ཀོ་ལོ་སི་པ་ 2

ཁྱི་ཞ་, ལ་འོ་འདི་ཀི་ཡཱ་ ཆོའེ་ཚོག་ ཡང་ ང་ མ་ཐུག་ཀ་ནེ་ ཏེཏ་པ་ཅེན་ ཚང་མ་ ཏེཏ་པེ་ན་ ལྡན་ཅེ་ཕི་ ངེ་ ཚེར་ཧ་ ཅོའེན་ ཧོཔ་ ལེ་ཧ་ ཅོ་ཀན་འབོ་ ཁྱི་ཞ་ ཧ་ཀོ་ ཅུག་ཉིན་རག་། 2 ངེ་ ཁོང་རྒུན་ལ་ སེམ་རུའི་ རྐྱེ་ཅུག་ཅེ་ རྡང་ ཤེ་སྤེ་ན་ ཐུན་འབྲེལ་ ཆ་ཅེ་ འདོད་པ་ ཅོའེན་། ཁོང་རྒུན་ལ་ ཀོན་འཇོག་རྒེ་ སང་སྤར་རེ་ན་ པོ་རེ་ ཛེད་ཀ་ནེ་ ཐབ་, ཀའོ་ མ་ཤི་ཀ་ ཁོ་རང་ འིན་, ཏོ་ ཧ་ཀོ་ཅེ་ན་ ལོ་ཁྱེལ་ སོན་ཏེ་ ཡོང་རྒོ་ཤེ་ ངེ་ འདོད་པ་ རག་། 3 མ་ཤི་ཀེ་ན་ ཀོན་འཇོག་རྒེ་ ཤེ་རབ་ ཏང་ ཤེ་རྒྱུ་ ཏེར་ ཚང་མ་ རྦེ་རྡེ་ ཡོད་ཏེ་ ནོག་།

4 སུ་ཞིག་ལ་ ཁེ་སྤེ་ སྤེ་ར་རྒུན་ ཏྃ་རྡེ་ ཁྱི་ཞ་ འགོམ་ཧོར་རྒུན་ མི་ཉེན་ཅེ་ཕི་ ངེ་ ཏོ་རྒུན་ ཁྱི་ཞ་ ཤེད་རྡེ་ཡོད་། 5 ཟུྃ་སྤེ་ ཐོག་ནི་ ང་ ཁྱི་ཞ་རྒུན་ ཉམ་པོ་ མེད་ནང་, སེམ་ཡིད་རྡེ་ ཐོག་ནི་ ང་ ཁྱི་ཞ་ ཉམ་པོ་ འིན་། ཡང་ ཁྱི་ཞ་རྒུན་ ཐུན་འདེ་ མ་ཤི་ཀེ་ ཏེཏ་པེ་ན་ རྟེམ་པོ་ འདེད་ཏེ་ ཡོ་ཀན་འབོ་ ཚོར་རྡེ་ ང་ ཐེད་པོ་ སོང་།

མ་ཤི་ཀེ་ན་ མི་ཙེ་ ཚང་འགིག་ཤིག་།

6 ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ མ་ཤི་ཀ་ ཡི་ཤུ་ ཁྱི་ཞ་རང་ངེ་ ཙོབོ་ འིན་ཀན་འབོ་ རྡེན་ཆེ་ཤེ་ ཅོའོ་ ཙོག་སེ་ ཏ་རུང་ང་ ཁོང་ངེ་ན་ འདོད་ཧེ་། 7 ཁྱི་ཞ་རྒུ་ནི་ མ་ཤི་ཀེ་ན་ པ་ཀྲག་ རྐྱང་འདེ་ ཡར་རྒྱེ་ ཅོའེན་, ཏེཏ་པ་རྦོ་ རྟེམ་པོ་ ཅོའེ་ཧེ་ ཀ་ཟུག་རྒེ་ ཁྱི་ཞ་རྒུན་ལ་ ལབ་ཏེ་ འིན་འབེན་། ཏེ་ནི་ ཁྱི་ཞ་རྒུ་ནི་ ཏུའི་རྒྱུན་ ཀོན་འཇོག་ལ་ ཐུག་ཞེ་ཆེ་ ཞུའིན་།

8 སུ་ཞིག་ལ་ ཁྱི་ཞ་རྒུན་ལ་ ཏོན་ཏག་ མེ་ཀན་ འདང་ ཟུའི་མ་ ལབ་ཞ་རྒུན་ རྒྱུད་ཏེ་, འགོམ་ཧོར་ ཅོ་མི་ཅུག་ཤེ་ལ་ ཤང་ ཅོའེ་ཧེ་, ཏེ་ ལབ་ཞ་རྒུན་ མ་ཤི་ཀེ་ མ་ནོག་, མི་ ལུག་སྲོལ་ རྡང་ འཇིག་རྟེན་ནེ་ ངན་པ་ སེམ་ཡིད་རྡེ་ ཝང་རྒུ་ནི་ ཡོྃ་རྡེ་ ནོག་། 9 འགོམ་ཧོར་ ཅོ་མི་ཅུག་ཤེ་པོ་ ནེན་ཏེན་ ཅོའེ་ཧེ་, ཅེ་ཟེར་ནི་ མ་ཤི་ཀེ་ ཧུ་ཟུག་རྒེ་ན་ ཀོན་འཇོག་ སོན་ཏེ་ ནེ་རྡེ་ ནོག་། 10 ཁྱི་ཞ་རྒུན་ མ་ཤི་ཀ་ ཉམ་པོ་ ཅིག་འགྲིལ་ ཆ་ཅེ་རྦེ་ ཁྱི་ཞི་ན་ ཡང་ ཅང་ རྒོའེ་ཤེ་ མག་། ཁོང་ནི་ ཝང་ ཡོ་ཀན་ འདང་ ཝང་སྲུལ་པ་ ཚང་མེ་སང་ ཆེ་ཤོག་རྦོ་ ཞུ་རྡེ་ནོག་།

