ཙོབོ་ ཡི་ཤུ་ ཕེབ་ཅེ་ ཏུའི་ཕི་ ཀྲལ་འགྲིག་ འདེད་ཅེ་།
5
ཤེ་སྤ་ སྤུན་རྒུན་, ཏ་ ཙོབོ་ ཡི་ཤུ་ ལོག་ཏེ་ ཕེབ་ཅེ་ ཏུའི་རྦོ་, ནམ་ ཆེན་ ཏོ་རྦེ་ ཧོར་ལ་ ཁྱི་ཞ་རྒུན་ལ་, འབྲི་རྒོའེ་ མེ་ཀག་། 2 ཅེ་ཟེར་ནི་ ཙོབོ་ ཕེབ་ཅེ་ ཞག་པོ་ ཚན་ལ་ ཧུན་མ་ ཡོང་ཀན་ ཙོག་སེ་ རྒྱུའི་མེད་རྡེ་ ཡོང་ཅེའོ་ ཁྱི་ཞ་ སལ་སྤོ་ རྒྱུའི་ནོག་། 3 མི་རྒུ་ནི་, “འི་ ཏུའི་རྦོ་ ཞིའི་རྡེ་ཅེན་ འདང་ འཇི་སྤ་ མེ་ཀན་ འདུག་” ཟེ་རེན་ ཡོད་ཏུའི་, ཧུན་མེད་ལ་ ཏོ་རྒུ་ནི་ཀ་ རྐྱེན་ངན་ ཡོང་ངེན་, ཀ་ཟུག་ ཕྲུ་རྒུ་ རྐྱེ་ཅེ་ཅེན་ནི་ པོ་མོ་ལ་ རྐྱེ་ཟུར་ ཏང་ངེ་ཡོད་, ཏོ་རྒུན་ ནེན་ཏེན་ལ་ ཏེ་ཀ་ནི་ མི་ཐར་།4 འིན་ན་ ཤེ་སྤ་ སྤུན་རྒུན་, ཁྱི་ཞ་རྒུན་ མུན་ཀྲག་རྒེ་ན་ རྒྱུའི་མེ་ཀན་རྒུན་ ཙོག་སེ་ འདེད་ཏེ་ མན་ཅེ་ཀ་ནི་, ཧུན་མ་ ཙོག་སེ་ ཏེ་ ཞག་པོ་ ལེཔ་ཟ་ནི་, ཁྱི་ཞ་རྒུན་ ཧ་ མི་ལེ་། 5 ཨ་ཧོ་རྒུན་ ཚེན་ ཡ་ མུན་ཀྲག་རྒེ་ ཕྲུ་རྒུ་ མག་, ཁྱི་ཞ་ ཚང་མ་ འོད་ ཏང་ ཉི་མེ་ ཕྲུ་རྒུ་ ནོག་། 6 ཏོ་རྦེ་ཕི་ ཏ་ ཨ་ཧོ་རྒུན་ ཤང་ ཅོའེ་རྡེ་ ཞེན་མ་རྒུན་ ཙོག་སེ་ ཉིད་ལོག་ཏེ་ མ་འདེད་ལ་, རང་འདང་རང་ ཆུན་ཉེན་ཀན་ རིག་ ཡོང་རྒོ་ཤེ་ ནོག་། 7 ཉིད་ ཏང་ཀན་རྒུན་ ཚེན་ལ་ ཉིད་ ཏང་ངེ་ནོག་, ཡང་ ར་རོའེ་ཧན་རྒུན་ ཚེན་ལ་ ར་རོའེ་རྡེ་ནོག་། 8 འིན་ན་ ཨ་ཧོ་རྒུན་ འོད་རྡེ་ འིན་ཅེ་ཀ་ནི་, ཨ་ཧོ་རྒུ་ནི་ རང་སེམ་ ཆུན་ཧེ་, ཡང་ ཏེཏ་པ་ རྡང་ ཤེ་སྤ་རྒུན་ ཀྲང་ལ་ ཀབ་ཅེ་ མག་ཆེ་, ཡང་ ཐར་པ་ ཐོབ་ཅེ་ རེ་ཝ་ ནེན་ཏེན་འབོ་ ལྕག་རྡེ་ ཏི་རྦི་ ཙོག་སེ་ ཀོན་ནེན་། 9 ཅེ་ཟེར་ནི་ ཀོན་འཇོག་རྒེ་ ཨ་ཧོ་རྒུན་ ཆེད་པེ་ཕི་ འདམ་མེ་ མ་ཛེ་རྡེ་ལ་, ཨ་ཧོའེ་ ཙོབོ་ ཡི་ཤུ་ མ་ཤི་ཀ་ རྒྱུད་ཏེ་ ཐར་པ་ ཐོབ་ཅེ་ལ་, འདམ་མེ་ ཛེད་ཏེ་ ནོག་། 10 ཨ་ཧོའེ་ཕི་ ཡི་ཤུ་ ཀྲོྃ་། ཨ་ཧོ་ ཤི་རྡེ་ ཡོད་ཁྲོ་ ཡང་ སོན་པོ་ ཨ་ཧོ་ལ་ ཁོང་ ཉམ་པོ་ ཏུའི་རྒྱུན་ མི་ཙེ་ པུད་ཉེན་ཅེ་ རྒྱུ་ཚན་འབེ་ཕི་, ཁོང་ ཀྲོྃ་། 11 ཏོ་རྦེ་ཕི་ ཁྱི་ཞི་ ཅིག་ ཏང་ ཅིག་ལ་ སེམ་རུའི་ ཏྃ་རྡེ་, ཙོབོ་ ཡི་ཤུའི་ན་ ཁོང་རྒུ་ནི་ ཏེཏ་པ་ རྐྱེད་ལ་ ཁྱོང་, ཀ་ཟུག་ ཁྱི་ཞི་ ཅོའེན་འདང་ ནོག་།
པ་འུ་ལུའི་ ལྟིང་འཇུག་རྒེ་ ལབ་ཞ་།
12 ཤེ་སྤ་ སྤུན་རྒུན་, ཙོབོ་ ཡི་ཤུའི་ ཞབ་རྟོག་ ཞུ་ཀ་ནེ་ འུ་རྐྱོང་རྒུན་ལ་ སི་ཝ་ ཅོ་ཅེ་ལ་ ཞུ་འིན་, ཀའོ་རྒུ་ནི་ ཁྱི་ཞི་ ཕྲོ་ ཙོན་འགྲུའི་ ཧོཔ་ ཅོའེན་ ཁྱི་ཞ་ རྡིག་པ་ མི་ཅོ་ཤེ་ལ་ སྤང་པུད་རྡེ་ནོག་། 13 འོ་ནེ་, ཁོང་རྒུ་ནི་ ཙོན་འགྲུའི་ ལེ་ཧ་རྒུན་ ཐོང་འདེ་ ཁོང་རྒུན་ལ་ རྒྱེ་སྤ་ སི་ཝ་ རྡང་, ཉིང་ནི་ ཤེ་སྤ་ ཅོའེ་ཧེ་, ཡང་ ཅིག་ ཏང་ ཅིག་ལ་ ཐུན་འདེ་ འདོད་ཧེ་།
14 ཤེ་སྤ་ སྤུན་རྒུན་ ཁྱི་ཞ་རྒུན་ལ་, ང་ཞི་ སེམ་རུའི་ ཏང་ངེན་ ཞུ་འིན་, ལེ་མི་ལམ་ཀན་རྒུན་ལ་ སྤང་པུད་ཧེ་, ཉིང་ཤུག་ མེ་ཀན་རྒུན་ལ་ སེམ་རུའི་ ཏོང་ཧེ་, ཉམ་ཤུང་རྒུན་ལ་ ཡ་ཏོ་ ཅོའེ་ཧེ་, ཡང་ ཚང་མ་ ཉམ་པོ་ ཟོད་པ་ པོར་ཧེ་། 15 སུ་ཞི་ལ་ ངན་པེ་ ལེན་ལ་ ངན་པ་ ཅོ་ མ་ཅུག་ཧེ་, ཅིག་ ཏང་ ཅིག་ལ་ མ་ཚེད་, ཞེན་ ཚང་མ་ ཉམ་པོ་ལ་ ཏུའི་རྒྱུན་ ཟང་པོ་ ཅོ་ཅེ་ ཙོན་འགྲུའི་ ཅོའེ་ཧེ་།
