ནྃ་རྟག་ ཏང་ཅེ་ལ་ སྤང་ པུད་།
2
ཏོ་རྦེ་ཕི་ ཨ་ཧོ་རྒུ་ནི་ ཚོར་ཧ་ནེ་ རྡེན་འབའ་འབེ་ཀ་ ནྃ་ སྲན་ཀྲེ་ ཏང་རྒོའེ་། ཀལ་ཏེ་ མ་ཏང་ནི་, ཨ་ཧོ་རྒུན་ ཏོ་རྦེ་ཀ་ནི་ ཀུ་ལེ་ ཀུ་ལེ་ལ་ ཐག་རིང་ལ་ ཆ་སྲིད་ཅེ་ ནོག་། 2 ངེ་ ཏོ་ ཟེ་འིན་, ཅེ་ཟེར་ནི་ ཀོན་འཇོག་རྒེ་ ཕོ་ཉ་རྒུན་ རྒྱུད་ཏེ་ ཁྲིམ་ སལ་ལེ་ ཛེད་ཀན་རྒུན་ རྟེམ་པོ་ ཅོའོ་ ཛེད་ཏེ་ ནོག་། ཡང་ ཁྲིམ་ཅག་ཀན་ འདང་ ཁྲིམ་ ཁ་ མ་ཉེན་ཀན་ ཚང་མ་ལ་ འོའེ་སྤེ་ ཆེད་པ་ ཕོག་ཏེ་ ནོག་། 3 ཀལ་ཏེ་ ཨ་ཧོ་རྒུ་ནི་ ཏོ་ཙོག་སེ་ ཧ་ལེ་ཤེ་ ཐར་པ་ ནྃ་ མ་ཏང་ནི་, ཏེ་ནི་ ཀ་ཟུག་རྒེ་ ཨ་ཧོ་རྒུན་ ཏེ་ ཆེད་པེ་ཀ་ནི་ ཤོར་ཉེན་ཅེ་ སམ་བ་ ཏང་ངེ་ཡོད་, ཀ་ ཐར་པ་རྦོ་ འགོ་མ་རང་ ཙོབོ་ ཡི་ཤུ་ ཁོ་རང་ངེ་ ཤེད་རྡེ་ ཛེད་, ཏེ་ནི་ ཚོར་ཧན་རྒུ་ནི་ ཏོ་ ཨ་ཧོ་རྒུན་ལ་ ཁྱོྃ་རྡེ་ འིན་འབེན་། 4 ཀོན་འཇོག་རྒེ་ ལྟའ་, ཧ་ལེ་ཤེ་ ལེ་ཧ་, ཛེད་པ་ན་ མང་པོ་ རྡང་, ཏམ་པེ་ ཐུག་ཡིད་རྡེ་ ཁྱུད་རྒུན་, ཁོ་རང་ངེ་ ཐུག་འདོད་ ནང་ཞིན་ སལ་ལེ་ ཛེད་ཏེ་ ཁྲིན་འབོ་ ཀྲང་པོ་ འིན་ཀ་ནེ་ སྤང་པོ་ སལ་ལེ་ ཛེ་རྡེ་ནོག་།ཐར་པ་ ཆོག་ལ་ ཁྲིད་རྡེ་ ཛེད་ཀན་།
5 ཀོན་འཇོག་རྒེ་ ཡོང་ཅེ་ཅེན་ནེ་ སོ་མ་ འཇིག་རྟེན་འབོ་ ཕོ་ཉ་རྒུ་ནི་ ཝང་ངེ་ ཡོག་ལ་ པོར་རེ་ མ་ཛེད་རྡེ་ ནོག་, ཀ་ འཇིག་རྟེན་འབེ་ ཧོར་ལ་ ངེ་ འབྲི་ཡོད་། 6 ཏམ་པེ་ སུང་རབ་རྦེ་ ཁག་ ཅིག་རྒེ་ན་ མོལ་རྡུག་།
“ཉེ་རང་ངེ་ ནྃ་ སལ་ལེ་ ཛེད་ཀ་ནེ་ མི་རྒུན་ལ་,
རིན་ ཅི་ ཡོད་ཏེ་ ནོག་?
ཅི་ མི་རྒུན་ ཏོ་ཙོག་སེ་ ནང་རྟག་ ཐོབ་ཅེ་ འོའེ་སྤ་ ནོག་རྒེ་?
