རྡེན་འབེ་ ལབ་ཞ་།
2
འིན་ན་ ཁྱེ་རང་ངེ་ རྡེན་འབེ་ ལབ་ཞ་ ནང་ཞིན་ལ་ ལབ་རྒོའེ་། 2 སྤུན་ རྒན་ནེ་རྒུན་ལ་ རང་སེམ་ ཆུན་ཅེ་, སི་ཝེ་ འོའེ་སྤ་ཅེན་ འགྱུར་ཤེ་ རྡང་ མི་ཙེ་རྦོ་ ཤེ་རབ་ཅེན་ཞིག་ པུད་ཅེ་པོ་ ལོབ་། ཁོང་རྒུ་ནི་ ཏེཏ་པ་འབོ་ ཀོན་འཇོག་རྒེ་ རྡེན་འབེ་ཀ་ རྟེམ་པོ་ ཡང་ ཤེ་སྤ་ རྡང་ ཟོད་པ་ ཉ་ཧེ་ ཀང་འདེ་ ཡོང་རྒོའེ་།3 ཏེ་རྒ་ ཙོག་སེ་ སྲིང་མོ་ རྒན་ནེ་རྒུན་ལ་, ཀོན་འཇོག་ལ་ སི་ཝ་ ཁྱོང་ཀ་ནེ་ མི་ཙེ་ཞིག་ པུད་ཅེ་ ལོབ་། ཁོང་རྒུན་ ཞེན་མ་ལ་ འབར་ཧན་, ཡང་ ཆང་ ཐུང་ཀན་ཞིག་ ཡོང་ མི་རྒོའེ་། འིན་ན་ ཁོང་རྒུ་ནི་ ཟང་པོ་ འིན་ཀན་འབོ་ ཞེན་མ་རྒུན་ལ་ ལབ་རྒོ་ཤེ་ ནོག་། 4 ཏེ་ པོ་མོ་ རྒ་ནེ་རྒུ་ནི་ པོ་མོ་ ན་ཅུང་རྒུན་ལ་ རང་ངེ་ མག་པ་ རྡང་ ཕྲུ་རྒུ་རྒུན་ལ་, ཤེ་སྤ་ ཅོ་ཅེ་ན་ སེམ་རུའི་ ཏང་རྒོའེ་། 5 མ་ཚེད་ ཏོ་རྒུན་ རང་སེམ་ ཆུན་ཉེན་ཀན་ འདང་ སེམ་ ལག་མོ་, ནང་ཚང་ངེ་ ལྟ་ཏོག་ ཅོ་ཅེ་, ལེ་ཧ་ ཟང་པོ་ ཅོ་ཅེ་, ཡང་ རང་འདང་རང་ ཁོ་རང་རྒུ་ནི་ མག་པེ་ ཝང་ངེ་ ཡོག་ལ་ པོར་ཤེ་རྒུན་ ལབ་རྒོའེ་། ཏེ་ནི་ ཀོན་འཇོག་རྒེ་ ཀའ་, སུ་ཞིག་ལ་ ངན་པ་ ཟེར་ མི་ཉེན་།
6 ཏེ་རྒ་ ཙོག་སེ་ ཁྱོག་ཏོང་རྒུན་ནང་, རང་སེམ་ ཆུན་ཏེ་ པོར་ཤེ་ལ་ སེམ་རུའི་ ཏོང་། 7 ཡང་ ཁྱེ་རང་ངེ་ལ་ ལེ་ཧ་ ཟང་པོ་རྒུན་ ཅོའེ་རྡེ་ ཁོང་རྒུ་ནི་ཕི་ སྤེ་ཞིག་ འགྱུར་རྒོའེ་། ཁྱེ་རང་ངེ་ ལབ་ཞ་རྦོ་ ཀྲང་པོ་ རྡང་ སེམ་མེ་ ཐིལ་ནི་ ཡོང་ཀན་འབོ་ ལྟོན་། 8 ཁྱེ་རང་ངེ་ ལབ་ཀན་འབོ་ལ་ ཉེད་ཀལ་ མི་ཡོང་ཤེ་ཕི་, རྡེན་འབའ་འབོ་ ལོབ་། ཏེ་ནི་ ཨ་ཧོ་རྒུན་ལ་ རྒྱཔ་འགལ་ ཅོ་ཀན་རྒུན་ ཁྲེལ་རྦ་ སོང་འདེ་ ཨ་ཧོ་རྒུན་ལ་ ཅང་ ངན་པ་ ཟེར་ མི་ཉེན་།
