ཨིབ་རི་པ་ 3

ཡི་ཤུ་ མོ་ཤེ་སང་ ཀྲ་རྒེ་ ནོག་།

ཏོ་རྦེ་ཕི་ ཏམ་པེ་ སྤུན་རྒུན་, ཀོན་འཇོག་རྒེ་ རྒྱལ་སྲིད་རྡེ་ན་ འབོ་ ཛེད་ཀ་ནེ་ ཁྲོ་པ་རྒུན་, སྲན་ཀྲེ་ ནྃ་ ཏྃ་རྡེ་ ཡི་ཤུའི་ ཧོར་ལ་ སམ་བ་ ཏོང་ཧེ་། ཁོང་ ཀོན་འཇོག་རྒེ་ ཁྲིན་ཁྱོང་ངེ་ ཛེད་ཀན་ འདང་ ལ་མ་ ཆོན་མོ་ འིན་ཀན་ ཏེཏ་པེ་ སྤང་པོ་ ང་ཞི་ ཏྃ་རྡེ་ འིན་། 2 ཡང་ ཁོང་ནི་, ཁོང་ འདམ་མེ་ ཛེད་ཀ་ནེ་ ཀོན་འཇོག་ལ་ ལོ་ཁྱེལ་ཅེན་ ནོག་, ཀ་ཟུག་རྒེ་ ཀོན་འཇོག་རྒེ་ མི་རྒུན་ལ་ ཞབ་རྟོག་ ཞུ་ཅེ་ན་ མོ་ཤེ་ ལོ་ཁྱེལ་ཅེན་ཞིག་ ཡོད་པེན་།

3 ཡི་ཤུ་ མོ་ཤེ་སང་ མང་ངེ་ སྤལ་ ཐོབ་རྒོ་ཤེ་ འོའེ་སྤ་ ནོག་, ཀ་ཟུག་རྒེ་ ཁང་པ་ སིག་ཀ་ནེ་ མིའུ་ལ་, ཁང་པེ་སང་ མང་ངེ་ སི་ཝེ་ འོའེ་སྤ་ ཡོད་། 4 ཁང་པ་ ཚང་མ་, སུ་ཞིག་རྒེ་ སིག་ཏེ་ ནོག་, འིན་ན་ ཅི་ཚང་མ་ སིག་རྒེ་ ཛེད་ཀན་འབོ་ ཀོན་འཇོག་ ཞུ་རྡེ་ནོག་། 5 ཏ་ མོ་ཤེ་ནི་, ཀོན་འཇོག་རྒེ་ མི་རྒུན་ལ་ ཞབ་རྟོག་པ་ ལོ་ཁྱེལ་ཅེན་འཇིག་ འིན་འབེན་། ཁོང་ངེ་ ཞབ་རྟོག་པོ་, ཡོང་ཅེ་ཅན་ནེ་ ཏུའི་ན་ ཀོན་འཇོག་རྒེ་ མོལ་ལེ་ ཛེད་ཅེ་ཅེན་ནེ་ སྤེ་རྦོ་, ནག་ཤེ་ ཚུལ་ལ་ འིན་འབེན་། 6 འིན་ན་ མ་ཤི་ཀ་ ཀོན་འཇོག་རྒེ་ སྲེ་ འིན་ཅེ་ཀ་ནི་, ཁོང་ ཀོན་འཇོག་རྒེ་ ཁང་པ་ སོན་ཏེ་ ཀྲང་པོ་ རྡང་ ཉ་ར་ ཛེད་ཀ་ནེ་ རྡག་པོ་འབོ་ ནོག་། ཡང་ ཀལ་ཏེ་ ཨ་ཧོ་རྒུ་ནི་ རུའི་ རྡང་ མ་ཤི་ཀེ་ན་ རེ་ཝ་རྒུན་ རྟེམ་པོ་ པོར་ནི་, ཏེ་ནི་ ཨ་ཧོ་རྒུན་ ཀོན་འཇོག་རྒེ་ ཁང་པ་འབོ་ ནོག་།

