ཀོ་ལོ་སི་པ་ 3

མི་ཙེ་ སང་མ་ཞིག་ པུད་།

ཏ་ ཀོན་འཇོག་རྒེ་ ཁྱི་ཞ་རྒུན་ མ་ཤི་ཀ་ ཉམ་པོ་ མི་ཙེ་ སོ་མ་ཞིག་རྒེ་ན་ ལང་ངེ་ ཛེད་ཅེ་ཀ་ནི་, ཁྱི་ཞི་ རྡེ་བ་ཅན་ནེ་ན་ ཡོ་ཀན་རྒུ་ནི་ འདོད་པ་ པོར་ཧེ་ ཀ་རུ་ མ་ཤི་ཀ་, ཀོན་འཇོག་རྒེ་ ཆག་ ཡོའེ་སྤེ་ ཁྲིའི་ཀ་ ཞུ་རྡེ་ཡོད་། 2 འཇིག་རྟེན་ནེ་ན་ ཡོ་ཀན་རྒུ་ནི་ ཧོར་ལ་ སམ་བ་ མ་ཏང་ལ་, རྡེ་བ་ཅན་ནེ་ན་ ཡོ་ཀན་རྒུ་ནི་ ཧོར་ལ་ སམ་བ་ ཏོང་ཧེ་། 3 ཅེ་ཟེར་ནི་ ཁྱི་ཞ་རྒུན་ ངུལ་མེ་ རྡིག་ཅེན་ མི་ཙེ་ པུད་ཅེ་ན་ ཤི་རྡེ་ ཀོན་འཇོག་རྒེ་ན་ ཁྱི་ཞི་ རྡེན་འབེ་ མི་ཙེ་རྦོ་ མ་ཤི་ཀ་ ཉམ་པོ་ རྦེ་རྡེ་ ཡོད་། 4 ཁྱི་ཞ་རྒུན་ལ་ མི་ཙེ་ སོ་མ་ སལ་ཧ་ནེ་ མ་ཤི་ཀ་ ལོག་ཏེ་ རྐྱོད་རྡེ་རྡང་, ཁྱི་ཞ་རྒུན་ལ་ ཟི་ཞིད་རྡེ་ན་ ཁོང་ ཉམ་པོ་ ངོན་ནེན་།

5 ཏོ་རྦེ་ཕི་ ཁྱི་ཞ་རྒུ་ནི་ རྡིག་པེ་ འདོད་པ་རྒུན་ མེ་ཀན་ ཅོའེ་ཧེ་། སྤེར་ན་ ངན་པེ་ ལུའི་འབྲེལ་, ཟུྃ་སྤེ་ ཐོག་ནི་ ཁྲེལ་མེད་རྡེ་ ལེ་ཧ་, ངན་པེ་ ལུའི་འབྲེལ་ལེ་ འདོད་པ་, འདོད་པ་ ངན་པ་, ནབ་སེམ་། 6 ཏེ་རྒ་རྒུ་ནི་ ཅོའེ་རྡེ་ ཁ་ མི་ཉེན་ཀན་རྒུ་ནི་ཀ་ ཀོན་འཇོག་རྒེ་ ཐུག་སྲོ་ པབ་ཅེ་ ནོག་། 7 ཏུའི་ཞིག་ལ་ ཁྱི་ཞ་རྒུན་ནྃ་ ཏེ་རྒ་ ཙོག་སེ་ ངན་པེ་ ལམ་མེ་ཀ་ འགྲུ་ལེ་ཡོད་པེན་, 8 འིན་ན་ ཏ་ སྲོ་ ཡོང་ཅེ་, ཁྲག་ལུང་, ངན་སེམ་, ཞེན་མེ་ ཤོད་པེ་ ཧོར་ལ་ ངན་པ་ ཟེར་ཤེ་ རྡང་ སྤེ་ར་ ངན་པ་ ཚང་མ་ ཕང་རྒོའེ་། 9 ཅིག་ ཏང་ ཅིག་ལ་ ཟུན་ མ་ཏང་ཧེ་, ཅེ་ཟེར་ནི་ ཁྱི་ཞི་ ངུལ་མེ་ སམ་ཚུལ་ རྡང་ ལེ་ཧ་ ངན་པ་རྒུན་ ཕྃ་རྡེ་ འིན་། 10 ཁྱི་ཞ་རང་རྒུན་ལ་ ཤོད་པ་ སོ་མེ་ ཀོའེ་ལག་ ཧོན་ཧེ་, ཡང་ ཁྱི་ཞ་ ཛེད་ཀ་ནེ་ ཀོན་འཇོག་ ཤེ་ཤེ་ན་ ལྡན་ནེན་ སོང་འདེ་ ཁྱི་ཞི་ ཤོད་པ་ ཁོང་ངེ་ ཙོག་སེ་ འགྱུར་ཤུག་ཧེ་། 11 ཏེ་ མི་ཙེ་ སོ་མ་རྦེ་ན་ ཁྱི་ཞ་རྒུན་ ཡ་ཧུ་འདཱ་པ་ ཡང་ ཡ་ཧུ་འདཱ་པ་ མན་ཀན་, འགོཔ་ཅེཏ་ ཅོ་ཀན་ ཡ་ མ་ཅོ་ཀན་, ཆི་རྒྱལ་པ་, ཤོད་ལམ་ མེ་ཀ་ནེ་ མི་, ཚེ་ཡོག་ ཡ་ ར་ཝང་ཅེན་ འིན་ཅེའོ་ ཁག་ཅེན་ མག་, འིན་ན་ ཚང་མེ་སང་ ཁག་ཅེན་འབོ་ མ་ཤི་ཀ་ ནོག་, ཡང་ ཁོང་ ཨ་ཧོ་ ཚང་མེ་ན་ ཞུ་རྡེ་ནོག་།

