ཨིབ་རི་པེ་ མ་ཤི་ཀ་པ་རྒུན་ལ་ ཆག་འབྲི་།
སྲེ་རྦོ་ ཕོ་ཉ་རྒུ་ནི་སང་ ཐོ་འིན་།
1
ངུལ་མེ་ ཏུའི་ལ་ ཀོན་འཇོག་རྒེ་ ཨ་ཧོ་རྒུ་ནི་ ཕ་མེ་པོ་རྒུན་ལ་, ལེན་ མང་པོ་ རྡང་ ཚུལ་ སོ་སོའེ་ན་, ཁོ་རང་ངེ་ ལུང་རྟོན་པ་རྒུན་ རྒྱུད་ཏེ་ ཞལ་ཏ་ སལ་ལེ་ ཛེད་ཏེ་ ནོག་། 2 འིན་ན་ ཏག་ས་ འི་ ལྟིང་འཇུག་རྒེ་ ཞག་རྒུ་ནི་ན་ ཁོང་ངེ་, ཁོ་རང་ངེ་ སྲེ་ རྒྱུད་ཏེ་ ཨ་ཧོ་རྒུན་ལ་ ཞལ་ཏ་ སལ་ལེ་ ཛེ་རྡེ་ནོག་། ཀོན་འཇོག་རྒེ་ ཁོ་རང་ངེ་ སྲེ་, ཅི་ཚང་མེ་ཀ་ ནོར་ཧལ་ ཐོབ་ཅེ་ཅེན་འབོ་ ཧོ་ ཛེད་, ཡང་ ཁོང་ རྒྱུད་ཏེ་ ཀོན་འཇོག་རྒེ་ ཛམ་ལིང་འབོ་ ཅོའོ་ ཛེད་ཏེ་ ནོག་། 3 སྲེ་ ནང་ནི་ ཀོན་འཇོག་ ཁོ་རང་ངེ་ ཟི་ཞིད་པོ་ འཇལ་ཅེ་ ཡང་, ཀོན་འཇོག་རྒེ་ ཁོ་རང་ ཞུ་ཧན་ ཙོག་སེ་ སྲེ་ལ་ ནོག་། སྲེ་ ཁོ་རང་ངེ་ ཀའ་ ཀྲག་པོ་ རྒྱུད་ཏེ་ ཅི་ཚང་མ་ རྟེམ་པོ་ པོ་རེ་ ཛེ་རྡེ་ནོག་། ཁོང་ངེ་ མི་ཚང་མ་, རྡིག་པ་རྒུ་ནི་ཀ་ནི་ སང་མ་ ཅོའོ་ ཛེད་ཏེ་ ལྟིང་ནི་, ཁོང་ རྡེ་བ་ཅན་ནེ་ན་ ཟི་ཞིད་ཅེན་ནེ་ ཀོན་འཇོག་རྒེ་ སི་ཝ་ཅེན་ནེ་ མལ་ལ་ ཡོའེ་སྤ་རྦེ་ཀ་ ཞུ་རྡེ་ ཛེད་། 4 ཏོ་རྦེ་ སྲེ་རྦོ་ ཕོ་ཉ་རྒུ་ནི་སང་ མང་ངེ་ ཀྲག་པོ་ འིན་ཀན་འབོ་ ལྟན་ནེ་ནོག་, ཀ་ཟུག་ ཀོན་འཇོག་རྒེ་ ཁོང་ལ་ སལ་ལེ་ ཛེད་ཀ་ནེ་ ཚན་འབོ་, ཏོ་རྒུན་ནེ་ མིང་ངེ་སང་ ཀྲག་པོ་ ནོག་།5 ཅེ་ཟེར་ནི་ ཀོན་འཇོག་རྒེ་ ཕོ་ཉ་ ཅིག་ལ་ འི་ཟུག་ མོལ་ལེ་ མ་ནི་ མ་ཛེད་།
“ཁྱེ་རང་ནི་ ངེ་ པུ་ཙ་འབོ་ འིན་།
ཏི་རིང་ ང་ ཁྱེ་རང་ངེ་ ཨ་རྦ་ འགྱུར་རྡེ་ འིན་།”
ཀོན་འཇོག་རྒེ་ འི་འབོ་ལ་ མོལ་ལེ་ ཛེད་།
“ང་ ཁོའེ་ ཨ་རྦ་ ཡང་ ཁོ་ ངེ་ སྲེ་ འགྱུ་རེན་།”
6 ཡང་ ཀོན་འཇོག་རྒེ་ ཁོ་རང་ངེ་ པུ་ཙ་ སི་ཝ་ཅེན་འབོ་, འཇིག་རྟེན་ནེ་ན་ ཀ་ལེ་ ཛེད་ཟ་ནི་, ཁོང་ངེ་ མོ་ལེ་ ཛེད་།