ཏེཏ་པ་ མི་ཕང་ཅེ་ལ་ སྤང་ པུད་།

7 ཏེ་རྒ་རྦེ་ཕི་ལ་ ཏམ་པེ་ ཐུག་ཡིད་རྡེ་ མོལ་,

“ཏི་རིང་ ཁྱི་ཞ་རྒུན་ལ་ ཁོང་ངེ་ སུང་ཧད་པོ་ ཚོར་ཟ་ནི་,

8 ཁྱི་ཞ་རྒུ་ནི་ ཉིང་ ཀྱོང་པོ་ འགྱུར་ མ་ཅུག་,

ཀ་ཟུག་རྒེ་ ཨིས་ར་ཡེལ་པ་རྒུ་ནི་ རི་ལྟོང་ངེ་ན་ ངེ་ ཟོད་པ་

ཐི་ཚོད་ལྟོའེ་རྡེ་ ང་ ངོ་ལོག་ཟ་ནི་ ཅོའེ་,

9 ཞེན་ ལོ་ ཞིབ་ཅུ་, ཁྱི་ཞི་ ཕ་མེ་པོ་རྒུ་ནི་ ངེ་ ལྟའ་རྒུན་

ཐོང་འདེ་ལ་ ཁོང་རྒུ་ནི་ ངེ་ ཟོད་པེ་ ཚོད་ལྟོའེ་།

10 ཏེ་རྒ་རྦེ་ཕི་ལ་ ང་ ཏོ་རྒུ་ནི་ཀ་ སྲོ་ ཡོྃ་ ཡང་ ངེ་ ཟེར་རྦེན་

‘ཁོང་རྒུ་ནི་ ཉིང་ ཏུའི་རྒྱུན་ ངེ་ཀ་ནི་ འགྱུར་རྡེ་ ཐག་རིང་ལ་ ཆ་རུག་།

ངེ་ ཅོ་ཅེ་ལ་ ཟེར་ཧན་རྒུན་ ཁོང་རྒུ་ནི་ ཅོའོ་ མི་འདུག་།’

11 ང་ སྲོ་ ཡོྃ་རྡེ་ ནའ་ ཁུར་རྡེ་ ཟེར་རྦེན་ ‘ངེ་ ངལ་ཚོའེ་

མལ་ལེ་ཀ་ ཁོང་རྒུན་ མ་ནི་ ཡོང་ མི་ཉེན་།’”

12 ཤེ་སྤ་ སྤུན་རྒུན་, ཁྱི་ཞ་རང་ངེ་ ཉིང་རྒུན་ ངན་པ་ རྡང་ ཏེཏ་པ་ མེ་ཀན་ མི་འགྱུར་ཤེ་ལ་ ཤང་ ཅོའེ་ཧེ་, ཀ་རྦེ་ ཅོའེ་རྡེ་ ཁྱི་ཞ་རྒུན་ སོན་པོ་ ཀོན་འཇོག་ནི་ ཐག་རིང་ལ་ ཁྱེ་རེ་ནོག་། 13 འིན་ན་ ཁྱི་ཞ་ ཅིག་ལ་ རྡིག་པེ་ འགོམ་ཧོར་རེ་ན་ སོང་འདེ་ ཀོན་འཇོག་རྒེ་ རྒྱཔ་འགལ་ལ་ ཉིང་རྒུན་ ཀྱོང་པོ་ མི་འགྱུར་ཤེ་ལ་, ཁྱི་ཞི་ ཞག་ཏང་, ཅིག་ ཏང་ ཅིག་ལ་ སེམ་ཤུག་ ཏང་རྒོའེ་, ཐོ་རེ་ཕི་ སྲུྃ་རྡེ་ མི་འདེད་ ཏི་རིང་རང་ ཅོའེ་། 14 ངེ་ ཏོ་ ཟེ་འིན་, ཅེ་ཟེར་ནི་ ཀ་ཟུག་ འགོ་མ་ ཨ་ཧོའེ་ ཏེཏ་པ་འབོ་ ཀོན་འཇོག་རྒེ་ན་ རྟེམ་པོ་ ཡོད་རྡེ་ ཙོག་སེ་, ཀལ་ཏེ་ ཨ་ཧོ་ ཐ་མེ་ ཏུའི་ཚུག་པ་ ལོ་ཁྱེལ་ཅེན་ ལུའི་ནི་, ཏེ་ནི་ ཨ་ཧོ་རྒུན་ལ་ མ་ཤི་ཀེ་ ནོར་ཧལ་རྦོ་ རྒོའེ་རྡེ་ ཐོབ་རྦེན་། 15 ཏམ་པེ་ སུང་རབ་རྦེ་ན་ མོལ་རྡེ་ ནོག་,