12 ཁྱི་ཞ་རྒུན་ ཀོན་འཇོག་རྒེ་ འདམ་ཀ་ནེ་ ཏམ་པ་ རྡང་ ཤེ་སྤ་རྒུན་ འིན་ཅེ་ཀ་ནི་, རང་འདང་རང་ལ་ ཉིང་ཞེ་, ཀ་ཀྲིན་, འཇམ་པོ་ རྡང་ ཟོད་པེ་ ཀོའེ་རྒུན་ ཧོན་ཧེ་། 13 ཁྱི་ཞ་ ཞེན་མེ་ རྒྱཔ་འགལ་ལ་ ཟེར་རྒྱུ་ ཡོད་ནི་, ཟོད་པ་ ཅོའེ་རྡེ་ ཏོ་རྒུན་ལ་ ཤག་སྤ་ ཏོང་ཧེ་། ཙོབོ་རྡེ་ ཁྱི་ཞ་རྒུན་ལ་ ཤག་སྤ་ སལ་ཧན་ ཙོག་སེ་ ཁྱི་ཞ་རྒུ་ནི་ལ་ ཅིག་ ཏང་ ཅིག་ལ་ ཤག་སྤ་ ཏོང་ཧེ་། 14 ཚང་མེ་སང་ ཁག་ཅེན་འབོ་, ཁྱི་ཞི་ ཁྱི་ཞ་རང་ལ་ ཤེ་སྤེ་ ཀོའེ་རྦོ་ ཧོན་ཧེ་, ཀ་རྦེ་ ཨ་ཧོ་རྒུན་ ཛོམ་འབོ་ ཐུན་འབྲེལ་ལེ་ན་ པོ་རེ་ནོག་། 15 ཡང་ ཁྱི་ཞ་རྒུན་ ཟུྃ་སྤོ་ ཅིག་རྒེ་ ཡན་ལག་ ཙོག་སེ་ ཞིའི་རྡེ་ན་ འདེད་རྡེ་ལ་ འབོ་ ཛེད་ཅེ་ཀ་ནི་, མ་ཤི་ཀེ་ ཞིའི་རྡེ་ ཁྱི་ཞི་ ཉིང་རྒུ་ནི་ན་ ཝང་སྲུལ་ ཅུག་། ཏུའི་རྒྱུན་ ཀོན་འཇོག་ལ་ ཐུག་ཞེ་ཆེ་ ཞུའི་ཧེ་།

