མི་ རྒད་པོ་ རྡང་ འ་ནེ་ མ་རང་མེ་ ཧོར་ལ་ ལབ་ཞ་།
5
རང་ངེ་སང་ རྒན་ནེ་ཞིག་ལ་ ཁར་རྐྱག་ ཏྃ་རྡེ་ སྤེ་ར་ མ་ཏྃ་ལ་, ཁོ་ རང་ངེ་ ཨ་རྦ་ ཙོག་སེ་ སམ་འདེ་ རྡེན་འབེ་ ལམ་མེ་ཀ་ འགྲུལ་ཤེ་ལ་ སེམ་རུའི་ ཏོང་, ཡང་ ཁྱོག་ཏོང་རྒུན་ལ་ རང་ངེ་ ནོ་ ཙོག་སེ་ སོམ་། 2 ཏེ་རྒ་ ཙོག་སེ་ པོ་མོ་ རྒན་ནེ་རྒུན་ལ་ ཁྱེ་རང་ངེ་ ཨ་མ་ ཡང་ པོ་མོ་ ན་ཅུང་རྒུན་ལ་ སེམ་ སང་མ་ ཉམ་པོ་ རང་ངེ་ སྲིང་མོ་ ཙོག་སེ་ སོམ་།3 འ་ནེ་ མ་རང་མོ་ ལྟ་ཏོག་ ཅོ་ཀན་ མེ་ཀན་རྒུན་ལ་, ལྟ་ཏོག་ ཅོའེ་རྡེ་ སི་ཝ་ ཏོང་། 4 འིན་ན་ ཀལ་ཏེ་ ཏེ་ འ་ནེ་ མ་རང་མོ་ལ་ ཕྲུ་རྒུ་, ཡང་ ཚ་འོ་, ཚ་མོ་ ཡོད་ནི་, ཏོ་རྒུ་ནི་ རང་ངེ་ ནང་མི་རྒུན་ལ་ ལྟ་ཏོག་ ཅོའེ་རྡེ་ འགོ་མ་ ཁོ་རང་རྒུ་ནི་ ཏེཏ་པ་རྦོ་ ལག་ལེན་ནེ་ན་ ཁྱོང་ རྒོ་ཤེ་ ནོག་། ཕ་མ་, ཨ་རྦི་ རྡང་ མེ་མེ་རྒུན་ལ་ ལྟ་ཏོག་ ཅོའེ་རྡེ་ ཁོང་རྒུ་ནི་ ཏྲིན་ལེན་ ལོག་ཀན་རྒུ་ནི་ ལེ་ཧ་རྦོ་ལ་ ཀོན་འཇོག་ ཐུག་ཐེད་རྡེ་ ཛེ་རྡེ་ནོག་།
5 ཏ་ ནང་ཚང་ མེད་རྡེ་ ཅིག་པོ་ ལུའི་ཧ་ནེ་ པོ་མོ་, ཁོ་རང་ངེ་ རེ་ཝ་ ཀོན་འཇོག་རྒེ་ན་ པོར་རྡེ་, ཚེན་ཉིན་ མེད་རྡེ་ ཡ་ཏོ་ ཅོའོ་ ཛེད་ ཟེར་རྡེ་ མོ་ལམ་ ཞུ་ཀན་འབོ་ ངོའེ་མེ་ འ་ནེ་ མ་རང་མོ་ ནོག་། 6 འིན་ན་ རང་འདོད་ ཀྲུབ་ཅུག་ཅེ་ན་ མི་ཙེ་ པུད་ཀ་ནེ་ འ་ནེ་ མ་རང་མོ་རྒུན་ སོན་པོ་ ཡོད་ཏེ་ལ་, སེམ་ཡིད་རྡེ་ ཐོག་ནི་ ཤི་རྡེ་ ནོག་། 7 སུ་ཞིག་ལ་ ཏེཏ་པ་ཅན་རྒུ་ནི་ རྒྱཔ་འགལ་ལ་ ཉེད་ཀལ་ མི་ཉེན་ཅེ་ཕི་, ཏེ་ ལབ་ཞ་རྒུན་ ཏོང་།
