ཀོན་འཇོག་ ཐུག་ཐེད་ཅེ་ མི་ཙེ་ པུད་ཅེ་།
4
ལྟིང་འཇུག་པེ་ཀ་ ཤེ་སྤ་ སྤུན་རྒུན་, ཀོན་འཇོག་ ཐུག་ཐེད་ཅེ་ཕི་ ང་ཞི་ ཁྱི་ཞ་ ལབ་ཀན་ ནང་ཞིན་ མི་ཙེ་ པུད་ཅེ་ལ་ ཞུའིན་། འོ་ནེ་ ཁྱི་ཞི་ ཏེ་རྒ་ ཙོག་སེ་ མི་ཙེ་ པུད་རྡེན་ ནོག་, འིན་ན་ ཏ་ ཏ་རུང་ང་ མང་ངེ་ ཏོ་ཙོག་སེ་ མི་ཙེ་ པུད་ཅེ་ལ་ ང་ཞི་ ཙོབོ་ ཡི་ཤུའི་ ཚན་ནེ་ཀ་ ཁྱི་ཞ་ སེམ་རུའི་ ཏང་ངེན་ ཞུ་ཝ་ ཞུའིན་། 2 ཙོབོ་ ཡི་ཤུའི་ ཝང་ངེ་ན་ ང་ཞི་ ཁྱི་ཞ་ ཏང་ཀ་ནེ་ ལབ་ཞ་རྒུན་ ཁྱི་ཞ་ རྒྱུའི་ནོག་། 3 ཀོན་འཇོག་རྒེ་ ཐུག་འདོད་པོ་ནི་, ཁྱི་ཞ་ ཏམ་པ་ ཡོང་རྒོ་ཤེའོ་ འིན་, ཏོ་རྦེ་ཕི་ ཁྱི་ཞ་རྒུན་ ལུའི་འབྲེལ་ ངན་པ་རྒུ་ནི་ ཐག་རིང་ལ་ འདོད་ཧེ་། 4-5 ཏེ་ནི་ ཞེན་མ་ ཀོན་འཇོག་ མ་ཤེ་ཀ་ནེ་ ཏེཏ་པ་ མེ་ཀན་རྒུན་ ཙོག་སེ་ ལུའི་འབྲེལ་ ངན་པེ་ འདོད་པ་ མ་ཡོང་ལ་, ཁྱི་ཞ་ རེ་རེ་ལ་ ཏམ་པ་ རྡང་ སི་ཝ་ཅེན་ནེ་ མི་ཙེ་ཞིག་རྒེ་ན་ རང་རང་ངེ་ ཟུྃ་སྤོ་རྒུན་ ཆུན་འདེ་ པོར་ཤེ་ ཤེ་རྡེན་།6 སྤུན་རྒུ་ནི་ ཞི་མེད་ ཉམ་པོ་ ལུའི་འབྲེལ་ པོར་རྡེ་, རང་ངེ་ སྤུན་རྒུན་ལ་ ངན་པ་ ཡང་ འགོམ་ཧོར་ ཏང་ མི་རྒོའེ་། ཏོ་ཙོག་སེ་ ལེ་ཧ་ ཅོ་ཀན་རྒུན་ལ་ ཙོབོ་རྡེ་ ཆེད་པ་ སལ་ལེ་ ཛེ་རྡེན་ ཟེར་རྡེ་, ཁྱི་ཞ་རྒུན་ལ་ ངུལ་ལ་ ང་ཞི་ སྤང་པུད་པེན་། 7 ཀོན་འཇོག་རྒེ་ ཨ་ཧོ་རྒུན་ ཀྲིཔ་རྦེ་ མི་ཙེ་ཞིག་ མ་ནོག་, ཏམ་པེ་ མི་ཙེ་ཞིག་ པུད་ཅེ་ལ་ འབོ་ ཛེད་རྡེ་ནོག་། 8 ཏོ་རྦེ་ཕི་ ཏེ་ ལབ་ཞ་ ཁ་ ཉེན་ནེ་མེད་ ཟེར་ཧན་རྒུ་ནི་, མི་ ལབ་ཞ་ མ་ནོག་, ཀོན་འཇོག་རྒེ་ ལབ་ཞ་ ཁ་ མ་ཉེན་ནེ་ ནོག་། ཀོན་འཇོག་ནི་ ཁྱི་ཞ་, ཁོ་རང་ངེ་ ཏམ་པེ་ ཐུག་ཡིད་ སལ་ལེ་ ཛེད་ཀན་འབོ་ ནོག་།
9 ཏ་ ཅིག་ ཏང་ ཅིག་ལ་ ཤེ་སྤ་ ཅོ་ཅེ་ ཧོར་ལ་ ཁྱི་ཞ་ ཅང་ འབྲི་རྒོའེ་ མེ་ཀག་, ཅེ་ཟེར་ནི་ ཀོན་འཇོག་ ཁོ་རང་ངེ་ ཁྱི་ཞ་རྒུན་ལ་ ཅིག་ ཏང་ ཅིག་ལ་ ཤེ་སྤ་ ཅོ་ཅེའོ་ ལབ་རྦེ་ ཛེད་ཏེ་ འིན་། 10 ཡང་ རྡེན་འབའ་ ཁྱི་ཞ་རྒུ་ནི་ མ་ཀེ་འདོ་ནི་ཡཱེ་ ཡུལ་ སོན་ཏེ་ན་ ཡོ་ཀ་ནེ་ སྤུན་ ཚང་མ་, ཏེ་རྒ་ ཤེ་སྤ་རྦོ་ ལྟན་འདེ་ ནོག་། འིན་ན་ ང་ཞི་ ཤེ་སྤ་ སྤུན་རྒུན་, ཏ་ འི་སང་ མང་ངེ་ ཅོ་ཅེ་ལ་, ང་ཞི་ སེམ་རུའི་ ཏང་ངེན་ ཞུ་ཝ་ ཞུ་འིན་།
