ཐེ་ས་ལོ་ནི་ཀེ་ན་ པ་འུ་ལུའི་ ཆག་ལེ་།
2
ངེ་ ཤེ་སྤ་ སྤུན་རྒུན་, ང་ཞི་ ཁྱི་ཞ་རྒུན་ ཉམ་པོ་ ཏུའི་ པུད་ཀན་འབོ་ ཕན་མི་ཐོག་ མན་ཀན་ ཁྱི་ཞ་རང་ལ་ རྒྱུའི་ནོག་། 2 ཁྱི་ཞ་ ཡོད་ས་ ཐེ་ས་ལོ་ནི་ཀེ་ ཡོང་ངེ་སང་ ངུལ་ལ་, ཕི་ལིབ་པི་ རྒྱལ་སེ་ན་ ང་ཞ་ ཙམ་ཤིག་ ནག་ ཏང་ ཁྲེལ་རྦ་ ལྟན་ཀན་འབོ་ ཁྱི་ཞ་རྒུན་ལ་ རྒྱུའི་ནོག་། འིན་ན་ ཐེ་ས་ལོ་ནི་ཀེ་ན་ རྒྱཔ་འགལ་ སྲན་ཀྲེ་ ཐོང་ངེ་རྡང་, ཨ་ཧོའེ་ ཀོན་འཇོག་རྒེ་ ཁྱི་ཞ་རྒུན་ལ་ ཁོང་ངེ་ ནེ་ཚུལ་ ཟང་པོ་ འཇིའི་ མེད་པ་ ཤེད་ཅེ་ལ་ ང་ཞ་ སེམ་རུའི་ སལ་། 3 ང་ཞི་ ཆོའེ་ཤེད་ཀན་རྒུན་ ང་ཞ་ ནོར་རྡེ་ ཡ་ རང་འདོད་ ཡང་ འགོམ་ཧོར་ ཏང་ཅེ་ འདོད་པེ་ ཅོའེ་རྡེ་ མན་འབེན་། 4 འིན་ན་ ཀོན་འཇོག་རྒེ་ ནེ་ཚུལ་ ཟང་པོ་ ལྟེད་རྡེ་ ཛེད་ཅེ་ལ་ འོའེ་སྤ་ཅེན་ ཐེའེ་ཛེད་ཀ་ནེ་ མི་རྒུན་ ཙོག་སེ་ ང་ཞི་ ཤེད་རྡེ་ཡོད་། ང་ཞི་ འདོད་པ་རྦོ་ མི་རྒུན་ ཐེད་ཅུག་ཅེ་ མ་ནོག་ ཀོན་འཇོག་ ཐུག་ཉེ་ ཅུག་ཅེའོ་ འིན་, ཁོང་ངེ་ ཨ་ཧོ་རྒུ་ནི་ ཉིང་ངེ་ ལྟག་ཅེད་ ཛེད་རྡེ་ནོག་། 5 ང་ཞ་ ཞེ་རྡང་ ཡོད་ཏེ་ ཁྱི་ཞ་ ལྕེ་ ཀོལ་ཤེ་ ཡང་ ཁྱི་ཞི་ ཡ་ཏོ་ འིན་ཟུན་ མ་ནི་ མ་ཏྃ་ཀན་འབོ་ ཁྱི་ཞ་ རྒྱུའི་ནོག་, ཡང་ ཀོན་འཇོག་ ཏོ་རྦེ་ སྤང་པོ་ འིན་, 6 མ་ཚེད་ ཁྱི་ཞ་ འིན་འགྲོ་ ཡང་ ཞེན་མ་, ང་ཞི་ མི་ཀ་ནི་ རྟོད་པ་ ཐོབ་ཅེ་ རེ་ཝ་ མ་པོར་རྦེན་།7 མ་ཤི་ཀེ་ ཧུ་ཚབ་ འིན་ཅེ་རྦེ་, ང་ཞི་ ཁྱི་ཞི་ཀ་ནི་ ཐོབ་ཏང་རྒུན་ སོད་ ཉེན་ཅེ་ ཡོད་པེན་། འིན་ན་ ཨ་མེ་ རང་ངེ་ ཕྲུ་རྒུ་རྒུན་ལ་ པི་རྦི་ ཏྃ་རྡེ་ ལྟ་ཏོག་ ཅོའོ་ ཙོག་སེ་ ང་ཞ་ལ་ ཁྱི་ཞ་ ཉམ་པོ་ འཇམ་པོ་ ཡོད་པེན་། 8 ཁྱི་ཞ་རྒུན་ལ་ ང་ཞི་ ཤེ་སྤ་ ཧོཔ་ ཅོའེ་རྦེ་, ཁྱི་ཞ་ ཉམ་པོ་ ཀོན་འཇོག་རྒེ་ ནེ་ཚུལ་ ཟང་པོ་ ཅིག་པོ་ མག་པེ་, ང་ཞ་རང་ངེ་ མི་ཙེ་ལ་ རྒོ་ཅེ་ལ་ ཐེད་རྡེ་ཡོད་པེན་།
9 ཤེ་སྤ་ སྤུན་རྒུན་, ང་ཞི་ པར་རྡོ་ ཁུར་རྡེ་ ལེ་ཧ་ ཅོ་ཀན་འབོ་ ཁྱི་ཞ་རྒུན་ལ་ ནེན་ཏེན་ འི་ཏུ་ ཡོད་ཁྲོ་; སྤེར་ན་ ཀོན་འཇོག་རྒེ་ ནེ་ཚུལ་ ཟང་པོ་ ཁྱི་ཞ་རྒུན་ལ་ ཤེད་ཟ་ནི་, སུ་ཞི་ལ་ པར་རྡོ་ མི་ཐོང་ཅེ་ལ་ ང་ཞ་རང་ངེ་ རྒོའེ་ཤེ་ཅན་རྒུ་ནི་ཕི་ ང་ཞི་ ཚེན་ཉིན་ མེད་རྡེ་ ལེ་ཧ་ ཅོའེ་རྦེན་། 10 ཁྱི་ཞ་ ཙོབོ་རྡེ་ཀ་ ཏེཏ་པ་ ཅོ་ཀན་རྒུ་ནི་ ཕྲོ་, ང་ཞི་ ཤོད་ལམ་རྒུན་ སང་མ་, ཀྲང་པོ་ རྡང་ རྐྱོན་མེད་ ཡོ་ཀན་འབེ་ སྤང་པོ་ ཁྱི་ཞ་ ཚང་མ་ རྡང་ ཀོན་འཇོག་ ནོག་། 11 ཡང་ ཨ་རྦེ་ རང་ངེ་ ཕྲུ་རྒུ་ལ་ ཡ་ཤ་ ཉམ་པོ་ ལྟ་ཏོག་ ཅོ་ཀན་ ཙོག་སེ་ ང་ཞི་ལ་ ཁྱི་ཞ་ རེ་རེ་ ལྟ་ཏོག་ ཅོ་ཀན་འབོ་ ཁྱི་ཞ་ རྒྱུའི་ནོག་། 12 ང་ཞི་ ཁྱི་ཞ་རྒུན་ལ་ ཀོན་འཇོག་ལ་ སི་ཝ་ ཐོབ་ཅེ་ཅེན་ནེ་ མི་ཙེ་ཞིག་ པུད་ཅེ་ལ་ སེམ་རུའི་ ཏང་ངེན་ ཞུ་ཝ་ པུ་ལེ་ཡོད་, ཅེ་ཟེར་ནི་ ཁོང་ངེ་ ཁྱི་ཞ་རྒུན་ལ་ ཁོ་རང་ངེ་ རྒྱལ་སྲིད་ ཏང་ སྤལ་ལེ་ན་ འདེད་རྡེ་ལ་ འབོ་ ཛེད་།
13 ང་ཞི་ ཏུའི་རྒྱུན་ ཀོན་འཇོག་ལ་ ཐུག་ཞེ་ཆེ་ ཞུ་ཡོད་, ཅེ་ཟེར་ནི་ ང་ཞི་ ཀོན་འཇོག་རྒེ་ ཀའ་ ཤེད་ཟ་ནི་, ཁྱི་ཞ་རྒུ་ནི་ ཏོ་རྒུན་ མི་ སྤེ་ར་ མ་ནོག་, ཀོན་འཇོག་རྒེ་ ཀའ་ འིན་ཅེ་རྦེ་ ཉེན་, ཀའོ་ ནེན་ཏེན་ ནོག་། ཡང་ ཏེཏ་པ་ ཅོ་ཀན་རྒུ་ནི་ མི་ཙེ་ན་ ཏེ་ ཀའ་རྦེ་ ཆག་ལེ་ ཛེད་རྡེན་ ནོག་།
