ཟང་པོ་ འིན་ཀན་རྒུན་ ཅོའེ་།
3
ཏེཏ་པ་ཅན་རྒུན་ལ་ ཁོ་རང་རྒུན་ ཝང་སྲུལ་པ་ རྡང་ ཝང་ ཡོ་ཀན་རྒུ་ནི་ ལག་ལ་ ལྟེད་ཅེ་, ཁ་ཉེན་ཅེ་, རྡང་ ཏུའི་རྒྱུན་ ལེ་ཧ་ ཟང་པོ་ ཅོ་ཅེ་ན་ ཀྲལ་འགྲིག་ ཅོའེ་རྡེ་ འདེད་ཅེ་ལ་, འི་ཏུ་ ཧུལ་། 2 ཁོང་རྒུ་ནི་ ཞེན་མེ་ ཧོར་ལ་ ངན་པ་ མ་ཟེར་རེ་, ཁྲུག་པ་ ཏང་ཅེ་ནི་ ཐག་རིང་ལ་ འདེད་རྒོའེ་། འིན་ན་ ཁོང་རྒུན་ ཞེན་མ་ ཉམ་པོ་ ཀ་ཀྲིན་ ལྟན་རྒོའེ་ ཡང་ རྡེན་འབེ་ པབ་མོ་ འིན་ཀན་འབོ་ ཚང་མ་ལ་ ལྟན་ཀན་ རིག་ ཡོང་རྒོའེ་།3 ཏུའི་ཞིག་ལ་ ཨ་ཧོ་རྒུན་ལ་ ཧ་འགྲང་ འདང་ ཁ་མི་ཉེན་ རིག་ ཡོད་པེན་། ཞེན་མ་རྒུ་ནི་ ཨ་ཧོ་རྒུན་ ལམ་ ནོར་སེ་ཀ་ ཁྲིད་, ཡང་ འདོད་པ་ ངན་པ་ མང་པོ་ཞིག་ ཏང་, འཇིག་རྟེན་ནེ་ རྐྱིད་པོ་རྒུ་ནི་ ཚེ་ཡོག་ འགྱུར་། ཨ་ཧོ་རྒུ་ནི་ མི་ཙེ་ན་ ངན་པ་ རྡང་ ཕྲ་རྡོག་ ཀང་འདེ་, ཞེན་མ་རྒུ་ནི་ ཨ་ཧོ་རྒུན་ལ་ སོག་པོ་ ཡང་ ཨ་ཧོ་རྒུ་ནི་ ཅིག་ ཏང་ ཅིག་ལ་ སོག་པོ་ ཅོ་ཡོད་པེན་།
4 འིན་ན་ “ཀོན་འཇོག་ ཨ་ཧོའེ་ རྐྱབ་འགོན་ནེ་ ཀ་ཀྲིན་ རྡང་ ཤེ་སྤ་རྒུན་ ངོན་ནེ་ ཛེ་རྡེ་རྡང་, 5 ཁོང་ངེ་ ཨ་ཧོ་རྒུན་ རྐྱོབ་རྦེ་ཛེད་། ཏོ་ ཨ་ཧོ་རྒུ་ནི་ ལེ་ཧ་ ཀྲང་པོ་ ཅོ་ཅེ་རྦེ་ ཅོའེ་རྡེ་ མ་ནོག་, ཁོང་ངེ་ ཉིང་ཞེ་ ཅོའེ་རྡེ་ ནོག་། ཁོང་ངེ་ ཨ་ཧོའེ་ རྡིག་པ་རྒུན་ ཁྲུ་ ཛེད་, ཡང་ ཏམ་པེ་ ཐུག་ཡིད་ རྒྱུད་ཏེ་ ཨ་ཧོ་རྒུན་ ཡང་ རྐྱེ་རྡེ་, མི་ཙེ་ སོ་མ་ཞིག་ སལ་། 6 ཡི་ཤུ་ མ་ཤི་ཀ་ ཨ་ཧོ་རྒུ་ནི་ རྐྱབ་འགོན་ རྒྱུད་ཏེ་ ཏམ་པེ་ ཐུག་ཡིད་པོ་ ཁོང་ངེ་ ཉིང་ པེ་རྡེ་ ཨ་ཧོ་རྒུ་ནི་ཀ་ ལུག་རྒེ་ ཛེད་། 7 ཁོང་ངེ་ ཐུག་ཞེ་ ཅོའེ་རྡེ་ ཨ་ཧོ་རྒུན་ ཀྲང་པོ་ ཐེའེ་ ཛེད་ཅེ་ཀ་ནི་, ཨ་ཧོ་རྒུན་ལ་ ཀོན་འཇོག་རྒེ་ ཕྲུ་རྒུ་ འགྱུར་རྡེ་ ཐ་མེད་པེ་ མི་ཙེ་ ཐོབ་ཅེ་ རེ་ཝ་ ཡོད་ཏེ་ ནོག་།” 8 ཏེ་ ཞལ་ཏ་རྒུན་ རྡེན་འབེ་ ལབ་ཞ་ ནོག་, ཡང་ ངེ་ འདོད་པ་རྦོ་, ཏེཏ་པ་ཅེན་ ཚང་མེ་ ཏུའི་རྦོ་ ལེ་ཧ་ ཟང་པོ་ ཅོ་ཅེ་ན་ པུད་ཅེ་ཕི་, ཁྱེ་རང་ངེ་ ཏེ་ ལབ་ཞ་རྒུན་ ཁོང་རྒུ་ནི་ན་ ཡོང་རྒོ་ཤེའོ་ ནེན་ཏེན་ ཅོ་ཅེའོ་ འིན་། ཏེ་ ལབ་ཞ་རྒུན་ ཚང་མེ་ཕི་ ཟང་པོ་ རྡང་ ཕན་ཏོག་ཅེན་ཞིག་ ནོག་།
