ཀོ་ལོ་སི་ ཆོའེ་ཚོག་ལ་ པ་འུ་ལུའི་ ཆག་འབྲི་།
པ་འུ་ལུའི་ འཇུ་ ཞུའི་།
1
ཀོན་འཇོག་རྒེ་ ཐུག་འདོད་ ནང་ཞིན་, ཡི་ཤུ་ མ་ཤི་ཀེ་ ཧུ་ཚབ་ལ་ འདམ་མེ་ ཛེད་ཀན་ པ་འུ་ལུ་ རྡང་ ཨ་ཧོ་རྒུ་ནི་ སྤུན་ ཏི་མོ་ཐི་རྒུ་ནི་ ཆོག་ནི་ 2 འི་ ཡི་རྒེ་རྦོ་ ཀོ་ལོ་སེ་ རྒྱལ་སེ་ན་ ཡོ་ཀ་ནེ་ མ་ཤི་ཀེ་ན་ ལོ་ཁྱེལ་ཅེན་ འདང་ ཏམ་པེ་ སྤུན་རྒུན་ལ་ འབྲི་འིན་།ཨ་ཧོའེ་ ཀོན་འཇོག་ ཡབ་རྦེ་ ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ སལ་ཤིག་།
པ་འུ་ལུའི་ ཐུག་ཞེ་ཆེ་ རྡང་ མོ་ལམ་།
3 ཁྱི་ཞ་རྒུ་ནི་ཕི་ མོ་ལམ་ ཞུ་ཟ་ནི་, ང་ཞི་ ཏུའི་རྒྱུན་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཡབ་ ཀོན་འཇོག་ལ་ ཐུག་ཞེ་ཆེ་ ཞུ་འིན་། 4 ཅེ་ཞུ་ནི་ ཁྱི་ཞ་རྒུ་ནི་ ཡི་ཤུ་ མ་ཤི་ཀེ་ཀ་ ཏེཏ་པ་ རྡང་ ཀོན་འཇོག་རྒེ་ ཏམ་པ་ མི་ཚང་མ་ ཉམ་པོ་ ཤེ་སྤ་ ཅོ་ཅེའོ་ ང་ཞི་ ཚོར་། 5 ཏེ་ ཏེཏ་པ་ རྡང་ ཤེ་སྤ་རྒུན་ ཁྱི་ཞ་རྒུན་ལ་ རྡེ་བ་ཅན་ནེ་ན་ ཀོན་འཇོག་རྒེ་ པོ་རེ་ ཛེད་ཀ་ནེ་ སོལ་རེ་རྡེ་ རེ་བ་རྦེ་ཀ་ནི་ ཡོྃ་རྡེ་ ནོག་། ཡང་ ཏེ་ རེ་ཝ་རྦོ་ ཁྱི་ཞ་རྒུ་ནི་ན་ ཡོད་པེན་, ནམ་ ཁྱི་ཞ་རྒུན་ལ་ ཏང་པོ་རང་ རྡེན་འབེ་ ཁྲིན་ ནེ་ཚུལ་ ཟང་པོ་རྦོ་ ཚོར་།
6 ཁྱི་ཞ་རྒུན་ལ་ ཐོབ་ཀ་ནེ་ ཏེ་རྒ་ ནེ་ཚུལ་ ཟང་པོ་རྦོ་ འཇིག་རྟེན་ སོན་ཏེ་ན་ ཚོར་རེན་, ཡང་ འབྲེ་རྦུ་ མང་པོ་ཞིག་ མིན་འདེ་ ལྡན་ནེན་ ནོག་, ཏེ་རྒ་ ཙོག་སེ་ ཁྱི་ཞ་རྒུ་ནི་ མི་ཙེ་ ནང་ལ་ ལེ་ཧ་ ཅོའེན་ ནོག་, ནམ་ ཁྱི་ཞ་ ཏང་པོ་རང་ ཀོན་འཇོག་རྒེ་ ཐུག་ཞེ་ ཧོར་ལ་ རྡེན་འབའ་འབོ་ ཚོར་རྡེ་ ཧ་ཀོ་།
