ཏི་མོ་ཐི་ ཧོར་།
3
ཏོ་རྦེ་ཕི་ ང་ཞ་ ཁྱི་ཞི་ ནེ་ལུག་རྒེ་ ཧོར་ལ་ རྒྱུའི་མ་ཆ་ འདེད་ མི་ཉེན་ཅེ་ཀ་ནི་, ང་ཞ་རང་ ཨེ་ཐེན་ རྒྱལ་སེ་ན་ འདེད་ཅེ་ ཐག་ཅེད་ཏེ་, 2-3 ང་ཞ་ ཉམ་པོ་ ཀོན་འཇོག་རྒེ་ ཞབ་རྟོག་ ཞུ་འིན་ མ་ཤི་ཀེ་ ཧོར་ལ་ ནེ་ཚུལ་ ཟང་པོ་ ཤེད་ཀན་, ང་ཞི་ ཤེ་སྤ་ སྤུན་, ཏི་མོ་ཐི་ ཁྱི་ཞ་རྒུ་ནི་ཀ་ ཀལ་རྦེན་། ཁོའེ་ ཁྱི་ཞི་ སེམ་ཉིད་རྒུན་ ཤུག་ཤེན་ ཅོ་ཅེ་ རྡང་ ཏེཏ་པེ་ན་ སེམ་རུའི་ ཏྃ་རྡེ་ ནག་པར་རྡོ་ ཐོང་ངེ་ ཏུའི་ལ་ ཁྱི་ཞ་ སུ་ཞིག་ལ་ རེ་ཝ་རྦོ་ ཕང་ མི་ཤུ་ཅེ་ ང་ཞི་ འདོད་པ་ ཅོའེན་། ཡུ་ཙོག་སེ་ ནག་པར་རྡོ་རྒུན་ ཨ་ཧོའེ་ཕི་ ཧོའེ་རྡེ་ ཡོ་ཀན་འབོ་ ཁྱི་ཞ་རྒུན་ལ་ རྒྱུའི་ནོག་། 4 ཅེ་ཟེར་ནི་ ང་ཞ་ ཁྱི་ཞ་ ཉམ་པོ་ ཡོད་ཟ་ནི་, ཨ་ཧོ་རྒུན་ལ་ ནག་ ལྟན་ཅེན་ ཟེར་རྡེ་ ཁྱི་ཞ་ ཤང་ ཧུལ་ལེ་ཡོད་པེན་། ཡང་ ཏེ་རྒ་ འདྲན་འདྲ་ ཆེན་ ཡོ་ཀན་འབོ་ ཁྱི་ཞ་ རྒྱ་ལེ་ ཅོའེ་རྡེ་ རྒྱུའི་ནོག་།5 ཏོ་རྦེ་ཕི་ ང་ སྲེན་འདེ་ འདེད་ མ་ཉེན་པེ་, ངེ་ ཏི་མོ་ཐི་ ཁྱི་ཞ་རྒུ་ནི་ ཏེཏ་པ་ རྟེམ་པོ་ ལུའི་རྡེ་ འདུག་རྒེ་ མི་འདུག་ ལྟ་ལ་ ཀལ་རྦེན་། ཐི་ཚོད་ལྟ་ཀ་ནེ་ ཚོད་ཀན་ རྡུད་རྡེ་ ཁྱི་ཞ་ ཏེཏ་པ་ ཕང་ཅེ་ ཚོད་ལྟེ་ན་ པུད་ཅུག་ཏེ་, ང་ཞི་ ཁྱི་ཞི་ ཕྲོ་ ཙོན་འགྲུའི་ ཅོ་ཀན་རྒུན་ ཕན་མི་ཐོག་ འགྱུར་ཤུག་སྲིད་ཅེ་ ནོག་ སམ་འདེ་ ང་ འཇིག་རྡེ་ཡོད་པེན་།