8 འིན་ན་ རང་ངེ་ ཉེན་འགྲུམ་རྒུན་ལ་, མིག་ས་ལེ་ ཁོ་རང་རྒུ་ནི་ ནང་མི་རྒུན་ལ་ ལྟ་ཏོག་ མ་ཅོ་ཀན་རྒུ་ནི་ ཁོ་རང་ངེ་ ཏེཏ་པ་ ཕྃ་རྡེ་ ནོག་། ཡུ་ཙོག་སེ་ མི་རྒུན་, ཏེཏ་པ་ མེ་ཀ་ནེ་སང་ ཐུ་ ནོག་།
9 ཡ་ཏོ་ ཅོ་རྒོ་ཤེ་ ཐོའེ་ན་ མིང་ ཅུག་ཏེ་ ཡོ་ཀ་ནེ་ འ་ནེ་ མ་རང་མོ་རྦོ་: ཁོ་རང་ངེ་ མག་པ་ ཅིག་ཅིག་ ཉམ་པོ་ ན་མ་ ཅོ་རྒོའེ་རྡེ་ནོག་, ཁོའེ་ ལོ་ ཀྲུག་ཅུ་ ཡང་ མང་ངེ་, 10 ལེ་ཧ་ ཟང་པོ་རྒུ་ནི་ ཅོའེ་རྡེ་ མིང་ཅེན་, སྤེར་ན་ ཕྲུ་རྒུ་རྒུན་ རྒྱ་ལེ་ ཅོའེ་རྡེ་ ལྡན་ཅུག་རྒེན་, པེ་སྤ་རྒུན་ལ་ རྒ་སུའི་ ཞུ་ཀན་, ཏེཏ་པ་ཅན་རྒུན་ལ་ པབ་མོ་ ཉམ་པོ་ ཞབ་རྟོག་ ཞུ་ཀན་, རྡུག་ངལ་ལེ་ན་ ཡོ་ཀན་རྒུན་ལ་ ཡ་ཏོ་ ཅོ་ཀན་, ཡང་ ལེ་ཧ་ ཟང་པེ་ན་ ཚང་མ་ ཅོ་ཅེ་ལ་ ཀྲལ་འགྲིག་ འདེད་ཀན་། ཏེ་ ཤོད་པ་ ཚང་མ་ ཁོའེ་ན་ ཡོང་རྒོའེ་།
11 འིན་ན་ མིང་ཐོའེ་ན་ འ་ནེ་ མ་རང་མོ་ ན་ཅུང་རྒུན་ ཡོང་ མི་རྒོའེ་, ཅེ་ཟེར་ནི་ ཁོང་རྒུ་ནི་ ཟུྃ་སྤེ་ འདོད་པེ་ ཡང་ པག་རྟོན་ ཅོ་ཉིན་འགྲོ་ཅེ་ཀ་ནི་ མ་ཤི་ཀ་ ཞབ་རྟོག་ ཞུ་ཅེ་ ཁ་ཅེད་རྡེ་ན་ རྒག་རྐྱིལ་ ཁྱོང་ངེ་ནོག་། 12 ཏེ་ནི་ ཁོང་རྒུ་ནི་ ངུལ་ལ་ ཅོའེ་ཧ་ནེ་ ཁ་ཅེད་འབོ་ མི་སྲུང་ཅེ་ཀ་ནི་ ཁོ་རང་རྒུ་ནི་ཀ་ ཁྲིམ་ཅེད་ ཕོག་རྒེན་། 13 ཡང་ ཀལ་ཏེ་ ཁོང་རྒུན་ མིང་ཐོའེ་ན་ ཡོད་ནི་, ཁོང་རྒུན་ ལེ་མི་ལམ་ འགྱུར་རྡེ་ ཁང་པ་ ཅིག་ནི་ ཅིག་རྒེ་ན་ སྤེར་མེན་ ཏང་ངེན་, ཁོ་རང་རྒུ་ནི་ ཏུའི་རྒུན་ པུད་རྡེན་, ཞེན་མ་ མི་རྒུ་ནི་ ལེ་ཧེ་ན་ ཐེ་རྟོག་, ཡང་ ཏང་རྒོའེ་ མེ་ཀ་ནེ་ སྤེ་ར་ རིག་ལ་ ཏང་ངེན་། 14 སོང་འབེ་སང་ ཏེ་ འ་ནེ་ མ་རང་མོ་ ན་ཅུང་རྒུན་ལ་ ཡང་ ན་མ་ ཅོའེ་རྡེ་ ཕྲུ་རྒུ་ རྐྱེ་ཅུག་ཅེ་, ཡང་ ཁོ་རང་རྒུ་ནི་ ཁང་པེ་ ལྟ་ཏོག་ ཅོ་ཅེ་ལ་ ངེ་ ཁ་རྡ་ ཏང་ངེ་ཡོད་། ཏེ་ནི་ འགྲ་ཝེ་, ཁོང་རྒུ་ནི་ རྒྱཔ་འགལ་ལ་ ཅང་ཀ་ ཟེར་ མི་ཉེན་། 15 ཅེ་ཟེར་ནི་ འ་ནེ་ མ་རང་མོ་ ན་ཅུང་ ཁ་ཅིག་ ཀོན་འཇོག་ལ་ རྒྱབ་ འགྱུར་ ཚར་རྡེ་ རྡུད་རྡེ་ རྒྱབ་ནི་ འགྲུལ་རྡུག་།
16 ཀལ་ཏེ་ པོ་མོ་ ཏེཏ་པ་ཅེན་ཞིག་ལ་, འ་ནེ་ མ་རང་མོ་ ཉེན་འགྲུམ་ རིག་ ཡོད་ནི་, ཁོའེ་ ཁོང་རྒུན་ལ་ ལྟ་ཏོག་ ཅོ་རྒོའེ་, ཡང་ ཏེ་ ཁག་པོ་ ཆོའེ་ཚོག་རྒེ་ཀ་ ཀལ་ མི་རྒོའེ་། ཏེ་ནི་ ཆོའེ་ཚོག་རྒེ་ ངོའེ་སྤོ་ལ་ ལྟ་ཀན་ མེ་ཀ་ནེ་ འ་ནེ་ མ་རང་མོ་རྒུན་ལ་ ལྟ་ཏོག་ ཅོ་ཉེན་ནེན་།
ཆོའེ་ཚོག་རྒེ་ འུ་རྐྱོང་རྒུ་ནི་ ཧོར་ལ་།
17 ཆོའེ་ཚོག་རྒེ་ ལེ་ཧ་ ཅོ་ཀ་ནེ་ འུ་རྐྱོང་རྒུན་ལ་ སི་ཝ་ རྡང་ ཡ་ཏོ་ ཉི་ལྡབ་ ཅོ་རྒོ་ཤེ་ ནོག་, མིག་ས་ལེ་ ཆོའེ་ཤེད་ཅེ་ རྡང་ ལབ་ཞ་ ཏང་ཅེ་ན་ ཙོན་འགྲུའི་ ཧོཔ་ ཅོ་ཀན་རྒུན་ལ་། 18 ཅེ་ཟེར་ནི་ སུང་རབ་རྦེ་ན་ “ཁྱེ་རང་རྒུ་ནི་ འུལ་ཏག་ལ་ ཧོར་ཧ་ནེ་ ལང་ཀྲོ་ ཟ་ཅེ་ནི་ ཁ་ ཀབ་ མི་རྒོའེ་” ཡང་ “ལེ་ཧ་ ཅོ་ཀན་རྒུན་ལ་ ཉིན་ལ་ འོའེ་སྤ་ ནོག་” མོལ་རྡེ་ འདུག་།