9 ཏེཏ་པ་ཅེན་ ཚེ་ཡོག་རྒུ་ནི་ ཏུའི་རྒྱུན་ ཁོ་རང་རྒུ་ནི་, སྤོན་འབེ་ ཁ་ཉེན་འདེ་ ཁོང་རྒུན་ ཐེད་ཅུག་ཅེ་ལ་ ཙོན་འགྲུའི་ ཅོའེ་ཧེ་། ཁོང་རྒུན་ལ་ ལེན་ལོག་ མ་ཏང་ཧེ་, 10 ཡང་ ཧུ་མ་ཧུ་, འིན་ན་ ཁོ་རང་རྒུན་ ཅི་ས་ཐོག་ནི་ ལོ་ཁྱེལ་ཅེན་ རྡང་ ཟང་པོ་ འིན་ཀན་འབོ་ ལྟན་རྒོའེ་། ཏེ་ནི་ ཁོང་རྒུན་ལ་ ཀོན་འཇོག་ ཨ་ཧོ་རྒུ་ནི་ རྐྱབ་འགོན་ནེ་ ལབ་ཞ་ ཧ་ཀོ་ཅེ་ འདོད་པ་ རྐྱེ་ཅུག་རྒེན་།
11 མི་ཚང་མ་ལ་ ཐར་པེ་ ལམ་ སལ་ལེ་ ཛེད་ཏེ་ ཀོན་འཇོག་རྒེ་ ཁོ་རང་ངེ་ ཐུག་ཞེ་འབོ་ ངོན་ཅུག་རྒེ་ ཛེད་། 12 ཡང་ ཨ་ཧོ་རྒུན་ལ་ “ངན་པེ་ མི་ཙེ་ པུད་ཅེ་ རྡང་, རྡིག་པེ་ འདོད་པ་རྒུན་ལ་ རྒྱབ་འགྱུར་རྒོའེ་” ཟེར་རྡེ་ ཤེད་རྡེ་ ཛེད་། ཨ་ཧོ་རྒུ་ནི་ འི་ འཇིག་རྟེན་ ངན་པེ་ན་ རང་སེམ་ ཆུན་ཉེན་ཀན་, ཀྲང་པོ་ རྡང་, ཀོན་འཇོག་རྒེ་ ཐུག་ཐེད་རྡེ་ཀ་ འགྲུལ་ཧ་ནེ་ མི་ཙེ་ཞིག་ པུད་རྒོ་ཤེ་ ནོག་། 13 ཡུ་ཙོག་སེ་ མི་ཙེ་ པུད་ཟ་ནི་, རེ་ཝ་ ཉམ་པོ་ ཨ་ཧོ་རྒུ་ནི་ ཀུན་ཝང་ ཀོན་འཇོག་ ཏང་ རྐྱབ་འགོན་ ཡི་ཤུ་ མ་ཤི་ཀེ་ ཟི་ཞིད་ ངོན་ཅེ་ཅན་ནེ་ ཏེ་ ཧ་ལེ་ཤེ་ ཞག་པོ་ལ་ སྲུང་ངེན་། 14 ཨ་ཧོ་རྒུན་ སང་མ་ ཅོ་ཅེ་ རྡང་ རྡིག་པ་ ཚང་མ་ནི་ ཐར་ཤེག་ཅེ་ མ་ཚེད་, ཉིང་ནི་ ལེ་ཧ་ ཟང་པོ་ ཅོ་ཅེ་ལ་ རིྃ་རྡེན་ ཡོ་ཀ་ནེ་ ཁོ་རང་ངེ་ མི་རྒུན་ ཅོ་ཅེ་ཕི་ ཁོང་ངེ་ ཁོ་རང་ངེ་ སྲོག་པོ་ སལ་ལེ་ ཛེད་།
15 ཁྱེ་རང་ངེ་ ཏོ་རྒུན་, ཏེཏ་པ་ཅན་རྒུན་ལ་ ལབ་ཏེ་ ལག་ལེན་ནེ་ན་ ཁྱོང་ཅེ་ལ་ སེམ་རུའི་ ཏོང་། ཁོང་རྒུ་ནི་ འི་ ལབ་ཞ་རྒུ་ནི་ རྒྱཔ་འགལ་ ཅོ་ཟ་ནི་, ཁྱེ་རང་ངེ་ ཁོང་རྒུན་ལ་ སེམ་རུའི་ ཏྃ་རྡེ་ རྐྱོང་ཅེ་ ཝང་ཆ་ ཡོད་ཏེ་ ནོག་། ཁྱེ་རང་ངེ་ ལབ་ཀན་རྒུན་ལ་ སུ་ཞི་ལ་ ནྃ་མེད་ ཅོ་ མ་ཅུག་།