ཆོའེ་ཚོག་རྒེ་ འུ་རྐྱོང་རྒུན་།
3
ངོའེ་སྤོ་ལ་ འི་ ཞལ་ཏ་རྒུན་ རྡེན་འབའ་ ནོག་, “ཀལ་ཏེ་ སུ་ཞིག་ལ་ ཆོའེ་ཚོག་རྒེ་ འུ་རྐྱོང་ ཅོ་ཅེ་ འདོད་པ་ ཡོད་ནི་, ཁོ་ འདོད་པ་ ཡོ་ཀ་ནེ་ ལེ་ཧ་རྦོ་ སི་ཝ་ཅེན་ཞིག་ ནོག་།” 2 ཆོའེ་ཚོག་རྒེ་ འུ་རྐྱོང་འབོ་, རྐྱོན་མེ་ཀན་, ཁོ་ལ་ ན་མ་ ཅིག་ཅིག་ ཅོ་རྒོའེ་རྡེ་ནོག་, ཁྲམ་པ་ཅེན་, རང་སེམ་ ཆུན་ཉེན་ཀན་ འདང་, སི་ཝ་ཅེན་, པེ་སྤ་རྒུན་ལ་ ཁང་པེ་ན་ རྒ་སུའི་ ཞུ་ཀན་, ལབ་ ཉེན་ཅེ་ ཁྱུད་, 3 ཆང་ མི་ཐུང་ཀན་, ནོད་པ་ མི་རྐྱལ་ཧན་, ཞེན་མ་རྒུན་ ཉམ་པོ་ ཟོད་པ་ཅེན་, ཁྲུག་པ་ མི་ཏང་ཀན་, ཡང་ མུལ་ འདོད་པ་ མེ་ཀ་ནེ་ མི་ཞིག་ ཡོང་རྒོའེ་། 4 ཁོའེ་ ཁོ་རང་ངེ་ ནང་ཚང་ལ་ རྒྱ་ལེ་ ཅོའེ་རྡེ་ སྲུལ་ཧན་ཞིག་ ཡོང་རྒོའེ་, ཁོའེ་ ཕྲུ་རྒུ་རྒུན་ སི་ཝ་ ཅོ་ཀན་ འདང་ ཁ་ཉེན་ཀན་ རིག་ ཡོང་རྒོའེ་། 5 ཀལ་ཏེ་ མི་ཞིག་ལ་ ཁོ་རང་ངེ་ ནང་ཚང་ སྲུལ་ མ་ཉེན་ནི་, ཏེ་ནི་ ཀ་ཟུག་རྒེ་ ཁོ་ ཀོན་འཇོག་རྒེ་ ཆོའེ་ཚོག་རྦོ་ སྲུལ་ ཉེན་ནེན་?6 འུ་རྐྱོང་འབོ་, ཏེཏ་པ་ ཅོ་ཀན་ སོ་མ་ཞིག་ ཡོང་ མི་རྒོའེ་, ཅེ་ཟེར་ནི་ ཁོའེ་ན་ ཕོ་སོ་ རྐྱེ་སྲིད་ཅེ་ ནོག་ ཀ་རྦེ་ ཁོ་, རྡུད་ལ་ ཕོག་ཀ་ནེ་ ཁྲིམ་ཅེད་ ཙོག་སེ་ན་ འགྱེལ་ཤུ་རྒེན་། 7 ཁྲེལ་རྦ་ སོང་འདེ་ རྡུད་རྡེ་ ཅུའི་ངན་ནེ་ན་ མི་འགྱེལ་ཤེ་ཕི་, ཁོ་ ཏེཏ་པ་ མེ་ཀན་རྒུ་ནི་ལ་ སི་ཝ་ ཅོ་ཀ་ནེ་ མི་ཞིག་ ཡོང་རྒོའེ་།
8 ཏེ་རྒ་ ཙོག་སེ་, ཞབ་རྟོག་པ་ ཧོ་ ཛེད་ཀན་རྒུན་ལ་ ཡ་རབ་ ཡོང་རྒོའེ་, ལྕེ་ཉི་ མི་ཀོལ་ཀན་, ཆང་ ཐུང་ཀན་ ཡ་ མུལ་ ཐོག་ནི་ ཀྲང་པོ་ མེ་ཀན་ ཡོང་ མི་རྒོའེ་། 9 ཁོང་རྒུ་ནི་ སེམ་མེ་ན་ རྐྱོན་ མེད་པེ་ ཏེཏ་པེ་ ཁག་ཅེན་ ཀྲང་པོ་རྒུན་ལ་ རྟེམ་པོ་ ཐམ་འདེ་ འདེད་རྒོའེ་། 10 ཞབ་རྟོག་པ་ཞིག་ ཧོ་སང་ ངུལ་ལ་ ཁོང་རྒུ་ནི་ ཤོད་པ་རྒུན་ལ་ ཞིབ་སལ་ ཅོའེ་རྡེ་ ལྟ་རྒོའེ་། ཀལ་ཏེ་ ཁོང་རྒུན་ རྐྱོན་མེ་ཀན་ཞིག་ ཐོང་ན་, ཁོང་རྒུན་ལ་ ཞབ་རྟོག་པེ་ ཚུལ་ལ་ ཞབ་རྟོག་ ཞུ་ཅུག་།
