ཀོ་ལོ་སི་པ་ 4

སྤོན་འབོ་རྒུན་, ཁྱི་ཞི་ ཚེ་ཡོག་རྒུན་ལ་ འོའེ་སྤ་ རྡང་ རྒྱ་ལེ་ ཅོའེ་ཧེ་, ཅེ་ཟེར་ནི་ ཁྱི་ཞ་རྒུན་ལ་ རྡེ་བ་ཅན་ནེ་ན་ ཞུ་ཧ་ནེ་ སྤོན་འབོ་ ཡོ་ཀན་འབོ་ རྒྱུའི་ནོག་།

མོ་ལམ་མེ་ཕི་ སེམ་རུའི་།

2 ཁག་ཅེན་ ཐེའེ་རྡེ་ མོ་ལམ་ ཞུ་ཅེ་པོ་ མ་ནི་ ཕང་ མི་རྒོའེ་། ཡང་ མོ་ལམ་ ཞུ་ཟ་ནི་, ཁྱི་ཞི་ སམ་བ་ ཆུན་འདེ་ ཀོན་འཇོག་ལ་ ཐུག་ཞེ་ཆེ་ ཞུའི་ཧེ་། 3 ཙོབོ་རྡེ་ ལམ་པེ་ ཛེད་ཏེ་ མ་ཤི་ཀེ་ ཧོར་ལ་ སང་སྤེ་རེ་ ཐབ་པོ་ ཤེད་ཉེན་ཅེ་ལ་ ང་ཞི་ཕི་ལ་ མོ་ལམ་ ཞུའི་ཧེ་, ཀ་རྦེ་ ཅོའེ་རྡེ་ ང་ ཙོན་ནེ་ན་ འིན་། 4 ཡང་ ང་ ཏེ་ ཁྲིན་འབོ་ སལ་སྤོ་ ཅོའེ་རྡེ་ ཤེད་ཉེན་ཅེ་ལ་ མོ་ལམ་ ཞུའི་ཧེ་, སལ་སྤོ་ ཅོའེ་རྡེ་ ཤེད་ཅེའོ་ ངེ་ ཁག་ཁུར་ ནོག་།

5 ཏེཏ་པ་ མེ་ཀན་རྒུན་ ཉམ་པོ་ འབྲེལ་ ཅོ་ཟ་ནི་ ཁོང་རྒུན་ ཏེཏ་པེ་ན་ ཁྱོང་ཅེ་ལ་ ཧབ་ ཐོབ་ཀན་ ཚང་མ་ ཤེ་རབ་ ཉམ་པོ་ ཀོལ་ཧེ་། 6 ཁྱི་ཞི་ སྤེ་ར་ རྡེ་མོ་ རྡང་ འཇམ་པོ་ ཉམ་པོ་ ཏང་ནི་ ཁྱི་ཞི་ ཁོང་རྒུན་ལ་ ལེན་ ཚང་མ་ རྒྱ་ལེ་ ཅོའེ་རྡེ་ ཏང་ ཉེ་ནེན་།

ལྟིང་འཇུག་རྒེ་ ལབ་ཞ་ རྡང་ འཇུ་ ཞུའི་།

7 ཏི་ཁི་ཀུའི་ ངེ་ ཧོར་ལ་ ནེ་ཚུལ་ ཚང་མ་ ཁྱི་ཞ་རྒུན་ལ་ ཞིབ་སལ་ ཅོའེ་རྡེ་ ཤེད་རྡེ་ནོག་། ཁོ་ནི་ ངེ་ ཤེ་སྤ་ སྤུན་, ཞབ་རྟོག་པ་ ཡང་ ངེ་ ཁྲོ་པ་ ཙོབོ་རྡེ་ན་ ལོ་ཁྱེལ་ཅེན་ ལེ་ཧ་ ཅོ་ཀན་ཞིག་ འིན་། 8 མིག་ས་ལེ་ ཁྱི་ཞ་རྒུན་ལ་ སེམ་རུའི་ ཏང་ཅེ་ རྡང་ ང་ཞི་ ནེ་ལུག་རྒུན་ ཧ་ཀོ་ ཉེན་ཅེ་ཕི་, ངེ་ ཁོ་ ཁྱི་ཞ་རྒུན་ས་ ཀ་ལེ་ཡོད་། 9 ཁོ་ ཉམ་པོ་ ཨོ་ནེ་སི་མུའི་ལ་ ཀལ་ལེན་, ཨོ་ནེ་སི་མུའི་ མ་ ལོ་ཁྱེལ་ཅེན་ ཞབ་རྟོག་པ་ རྡང་ ཤེ་སྤ་ སྤུན་, ཁྱི་ཞ་རང་ངེ་ ཕྲོ་ནི་ ཅིག་ ནོག་། ཁོང་རྒུ་ནི་ ཁྱི་ཞ་ འི་རུ་ ཆེན་ ཡོ་ཀན་ ཚང་མེ་ ཧོར་ལ་ ཤེད་རྡེན་།