11 ཁྱི་ཞི་, མ་ཤི་ཀེ་ན་ ཏེཏ་པ་ ཅོ་རྡང་, ཁྱི་ཞ་རྒུ་ནི་ སེམ་ལ་ འགོཔ་ཅེཏ་ ཅོའོ་ ཛེད་ཏེ་ ནོག་, ཏེ་ འགོཔ་ཅེཏ་པོ་ མི་ ལག་པ་ནི་ མ་ཅོ་ལ་, མ་ཤི་ཀ་ ཁོ་རང་ངེ་ ཛེད་ཏེ་ ཁྱི་ཞི་ན་ ཡོ་ཀ་ནེ་ རྡིག་ཅེན་ འདོད་པེ་ ཝང་འབོ་ ཅེད་རྡེ་ ཛེད་། 12 ཁྱི་ཞི་ ཁྲུའི་ནེན་ནེ་རྡང་, ཁྱི་ཞ་རྒུན་ ཤི་རྡེ་ མ་ཤི་ཀ་ ཉམ་པོ་ ཧུྃ་རྡེ་ འིན་། ཡང་ ཁོང་ ཉམ་པོ་ སོན་པོ་ལ་ ལྃ་རྡེ་ ནོག་, ཅེ་ཟེར་ནི་ ཁྱི་ཞ་རྒུ་ནི་ མ་ཤི་ཀ་ ཤི་ཀ་ནེ་ ཕྲོ་ནི་ སོན་པོ་ ལང་ངེ་ ཛེད་ཀ་ནེ་ ཀོན་འཇོག་རྒེ་, ཏེ་ ཁྱུད་པེ་ན་ རྡེན་ཆེ་ཤེ་ ཅོའེ་རྡེ་ ནོག་།

13 རྡིག་པ་ རྡང་ རྡིག་པེ་ འདོད་པ་རྒུ་ནི་ཀ་ནི་ མི་ཐར་ཤེའོ་ ཅོའེ་རྡེ་, སེམ་ཡིད་རྡེ་ ཐོག་ནི་ ཁྱི་ཞ་རྒུན་ ཤི་རྡེ་ འིན་འབེན་། ཏེ་ན་ ཀོན་འཇོག་རྒེ་ ཨ་ཧོའེ་ རྡིག་པ་ ཚང་མ་ ཤག་སྤ་ སལ་ལེ་ ཛེད་ཏེ་, མ་ཤི་ཀ་ ཉམ་པོ་ ཁྱི་ཞ་རྒུན་ སོན་པོ་ ལང་ངེ་ ཛེད་། 14 ཀོན་འཇོག་རྒེ་ ཨ་ཧོའེ་ རྒྱཔ་འགལ་ལ་ སྤང་པོ་ ཏང་ཀ་ནེ་ རྡིག་པེ་ ཐོ་རྒུན་ ཤིག་ཏེ་, མ་ཤི་ཀེ་ རྐྱང་ཤིང་ངེ་ཀ་ ཟིར་རུ་ རྒྱབ་ཏེ་ མེ་ཀན་ ཅོའོ་ ཛེད་། 15 ཏུ་ཟུག་ ཛེད་ཏེ་ ཀོན་འཇོག་རྒེ་ ཝང་ འདང་ ཝང་སྲུལ་ཧན་ནེ་ ངན་པ་ སེམ་ཡིད་ ཚང་མེ་ ཝང་འབོ་ མེ་ཀན་ ཅོའོ་ ཛེད་། མ་ཤི་ཀ་ རྐྱང་ཤིང་ངེ་ཀ་ ཀྲོྃ་རྡེ་ སོན་པོ་ ཞྃ་ཤེ་ རྒྱུད་ཏེ་, སྲོག་ ཡོ་ཀན་ ཚང་མེ་ འདུན་ལ་ ཏོ་རྒུན་ལ་ ཁྲེལ་ཤུག་རྒེ་ ཛེད་ཏེ་ རྒྱལ་ཁ་ ནེན་ནེ་ ཛེད་།

