ཐེ་ས་ལོ་ནི་ཀེ་ ཆོའེ་ཚོག་ལ་ པ་འུ་ལུའི་ ཆག་འབྲི་ ཏང་པོ་།
ཐེ་ས་ལོ་ནི་ཀེ་ ཆོའེ་ཚོག་ལ་ པ་འུ་ལུའི་ ཆག་འབྲི་ ཏང་པེ་ ཧོར་།
འི་ ཆག་འབྲི་རྦོ་ ཙོབོ་ ཡི་ཤུའི་ ཧུ་ཚབ་ པ་འུ་ལུའི་ འབྲི་ཛེད་ཀན་འབོ་ ཨ་ཧོ་ལ་ འི་ ཆག་འབྲི་ རྡང་ ངུལ་མེ་ ཆོའེ་ཚོག་རྒེ་ འུ་རྐྱོང་རྒུ་ནི་ སྤང་པོ་རྒུ་ནི་ རྒྱུའི་ ཆ་ནོག་།
ཆོའེ་ལ་ ཁེ་སྤ་རྒུ་ནི་ པ་འུ་ལུའི་ འི་ ཆག་འབྲི་རྦོ་ ཀོ་རིན་ཐི་ རྒྱལ་སེ་ན་ ཡོད་ཟ་ནི་ འབྲི་ཛེད་ཀན་འབོ་ རྡེན་ཆེ་རྡེ་ནོག་། ཁོང་ངེ་ འི་ ཆག་འབྲི་རྦོ་ ཡི་ཤུ་ ཀྲོྃ་རྡེ་ སོན་པོ་ ཞྃ་རྡེ་ ལྟིང་ནི་, ལོ་ ཅུར་རྒུ་ ནེ་ ཉི་ཤུ་ ཉེ་ཁོར་ལ་ འབྲི་ཛེད་ཏེ་ ནོག་།
ཐེ་ས་ལོ་ནི་ཀེ་ རྒྱལ་ས་ མ་ཀེ་འདོ་ནི་ཡཱེ་ ཡུལ་ཞོང་ངེ་ན་ ཚང་མེ་སང་ ཁག་ཅེན་ རྒྱལ་ས་ཞིག་ འིན་འབེན་། ཏོ་ རྒྱམ་ཚོའེ་ ཐ་མ་ ཆག་རྡེ་ མ་ ཁག་ཅེན་ འདང་ ཆུག་པོ་ རྒྱལ་ས་ཞིག་ འིན་འབེན་། ཁོང་ འགོ་མ་ ཏུ་རུ་ རྐྱོད་ཟ་ནི་ ཡ་ཧུ་འདཱ་པ་རྒུ་ནི་ ཏེ་ རྒྱལ་སེ་ མི་རྒུན་ལ་ པ་འུ་ལུ་ རྒྱཔ་འགལ་ ཅོའེ་རྡེ་ ནག་ ལྟན་ཅུག་ཅེ་ཀ་ནི་ ཁོང་ ཏུ་རུ་ ཏུའི་ ཉུང་ཙེ་ཞིག་ མ་ནི་ ཞུའུ་ མ་ཉེན་ནེ་ལ་ ཕྃ་རྡེ་ ཆ་རྒོའེ་། ཁོང་ ཕང་འདེ་ ཆ་ཟ་ནི་ ཏུ་རུ་ མ་ཤི་ཀེ་ན་ ཏེཏ་པ་ ཅོ་ཀན་ སོ་མ་ ཁ་ཅིག་ མ་ནི་ མེད་པེན་།
པ་འུ་ལུའི་ འི་ ཆག་འབྲི་ འབྲི་ཅེ་ རྒྱུ་ཚན་ནི་:
ཏང་པོ་, ཏེཏ་པ་ སོ་མ་ ཅོ་ཀན་རྒུན་ལ་ རྡུ་ངལ་ལེ་ན་ རེ་ཝ་ མི་ཕང་ཤི་ སེམ་རུའི་ སལ་ཅེ་།
ཉི་སྤ་, ཀོན་འཇོག་ ཐུག་ཐེད་ཀ་ནེ་ མི་ཙེ་ པུད་ཅེ་ན་ ལབ་ཞ་ སལ་ཅེ་།
སུམ་པ་, ཁོང་རྒུན་ལ་ ཏེཏ་པ་ཅེན་ ཤི་ཀན་རྒུན་ལ་ མ་འོང་པེ་ ཏུའི་ན་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་ཤེ་ ལབ་ཞ་རྒུན་ རྒྱུད་ཏེ་ སེམ་རུའི་ སལ་ཅེ་རྒུན་ འིན་འབེན་༎