“ཀོན་འཇོག་རྒེ་ ཕོ་ཉ་ ཚང་མེ་ ཁོང་ལ་ ཅོལ་རྒོའེ་།”
7 ཕོ་ཉ་རྒུ་ནི་ ཧོར་ལ་ ཁོང་ངེ་ མོལ་།
“ཁོང་ངེ་ ཁོ་རང་ངེ་ ཕོ་ཉ་རྒུན་ ལུང་སྤོ་ཞིག་ ཙོག་སེ་ ལམ་ཅུག་རྒེན་,
ཡང་ ཁོང་ངེ་ ཞབ་རྟོག་པ་རྒུན་a མེ་ལྗབ་ ཙོག་སེ་།”
8 འིན་ན་ སྲེ་ལ་ ཁོང་ངེ་ མོལ་།
“ཉེ་རང་ ཀོན་འཇོག་ འིན་, ཉེ་རང་ངེ་ ཞུ་ཁྲིའི་རྦོ་ ཏུའི་རྒྱུན་ནི་ཏུའི་རྒྱུན་ལ་ ལུའི་རྡེན་།
ཉེ་རང་ངེ་ ཀྲང་པོ་ ཉམ་པོ་ ཝང་སྲུལ་ལེ་ ཛེ་རྡེན་།
9 ཀྲང་པོ་ ལེ་ཧ་རྒུན་ལ་ ཉེ་རང་ངེ་ ཤེ་སྤ་
ཡང་ ངན་པ་ ལེ་ཧ་རྒུན་ལ་ སོག་པོ་ ཅོའོ་ ཛེད་རྡེ་ནོག་།
ཏོ་རྦེ་ཕི་ ཀོན་འཇོག་, ཉེ་རང་ངེ་ ཀོན་འཇོག་རྒེ་ ཉེ་རང་ངེ་ཀ་b
རྒ་མོའེ་ མར་རྦོ་c ཡང་རྒུ་ནི་སང་ མང་ངེ་ ལུག་རྒེ་ ཛེད་ཏེ་
ཉེ་རང་ ཧོ་ ཛེད་།”
10 ཁོང་ངེ་ སྲེ་ འི་རྦོ་ལ་ མོལ་ལེ་ ཛེད་,
“ཙོབོ་, ཉེ་རང་ངེ་ འགོ་ཟུག་རྒེ་ཀ་ འཇིག་རྟེན་ནེ་ མག་རྡེན་འབོ་ ཏིང་ངེ་ ཛེད་།
ཡང་ ཉེ་རང་ རང་ངེ་ ཆག་ནི་ ནམ་ཀ་ ཅོའོ་ ཛེད་།
11 ཏོ་རྒུན་ མེ་ཀན་ ཆེན་, འིན་ན་ ཉེ་རང་ ཏུའི་རྒྱུན་ ལུའི་ཤེ་ ནོག་།
ཏོ་རྒུན་ ཀོའེ་ལག་ ཉིང་པ་ ཙོག་སེ་ ཆེད་རྡེན་།
12 ཉེ་རང་ངེ་ ཏོ་རྒུན་ ཀོའེ་ ཙོག་སེ་ སྲིལ་ལེ་ ཛེ་རྡེན་།
ཡང་ ཀོའེ་ལག་ ཉིང་པ་ཞིག་ ཙོག་སེ་ ཕང་ངེ་ ཛེ་རྡེན་།
འིན་ན་ ཉེ་རང་ ཏུའི་རྒྱུན་ ཙོག་སེ་ ལུའི་རྡེན་།
ཉེ་རང་ ཏུའི་རྒྱུན་ནི་ཏུའི་རྒྱུན་ སོན་པོ་ ཞུ་རྡེན་།”
13 ཡང་ ཀོན་འཇོག་རྒེ་ ཕོ་ཉ་ ཅིག་ལ་ མ་ནི་ མོལ་ལེ་ མ་ཛེད་,
“ངེ་ ཁྱེ་རང་ངེ་ འགྲ་ཝོ་ ཚང་མ་,
ཁྱེ་རང་ངེ་ ཧང་པེ་ ཡོག་ལ་ པོར་པོར་ཚུག་པ་,
ཁྱེ་རང་ ངེ་ ལག་པ་ ཡོའེ་སྤེ་ ཁྲི་རྡེ་ཀ་ ཞུ་རྡེ་ ཛེད་།”
14 ཏོ་རྦེ་ཕི་ ཕོ་ཉ་རྒུན་, ཐར་པ་ ནོར་ཧལ་ལ་ ཐོབ་ཅེ་ཅན་རྒུན་ལ་ ཞབ་རྟོག་ ཞུ་ཅེ་ལ་ ཀ་ལེ་ ཛེད་ཀ་ནེ་ སེམ་ཉིད་རྒུན་ ནོག་།