10 ངེ་ ཁྲོ་པ་ ཙོན་པ་ ཨ་རི་ཏར་ཀུ་ ཁྱི་ཞ་རྒུན་ལ་ འཇུ་ ཞུ་རུག་, ཡང་ མར་ཀུའི་ འབཱར་ན་འབཱ་རྦེ་ ནོ་ལ་ འཇུ་ ཞུ་རུག་། ངེ་ ཁྱི་ཞ་རྒུན་ལ་ ངུལ་ལ་ ཁྲིན་ ཀལ་ཧན་ ཙོག་སེ་, མར་ཀུའི་ ཁྱི་ཞ་རྒུན་ས་ ཡོང་ནི་ རྒ་སུའི་ ཞུའི་། 11 ཡང་ ཡི་ཤུ་ ཟེར་ཧན་ ཡུའི་ཏུ་ལ་ ཁྱི་ཞ་ འཇུ་ ཞུ་རུག་། འེ་ཀ་ ང་ ཉམ་པོ་ ཀོན་འཇོག་རྒེ་ རྒྱལ་སྲིད་རྡེ་ཕི་ ལེ་ཧ་ ཅོ་ཀན་རྒུ་ནི་ ཕྲོ་ནི་ ཡ་ཧུ་འདཱ་པ་ ཏེཏ་པ་ཅེན་ ཏེ་རྒ་ མི་ སུམ་ཀ་ མ་ནི་ མེད་, ཡང་ ཁོང་རྒུ་ནི་ ང་ མ་སྲན་ཀྲེ་ སེམ་རུའི་ ཏང་འདུག་།

12 ཁྱི་ཞི་ ཁྲོ་པ་ ཡི་ཤུ་ མ་ཤི་ཀེ་ ཞབ་རྟོག་པ་ ཨེ་པབ་རེ་ ཁྱི་ཞ་རྒུན་ལ་ འཇུ་ ཞུ་རུག་། ཡང་ ཁོའེ་ ཁྱི་ཞ་རྒུན་ ཏེཏ་པེ་ན་ ལྡན་ཀན་ འདང་ ལོ་ཁྱེལ་ སོན་ཏེ་ ཉམ་པོ་ ཀོན་འཇོག་རྒེ་ ཐུག་འདོད་ ཚང་མེ་ན་ རྟེམ་པོ་ འདེད་ཅེ་ཕི་ ཏུའི་རྒྱུན་ ཉིང་ངེ་ ཐིལ་ནི་ མོ་ལམ་ ཞུ་རུག་། 13 ཁྱི་ཞ་ རྡང་ ལ་འོ་འདི་ཀི་ཡཱ་ རྡང་ ཧི་ར་པོ་ལི་ ཏེཏ་པ་ཅེན་རྒུ་ནི་ཕི་ ཁོའེ་ ཧོཔ་ ལེ་ཧ་ ཅོའེན་ ཡོ་ཀན་འབོ་ལ་ ངེ་ སྤང་པོ་ ཏང་ངེ་ཡོད་།

14 སྤུན་ འདེ་མཱ་ རྡང་ ཨ་ཧོའེ་ ཤེ་སྤེ་ ཨམ་ཅི་ ལུ་ཀ་ ཉ་ཧེ་ ཁྱི་ཞ་རྒུན་ལ་ འཇུ་ ཞུ་རུག་། 15 ལ་འོ་འདི་ཀི་ཡཱ་ ཡོ་ཀ་ནེ་ སྤུན་རྒུན་, ཨ་ཧོའེ་ སྲིང་མོ་ ནིམ་ཕ་ རྡང་ ཁོའེ་ ཁང་པེ་ན་ ཚོག་ཧ་ནེ་ ཆོའེ་ཚོག་ལ་ འཇུ་ ཞུ་རུག་ ཞུའི་།

16 འི་ ཡི་རྒེ་རྦོ་ ཁྱི་ཞ་རྒུ་ནི་ སིལ་རྡེ་ ལྟིང་ནི་, ལ་འོ་འདི་ཀི་ཡཱ་པེ་ ཆོའེ་ཚོག་ལ་ སིལ་ཅེ་ལ་ ཏོང་ཧེ་། ཡང་ ལ་འོ་འདོ་ཀི་ཡཱ་པེ་ ཆོའེ་ཚོག་ལ་ འབྲི་ཧན་ནེ་ ཏེ་ ཡི་རྒེ་རྦོ་ ཁྱི་ཞ་རྒུ་ནི་ལ་ སིལ་ཧེ་།

17 ཙོབོ་རྡེ་ སྤུན་ ཨར་ཀིབ་པུ་ ལག་ལ་ ལྟེད་རྡེ་ ཛེད་ཀ་ནེ་ ལེ་ཧ་པོ་ ཁོ་ འདྲན་འདྲ་ ཀྲུབ་ཅུག་ཅེ་ལ་ ཟེར་།

18 ཏ་ ང་ པ་འུ་ལུའི་ ཡི་རྒེ་ འབྲི་ཧན་འབེ་ཀ་ནི་ ཉི་འགུ་ ཁྱོྃ་རྡེ་ ང་རང་ངེ་ ལག་འབྲི་ན་ འཇུ་ ཞུ་ཡོད་།

ང་ ཙོན་ལ་ ཡོ་ཀན་འབོ་ འི་ཏུ་ ཅོའེ་རྡེ་ ངེ་ཕི་ མོ་ལམ་ ཏོབ་ཧེ་།

ཀོན་འཇོག་རྒེ་ ཐུག་ཞེ་ ཁྱི་ཞ་རྒུན་ལ་ ཐོབ་ཤིག་༎