16 མ་ཤི་ཀེ་ ཤུག་ཤེན་ ཁྲིན་རྒུན་ ཁྱི་ཞ་རྒུ་ནི་ ཉིང་ འདང་ སེམ་མེ་ན་ འདེད་ཅུག་། ཀོན་འཇོག་རྒེ་ སལ་ཧ་ནེ་ ཤེ་རབ་ ཚང་མ་ ཉམ་པོ་ ཁྱི་ཞ་རྒུ་ནི་ ཅིག་ ཏང་ ཅིག་ལ་ ལབ་ཞ་ རྡང་ ཁ་རྡ་ ཏོང་ཧེ་། ཀོན་འཇོག་རྒེ་ སུང་འགུར་, འགུར་མ་ རྡང་ སེམ་ཡིད་རྡེ་ ལུ་རྒུན་ པུལ་ཟ་ནི་, ཉིང་ནི་ ཐུག་ཞེ་ཆེ་ ཞུའི་ཧེ་། 17 ཡང་ ཁྱི་ཞི་ ཅི་ཞིག་ ཟ་ན་ ཡང་ ཅོ་ན་, ཡབ་ ཀོན་འཇོག་ལ་ ཐུག་ཞེ་ཆེ་ པུ་ལེན་ ཏོ་ ཙོབོ་ ཡི་ཤུའི་ ཝང་ངེ་ན་ ཅོའེ་ཧེ་།

ནང་ཚང་རྒུ་ནི་ཕི་ ལབ་ཞ་།

18 ན་མ་རྒུན་, ཁྱི་ཞ་ རང་ངེ་ མག་པ་རྒུ་ནི་ ཝང་ངེ་ ཡོག་ལ་ འདོད་ཧེ་, ཅེ་ཟེར་ནི་ ཙོབོ་རྡེ་ ལོབ་ཀྲུག་ འིན་ཅེ་རྦེ་ ཏོ་ཙོག་སེ་ ཅོ་རྒོ་ཤེ་ ནོག་།

19 མག་པ་རྒུ་ནི་, རང་ངེ་ ན་མ་ ཤེ་སྤ་ ཅོའེ་ཧེ་, ཡང་ ཁོང་རྒུན་ལ་ ནག་ མ་ལྟན་ཧེ་།

20 ཕྲུ་རྒུ་རྒུན་, ཕ་མེ་ ཟེར་ཧན་ ཚང་མ་ ཁ་ཉོན་ཧེ་, ཏོ་ལ་ ཙོབོ་ ཐུག་ཐེད་རྡེ་ནོག་། 21 ཨ་རྦ་རྒུན་ རང་ངེ་ ཕྲུ་རྒུ་ལ་ མང་པོ་ རྡམ་ཏེ་ མ་པོར་ཧེ་, ཏུ་ཟུག་ ཅོ་ནི་ ཁོང་རྒུ་ནི་ སེམ་རུའི་ ཆག་རྒེ་ནོག་།

22 ཡོག་པོ་རྒུན་, ཁྱི་ཞི་ འཇིག་རྟེན་ནེ་ སྤོན་འབོ་རྒུ་ནི་ ཟེར་ཧན་ ཚང་མ་ ཁ་ཉོན་ཧེ་། ཁྱི་ཞ་རྒུ་ནི་ ཁོང་ངེ་ རྟོད་པ་ ཐོབ་ཅེ་ ཡང་ ཁོང་རྒུ་ནི་ ལྟ་ཟ་ནི་ ཅིག་པོ་ མ་ནོག་, ཙོབོ་ལ་ ཀུའི་སྤ་ ཅོ་ཅེ་ རྡང་ སེམ་ ཟང་པོ་ ཡོད་ཅེ་རྦེ་ ཏོ་ ཅོའེ་ཧེ་། 23 ཅི་ ལེ་ཧ་ཞིག་ ཅོ་ན་, ཉིང་ ཏག་པ་ནི་ ཅོའེ་ཧེ་། མི་ མ་ནོག་, ཙོབོ་རྡེ་ཕི་ ཅོའེ་རྡེ་ འིན་ སོམ་ཧེ་། 24 ཙོབོ་རྡེ་ སོལ་རེ་ ཚུལ་ལ་ ནོར་ཧལ་ སལ་ཅེའོ་ འི་ཏུ་ ཅོའེ་ཧེ་, ཅེ་ཟེར་ནི་ ཁྱི་ཞི་ ཞབ་རྟོག་ ཞུ་ཀ་ནེ་ རྡེན་འབེ་ སྤོན་འབོ་ ཙོབོ་ མ་ཤི་ཀ་ ཞུ་རྡེ་ནོག་། 25 ཀལ་ཏེ་ ཁྱེ་རང་རྒུ་ནི་ ངན་པ་ ཅོ་ནི་, ངན་པ་ ཅོ་ཀ་ནེ་ ལན་འབོ་ལ་ ཆེད་པ་ ཕོག་རྒེན་, ཅེ་ཟེར་ནི་ ཀོན་འཇོག་རྒེ་ སུ་ལ་ ཡ་པེ་ ཅོའོ་ ཛེད་རྡེ་ མག་།