“ཏི་རིང་, ཁྱི་ཞ་རྒུན་ལ་ ཁོང་ངེ་ སུང་ཧད་པོ་ ཚོར་ཟ་ནི་,

ཁྱི་ཞ་རྒུ་ནི་ ཉིང་ ཀྱོང་པོ་ འགྱུར་ མ་ཅུག་ཧེ་,

ཀ་ཟུག་རྒེ་ ཨིས་ར་ཡེལ་པ་རྒུ་ནི་ ངོ་ལོག་ ཅོ་ཟ་ནི་ ཅོའེ་།”

16 ཏ་ ཀོན་འཇོག་རྒེ་ སུང་ཧད་པོ་ ཚོར་རྡེ་ལ་ ཁོང་ལ་ ངོ་ལོག་ ཅོ་ཀན་རྒུན་ སུ་ ནོག་? ཅི་! ཏོ་རྒུན་ མོ་ཤེ་ ཨི་འཇིབ་རྦེ་ ཡུལ་ནི་ ཕིང་འདེ་ ཁྱོང་ཀན་ ཚང་མ་ མ་ནོག་རྒེ་? 17 ཡང་ ལོ་ ཞིབ་ཅུ་ ཀོན་འཇོག་ལ་ ཐུག་སྲོ་ ཞྃ་ཤུག་ཀན་རྒུན་ སུ་ ནོག་? ཅི་! ཏེ་ མི་རྒུན་ རྡིག་པ་ ཅོ་ཀན་རྒུན་ ཡང་ ཏོ་རྒུ་ནི་ རོ་ རི་ལྟོང་ངེ་ན་ ལུའི་ཧན་རྒུན་ མ་ནོག་རྒེ་? 18 ཡང་ ཀོན་འཇོག་རྒེ་ ཏོ་རྒུན་ ཁོང་ངེ་ ངལ་ཚོའེ་ མལ་ལེ་ན་ མ་ནི་ ཞུའུ་ མི་ཉེན་ མོལ་རྡེ་ ནའ་ ཁུར་རེ་ ཛེད་ཟ་ནི་, སུ་ ཉམ་པོ་ ཞལ་ཏ་ སལ་ལེ་ ཛེད་ཏེ་ ནོག་? ཅི་ ཏེ་ མི་རྒུན་ ཁོང་ངེ་ ཁ་ མ་ཉེན་ཀན་རྒུན་ མ་ནོག་རྒེ་? 19 ཏོ་རྦེ་ཕི་ལ་ ཨ་ཧོ་རྒུ་ནི་ ཐོང་ངེ་ནོག་, ཁོང་རྒུ་ནི་ ཏེཏ་པ་ མི་ཅོ་ཤེ་རྦེ་ ཅོའེ་རྡེ་, ཁོང་རྒུན་ ངལ་ཚོའེ་ མལ་ལེ་ཀ་ ཞུའུ་ མ་ཉེན་ནེ་ འིན་འབེན་།