7 ཁྱི་ཞ་རྒུ་ནི་ ཏེ་ ནེ་ཚུལ་ ཟང་པོ་ ང་ཞི་ ཤེ་སྤ་ ཞབ་རྟོག་པ་ ཁྲོ་པ་ ཨེ་པབ་རེ་ཀ་ནི་ ཚོར་རྡེ་ འིན་། ཁོ་ མ་ཤི་ཀེ་ ལོ་ཁྱེལ་ཅེན་ནེ་ ཞབ་རྟོག་པ་, ང་ཞི་ ཚབ་ལ་ ཁྱི་ཞ་ ཡ་ཏོ་ ཅོ་ཀན་འབོ་ འིན་། 8 ཡང་ ཏམ་པེ་ ཐུག་ཡིད་རྡེ་ ཁྱི་ཞ་ ཞེན་རྒུན་ལ་ ཤེ་སྤ་ ཅོ་ཅེ་ ཁྱུད་ སལ་ཧན་འབོ་ལ་ ཁོའེ་ ང་ཞ་ ཤེད་།
9 ཏེ་རྒ་རྦེ་ཕི་ལ་ ང་ཞི་ ཁྱི་ཞ་རྒུ་ནི་ ཧོར་ལ་ ཚོར་རྦེ་ནི་ཕ་ལ་, ཆེད་མེད་ལ་ ཁྱི་ཞ་རྒུ་ནི་ཕི་ ཀོན་འཇོག་ལ་ མོ་ལམ་ ཞུའིན་། ཁྱི་ཞ་རྒུན་ལ་ ཀོན་འཇོག་རྒེ་ ཁོང་ངེ་ ཐུག་འདོད་པོ་ སོན་ཏེ་ ཧ་ཀོ་ཅེ་, ཡང་ སེམ་ཡིད་རྡེ་ ཐོག་ནི་ ཤེ་རབ་ ཏང་ ཧ་ཀོ་ སལ་ལེ་ ཛེད་ཅེ་ལ་ ཞུ་འིན་། 10 ཏེ་ནི་ ཁྱི་ཞ་རྒུ་ནི་ ཅི་ས་ཐོག་ནི་ ཙོབོ་ལ་ ཐུག་ཐེད་ཅེ་ རྡང་ སི་ཝ་ ཁྱོང་ཀ་ནེ་ མི་ཙེ་ཞིག་ པུད་ཉེན་ནེན་། ཁྱི་ཞི་ མི་ཙེ་, འབྲེ་རྦུ་ན་ ཟང་པོ་ ཚང་མ་ མིན་འདེ་ ཀོན་འཇོག་ ཤེ་ཤེ་ན་ མང་ནེ་ མང་ངེ་ ལྡན་ནེན་།
11 ང་ཞི་ མོ་ལམ་ ཞུའིན་, ཁྱི་ཞ་རྒུན་ལ་ ཟོད་པ་ ཡང་ རྡུ་ངལ་རྒུན་ ཁུར་ ཉེན་ཅེ་ཕི་ ཀོན་འཇོག་རྒེ་ ཁྱི་ཞ་རྒུ་ནི་ སེམ་པོ་ ཁོང་ངེ་ ཧ་ལེ་ཤེ་ ཁྱུད་ ཉམ་པོ་ ཤེད་ཅེན་ ཅོའོ་ ཛེད་ཧེ་། ཡང་ མ་ ཐེད་པོ་ ཉམ་པོ་, 12 ཨ་ཧོ་རྒུ་ནི་ ཡབ་ ཀོན་འཇོག་ལ་ ཐུག་ཞེ་ཆེ་ པུལ་ཧེ་། ཁོང་ངེ་ ཁྱི་ཞ་རྒུན་ལ་, འོད་རྡེ་ན་ འདེད་ཀ་ནེ་ ཁོང་ངེ་ ཏམ་པ་ མི་རྒུ་ནི་ ནོར་ཧལ་རྒུན་ རྒོའེ་རྡེ་ ཐོབ་ཅེ་ལ་ འདམ་མེ་ ཛེད་ཏེ་ ནོག་། 13 ཀོན་འཇོག་རྒེ་ ཨ་ཧོ་རྒུན་ རྡུད་རྡེ་ མུན་ཀྲག་ ཝང་ནི་ ཐར་ཤུག་རྒེ་ ཛེད་ཏེ་, ཁོ་རང་ངེ་ ཤེ་སྤེ་ སྲེ་ རྒྱལ་སྲིད་རྡེ་ན་ ཁྱེར་རེ་ ཛེད་། 14 ཁོང་ངེ་ སྲེ་ ཁོ་རང་ངེ་ སྲོག་ སལ་རྡེ་ ཨ་ཧོ་རྒུན་ རྡུད་རྡེ་ ཝང་ངེ་ཀ་ནི་ ཐར་ཤུག་རྒེ་ ཛེད་, ཡང་ ཨ་ཧོ་རྒུ་ནི་ རྡིག་པ་རྒུན་ལ་ ཤག་སྤ་ སལ་ལེ་ ཛེད་།
མ་ཤི་ཀ་རྦོ་ ཚང་མེ་སང་ ཆེ་ འིན་།
15 མ་ཤི་ཀ་ ལྟོའེ་རྡེ་, མ་ནི་ མ་ཐོང་ཀ་ནེ་ ཀོན་འཇོག་པོ་ ཧ་ཀོ་ནོག་། ཅི་ཚང་མ་ ཆག་ཤུག་རྒེ་སང་ ངུལ་ལ་ མ་ཤི་ཀ་ ཞུ་རྡེ་ ཡོད་པེན་, ཡང་ ཁོང་ལ་ ཅི་ཚང་མེ་ཀ་ ཝང་ ཡོད་ཏེ་ ནོག་། 16 ཁོང་ རྒྱུད་ཏེ་ ཀོན་འཇོག་རྒེ་ ཅི་ཚང་མ་ ཅོའོ་ ཛེད་: རྡེ་བ་ཅན་ འདང་ འཇིག་རྟེན་ནེ་ན་ ཡོ་ཀན་ ཚང་མ་, ཐོང་ཀན་ འདང་ མི་ཐོང་ཀན་, ཁྲིའི་ རྡང་, རྒྱལ་སྲིད་ ཡང་, ཝང་སྲུལ་ ཡ་ ཝང་ ཡོ་ཀན་རྒུན་, ཏོ་ ཚང་མ་ ཁོང་ རྒྱུད་ཏེ་ ཡང་ ཁོང་ངེ་ཕི་ ཅོའོ་ ཛེད་ཏེ་ ནོག་། 17 ཁོང་ ཏོ་རྒུན་ ཆག་ཤུག་རྒེ་སང་ ངུལ་ལ་ ཞུ་རྡེ་ ཡོད་པེན་། ཡང་ ཁོང་ངེ་ ཅོའེ་རྡེ་ འི་ ཚང་མ་ ལུའི་རྡེ་ནོག་། 18 ཆོའེ་ཚོག་པོ་ ཁོང་ངེ་ ཧུ་ཟུག་པོ་ ནོག་། ཡང་ ཁོང་ ཏེ་ ཧུ་ཟུག་པོ་ ཨུ་ འིན་། ཁོང་ནི་ འགོ་ཟུག་པ་ ཞུ་རྡེ་ནོག་, ཡང་ ཤི་རྡེ་ སོན་པོ་ ལང་ཀན་ ཚང་མེ་ ཕྲོ་ནི་ ཁོང་ ཀྲག་ཤོག་རྦོ་ འིན་། ཏོ་རྦེ་ཕི་ ཁོང་ ཅི་ཚང་མེ་ན་ ཏང་པོ་ ཞུ་རྡེ་ འིན་། 19 མ་ཤི་ཀེ་ན་ སོན་ཏེ་ ནེ་རྡེ་ལ་ ཀོན་འཇོག་ ཐུག་ཐེད་རྡེ་ཡོད་པེན་། 20 ཡང་ མ་ཤི་ཀ་ རྒྱུད་ཏེ་ ཀོན་འཇོག་རྒེ་ ཅི་ཚང་མ་ ཁོ་རང་ ཉམ་པོ་ ཐུན་འབྲེལ་ལེ་ན་ ཁྱོང་ངེ་ ཛེད་། ཀོན་འཇོག་རྒེ་ ཁོ་རང་ངེ་ སྲེ་ ཁྲག་ རྐྱང་ཤིང་ངེ་ཀ་ པོ་ཅེ་ རྒྱུད་ཏེ་, འཇིག་རྟེན་ འདང་ རྡེ་བ་ཅན་ནེ་ན་ ཡོ་ཀན་ ཚང་མ་, ཁོང་ ཉམ་པོ་ ཞིའི་རྡེ་ན་ ཁྱོང་ངེ་ ཛེད་།
21 ངུལ་མ་ཞིག་ལ་ ཁྱི་ཞ་རྒུན་ ཀོན་འཇོག་ནི་ མ་ ཐག་རིང་ལ་ ཡོད་པེན་, ཡང་ ཁྱི་ཞི་ ཅོ་ཚུལ་ རྡང་ སམ་ཚུལ་ ངན་པ་རྒུ་ནི་ ཅོའེ་རྡེ་ ཁྱི་ཞ་ ཀོན་འཇོག་རྒེ་ འགྲ་ཝོ་ འིན་འབེན་། 22 འིན་ན་ མ་ཤི་ཀ་ ཧུ་ཟུག་རྒེ་ན་ ཀྲོང་ཤེ་རྦེ་ ཅོའེ་རྡེ་ ཁྱི་ཞ་རྒུན་ ཀོན་འཇོག་ ཉམ་པོ་ ཐུན་འབྲེལ་ལེ་ན་ ཁྱོང་ངེ་ ཛེད་ཏེ་ འིན་། ཏེ་རྒ་རྦེ་ ཅོའེ་རྡེ་ ཀོན་འཇོག་རྒེ་ ཁྱི་ཞ་རྒུན་ ཏམ་པ་, སང་མ་ རྡང་ རྐྱོན་མེད་ ཅོའོ་ ཛེད་ཏེ་, ཁོ་རང་ངེ་ འདུན་ལ་ ཁྱོང་ངེ་ ཛེད་།
23 འིན་ན་ ཁྱི་ཞ་རྒུན་ འི་ན་ རྟེམ་པོ་ འདེད་ཏེ་ རྡེན་འབའ་ འིན་ཀན་འབོ་ ཏེཏ་པ་ ཅོ་རྒོའེ་། ཁྱི་ཞ་རྒུ་ནི་ ནེ་ཚུལ་ ཟང་པོ་ ཚོར་རྡེ་ ཏེཏ་པ་ ཅོའེ་ཧན་འབེ་ཀ་ནི་ ཐག་རིང་ལ་ མ་ཆ་ཧེ་, ཡང་ ཏེ་ ནེ་ཚུལ་ ཟང་པོ་ འཇིག་རྟེན་ སོན་ཏེ་ན་ ཤེད་ཏེ་ ནོག་། ང་, པ་འུ་ལུ་ ཏེ་ ནེ་ཚུལ་ ཟང་པོ་ ཤེད་ཅེ་ལ་ ཀོན་འཇོག་རྒེ་ ཞབ་རྟོག་པ་ འདམ་མེ་ ཛེད་ཀན་འབོ་ འིན་།
