6
ཀོན་འཇོག་རྒེ་ ཚན་ འདང་ ཁོང་ངེ་ ལབ་ཞ་རྒུན་ལ་ ཁྲེལ་རྦ་ མི་ཁྱོང་ཤེ་ཕི་, ཏེཏ་པ་ཅེན་ ཚེ་ཡོག་ ཚང་མེ་ ཁོ་རང་རྒུ་ནི་ སྤོན་འབོ་རྒུན་ལ་ རྒྱལ་ལ་ ཅོའེ་རྡེ་ སི་ཝ་ ཅོ་རྒོ་ཤེ་ ནོག་། 2 ཀལ་ཏེ་ ཁོང་རྒུ་ནི་ སྤོན་འབོ་རྒུན་ ཏེཏ་པ་ཅེན་ རིག་ འིན་ནི་, ཏོ་ སི་ཝ་ ཉུང་ཙེ་ ཅོ་ཅེ་ རྒྱུ་ཞིག་ ཡོང་ མི་རྒོའེ་། འིན་ན་ ཏེ་ ཚེ་ཡོག་རྒུ་ནི་ ལེ་ཧ་ མང་ངེ་ རྒྱ་ལེ་ ཅོ་རྒོ་ཤེ་ ནོག་, ཅེ་ཟེར་ནི་ ཁོང་རྒུ་ནི་ སོན་འགྲུའི་ ཕན་ཏོག་པོ་ ཁོ་རང་རྒུ་ནི་ ཡ་ཤ་ ཅོ་ཀན་ ཏེཏ་པ་ ཡོ་ཀན་རྒུན་ལ་ ཐོབ་ཏེ་ ནོག་།ཏི་མོ་ཐི་, ཏེཏ་པ་ཅན་རྒུན་ལ་ ཏེ་ ལབ་ཞ་རྒུན་ ལབ་ཏེ་ ཁ་ཉེན་ཅེ་ལ་ སེམ་རུའི་ ཏོང་།
ཟུའི་མེ་ ལབ་ཞ་ རྡང་ རྡེན་འབེ་ རྒྱུ་ནོར་།
3 ཀལ་ཏེ་ སུ་ཞིག་རྒེ་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཆོའེ་ འདེན་བ་རྦོ་རྡང་, ཀོན་འཇོག་ ཐུག་ཉེ་ཤེ་ཅན་ནེ་ ལམ་ལ་ འགྲུལ་ཤེ་ ལབ་ཞ་འབོ་ལ་ མ་ཆམ་མེ་ ཟུའི་མ་ ལབ་རྦེ་ཡོད་ནི་, 4 ཏོ་ཙོག་སེ་ མི་རྒུན་ ཕོ་སོ་ཅེན་ འདང་ ཧ་མ་ཀོ་ཀན་རྒུན་ ནོག་། ཏོ་རྒུ་ནི་ ཕན་མི་ཐོག་རྡེ་ ལོབ་པེ་, ཁོང་རྒུ་ནི་ སྤེ་རེ་ ཏོན་ཏག་རྒེ་ཀ་ ཁྲུག་པ་ རྡང་ ཁྲབ་རྦེ་ནོག་, ཏོ་རྦེ་ ཕྲ་རྡོག་, པོ་པུད་ཅེ་, ཞེན་མེ་ ཧོར་ལ་ འབར་ཤེ་, ཡང་ ཞེན་མེ་ ཧོར་ལ་ སམ་བ་ ངན་པ་རྒུན་ ལྡན་ཅུག་རྒེ་ནོག་། 5 ཏོ་རྒུ་ནི་ ཏུའི་རྒྱུན་ མི་རྒུ་ནི་ ཕྲོ་ ཁྲུག་པ་ ཆ་ཅུག་རྒེ་ནོག་། ཏོ་རྒུན་ལ་ རྡེན་འབའ་ རྡང་ ཟུན་འབེ་ ཁྱེད་ མ་ཤེ་རྦེ་, རྡེན་འབའ་ ཆོག་ལ་ རང་ངེ་ རྒྱབ་འགྱུར་རྡེ་ ནོག་། ཏོ་རྒུ་ནི་ ཁོ་རང་རྒུན་ ཆུག་པོ་ འགྱུར་ཤེ་ཕི་ལ་ ཀོན་འཇོག་རྒེ་ ཤོད་ལམ་མེ་ཀ་ འགྲུལ་ཟུན་ ཏང་ངེ་ནོག་།