19 འུ་རྐྱོང་ཞིག་རྒེ་ རྒྱཔ་འགལ་ལ་ རྐྱོན་འཇོད་ ཅོ་ནི་, ཏོ་རྒུན་ལ་ ཏེ་ཏེ་ཚུག་པ་ མ་ཉེན་, ནམ་ཚུག་པ་ སྤང་པོ་ ཉི་ ཡ་ སུམ་མེ་ ཏོ་རྦེ་ ཧོར་ལ་ ནེན་ཏེན་ མི་ཅོ་། 20 འི་རྦོ་ ཞེན་མ་རྒུན་ལ་ འཇིའི་ཤེ་ཕི་ལ་, རྡིག་པ་ ཅོ་ཀ་ནེ་ འུ་རྐྱོང་རྒུན་ལ་ ཆོའེ་ཚོག་ སོན་ཏེ་ འདུན་ལ་ ཁར་རྐྱག་ ཏང་རྒོའེ་།
21 ང་ པ་འུ་ལུའི་ ཏི་མོ་ཐི་ ཁྱེ་རང་ལ་ ཀོན་འཇོག་, མ་ཤི་ཀ་ ཡི་ཤུ་ རྡང་ ཀོན་འཇོག་རྒེ་ འདམ་མེ་ ཛེད་ཀ་ནེ་ ཕོ་ཉ་རྒུ་ནི་ འདུན་ལ་ འི་ ལབ་ཞ་རྒུན་ལ་ ཁ་ཉེན་འདེ་ སུ་ཞི་ལ་ ཡ་པེ་ མ་ཅོ་ལ་, ལག་ལེན་ ཅོ་ཅེ་ལ་ ཀཱ་ ཏང་ངེ་ཡོད་།
22 ཆོའེ་ཚོག་རྒེ་ འུ་རྐྱོང་ འདམ་ཅེ་ན་ ཚ་རག་ མ་ཏང་, ཀལ་ཏེ་ ཏང་ནི་ ཏེ་ནི་ ཁོའེ་ རྡིག་པེ་ན་ ཁྱེ་རང་ལ་ འདྲེའེ་རྡེན་། ཁྱེ་རང་ རང་འདང་རང་ སང་མ་ པོར་།
23 ཆུ་ རྐྱང་ ཐུང་ངེན་ མ་འདེད་, ཁྱེ་རང་ངེ་ ཀྲོཏ་པེ་ ཕན་ཏོག་རྡེ་ཕི་ རྒུན་འགྲུམ་མེ་ ཁོའེ་ ཉུང་ཙེ་ རིག་ལ་ ཐུང་, ཅེ་ཟེར་ནི་ ཁྱེ་རང་ལ་ ཟུར་མོ་ ཡོང་ངེན་ འདེད་ཏུག་།
24 མི་ ཁ་ཅིག་རྒེ་ རྡིག་པ་རྒུན་ སལ་སྤོ་ ཐོང་ངེ་ནོག་, ཏོ་རྒུ་ནི་ རྡིག་པ་རྒུན་ ཀོན་འཇོག་རྒེ་ ཁྲིམ་ཅེད་ ཛེད་ཏེ་ མལ་ལ་ ཁོང་རྒུ་ནི་སང་ ངུལ་ལ་ ལེབ་རྦེན་། འིན་ན་ ཞེན་རྒུ་ནི་ རྡིག་པ་རྒུན་ ལྟིང་ནི་ མ་ནི་ མི་ངོན་། 25 ཏེ་རྒ་ ཙོག་སེ་ མི་ ཁ་ཅིག་རྒེ་ ལེ་ཧ་ ཟང་པོ་རྒུན་ སལ་སྤོ་ ཅོའེ་རྡེ་ ཐོང་འདུག་། འིན་ན་ ཀལ་ཏེ་ སང་སྤེར་ན་ ལེ་ཧ་ ཟང་པོ་ ཅོ་ནི་, ཡུ་རྒུན་ ཏུའི་རྒྱུན་ནི་ཕི་ རྦེ་རྡེ་ པོར་ མི་ཉེན་།