ཆོའེ་ཚོག་རྒེ་ཕི་ པ་འུ་ལུའི་ ཞབ་རྟོག་།
24 ཏ་ ཁྱི་ཞ་རྒུ་ནི་ཕི་ ང་ ནག་ ཐོང་ཀན་འབོ་ལ་ ཐེད་པོ་ རག་, ཅེ་ཟེར་ནི་ མ་ཤི་ཀེ་ ཁོ་རང་ངེ་ ཧུ་ཟུག་, ཆོའེ་ཚོག་རྒེ་ཕི་ རྡུ་ངལ་ ནམ་ཀན་འབེ་ན་, ངེ་ལ་ ཁག་ནེ་ནེན་ ནོག་། 25 ཀོན་འཇོག་རྒེ་ ཁྱི་ཞ་རྒུན་ལ་ ཁོ་རང་ངེ་ ཁྲིན་ སོན་ཏེ་ ཤེད་ཏེ་ ཁོང་ངེ་ ཆོའེ་ཚོག་རྒུན་ལ་ ཞབ་རྟོག་ ཞུ་ཅེ་ ཁག་པོ་ ང་ ཀ་ལེ་ ཛེད་། 26 ཏུའི་ཡུན་རིང་ འདང་ ངུལ་མེ་ མིར་རྒྱུད་རྒུ་ནི་ཀ་ནི་ རྦེ་རྡེ་ པོ་རེ་ ཛེད་ཀ་ནེ་ ཏེ་ ཁྲིན་འབོ་ ཏག་ས་ ཀོན་འཇོག་རྒེ་ ཁོ་རང་ངེ་ མི་ ཏམ་པ་རྒུན་ལ་ ངོན་ཅུག་རྒེ་ ཛེད་། 27 ཀོན་འཇོག་རྒེ་ མ་ཤི་ཀེ་ ནོར་ རྡང་ སྤལ་རྦོ་ ཁྱི་ཞ་ ཡ་ཧུ་འདཱ་པ་ མན་ཀན་རྒུ་ནི་ཕི་ལ་ འིན་ཀན་འབོ་, ཁོ་རང་ངེ་ མི་རྒུན་ལ་ ཧ་ཀོ་ཅུག་ཅེ་ལ་ ཐུག་ཐེད་རྡེ་ནོག་། ཀོན་འཇོག་རྒེ་ སང་སྤེར་རྦོ་, མ་ཤི་ཀ་ ཁྱི་ཞི་ན་ ཞུ་རྡེ་ ཡོ་ཀན་འབོ་ འིན་, ཏོ་རྦེ་ ཁྱི་ཞ་རྒུན་ལ་ ཁོང་ངེ་ སྤལ་ལེ་ན་ ཐུའི་ཤེ་ རེ་ཝ་རྦོ་ ཏང་ངེ་ནོག་།
28 ཀོན་འཇོག་རྒེ་ ང་ཞ་ སལ་ཧ་ནེ་ ཤེ་རབ་ ཚང་མ་ ཉམ་པོ་ སྤང་པུད་རྡེན་ ཡང་ ལབ་ཞ་ ཏང་ངེན་, ང་ཞི་ མ་ཤི་ཀེ་ ཧོར་ལ་ ཞེན་མ་རྒུན་ལ་ ཤེད་རྡེ་ཡོད་། ཀོན་འཇོག་རྒེ་ འདུན་ལ་ ཏོ་རྒུན་ མ་ཤི་ཀེ་ན་ སམ་བ་ཅེན་ རིག་ འགྱུར་རྡེ་ པུལ་ ཉེན་ཅེ་ལ་ ང་ཞ་ འདོད་པ་ རག་། 29 ཏེ་རྒ་རྦེ་ཕི་ལ་ མ་ཤི་ཀེ་ ང་ སལ་ལེ་ ཛེད་ཀ་ནེ་ ཤེད་ ཏང་ ཁྱུད་ ཚང་མ་ ཉམ་པོ་, ངེ་ ལེ་ཧ་ ཧོཔ་ ཅོའེན་།