ཟུའི་མེ་ ལོབ་རྦོན་རྒུ་ནི་ རྒྱཔ་འགལ་ལ་ སྤང་ པུད་།
4
ཏམ་པེ་ ཐུག་ཡིད་རྡེ་ སལ་སྤོ་ ཅོའེ་རྡེ་ མོལ་རྡེ་ འདུག་, ཐ་མེ་ ཏུའི་ལ་ མི་ ཁ་ཅིག་རྒེ་ ཁོ་རང་རྒུ་ནི་ ཏེཏ་པ་ ཕྃ་རྡེ་ འགོམ་ཧོར་ ཏང་ཀ་ནེ་ སེམ་ཡིད་ ཏང་ རྡུད་རྡེ་ ལབ་ཞ་རྒུ་ནི་ རྒྱབ་ནི་ འགྲྃ་རྡེ་ ཆེན་། 2 ཏེ་ ལབ་ཞ་རྒུན་ ངའིན་ ཅོ་ཀན་ འདང་ ཟུན་ཅེན་རྒུ་ནི་ཀ་ནི་ ཡོང་ངེ་ནོག་, ཀའོ་རྒུ་ནི་ སེམ་འབོ་ ཤི་རྡེ་ འིན་ཅེ་ཀ་ནི་, ཁོང་རྒུ་ནི་ རྡིག་པ་རྒུན་ལ་ ཉེད་ཀལ་ ཅོའོ་ མག་།3 ཏོ་རྒུ་ནི་ ཏེཏ་པ་ཅན་རྒུན་ལ་ པག་རྟོན་ ཅོ་ཅེ་ རྡང་ ཁར་ཞི་ན་ ཁ་ཅིག་ ཟ་ མི་ཆོག་ ཟེ་རེ་ནོག་། འིན་ན་ ཀོན་འཇོག་རྒེ་ རྡེན་འབའ་ ཤེ་རྡེ་ ཏེཏ་པ་ ཅོ་ཀན་རྒུན་ལ་ ཁོང་ངེ་ ཟ་ཅེ་ན་ ཚང་མ་ ཐུག་ཞེ་ཆེ་ ཉམ་པོ་, ཟ་ལ་ ཅོའོ་ ཛེད་ཏེ་ ནོག་། 4 ཀོན་འཇོག་རྒེ་ ཅོའོ་ ཛེད་ཀན་ ཚང་མ་ ཟང་པོ་ འིན་ཅེ་ཀ་ནི་, ཨ་ཧོ་རྒུ་ནི་ ཏོ་རྒུན་ ཅིག་ལ་ ཕང་ མ་ཕང་ལ་ ཐུག་ཞེ་ཆེ་ ཉམ་པོ་ ནེན་རྒོའེ་། 5 ཅེ་ཟེར་ནི་ ཀོན་འཇོག་རྒེ་ ཀའ་ རྡང་ ཨ་ཧོ་རྒུ་ནི་ ཁོང་ལ་ ཐུག་ཞེ་ཆེ་ མོ་ལམ་མེ་ ཅོའེ་རྡེ་ ཏོ་རྒུན་ སང་མ་ ཅོའོ་ ཛེད་ཏེ་ ནོག་།
མ་ཤི་ཀ་ ཡི་ཤུའི་ ཞབ་རྟོག་པ་ ཟང་པོ་ཞིག་ འགྱུར་ཤེ་།
6 ཏི་མོ་ཐི་ ཀལ་ཏེ་ ཁྱེ་རང་ངེ་ སྤུན་རྒུན་ལ་ ཏོ་རྒུ་ནི་ ཧོར་ལ་ ལབ་ནི་, ཁྱེ་རང་ མ་ཤི་ཀ་ ཡི་ཤུའི་ ཞབ་རྟོག་པ་ འོའེ་སྤ་ཅེན་ཞིག་ འགྱུ་རེན་, ཀའོ་ ཁྱེ་རང་ངེ་ མི་ཙེ་ན་ ཏེཏ་པེ་ རྡེན་འབའ་རྒུན་ ལོབ་ཏེ་, ལབ་ཞ་ ཟང་པེ་ རྒྱབ་ནི་ འགྲུལ་ཤེ་རྦེ་, ཤེད་ཅེན་ འགྱུར་རྡེ་ འིན་། 7 ཏོན་མེ་ཀན་ འདང་ རྡེན་འབའ་ མན་ཀ་ནེ་ ཅོའེ་མེ་ སྲུང་ངུ་རྒུ་ནི་ ཧོར་ལ་ ཁྲུག་པ་ ཏང་ངེན་, ཁྱེ་རང་ངེ་ ཏུའི་ ཙི་རྦིག་ལ་ ཀོད་ལ་ མ་ཏང་ལ་, ཀོན་འཇོག་ ཐུག་ཉེ་ཤེ་ཅན་ནེ་ ལམ་ལ་ འགྲུལ་ཤེ་ན་ རང་ངེ་ མི་ཙེ་རྦོ་ མང་ངེ་ ཡར་རྒྱེ་ ཆ་ཅུག་རྒེན་ པུད་། 8 ཁྱེ་རང་ལ་ འི་ ཟེར་ལོ་རྦོ་ རྒྱུའི་ཡོད་ཏེ་ ནོག་།
“ཞང་འདར་ ཅོའེ་རྡེ་ ཟུྃ་སྤོ་ལ་ ཡར་རྒྱེ་ ཅོ་ཅེ་རྦེ་,
ཕན་ཏོག་ ཙ་རྦིག་ ཡོད་ཏེ་ ནོག་།