16 ཏུའི་རྒྱུན་ རྒ་མོ་ འདོད་ཧེ་། 17 ཆེད་མེད་ལ་ མོ་ལམ་ ཞུའིན་ འདོད་ཧེ་། 18 ནེ་ལུག་ ཚང་མེ་ན་ ཀོན་འཇོག་ལ་ ཐུག་ཞེ་ཆེ་ ཞུའི་ཧེ་, ཅེ་ཟེར་ནི་ ཁྱི་ཞི་ མ་ཤི་ཀ་ ཡི་ཤུ་ ཉམ་པོ་ མི་ཙེ་ན་, ཡུ་རྒུན་ ཀོན་འཇོག་རྒེ་ ཐུག་འདོད་ ནོག་།
19 ཁྱི་ཞི་ ཉིང་ངེ་ན་ ཏམ་པེ་ ཐུག་ཡིད་རྡེ་ ཆག་ལེ་རྒུན་ལ་ རྒག་ཞ་ མ་ཏང་ཧེ་། 20 ལུང་རྟན་རྒུན་ལ་ སི་ཝ་ མ་ཏང་ངེ་ལ་ ནྃ་མེད་ མ་ཅོ་ཧེ་། 21 ལུང་རྟན་ ཚང་མ་ལ་ ལྟག་ཅེད་ ཅོའེ་ཧེ་། རྡེན་འབེ་ ལུང་རྟན་རྒུ་ནི་ཀ་ རྟེམ་པོ་ ཐམ་འདེ་ འདོད་ཧེ་། 22 ལེ་ཧ་ ངན་པེ་ན་ ཚང་མ་ནི་ ཐག་རིང་ལ་ འདོད་ཧེ་།
23 ཏ་ ཨ་ཧོ་ལ་ ཞིའི་རྡེ་ སལ་ཧ་ནེ་ ཀོན་འཇོག་རྒེ་ ཁྱི་ཞ་རྒུན་ལ་ ཅི་ས་ཐོག་ནི་ ཏམ་པ་ ཛེད་ཤིག་། ཡང་ ཨ་ཧོའེ་ ཙོབོ་ ཡི་ཤུ་ མ་ཤི་ཀ་ ལོག་ཏེ་ ཕེབ་ཕེབ་ཚུག་པ་, ཁྱི་ཞི་ སེམ་ཡིད་, སེམ་ འདང་ ཟུྃ་སྤོ་ ཚང་མ་, རྐྱོན་མེད་ པོ་རེ་ ཛེད་ཤིག་། 24 ཁྱི་ཞ་ འབོ་ ཛེད་ཀ་ནེ་ ཀོན་འཇོག་ནི་ ལོ་ཁྱེལ་ཅེན་ ནོག་, ཡང་ ཁོང་ངེ་ ཏོ་ ཚང་མ་ ཅོའོ་ ཛེད་རྡེན་།
25 ཤེ་སྤ་ སྤུན་རྒུན་, ང་ཞི་ཕི་ མོ་ལམ་ ཞུའི་ཧེ་། 26 ཤེ་སྤ་ ཉམ་པོ་ ཤེ་སྤེ་ སྤུན་ ཚང་མ་ལ་ འཇུ་ ཞུའི་། 27 ང་, པ་འུ་ལུའི་ ཁྱི་ཞ་རྒུན་ལ་, ཙོབོ་རྡེ་ ཝང་ངེ་ན་ འི་ ཡི་རྒེ་ནི་ ཤེ་སྤེ་ སྤུན་ ཚང་མེ་ འདུན་ལ་ སིལ་ཅེ་ལ་ ཀཱ་ ཏང་ངེ་ཡོད་།
28 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ ཁྱི་ཞ་ ཉམ་པོ་ ལུའི་ཤིག་༎