ཐེ་ས་ལོ་ནི་ཀེ་ ཆོའེ་ཚོག་ལ་ པ་འུ་ལུའི་ ཆག་འབྲི་ ཏང་པོ་།
པ་འུ་ལུའི་ ཆོག་ནི་ འཇུ་།
1
ང་ པ་འུ་ལུ་, སེ་ལེ་a རྡང་ ཏི་མོ་ཐི་ ཚང་ཀེ་ ཆོག་ནི་ འི་ ཡི་རྒེ་རྦོ་ ཐེ་ས་ལོ་ནི་ཀེ་ རྒྱལ་སེ་ ཀོན་འཇོག་ ཡབ་ ཏང་ ཙོབོ་ ཡི་ཤུ་ མ་ཤི་ཀེ་ འིན་ཀ་ནེ་ ཆོའེ་ཚོག་ལ་ འབྲི་འིན་། ཀོན་འཇོག་རྒེ་ ཞིའི་རྡེ་ རྡང་ ཐུག་ཞེ་ ཁྱི་ཞ་ ཚང་མ་ལ་ ཐོབ་ཤིག་།ཐེ་ས་ལོ་ནི་ཀེ་ ཆོའེ་ཚོག་རྒེ་ ཏེཏ་པེ་ ཧོར་།
2 ང་ཞི་ མོ་ལམ་མེ་ན་ ཁྱི་ཞ་རྒུན་ འི་ཏུ་ ཅོའེན་ ཏུའི་རྒྱུན་ ཀོན་འཇོག་ལ་ ཁྱི་ཞ་ ཚང་མེ་ཕི་ ཐུག་ཞེ་ཆེ་ ཞུ་འིན་། 3 ང་ཞི་ ཀོན་འཇོག་, ཨ་ཧོ་རྒུ་ནི་ ཡབ་ལ་ མོ་ལམ་ ཞུ་ཟ་ནི་, ཁྱི་ཞ་རྒུ་ནི་ ཏེཏ་པ་རྦོ་ ལག་ལེན་ནེ་ན་ ཁྱོང་ཅེ་, ཤེ་སྤེ་ན་ ཞེན་མ་ ཞབ་རྟོག་ ཞུ་ཅེ་ རྡང་ ཙོབོ་ ཡི་ཤུ་ མ་ཤི་ཀེ་ན་ རེ་ཝ་ རྟེམ་པོ་ པོར་ཤེ་རྦེ་, ཟོད་པ་ ཅོ་ཉེན་ཅེ་རྒུན་ འི་ཏུ་ ཅོའེན་།
4 ཤེ་སྤ་ སྤུན་རྒུན་, ཀོན་འཇོག་རྒེ་ ཁྱི་ཞ་རྒུན་ལ་ ཤེ་སྤ་ ཛེད་ཏེ་ ཁོ་རང་ངེ་ མི་རྒུན་ འདམ་མེ་ ཛེད་ཀན་འབོ་ ང་ཞ་ རྒྱུའི་ཡོད་། 5 ཅེ་ཟེར་ནི་ ང་ཞི་ ཁྱི་ཞ་རྒུན་ལ་ ནེ་ཚུལ་ ཟང་པོ་ ཤེད་ཟ་ནི་, སྤེ་ར་ ཅིག་པོ་ རྒྱུད་ཏེ་ མན་ ཀོན་འཇོག་རྒེ་ ཤུག་ ཉམ་པོ་ ཤེད་པེན་, མ་ཚེད་ ང་ཞི་ ཤེད་ཀན་རྒུན་ རྡེན་འབའ་ འིན་ཀན་འབོ་ལ་ ཏམ་པེ་ ཐུག་ཡིད་རྡེ་ ཁྱི་ཞ་རྒུན་ལ་ ཉིང་ངེ་ ཐིལ་ནི་ རྡེན་ཆེ་ཤུག་། ཡང་ ང་ཞི་ ཁྱི་ཞ་རྒུ་ནི་ ཕྲོ་ མི་ཙེ་ པུད་ཚུལ་རྦོ་, ཁྱི་ཞ་རྒུ་ནི་ ཕན་ཏོག་རྒེ་ཕི་ འིན་ཀན་འབོ་, ཁྱི་ཞ་རྒུན་ལ་ རྒྱུ་ནོག་། 6 ང་ཞ་ རྡང་ ཙོབོ་ ཡི་ཤུ་ འགྲུལ་ཧ་ནེ་ ལམ་མེ་ཀ་ ཁྱི་ཞ་རྒུན་ འགྲུལ་། ཁྱི་ཞ་རྒུན་ལ་ མ་མང་པོ་ ནག་ ཐོང་འདེ་ལ་, ཁྱི་ཞ་རྒུ་ནི་ ཏམ་པེ་ ཐུག་ཡིད་རྡེ་ སལ་ཧ་ནེ་ ཐེད་པོ་ ཉམ་པོ་ ཏེ་ ཁྲིན་འབོ་ ནེན་། 7 ཏོ་རྦེ་ ཅོའེ་རྡེ་ མ་ཀེ་འདོ་ནི་ཡཱ་ རྡང་ ཨ་ཀ་ཡཱེ་ ཡུལ་རྒུ་ནི་ན་ སྤུན་ ཚང་མེ་ཕི་ ཁྱེ་རང་རྒུན་ སྤེ་ཞིག་ལ་ འགྱུར་རྡེ་ ནོག་། 8 ཁྱི་ཞ་རྒུན་ རྒྱུད་ཏེ་ ཙོབོ་རྡེ་ ཀའ་འབོ་, མ་ཀེ་འདོ་ནི་ཡཱ་ རྡང་ ཨ་ཀ་ཡཱ་ ཡུལ་རྒུ་ནི་ན་ ཕེལ་ཤེ་ མ་ཚེད་, ཀོན་འཇོག་རྒེ་ཀ་ ཁྱི་ཞི་ ཏེཏ་པ་ ཅོ་ཀ་ནེ་ ནེ་ཚུལ་རྦོ་ ཀང་ལུང་ས་ ལེཔ་། ཏེ་ ཧོར་ལ་ ང་ཞི་ ཅང་ ཟེར་རྒོའེ་ མི་འདུག་། 9 ཡང་ ཏེ་ ཡུལ་མི་རྒུ་ནི་ མི་ཚང་མ་ལ་ ཁྱི་ཞ་རྒུ་ནི་ ང་ཞ་ ཛ་ཝེ་ ཚུལ་ལ་ རྒ་སུའི་ ཅོ་ཀན་ འདང་ ཁྱི་ཞི་ ཧུ་འདྲ་ ཅོལ་ཤེ་ ཕྃ་རྡེ་ རྡེན་འབེ་ སོན་པོ་ ཀོན་འཇོག་ལ་ ཞབ་རྟོག་ ཞུ་ཅེ་རྒུན་ ཤེད་ཏུག་། 10 མ་ཚེད་ ཀོན་འཇོག་རྒེ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཀན་ སྲེ་ ཡི་ཤུ་, རྡེ་བ་ཅན་ནི་ ལོག་ཏེ་ ཕེབ་ཅེ་ཕི་, ཁྱི་ཞ་རྒུན་ སྲུྃ་རྡེ་ ཡོ་ཀན་འབེ་ ཧོར་ལ་ ཤེད་ཏུག་། ཨ་ཧོ་རྒུན་ ཀོན་འཇོག་ནི་ ཡོང་ཅེ་ཅེན་ནེ་ ཐུག་སྲོའེ་ཀ་ནི་ རྐྱོབ་རྦེ་ ཛེད་ཀན་འབོ་ ཡི་ཤུ་ ནོག་།