6 སེམ་མེ་ན་ ཞིའི་རྡེ་ རྡང་ ཀོན་འཇོག་རྒེ་ ཤོད་ལམ་མེ་ཀ་ འགྲུལ་ཤེ་ འདོད་པ་ ཡོད་ཅེ་རྦེ་ ཁོ་རང་, ཅིན་ལབ་ ཆོན་མོ་ཞིག་ ནོག་། 7 ཅེ་ཟེར་ནི་ ཨ་ཧོའེ་ འི་ འཇིག་རྟེན་ནི་ན་ ཅང་ ཁུར་རྡེ་ མ་ཁྱོྃ་, ཡང་ འེ་ཀ་ནེ་ ཅང་ ཁུར་རྡེ་ ཆ་ མི་ཉེན་། 8 ཏོ་རྦེ་ཕི་ ཨ་ཧོ་རྒུན་ལ་ ཟ་རྒྱུ་ རྡང་ ཀོན་རྒྱུ་ ཡོད་ནི་ ཏོ་རྦོ་ ཚིམ་ རྒོ་ཤེ་ ནོག་།
9 ཆུག་པོ་ འགྱུར་ལ་ ཐེད་ཀན་རྒུན་ ཚོད་ལྟེ་ན་ འགྱེལ་རྡེ་, ཏོན་མེད་ ཏང་ ནོད་རྐྱལ་ཧ་ནེ་ འདོད་པ་རྒུ་ནི་ན་ ཁད་རྡེ་ནོག་, ཀ་རྦེ་ ཁོང་རྒུན་ ཞིག་ཏེ་ མེ་ཀན་ ཆ་ཅེ་ན་ འདྲུལ་ ཤུག་རྒེ་ནོག་། 10 ཅེ་ཟེར་ནི་ ནོར་རེ་ འདོད་པ་རྦོ་ ངན་པེ་ན་ ཚང་མེ་ པ་ཀྲག་ ནོག་། ཡང་ ནོར་འདོད་ མང་པོ་ ཡོ་ཀན་ ཁ་ཅིག་ ཏེཏ་པེ་ཀ་ནི་ མ་ ཐག་རིང་ལ་ ནུར་རྡེ་ སོང་འདེ་ རང་འདང་རང་ལ་ ཡང་འདང་ཡང་ ཀྲི་ ཙུག་རྒེ་ ཙོག་སེ་ རང་ངེ་ སེམ་རྡུག་ ཆོན་མོ་ ཁྱོང་འདུག་།
པ་འུ་ལུའི་ ལྟིང་འཇུག་རྒེ་ ལབ་ཞ་རྒུན་།
11 ཏི་མོ་ཐི་, ཁྱེ་རང་ ཀོན་འཇོག་ལ་ ཞབ་རྟོག་ ཞུ་ཀ་ནེ་ མི་ཞིག་ འིན་ཅེ་ཀ་ནི་, ཏེ་ ངན་པེ་ ལེ་ཧ་ ཚང་མེ་ཀ་ནི་ ཤོར་རྡེ་ སོང་། འིན་ན་ ཀྲང་པོ་, ཀོན་འཇོག་རྒེ་ ཐུག་ཐེད་རྡེ་ཀ་ ཅོ་ཅེ་, རྡེན་ཆེ་ཤེ་, ཤེ་སྤ་, ཏེཏ་པེ་ན་ རྟེམ་པོ་ འདེད་ཅེ་ རྡང་ ཡ་རབ་ མི་ཚེ་ཞིག་རྒེ་ ལྟིང་འགྲྃ་ནི་ རྒྱུག་ རྒོའེ་། 12 རང་ངེ་ ཏེཏ་པ་ རྐྱོབ་ཅེ་ཕི་ རྒྱ་ལེ་ ཅོའེ་རྡེ་ ནོལ་། ཀོན་འཇོག་རྒེ་ ཁྱེ་རང་ལ་ འབོ་ ཛེད་ཀ་ནེ་ ཐ་མེད་པེ་ མི་ཙེ་འབོ་ལ་ སྲན་ཀྲེ་ ཐམ་འདེ་ འདོད་, ཀའོ་ ཁྱེ་རང་ངེ་ ཡི་ཤུའི་ན་ རྡེན་ཆེ་ཤེ་ ཅོ་ཀ་ནེ་ སྤང་པོ་ ཏེཏ་པ་ཅེན་ མང་པེ་ འདུན་ལ་ ཏྃ་། 13 ཡང་ ཚང་མ་ལ་ སྲོག་ སལ་ཧ་ནེ་ ཀོན་འཇོག་ ཏང་ པོན་ཏིའུ་པི་ལ་ཏུ་ འདུན་ལ་ སྤང་པོ་ ཟང་པོ་ སལ་ཧ་ནེ་ མ་ཤི་ཀ་ ཡི་ཤུ་ ཉ་ཧེ་ ཧུ་འདུན་ལ་ ངེ་ ཁྱེ་རང་ལ་ ཡུ་ ཀཱ་ ཏང་ངེ་ཡོད་། 14 ཨ་ཧོའེ་ ཙོབོ་ ཡི་ཤུ་ མ་ཤི་ཀ་ ལོག་ཏེ་ ཕེབ་ཕེབ་ཚུག་པ་ ཁྱེ་རང་ངེ་ ཁོང་ངེ་ ཀཱ་ ཐེ་ཚོམ་ མེད་རྡེ་ ཁ་ཉོན་། 15 ཏ་ ཏེ་རྒ་ འདམ་མེ་ ཛེད་ཀ་ནེ་ ཏུའི་རྦེ་ཀ་ ཀོན་འཇོག་, རྒྱ་སྤོ་རྒུ་ནི་ རྒྱ་སྤོ་ རྡང་ ཙོབོ་རྒུ་ནི་ ཙོབོ་, ཅིན་ལབ་ཅེན་ནེ་ ཀུན་ཝང་ ཅིག་པེ་, མ་ཤི་ཀ་ རྡེ་བ་ཅན་ནེ་ ངོན་ཅུག་རྒེ་ ཛེ་རྡེན་། 16 ཀོན་འཇོག་ ཅིག་པོ་ མ་ནི་ མི་ཀྲོྃ་, སུ་ལ་ ཆ་ མི་ཉེན་ཅེ་ འོད་རྡེ་ན་ ཁོང་ ཞུ་རྡེན་, ཁོང་ སུ་ཞིག་ལ་ མ་ནི་ མ་འཇལ་ཀག་ ཡང་ འཇལ་ མི་ཉེན་། ཚང་མེ་ ཁོང་ལ་ སི་ཝ་ ཅོའེ་ཧེ་, ཡང་ ཁོང་ངེ་ ཝང་རྒུན་ ཏུའི་རྒྱུན་ ལུའི་ཤིག་། ཨ་མེན་།
17 འི་ འཇིག་རྟེན་ནེ་ན་ ཡོ་ཀ་ནེ་ ཆུག་པོ་རྒུན་ལ་ ཁོ་རང་རྒུ་ནི་ ནོར་རྒུ་ནི་ཀ་ ཕོ་སོ་ རྡང་ རྡེན་ཆེ་ཤེ་ མ་ཅོ་ ཟེར་རྡེ་ ལོབ་, ཀའོ་ ལ་མོ་ ཉམ་པོ་ མེ་ཀན་ ཆ་ ཉེན་ནེ་ནོག་། ཨ་ཧོའེ་ རྐྱིད་པེ་ཕི་ རྒོའེ་ཤེ་ཅན་རྒུན་ ཉིང་ པེ་རྡེ་ སལ་ལེ་ ཛེད་ཀ་ནེ་ ཀོན་འཇོག་རྒེ་ན་ ཁོང་རྒུ་ནི་ རྡེན་ཆེ་ཤེ་ ཡོང་རྒོའེ་། 18 ཁོང་རྒུ་ནི་ མུལ་རྒུན་ ལེ་ཧ་ ཟང་པེ་ན་ རྐྱག་ཅེ་, ལེ་ཧ་ ཟང་པེ་ན་ ཆུག་པོ་ འགྱུར་ཤེ་, རྒོའེ་ཤེ་ཅན་རྒུ་ནི་ཕི་ ཉིང་ པེ་རྡེ་ ཏང་ཅེ་, ཏུའི་རྒྱུན་ ཞེན་མ་ ཉམ་པོ་ རྒོ་ཅེ་ན་ ཀྲལ་འགྲིག་ འདེད་ཅེ་ལ་ ཟེར་། 19 ཏུ་ཟུག་ ཅོ་ཅེ་རྦེ་, ཁོང་རྒུ་ནི་ ཡོང་ཅེ་ཅེན་ནེ་ ཏུའི་རྡེ་ཕི་ ཁོ་རང་རྒུན་ལ་ རྡེ་བ་ཅན་ནེ་ན་ མག་རྡེན་ རྟེམ་པོ་ ཙོག་སེ་ པང་ཛོད་ སག་ཏེ་ པོ་རེན་, ཏེ་ནི་ ཁོང་རྒུ་ནི་ རྡེན་འབེ་ ངོའེ་མེ་ མི་ཙེ་རྦོ་ ཐམ་ ཉེན་ནེན་།
20 ཏི་མོ་ཐི་, ཀོན་འཇོག་རྒེ་ ཁྱེ་རང་ངེ་ ལག་ལ་ ལྟེད་རྡེ་ ཛེད་ཀན་རྒུན་ལ་ རྒྱ་ལེ་ ཅོའེ་རྡེ་ སྲུང་རྐྱོབ་ ཅོའེ་། ཧ་འགྲང་ངེ་ སྤེ་ར་རྒུ་ནི་ན་ འདྲེའེ་ མ་འདྲེའེ་, ཀ་འབོ་ལ་ མི་ ཁ་ཅིག་རྒེ་ ནོར་རྡེ་ ཤེ་རྒྱ་ ཟེ་རེན་།
21 ཡུ་ཙོག་སེ་ ཧ་འགྲང་ངེ་ ཀྲཔ་ཅོ་ཀན་རྒུ་ནི་ རྒྱབ་ནི་ འགྲུལ་རྡེ་ མི་ ཁ་ཅིག་ རྡེན་འབེ་ ཏེཏ་པེ་ཀ་ནི་ ཐག་རིང་ལ་ སོང་འདེ་ ནོག་།
ཀོན་འཇོག་རྒེ་ ཐུག་ཞེ་ ཁྱི་ཞ་རྒུན་ལ་ སལ་ལེ་ ཛེད་ཤིག་༎