9 ཁྱེ་རང་ ཁོང་རྒུ་ནི་ མིར་རྒྱུད་རྡེ་ མིང་ཐོའེ་ ཧོར་ལ་ ཧ་འགྲང་ངེ་ ཁྲཔ་སེ་ན་ མ་འདྲེའེ་, ཡང་ ཡ་ཧུ་འདཱ་པེ་ ཁྲིམ་རྒུན་ སྲུང་ཅེ་ ཧོར་ལ་, ཁྲུག་པ་ རྡང་ ནོལ་ མ་ནོལ་། ཏོ་རྒུ་ནི་ ཕན་མི་ཐོག་ རྡང་ ཏུའི་ ཀོལ་ལ་ ཆ་ཅེ་ མ་ནི་ ཅང་ མག་། 10 ཀལ་ཏེ་ མི་རྒུ་ནི་ ཁྱེ་རང་རྒུན་ པེ་ཅེ་ ཅོ་རྡང་, རྡམ་འཇག་ ཏོང་ཧེ་ ཡང་ ལེན་ ཉི་སྤ་ལ་, ཏོ་རྦེ་ ལྟིང་ནི་ ཀལ་ཏེ་ སེམ་ མ་འགྱུར་ནི་, ཁོང་རྒུན་ ཉམ་པོ་ འབྲེལ་ མ་པོར་ཧེ་། 11 ཏོ་ཙོག་སེ་ མི་རྒུན་ ཀོན་འཇོག་རྒེ་ རྡེན་འབའ་ རྒྱབ་ལོག་ཀན་ ཡང་ ཁོ་རང་རྒུ་ནི་ རྡིག་པེ་ ཁོ་རང་རྒུན་ལ་ ཉེད་ ཀ་ལེ་ནོག་།
ལྟིང་འཇུག་རྒེ་ ལབ་ཞ་ རྡང་ འཇུ་།
12 ངེ་ སྤུན་, ཨར་ཏེ་མ་ ཡ་ ཏི་ཁི་ཀུ་ ཉ་ཧེ་ ནང་ནི་ ཅིག་པོ་ ཁྱེ་རང་ངེ་ཀ་ ཀ་ལེ་རྡང་, ནི་ཀོ་པོ་ལི་ རྒྱལ་སེ་ན་ ཁྱེ་རང་ ང་ ཐུ་རྒ་ལ་ ཡོང་ཅེ་ ཙོན་འགྲུའི་ ཅོའེ་, ཅེ་ཟེར་ནི་ ང་ ཏུ་རུ་ རྒུང་ཀ་ འདེད་ཅེ་ ཐག་ཅེད་ཏེ་ འིན་། 13 ངེ་ སྤུན་ ཁྲིམ་ཙོད་པ་ ཟེ་ནཱ་ ཡང་ སྤུན་ ཨ་པོ་ལོ་རྒུན་ པེ་ལ་ ཆ་ཅེ་ན་ ཁྱེ་རང་ངེ་ ཅི་ས་ཐོག་ནི་ ཡ་ཏོ་ ཅོ་ཅེ་ ཙོན་འགྲུའི་ ཅོའེ་། ཁོང་རྒུན་ལ་ རྒོའེ་ཤེ་ ཡོ་ཀན་ ཚང་མ་ ཏྃ་རྡེ་ འདུག་རྒེ་ ལྟོའེ་། 14 ཨ་ཧོའེ་ སྤུན་རྒུ་ནི་ ཞེན་མ་ ཏེཏ་པ་ཅན་རྒུ་ནི་ རྡེན་འབེ་ རྒོའེ་ཤེ་ཅན་རྒུན་ རིག་ཏེ་ ཁོ་རང་རྒུ་ནི་ ཏུའི་རྦོ་ ལེ་ཧ་ ཟང་པོ་ ཅོ་ཅེ་ན་ པུད་ཅེ་ ལོབ་རྒོའེ་། ཏེ་ནི་ ཁོང་རྒུ་ནི་, ཏོན་མེད་རྡེ་ མི་ཙེ་ཞིག་ མི་པུད་།
15 འི་རུ་ ཡོ་ཀན་ ཚང་མེ་ འཇུ་ ཞུ་རུག་། འཇུ་འཇུ་ ཏུ་རུ་ ཡོ་ཀ་ནེ་ ཏེཏ་པ་ཅེན་, ཨ་ཧོ་རྒུན་ལ་ ཤེ་སྤ་ ཅོ་ཀན་རྒུན་ལ་ ངེ་ ཆོག་ནི་ འཇུ་ ཞུའི་།
ཀོན་འཇོག་རྒེ་ ཐུག་ཞེ་ ཁྱི་ཞ་ ཚང་མ་ལ་ སལ་ཤིག་༎