11 ཏེ་རྒ་ ཙོག་སེ་ ཆོའེ་ཚོག་རྒེ་ ཞབ་རྟོག་པ་རྒུ་ནི་ ན་མ་རྒུན་ལ་ ཞེན་མེ་ སི་ཝ་ ཡོ་ཀ་ནེ་ པོ་མོ་ རིག་ ཡོང་རྒོའེ་, ཡང་ ཞེན་མ་རྒུ་ནི་ ཧོར་ལ་ འབར་ མི་རྒོའེ་། ཁོང་རྒུ་ནི་ རང་སེམ་ ཆུན་ཏེ་, ཡང་ ལེ་ཧ་ ཅོ་ཀན་ ཚང་མེ་ན་ ལོ་ཁྱེལ་ཅེན་ ཡོང་རྒོའེ་།
12 ཞབ་རྟོག་པ་ལ་ ན་མ་ ཅིག་ཅིག་ ཅོ་རྒོའེ་རྡེ་ནོག་, ཡང་ ཁོའེ་ ཁོ་རང་ངེ་ ཕྲུ་རྒུ་ རྡང་ ཁང་པེ་ན་ འདེད་ཀན་ ཚང་མ་ལ་ རྒྱ་ལེ་ ཅོའེ་རྡེ་ སྲུལ་ ཉེན་རྒོའེ་། 13 རྒྱ་ལེ་ ཅོའེ་རྡེ་ ཞབ་རྟོག་ ཞུ་ཀན་རྒུན་ལ་, ཞེན་མ་རྒུ་ནི་ཀ་ནི་ སི་ཝ་ ཐོབ་ཏེ་ མང་ངེ་ ཧམ་བ་ ཉམ་པོ་ ཞེན་མ་རྒུན་ལ་ མ་ཤི་ཀ་ ཡི་ཤུའི་ ཧོར་ལ་ ཤེད་ཉེན་ནེན་།
སང་སྤེ་རེ་ རྡེན་འབའ་རྒུན་།
14-15 ཞེན་ ང་ ཁྱེ་རང་ ཉམ་པོ་ འགྱོ་སྤ་ ཐུག་ཅེ་ རེ་ཝ་ ཅོའེན་, འིན་ན་ ཀལ་ཏེ་ ང་ ཡོང་ཅེ་ལ་ འགོར་ནི་, མི་ཞིག་ ཀོན་འཇོག་རྒེ་ ཁང་པེ་ ཕྲོ་ ཀ་ཟུག་རྒེ་ འདེད་རྒོ་ཤེའོ་, ཁྱེ་རང་ལ་ རྒྱུའི་ ཆ་ཅེ་ལ་ འི་ ལབ་ཞ་རྒུན་ འབྲིན་། ཏེ་ ཁང་པ་འབོ་ ཀོན་འཇོག་ སོན་པེ་ ཆོའེ་ཚོག་པོ་ ནོག་, ཀའོ་ ཀོན་འཇོག་རྒེ་ ཀའ་ ཀྲང་པེ་ ཀ་ཝ་ རྡང་ མག་རྡེན་ འིན་།
16 ཐེ་ཚོམ་ མེད་རྡེ་ འི་རྦོ་, ཨ་ཧོ་རྒུ་ནི་ ཏེཏ་པེ་ སང་སྤེར་ ཆེ་ཤོག་རྦོ་ ནོག་།
མ་ཤི་ཀ་ མི་ ཟོབ་ཏེ་ན་ ངོན་འདེ་
ཐུག་ཡིད་རྡེ་ ཁོང་ ཀྲང་པོ་ ལྟན་འདེ་,
ཕོ་ཉ་རྒུ་ནི་ འཇལ་།
ཡང་ རྒྱལ་ཁབ་རྒུ་ནི་ན་ ཤེད་ཏེ་
འཇིག་རྟེན་ སོན་ཏེ་ན་ མི་ མང་པོ་ཞིག་རྒེ་ ཁོང་ལ་ ཏེཏ་པ་ ཅོའེ་།
ཡང་ རྡེ་བ་ཅན་ནེ་ན་ ཟི་ཞིད་ ཉམ་པོ་ ཁྱེར་རེ་ ཛེད་ཏེ་ འིན་།