7 ཏུའི་ཙི་རྦི་ཤིག་རྒེ་ཕི་ ཉེ་རང་ངེ་ ཁོང་རྒུན་ལ་ ཀོ་ས་
ཕོ་ཉ་རྒུ་ནི་སང་ ཆུང་ཙེ་ སལ་ལེ་ ཛེད་།
ཏེ་ན་ ཉེ་རང་ངེ་ མི་རྒུན་ལ་ སྤལ་ རྡང་
སི་ཝ་ཅེན་ནེ་ ཐོར་ཤོག་པོ་ ཧོ་ནེ་ ཛེད་།
8 ཉེ་རང་ངེ་ ཅི་ཚང་མེ་ཀ་ ཁོང་རྒུན་ལ་ ཝང་ སལ་ལེ་ ཛེད་།”
ཏ་ ཅི་ཚང་མེ་ཀ་ ཟེ་རེ་རྡང་, ཅི་ཞིག་ལ་ ཁོང་རྒུ་ནི་ ཝང་ནི་ ཕི་ལོག་ལ་ ལུའི་རྡེ་ མེ་ཀག་། ཏག་ས་ཚུག་པ་ ཨ་ཧོ་རྒུ་ནི་ ཅི་ཚང་མ་ ཁོང་རྒུ་ནི་ ཝང་ངེ་ ཡོག་ལ་ པོ་རེ་ལ་ མ་ཐོང་ངེ་ ནོག་། 9 འིན་ན་ ཨ་ཧོ་རྒུ་ནི་ ཡི་ཤུ་ ཐོང་ངེ་ནོག་ ཀའོ་ལ་ “ཙི་རྦི་ཤིག་རྒེ་ཕི་ལ་ ཕོ་ཉ་རྒུ་ནི་སང་ ཆུང་ཙེ་ ཀོ་ས་ སལ་ལེ་ ཛེད་།” ཁོང་ངེ་ ཨ་ཧོ་རྒུ་ནི་ཕི་ ཤི་ཅེ་ རྡུ་ངལ་རྦོ་ ཁུར་རེ་ ཛེད་, འོ་ནེ་ ཀོན་འཇོག་རྒེ་ ཐུག་ཞེ་ ཅོའེ་རྡེ་ ཡི་ཤུའི་ ཚང་མེ་ ཏོན་ལ་ ཤི་ཅེའོ་ ཉོང་ངེ་ ཛེད་ཅེ་ཀ་ནི་, ཁོང་ལ་ སྤལ་ རྡང་ སི་ཝ་ཅེན་ནེ་ ཐོར་ཤོག་པོ་ ཧོན་ནེ་ ཛེད་ཏེ་ ནོག་།
10 ཀོན་འཇོག་རྒེ་, ཁོ་རང་ངེ་ཕི་ ཡང་ ཁོ་རང་ རྒྱུད་ཏེ་ ཅི་ཚང་མ་ ཅོའོ་ ཛེད་། ཁོ་རང་ངེ་ ཟི་ཞིད་པོ་ མི་ མང་པོ་ ཉམ་པོ་ འགོ་ ཛེད་ཅེ་ལ་ ཐབ་ལྡིང་ངེ་ ཛེད་། ཁོང་རྒུན་ ཐར་པེ་ན་ ཁྱོང་ངེ་ ཛེད་ཅེ་ཕི་ ཡི་ཤུའི་ རྡུ་ངལ་ རྒྱུད་ཏེ་, ཁོང་ ཕུན་སུམ་ཚོག་པ་ འུ་རྐྱོང་ ཛེད་ཅེ་རྦེ་, ཀོན་འཇོག་རྒེ་ ཐག་ཅེད་ ཀྲང་པོ་རྦོ་ འིན་འབེན་། 11 སོང་འབེ་སང་ ཏ་ ཡི་ཤུ་ རྡང་ ཁོང་ངེ་ ཏམ་པ་ ཅོའོ་ ཛེད་ཀན་ མི་རྒུན་ལ་ ཡབ་ ཅིག་ཅིག་ ཡོད་ཏེ་ ནོག་། ཏེ་རྒ་རྦེ་ཕི་ལ་ ཡི་ཤུའི་ ཐུག་ཁྲེལ་ལེ་ མ་ཛེད་རྡེ་, ཏོ་རྒུན་ལ་ ཁོ་རང་ངེ་ སྤུན་རྒུན་ མོལ་ལེ་ ཛེ་རྡེན་ ནོག་། 12 ཁོང་ངེ་ ཀོན་འཇོག་ལ་ མོལ་།