14 ཤེ་སྤ་ སྤུན་རྒུན་, ཁྱི་ཞ་ ཡ་ཧུ་འདཱེ་ ཡུལ་ལེ་ན་ ཀོན་འཇོག་རྒེ་ ཆོའེ་ཚོག་ ཀའོ་ མ་ཤི་ཀ་ ཡི་ཤུའི་ འིན་, ཏོ་རྒུན་ འགྲུལ་ཧ་ནེ་ ལམ་མེ་ཀ་ འགྲུལ་རྡེ་ ནོག་། ཏོ་རྒུན་ལ་ ཡ་ཧུ་འདཱ་པ་རྒུ་ནི་ ནག་ ལྟན་ནེ་ ཙོག་སེ་, ཁྱི་ཞ་རྒུན་ལ་ རང་ཡུལ་ལེ་ མི་རྒུ་ནི་ ནག་ལྟན་འདེ་ ནོག་། 15 ཏེ་རྒ་ ཙོག་སེ་ ཡ་ཧུ་འདཱ་པ་རྒུ་ནི་ ཙོབོ་ ཡི་ཤུ་ མ་ཚེད་, ངུལ་མེ་ ལུང་རྟོན་པ་རྒུན་ནྃ་ སེད་ཏེ་ འིན་འབེན་, ཡང་ ང་ཞ་རྒུན་ལ་ ནག་ ལྟན་། ཀོན་འཇོག་ ཏོ་རྒུ་ནི་ཀ་ ཐུག་ཐེད་རྡེ་ མ་ཛེད་། ཡང་ ཏོ་རྒུ་ནི་ མི་ཚང་མ་ལ་ རྒྱཔ་འགལ་ ཅོའེ་རྡེ་ 16 ཡ་ཧུ་འདཱ་པ་ མན་ཀན་རྒུན་ལ་ ཐར་པ་ ཐོབ་ཅེ་ ནེ་ཚུལ་ ཟང་པོ་ ཤེད་ཅེ་ནེ་ ང་ཞ་ རྒག་ཅེ་ ཙོན་འགྲུའི་ ཅོའེ་། ཏུ་ཟུག་ ཅོ་ཅེ་ནི་, ཁོང་རྒུ་ནི་ རྡིག་པ་རྦོ་ ས་རྒེན་ སོང་འདེ་ ཚེད་ནི་ ཐལ་རྡེ་ ཆ་ཅེ་ཀ་ནི་, ཏ་ ཀོན་འཇོག་རྒེ་ ཐུག་སྲོ་ སོན་ཏེ་ ཁོང་རྒུ་ནི་ཀ་ པབ་ཏེ་ ནོག་།
པ་འུ་ལུ་ ཁོང་རྒུན་ ཉམ་པོ་ ཡང་ ཐུག་ཅེ་ འདོད་པ་།
17 ཤེ་སྤ་ སྤུན་རྒུན་, ང་ཞ་རྒུན་ སེམ་ནི་ མ་ནོག་, ཟུྃ་སྤེ་ ཐོག་ནི་ ཁྱི་ཞ་ ཉམ་པོ་ ཏུའི་ ཉུང་ཙེ་ཞིག་རྒེ་ཕི་ ཐག་རིང་ལ་ ཕྃ་རྡེ་ ཡོད་ ཟ་ནི་ལ་, ང་ཞི་ ཁྱི་ཞ་རྒུན་ ཡོད་ས་ ལོག་ཏེ་ ཡོང་ཅེ་ ཙོན་འགྲུའི་ མང་པོ་ ཅོའེ་རྦེན་, ཅེ་ཟེར་ནི་ ང་ཞ་, ཁྱི་ཞ་རྒུན་ ཐོང་ཅེ་ འདོད་པ་ ཧོཔ་ ཡོད་པེན་། 18 ང་ཞ་རྒུན་ ལོག་ཏེ་ ཁྱི་ཞི་ཀ་ ཡོང་ཉིན་ ཡོད་པེན་, ནེན་ཏེན་ལ་ ང་ པ་འུ་ལུའི་ ལོག་ཏེ་ ཡོང་ཅེ་ ཙོན་འགྲུའི་ ལེན་ མང་པོ་ ཅོའེ་རྦེན་, འིན་ན་ རྡུད་རྡེ་ ང་ཞ་ རྒག་རྐྱིལ་ ཏང་།