6 འིན་ན་ ཁྱི་ཞ་རྒུ་ནི་ ཏེཏ་པ་ རྡང་ ཤེ་སྤེ་ ཧོར་ལ་ ནེ་ཚུལ་ ཟང་པོ་ ཁུར་རྡེ་ ཏི་མོ་ཐི་ ཏག་ས་རང་ ང་ཞི་ཀ་ ལོག་ཏེ་ ལེཔ་། ཁྱི་ཞ་རྒུ་ནི་ ང་ཞ་ ཁྱི་ཞ་ ཉམ་པོ་ ཡོ་ཀ་ནེ་ ཏུའི་རྒུན་ ཐེད་པོ་ ཉམ་པོ་ འི་ཏུ་ ཅོ་ཅེ་ ཡང་, ང་ཞ་ ཁྱི་ཞ་ ཐུག་ཅེ་ལ་ འདོད་པ་ མང་པོ་ ཡོ་ཀན་ ཙོག་སེ་, ཁྱི་ཞ་ལ་ ཐུག་ཅེ་ལ་ འདོད་པ་ ཡོ་ཀན་རྒུན་ ཏི་མོ་ཐི་ ཤེད་རྡེ་རག་། 7 ཏོ་རྦེ་ཕི་ ང་ཞ་ ནག་ ཏང་ པར་རྡོ་ ཐོང་ངེན་ ཡོད་ནྃ་, ཤེ་སྤ་ སྤུན་རྒུན་, ཁྱི་ཞ་ ཏེཏ་པེ་ན་ རྟེམ་པོ་ འདེད་ཅེའོ་ ཚོར་རྡེ་, ང་ཞ་ སེམ་རུའི་ ཐོབ་། 8 ཁྱི་ཞ་རྒུ་ནི་ ཙོབོ་རྡེ་ན་ ཏེཏ་པ་ རྟེམ་པོ་ པོར་རྦེ་, ང་ཞི་ སེམ་ལ་ སོ་མ་ མི་ཙེ་ ཐོབ་།
9 ཁྱི་ཞི་ ཅོའེ་རྡེ་ ཙམ་ཤིག་ རྒ་མོ་ ང་ཞ་ ཀོན་འཇོག་རྒེ་ ཧུ་འདུན་ལ་ ཐོབ་ཀན་འབོ་ལ་, ང་ཞི་ ཀོན་འཇོག་ལ་ ཐུག་ཞེ་ཆེ་ འདྲན་འདྲ་ ཀ་ཟུག་རྒེ་ ཞུ་ཉེན་ནེན་? 10 ཡང་ ཁྱི་ཞི་ ཏེཏ་པེ་ན་ རྒོའེ་ཤེ་ ལུའི་རྡེ་ ཡོ་ཀན་ ཚང་མ་ ཧང་ཅེ་ལ་ ང་ཞ་ ཡང་ ཁྱི་ཞ་རྒུན་ འདུན་ལ་ ཐུག་ཅུག་རྒེ་ ཛེད་ ཞུའིན་, ང་ཞི་ ཚན་ཉིན་ མེད་རྡེ་ ཀོན་འཇོག་ལ་ ཉིང་ངེ་ ཐིལ་ནི་ འདོད་པ་ སྲན་ཀྲེ་ ཉམ་པོ་ མོ་ལམ་ ཞུའིན་།
11 ཏ་ ཀོན་འཇོག་ ཨ་ཧོའེ་ ཡབ་ ཏང་, ཨ་ཧོའེ་ ཙོབོ་ ཡི་ཤུ་ ཉ་ཧེ་, ང་ཞི་ཕི་ ཡང་ ཁྱི་ཞ་རྒུན་ ཐུག་ཅེ་ ལམ་འབོ་ ལག་མོ་ ཅོའོ་ ཛེད་ཤིག་། 12 ཡང་ ཙོབོ་རྡེ་ ཁྱི་ཞ་རྒུ་ནི་ ཤེ་སྤ་རྦོ་ ཁྱི་ཞ་ ཅིག་ ཏང་ ཅིག་རྒེ་ན་ མ་ཚེད་, ཞེན་མ་ ཚང་མེ་ཕི་ལ་ རྒྱེ་ཤུག་རྒེ་ ཛེད་ཤིག་, ཀ་ཟུག་ ཁྱི་ཞ་རྒུ་ནི་ཕི་ ང་ཞི་ ཤེ་སྤ་རྦོ་ ཡོད་། 13 ཨ་ཧོའེ་ ཙོབོ་ ཡི་ཤུ་ ཁོ་རང་ངེ་ ཏམ་པེ་ མི་རྒུན་ ཉམ་པོ་ ཕེབ་རྦེ་ ཏུའི་ལ་, ཁྱི་ཞ་ ཚང་མ་ ཀོན་འཇོག་, ཨ་ཧོའེ་ ཡབ་ ཧུ་འདུན་ལ་ ཏམ་པ་ རྡང་ རྐྱོན་མེད་ ལུའི་ཤེ་ལ་, ཙོབོ་ ཡི་ཤུའི་ ཁྱི་ཞ་ སེམ་ཤུག་ཤེན་ ཛེད་ཤིག་།