“ངེ་ ང་རང་ངེ་ སྤུན་རྒུན་ལ་ ཉེ་རང་ངེ་ ཚན་འབོ་ ཤེད་རྡེན་།
ཛོམ་འདེ་ ཡོ་ཀ་ནེ་ སྤུན་རྒུ་ནི་ ཕྲོ་,
ངེ་ ཉེ་རང་ལ་ རྟོད་པ་ པུ་ལེན་།”
13 ཁོང་ངེ་ འི་རྦོ་ལ་ མོལ་ལེ་ ཛེད་,
“ངེ་ ཀོན་འཇོག་ལ་ རྡེན་ཆེ་ཤེ་ ཅོའེན་།”
ཡང་ ཁོང་ངེ་ མོལ་,
“འི་ཀ་, ང་ རྡང་ ཀོན་འཇོག་རྒེ་ ང་ སལ་ལེ་ ཛེད་ཀ་ནེ་ ཕྲུ་རྒུ་རྒུན་ ཡོད་།”
14 ཀོན་འཇོག་རྒེ་ ཕྲུ་རྒུ་རྒུན་ ཤ་ རྡང་ ཁྲག་ལ་ ཅོ་ཀ་ནེ་ མི་རིག་ འིན་ཅེ་ཀ་ནི་, སྲེ་ལ་ ཤ་ རྡང་ ཁྲག་རྒེ་ འགྱུར་རེ་ ཛེད་། མི་ འགྱུར་ཤེ་ ཅིག་པོ་ རྒྱུད་ཏེ་ ཁོང་ ཀྲོྃ་ ཉེན་ནེ་ནོག་, ཡང་ ཀྲོྃ་ཤེ་ ཅིག་པོ་ རྒྱུད་ཏེ་ ཁོང་ངེ་ རྡུད་རྦོ་ ཝང་ མེ་ཀན་ ཅོའོ་ ཛེད་ ཉེན་ནེ་ནོག་, ཏེ་ ཝང་འབོ་ ཤི་ཅེའོ་ ནོག་། 15 མི་ཙེ་ སོན་ཏེ་ ཤི་ཅེ་ འཇིའི་རྡེ་ ཚེ་ཡོག་ལ་ ཟུམ་འདེ་ ཡོ་ཀན་ ཚང་མ་, ཁོང་ ཀྲོྃ་ཤེ་ ཅིག་པོ་ རྒྱུད་ཏེ་ ཐར་ཤུག་རྒེ་ ཛེད་།
16 སྲེ་ ཕོ་ཉ་རྒུན་ལ་ མན་ ཨབ་ར་ཧམ་མེ་ ཕར་རྒྱུད་རྒུན་ལ་ ཡ་ཏོ་ ཛེད་ཅེ་ལ་ རྐྱོད་རྡེ་ ཛེད་ཀན་འབོ་, ཨ་ཧོ་རྒུན་ལ་ སལ་སྤོ་ རྒྱུའི་ནོག་། 17 ཏོ་རྦེ་ཕི་ ཀོན་འཇོག་རྒེ་ ཞབ་རྟོག་རྒེ་ན་, ཉིང་ཞེ་ཅེན་ འདང་ ལོ་ཁྱེལ་ཅེན་ནེ་ ལ་མ་ ཆོན་མོ་ འགྱུར་ཤེ་ཕི་, ཁོང་ ཅི་ས་ཐོག་ནི་ ཁོང་ངེ་ སྤུན་རྒུན་ ཙོག་སེ་, འགྱུར་རེ་ ཛེད་ཅེའོ་ ཁག་ཅེན་ འིན་འབེན་། ཏེ་ནི་ ཁོང་ངེ་ མི་རྒུ་ནི་ རྡིག་པ་ མེ་ཀན་ ཅོའོ་ ཛེད་ཅེ་ལ་ སྲོག་ཆོད་ པུལ་ཉེན་། 18 ཁོང་ལ་ ཚོད་ལྟ་ཅེ་ན་ རྡུ་ངལ་ ཆ་ཅེ་ཀ་ནི་, ཨ་ཧོ་རྒུན་ལ་ ཚོད་ལྟ་ ཆ་ཟ་ནི་ ཁོང་ངེ་ ཡ་ཏོ་ ཛེད་ཉེན་ནེན་།