5
མི་རྒུ་ནི་ ཕྲོ་ནི་ ཀོན་འཇོག་རྒེ་ འདམ་མེ་ ཛེད་ཀ་ནེ་ ཡ་ཧུ་འདཱ་པེ་ ལ་མ་ ཆོན་མོ་ ཚང་མེ་, མི་རྒུ་ནི་ འབྲེལ་ ཀོན་འཇོག་ ཉམ་པོ་ ལུའི་ཤུག་ཅེ་ལ་, ཁོང་རྒུ་ནི་ ཚབ་ ཅོའེ་རྡེ་ ལེ་ཧ་ ཅོ་ནོག་། ལ་མ་ ཆོན་མེ་ ཁག་ནི་, མི་རྒུ་ནི་ རྡིག་པེ་ཕི་ སེམ་ཅེན་ནེ་ སྲོག་ཆོད་ ཏང་ ཁྱོའེ་མ་རྒུན་ ཀོན་འཇོག་རྒེ་ ཧུ་འདུན་ལ་ པུལ་ཤེ་ ནོག་། 2 ལ་མ་ ཆོན་མོ་ ཁོ་རང་རྒུན་ལ་ སེམ་མེ་ན་ འུ་ཐུག་ ཡོད་ཅེ་ཀ་ནི་, མ་ཤེ་རྡེ་ རྡིག་པ་ ཅོ་ཀན་རྒུན་ འཇམ་པོ་ ཉམ་པོ་ ལེ་ཧ་ ཅོ་ ཉེན་ནེ་ནོག་། 3 ཏེ་རྒ་རྦེ་ཕི་ལ་ ཁོ་ ཁོ་རང་ངེ་ རྡིག་པ་ མ་ཚེད་, མི་རྒུ་ནི་ རྡིག་པེ་ཕི་ལ་ སྲོག་ཆོད་ པུལ་རྒོའེ་རྡེ་ནོག་།4 ལ་མ་ ཆོན་མེ་ སི་ཝ་ཅེན་ནེ་ ཀོ་ས་ སུ་ཞིག་ལ་ ནེན་ཉེན་ནེ་ མག་། འི་ ཀོ་སེ་ཕི་ ཁོ་ ཀོན་འཇོག་རྒེ་ འདམ་མེ་ ཛེད་རྒོའེ་རྡེ་ནོག་, ཀ་ཟུག་ ཨ་རོན་ ཟེར་ཧན་འབོ་ འིན་འབེན་། 5 ཏེ་རྒ་རྦེ་ཕི་ལ་ མ་ཤི་ཀེ་ ཁོ་རང་ངེ་ ཁོ་རང་ལ་ སི་ཝ་ ཐོབ་ཅེ་ལ་, ལ་མ་ ཆོན་མོ་ ཅོའོ་ མ་ཛེད་། འིན་ན་ ཁོང་ལ་
“ཁྱེ་རང་ ངེ་ པུ་ཙ་ འིན་།
ཏི་རིང་ ང་ ཁྱེ་རང་ངེ་ ཨ་རྦ་ འགྱུར་རྡེ་ འིན་།”
མོལ་ཧ་ནེ་ ཀོན་འཇོག་རྒེ་ འདམ་མེ་ ཛེད་ཏེ་ ནོག་། 6 ཞེན་ཡང་ མལ་ཞིག་རྒེ་ན་ ཀོན་འཇོག་རྒེ་ ཁོང་ལ་ མོལ་ལེ་ ཛེད་།
“མེལ་ཀི་ཟེ་འདེག་ ཙོག་སེ་ ཁྱེ་རང་ནི་ ཏུའི་རྒྱུན་ནི་ཕི་ ལ་མ་རྦོ་ འིན་།”
7 ཡི་ཤུ་ འཇིག་རྟེན་ནེ་ཀ་ ཞུ་རྡེ་ ཡོད་ཟ་ནི་, ཁོང་ངེ་ ཁོང་ ཤི་ཅེ་ཀ་ནི་ རྐྱོབ་རྦེ་ ཛེད་ཉེན་ཀ་ནེ་ ཀོན་འཇོག་ལ་ མིག་ཆུ་ ཉམ་པོ་ ཀུ་ཅུ་ ཏང་ངེན་, ཞུ་ཝ་ རྡང་ མོ་ལམ་ ཞུ་ ཛེད་། ཁོང་ངེ་ ཉིང་ངེ་ ཐིལ་ནི་ ཀོན་འཇོག་ལ་ སི་ཝ་ ཛེད་ཏེ་, ཁོ་རང་ ཀོན་འཇོག་རྒེ་ ཝང་ངེ་ ཡོག་ལ་ པོ་རེ་ ཛེད་རྦེ་, ཀོན་འཇོག་རྒེ་ ཁོང་ངེ་ མོ་ལམ་རྒུན་ སན་ནེ་ ཛེད་། 8 ཞེན་ ཡི་ཤུ་ ཀོན་འཇོག་རྒེ་ སྲེ་ འིན་ན་, རྡུ་ངལ་ ཆ་ ཛེད་ཅེ་རྦེ་ ཀ་ནེ་, ཁོང་ལ་ ཀོན་འཇོག་ལ་ ཁ་ཉེན་ཅེའོ་ ལོབ་། 9 འེ་རྒ་རྒུ་ནི་ ཅོའེ་རྡེ་ ཀོན་འཇོག་རྒེ་ ཁོང་ལ་ ཕུན་སུམ་ཚོག་པེ་ ལ་མ་ ཆོན་མོ་ ཅོའོ་ ཛེད་། ཡང་ ཡི་ཤུ་རྦོ་, ཁོ་རང་ངེ་ ཁ་ཉེན་ཀན་རྒུན་ལ་, ཐ་མེད་པེ་ ཐར་པ་ སལ་ལེ་ ཛེད་ཀན་འབོ་ ནོག་། 10 འེ་རྒ་རྦེ་ ཅོའེ་རྡེ་ མེལ་ཀི་ཟེ་འདེག་ ཙོག་སེ་ ཀོན་འཇོག་རྒེ་ ཁོང་ལ་ ལ་མ་ ཆོན་མེ་ ཀོ་སེ་ཀ་ ཧོ་ ཛེད་།
ཏེཏ་པེ་ན་ ལྡན་ཅེ་ལ་ འབོའེ་།
11 མ་ཤི་ཀ་ ལ་མ་ ཆོན་མེ་ ཧོར་ལ་ ཤེད་རྒྱུ་ མང་པོ་ ཡོད་ཏེ་, ཁྱི་ཞ་རྒུན་ལ་ ཧ་ཀོ་ཅུག་ཅེ་ མ་ ཀག་སྤོ་ ཆ་རུག་, ཅེ་ཟེར་ནི་ སེམ་ཡིད་རྡེ་ ཐོག་ནི་ ཧ་ཀོ་ཅེ་ལ་ ཁྱི་ཞ་རྒུན་ འུ་ཐུག་ ཏུག་། 12 ཁྱི་ཞ་རྒུན་ ཏུའི་ མང་པོ་ཞིག་ནི་ཕ་ལ་ ཏེཏ་པ་ཅེན་ འིན་ཅེ་ཀ་ནི་, ཁྱི་ཞ་རྒུ་ནི་ ཞེན་མ་རྒུན་ལ་ ལབ་ཞ་ ཏང་རྒོ་ཤེ་ ནོག་། འིན་ན་ ཁྱི་ཞ་རྒུན་ལ་ ཏ་རུང་ང་ ཀོན་འཇོག་རྒེ་ ཀའ་ ཀྲང་པེ་ མག་རྡེན་འབོ་, ཡང་འགོ་མ་ནི་ ལབ་ཀན་ཞིག་ རྒོ་ཤེ་ ཡོད་ཏེ་ ནོག་། ཁྱི་ཞ་རྒུན་ལ་ ཁར་ཞི་ མན་, འོ་མ་ རྒོ་ཤེ་ ཡོད་ཏེ་ ནོག་། 13 འོ་མ་ ཅིག་པོ་ ཐུང་ཀན་རྒུན་ ཏ་རུང་ངེ་ ཕྲུ་རྒུ་ ཆུང་ཙེ་ ཙོག་སེ་ ནོག་, ཁོང་རྒུན་ལ་ མི་ཙེ་ ཀྲང་པོ་ པུད་ཅེ་ ལབ་ཞ་རྒུན་ ཤེ་རྡེ་ མག་། 14 ཁར་ཞི་རྦོ་ ལྡན་ཀན་རྒུ་ནི་ཕི་ ནོག་, ཀའོ་རྒུ་ནི་ ཙོན་འགྲུའི་ ཅོ་ཅེ་རྦེ་, ཀྲང་པོ་ རྡང་ ངན་པེ་ ཁྱད་པོ་ ཧ་ཀོ་ཉེན་འདེ་ ནོག་།