11 ཁྱི་ཞི་ མིག་ཞི་རྦོ་ ཞིའི་རྡེ་ཅེན་ནེ་ མི་ཙེ་ པུད་ཅེ་, རང་ངེ་ ལེ་ཧ་ རྡང་ འབྲེལ་ པོར་རྡེ་ ཞེན་མེ་ ལེ་ཧེ་ན་ ཐེ་ཏོག་ མི་ཏང་ཤི་ རྡང་, རང་ངེ་ ལག་པ་ འབད་ཏེ་ མི་ཙེ་ པུད་ཀན་ཞིག་ ཡོང་རྒོ་ཤེ་ ནོག་, ཀ་ཟུག་ ང་ཞི་ ཁྱི་ཞ་རྒུན་ལ་ ལབ་ཏེ་ འིན་འབེན་།
12 ཏུ་ཟུག་ ཅོ་ནི་ ཁྱི་ཞ་རྒུ་ནི་ མི་ཙེ་ པུད་ཚུལ་རྦོ་ལ་, ཏེཏ་པ་ མེ་ཀན་རྒུ་ནི་ མང་ངེ་ སི་ཝ་ ཐོབ་རྦེན་, ཡང་ ཁྱི་ཞ་རྒུན་ལ་ རྒོའེ་ཤེ་ཅན་རྒུ་ནི་ཕི་ ཞན་མེ་ཀ་ ལྟེན་འདེ་ འདེད་ མི་རྒོའེ་།
སོན་པོ་ ལང་ངེ་ ཛེད་ཅེ་ རེ་ཝ་།
13 ཏ་ ཤེ་སྤ་ སྤུན་རྒུན་, ཁྱི་ཞ་ ཤི་ཀན་རྒུན་ལ་ ཆ་ཤེའོ་ ཧ་ཀོ་རྒོ་ཤེ་ ང་ཞི་ འདོད་པ་ ཅོའེན་། ཏེ་ནི་ ཁྱི་ཞ་རྒུན་ལ་ སོན་པོ་ ལྃ་ཤེ་ན་ རེ་ཝ་ མེ་ཀན་རྒུན་ ཙོག་སེ་ ཚེར་ཧ་ མི་ཡོང་། 14 ཡི་ཤུ་ ཀྲོང་ཏེ་ ཡང་ སོན་པོ་ ཞྃ་ཧན་འབོ་ལ་ ཨ་ཧོའེ་ ཏེཏ་པ་ ཅོ་ཅེ་ཀ་ནི་, ཡི་ཤུའི་ཀ་ ཏེཏ་པ་ པོར་རྡེ་ ཤི་ཀན་རྒུན་, ཀོན་འཇོག་རྒེ་ སོན་པོ་ ལང་ངེ་ ཛེད་ཏེ་, ཡི་ཤུ་ ཉམ་པོ་ ཁྱོང་ངེ་ ཛེད་ཅེ་རྦེ་ ཨ་ཧོ་རྒུ་ནི་ ཏེཏ་པ་ ཅོ་ནོག་།
15 ཙོབོ་ ཡི་ཤུའི་ མོལ་ཧན་འབོ་ ང་ཞི་ ཁྱི་ཞ་རྒུན་ལ་ ཤེད་རྡེ་ཡོད་, ཙོབོ་ ལོག་ཏེ་ ཕེབ་རྦེ་ ཏུའི་ལ་, ཨ་ཧོ་ སོན་པོ་ ཡོ་ཀན་རྒུན་, ནེན་ཏེན་ལ་ ཤི་ཀན་རྒུ་ནི་སང་ ངུལ་ལ་ ཁོང་ལ་ ཐུག་རྒེ་ མི་ཆ་། 16 ཧད་ ཆོན་མེ་ན་ ཀཱ་, ཕོ་ཉེ་ སྤོན་འབེ་ སུང་ཧད་ ཏང་ ཀོན་འཇོག་རྒེ་ ཏུང་ཧད་ ཉམ་པོ་, ཙོབོ་ ཁོ་རང་ རྡེ་བ་ཅན་ནི་ ཕེབ་རྦེན་, ཏེ་ནི་ མ་ཤི་ཀེ་ཀ་ ཏེཏ་པ་ པོར་རྡེ་ ཤི་ཀན་རྒུན་ ངུལ་ལ་ སོན་པོ་ ལང་ངེ་ ཛེ་རྡེན་། 17 ཏེ་ ལྟིང་ནི་ འཇིག་རྟེན་ནི་ཀ་ ཨ་ཧོ་ སོན་པོ་ ལུའི་རྡེ་ ཡོ་ཀན་རྒུན་ སྲིན་ནེ་ཀ་ ཏོ་རྒུན་ ཉམ་པོ་ ཙོབོ་ ཡི་ཤུ་ འཇལ་ཤེ་ལ་ ཏག་རྒེ་ ཛེད་རྡེན་, ཡང་ ཨ་ཧོ་རྒུན་ ཙོབོ་ ཉམ་པོ་ ཏུའི་རྒྱུན་ འདེད་རྡེན་། 18 ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ ཏེ་ ལབ་ཞ་རྒུན་ ཅིག་ ཏང་ ཅིག་ལ་ ཤེད་ཏེ་ སེམ་རུའི་ ཏོང་ཧེ་།