འིན་ན་ ཏེ་སང་ མང་ངེ་ ཕན་ཏོག་རྦོ་,
ཀོན་འཇོག་ ཐུག་ཉེ་ཤེ་ཅན་ནེ་ ལམ་ལ་ འགྲུལ་ཅེའོ་ ནོག་།
ཅེ་ཟེར་ནི་ ཏོ་རྦེ་ ཨ་ཧོ་རྒུན་ལ་ འི་ མི་ཙེ་ རྡང་ ཤི་རྡེ་ ལྟིང་ནི་
ཐོབ་ཅེ་ཅེན་ནེ་ མི་ཙེ་ ཉ་ཧེ་ཕི་ ཕན་ཏོག་ ཅོ་ནོག་།”
9 ཏེ་ ཟེར་ལོ་རྦོ་ ལོ་ཁྱེལ་ཅེན་ ནོག་, ཡང་ ཚང་མེ་ ཐེ་ཚོམ་ མེད་རྡེ་, ཏེཏ་པ་ ཅོ་རྒོ་ཤེ་ ནོག་། 10 ཏེ་རྒ་རྦེ་ཕི་ལ་ ཨ་ཧོ་རྒུ་ནི་ ཙོན་འགྲུའི་ ཅོའེ་རྡེ་ པར་རྡོ་ ཁུར་རེ་ནོག་, ཅེ་ཟེར་ནི་ ཨ་ཧོ་རྒུ་ནི་ རེ་ཝ་རྦོ་, ཀོན་འཇོག་ སོན་པེ་ན་ ཡོད་ཏེ་ ནོག་, ཀའོ་ མི་ཚང་མ་ རྡང་ མིག་ས་ལེ་ ཏེཏ་པ་ཅན་རྒུན་ རྐྱོབ་ཀན་འབོ་ ཞུ་རྡེ་ འིན་།
11 ཁོང་རྒུན་ལ་ འི་ ལབ་ཞ་རྒུན་ ལོབ་, ཡང་ ཁོང་རྒུ་ནི་ཀ་ ལག་ལེན་ ཅོ་ཅེ་ ཀཱ་ ཏོང་། 12 ཁྱེ་རང་, ཏེཏ་པ་ཅན་རྒུ་ནི་ཕི་ སྤེ་ར་ ཏང་ཅེ་, མི་ཙེ་ པུད་ཅེ་, ཤེ་སྤ་ ཅོ་ཅེ་, ཏེཏ་པ་ ཡང་ སང་མེ་ ཐོག་ནི་ སྤེ་ཞིག་ལ་ འགྱུར་། ཀལ་ཏེ་ ཏུ་ཟུག་ ཅོ་ན་ ཁྱེ་རང་ ཁྱོག་ཏོང་ འིན་ཅེ་རྦེ་ སི་ཝ་ མི་ཅོ་ སམ་ཀན་རྒུན་ རྒག་རྒེན་། 13 ང་ ཡོང་ཡོང་ཚུག་པ་, ཁྱེ་རང་ངེ་ ཏུའི་ མང་ཆེ་ ཆོའེ་ཚོག་རྒེ་ འདུན་ལ་ ཏམ་པེ་ སུང་རབ་ སིལ་ ཡང་ ཆོའེ་ཤེད་ཅེ་ རྡང་ ཀོན་འཇོག་རྒེ་ རྡེན་འབེ་ ཧོར་ལ་ ལབ་ཅེ་ན་ པུད་།
14 ཁྱེ་རང་ལ་ ཀོན་འཇོག་རྒེ་ སལ་ཧ་ནེ་ ཁྱུད་པོ་ ཀོད་ལ་ ཆ་ མ་ཅུག་, ཀའོ་ ཁྱེ་རང་ལ་ ཆོའེ་ཚོག་རྒེ་ འུ་རྐྱོང་རྒུ་ནི་ ཁྱེ་རང་ངེ་ཀ་ ཁོ་རང་རྒུ་ནི་ ཆག་རྒུན་ པོར་རྡེ་, ཁྱེ་རང་ངེ་ ཧོར་ལ་ ལུང་རྟན་རྒུན་ སལ་ཟ་ནི་ ཐོབ་། 15 ངེ་ ལབ་ཞ་རྒུན་ལ་ ནྃ་ པོར་རྡེ་, ཉིང་ སོན་ཏེ་ ཉམ་པོ་ ལག་ལེན་ ཅོའེ་, ཏེ་ནི་ མི་ཚང་མེ་ ཁྱེ་རང་ སེམ་ཡིད་རྡེ་ ཐོག་ནི་ ཡར་རྒྱེ་ ཆ་ཀན་འབོ་, ཐོང་ཉེན་ནེན་། 16 ཁྱེ་རང་ངེ་ མི་ཙེ་ པུད་ཅེ་ ཡང་ ཁྱེ་རང་ངེ་ ལབ་ཞ་རྒུན་ལ་ ལྟག་ཅེད་ ཅོའེ་, ཏུའི་རྒྱུན་ ཏོ་ཙོག་སེ་ ཅོའེན་ འདོད་ཧེ་། ཀལ་ཏེ་ ཏུ་ཟུག་ ཅོ་ནི་, རང་ངེ་ མི་ཙེ་ རྡང་ ཁྱེ་རང་ངེ་ ལབ་ཞ་ ཉེན་ཀན་རྒུ་ནི་ མི་ཙེ་ལ་ རྐྱོབ་རྦེན་།