16 ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ ཅི་རིག་ ཟ་ཡོད་ ཡང་ ཐུང་ངེ་ཡོད་, ཆོའེ་ ཡང་ ནམ་འགང་ངེ་ ཏུའི་ཤེན་ སི་ཅེ་, ངལ་ཚོའེ་ ཞག་རྒུན་ མི་སྲུང་ཅེ་ལ་ རྐྱོན་ ཕིང་ཀན་རྒུན་ལ་ ནྃ་ མ་ཏང་ཧེ་། 17 ཏེ་ ཁྲིམ་ ཚང་མ་ རྐྱོད་ཅེ་ཅེན་ནེ་ ངོའེ་མ་རྦེ་ ཀྲིབ་ཉག་ འིན་འབེན་, ཏ་ མ་ཤི་ཀ་རྦོ་ ཏེ་རྒ་ ངོའེ་མ་འབོ་ འིན་། 18 པབ་མོ་ ལྟན་ཟུན་ ཡང་ ཕོ་ཉ་ ཅོལ་ཤེ་ན་ མ་ ཐེད་པོ་ ཅོ་ཀན་རྒུན་ལ་, ཁྱི་ཞ་རྒུན་ ཀོན་འཇོག་རྒེ་ རྡེན་འབེ་ ལམ་ནི་ ཐག་རིང་ལ་ ཁྱེར་ མ་ཅུག་ཧེ་། ཀོན་འཇོག་རྒེ་ ཁོང་ལ་ ཉི་ལམ་ རྒྱུད་ཏེ་ ཏོ་རྒུ་ནི་ ཧོར་ལ་ ཤེད་རྡེ་ ཛེད་ ཟེ་རེ་ནོག་། འིན་ན་ ཁོང་ངེ་ རྡིག་ཅེན་ སམ་བ་རྒུ་ནི་ ཁོང་རྒུན་ ཕོ་སོ་ཅེན་ འགྱུར་ཤུག་ཏེ་ ནོག་། 19 ཏོ་རྒུ་ནི་ འབྲེལ་རྦོ་ མ་ཤི་ཀ་ ཉམ་པོ་ ཆེད་ཏེ་ ནོག་, ཀའོ་ ཁོང་རྒུ་ནི་ ཡུ་ འིན་། ཡང་ མ་ཤི་ཀེ་ ཧུ་ཟུག་ སོན་ཏེ་ ཤ་ རྡང་ ཉ་རྒུ་ནི་ ཉམ་པོ་ ཟུམ་འདེ་ པོ་རེ་ ཛེད་ཏེ་ ཀོན་འཇོག་རྒེ་ ཐུག་འདོད་ ནང་ཞིན་ལ་ ལྡན་ཅུག་རྒེ་ ཛེ་རྡེ་ནོག་།

20 ཁྱི་ཞ་རྒུན་ མ་ཤི་ཀ་ ཉམ་པོ་ ཤི་ཅེ་རྦེ་, ཁོང་ངེ་ འཇིག་རྟེན་ནེ་ ངན་པ་ སེམ་ཡིད་རྡེ་ ཝང་སྲུལ་པ་རྒུ་ནི་ ཡོག་ནི་ ཁྱི་ཞ་ ཐར་ཤུག་རྒེ་ ཛེད་, ཏེ་ནི་ ཅེ་ ཁྱི་ཞི་ ཏ་རུང་ང་ འཇིག་རྟེན་ནེ་ ཁྲིམ་རྒུ་ནི་ ཁ་ཉེན་ནེ་ཡོད་? 21 སྤེར་ན་ “ལག་པ་ མ་ཁུར་, མ་ཉང་, ཡང་ ལག་པ་ མ་སེ་ ཟེ་རེ་ནོག་!” 22 ཏེ་ ཚིར་ཧ་རྒུན་ ཀོལ་རྡེ་ ལྟིང་ནི་ མེ་ཀན་ ཆ་ཅེའོ་ ཀོན་འཇོག་རྒེ་ ཐབ་ལྡིང་ངེ་ ཛེད་, ཅེ་ཟེར་ནི་ ཏོ་རྒུན་ མི་ ལབ་ཞ་ རྡང་ ཀཱ་ ཏང་ཀན་རྒུན་ མ་ནི་ ཡང་ ཅང་ མག་། 23 མི་རྒུན་ལ་ ཏེ་ ཁྲིམ་འབེ་ ཤེ་རབ་ཅེན་ ཐོང་ངེ་ནོག་ ཅེ་ཟེར་ནི་ ཏེ་ ཁྲིམ་འབེ་ ཁོང་རྒུན་ལ་ ཅི་ཚང་མེ་སང་ ཏོ་ ཁག་ཅེན་ སམ་ཅེ་, པབ་མོ་ ཅོའེ་རྡེ་ ཏམ་པ་ ཐོང་ཅུག་ཅེ་, རྡང་ རང་ངེ་ ཟུྃ་སྤོ་ལ་ ནག་ ལྟན་ཅེ་རྒུན་ ལབ་རྦེ་ནོག་། འིན་ན་ རྡེན་འབའ་ ཁོང་རྒུན་ལ་ རང་རང་ངེ་ འདོད་པ་ ངན་པ་རྒུན་ལ་ ཕམ་ཀལ་ཅེ་ན་ ཏེ་ ཁྲིམ་རྒུ་ནི་ ཡ་ཏོ་ ཅོའོ་ མག་།