ཕི་ལི་པི་པ་ 3

རྡེན་འབེ་ ལམ་།

ལྟིང་འཇུག་ལ་, ངེ་ སྤུན་རྒུན་, ཙོབོ་རྡེ་ན་ ཐེད་པོ་ ཅོའེ་ཧེ་། ཁྱི་ཞ་ འི་ སྤེ་ར་རྒུན་ ལྡབ་ཏེ་ ཤེད་ཅེ་ལ་ ང་ སུན་ཅེ་ མེ་རག་། འི་རྦོ་ ཁྱི་ཞ་རྒུ་ནི་ སྲུང་རྐྱོབ་རྦེ་ཕི་ འིན་།

2 ཁྱི་ ཙོག་སེ་, ངན་པ་ ལེ་ཧ་ ཅོ་ཀན་, ཐར་པ་ ཐོབ་ཅེ་ཕི་ འགོཔ་ཅེཏ་ ཅོ་རྒོའེ་ ཟེར་ཧ་ནེ་ འི་ ཡ་ཧུ་འདཱ་པ་རྒུ་ནི་ཀ་ནི་ ཤང་ ཅོའེ་ཧེ་། 3 ཨ་ཧོ་ནི་: སེམ་ལ་ འགོཔ་ཅེཏ་ ཛེད་ཏེ་ ཀོན་འཇོག་རྒེ་ རྡེན་འབེ་ མི་རྒུན་, ཁོང་ངེ་ ཐུག་ཡིད་ རྒྱུད་ཏེ་ ཅོལ་ཧན་, ཡི་ཤུ་ མ་ཤི་ཀེ་ ཨ་ཧོའེ་ཕི་ ཛེད་ཀན་རྒུན་ལ་ རྟོད་པ་ པུལ་ཧན་ འདང་ འཇིག་རྟེན་པེ་ ལུག་སྲོལ་རྒུ་ནི་ཀ་ ལོ་ཁྱེལ་ མ་ཅོ་ཀན་རྒུན་ ནོག་། 4 ཏོ་ཙོག་སེ་ འཇིག་རྟེན་པེ་ ལུག་སྲོལ་རྒུ་ནི་ཀ་ ངེ་ལ་ ལོ་ཁྱེལ་ ཅོ་ཉེན་ཅེ་ ཡོད་པེན་།

ཀལ་ཏེ་ སུ་ཞིག་ལ་ ཏེ་ ལུག་སྲོལ་རྒུན་ལ་ ལོ་ཁྱེལ་ ཅོ་ཅེ་ རྒྱུ་ཚན་ ཡོད་ནི་ ང་ལ་ མ་མང་པོ་ ཡོད་: 5 སྤེར་ན་ རྐྱེ་རྡེ་ ཞག་ རྒྱེད་པེ་ ཞག་ལ་ ང་ འགོཔ་ཅེཏ་ ཅོའེ་, ང་ ཨིས་ར་ཡེལ་པ་ འིན་, ང་ ཨིས་ར་ཡེལ་ལེ་ སི་ཝ་ཅེན་ནེ་ མི་རིག་ འབེན་ཡཱ་མིན་ ཟེར་ཧ་ནེ་ འིན་, ང་ རྡང་ ངེ་ ཕ་མེ་པོ་ ཚང་མ་ ཨིབ་རི་པ་ འིན་, ཁྲིམ་ རེ་རེ་ རྒྱ་ལེ་ ཅོའེ་རྡེ་ སྲུང་ཀ་ནེ་ ཆོའེ་ རྡེ་ པ་རུ་ཤི་པ་ ཟེར་ཧན་འབེ་ ནང་ནི་ ང་ལ་ འིན་འབེན་, 6 ཀོན་འཇོག་རྒེ་ཕི་ སེམ་ཤུག་ ཉམ་པོ་ ངེ་ ཡི་ཤུའི་ ཆོའེ་ཚོག་རྒུན་ལ་ ནག་ ལྟན་རྦེན་, ཡ་ཧུ་འདཱ་པ་རྒུ་ནི་ ཁྲིམ་ ནང་ཞིན་ ང་ རྐྱོན་མེད་ཞིག་ འིན་འབེན་།

7 འིན་ན་ ཀའོ་རྒུན་ ངེ་ ངུལ་ལ་ མ་ རིན་ཅེན་ སི་རྒེ་ཡོད་པེན་, ཏ་ ངེ་ ཏག་ས་ རིན་མེད་ སི་རྒེན་ ཅེ་ཟེར་ནི་ ངེ་ཕི་ མ་ཤི་ཀ་ ཀྲོང་རྡེ་ ཛེད་། 8-9 འོ་ནེ་ ནམ་ ངེ་ མ་ རིན་ཅེན་ ཙོབོ་ ཡི་ཤུ་ མ་ཤི་ཀ་ ངོ་ཤེ་ཤེའོ་ ཉམ་པོ་ རྡུར་ནི་ ཏེ་ ཚང་མ་ ཅང་རིན་ མེད་ཏེ་ ནོག་། ཁོང་ ཉམ་པོ་ འབྲེལ་ ཡོད་ཅེ་ རྡང་ ཁོང་ངེ་ འིན་ཅེ་ཕི་ ངེ་ ཏེ་ ཚང་མ་ ཁྱིམ་ས་ ཙོག་སེ་ སི་རྡེ་, ཕང་ ཚར་རྡེ་ འིན་། ཡ་ཧུ་འདཱ་པེ་ ཁྲིམ་རྒུན་ ཁ་ཉེན་ཅེའོ་ མ་ནོག་ མ་ཤི་ཀེ་ཀ་ ཏེཏ་པ་ ཅོ་ཅེའོ་ རྒྱུད་ཏེ་ ང་ ཀྲང་པོ་ ཐེའེ་ཛེད་ཏེ་ འིན་, ཅེ་ཟེར་ནི་ ཀོན་འཇོག་རྒེ་ འདུན་ལ་ ཨ་ཧོ་ ཀྲང་པོ་ འིན་ཅེ་རྦེ་ ཏེཏ་པེ་ཀ་ རག་ལེ་རྡེ་ ནོག་། 10 ང་ མ་ཤི་ཀ་ ཤེ་ཤེ་ ཡང་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཀ་ནེ་ ཀོན་འཇོག་རྒེ་ ཏེ་ ཝང་ ཀྲག་པེ་ ཐོང་ངོམ་ ཆ་ཉིན་རག་། མ་ཤི་ཀ་ ཉམ་པོ་ རྡུ་ངལ་ ཐོང་འདེ་ ཁོང་ངེ་ ཀྲོང་ཤེ་ན་ འདྲེའེ་ ཉིན་རག་ 11 ང་ལ་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་རྡེ་ ཛེད་ཅེ་ རེ་ཝེ་ན་ ངེ་ ཏོ་རྒུན་ ཅོའེན་།

རེ་ཝེ་ ཆོག་ལ་ ཆ་ཅེ་།

12 ངེ་ ང་རང་ངེ་ རེ་ཝ་འབོ་ ཀྲུཔ་ ཚར་རྡེ་ འིན་, ཡ་ ང་ མ་ཤི་ཀ་ ཙོག་སེ་ འགྱུར་རྡེ་ འིན་ ཟེ་རེ་མེད་། འིན་ན་ ངེ་ ཁོང་ ཙོག་སེ་ འགྱུར་ཤེ་ལ་ ཙོན་འགྲུའི་ མ་ རྒྱ་ལེ་ ཅོའེན་, ཅེ་ཟེར་ནི་ ཏེ་རྒ་རྦེ་ ཏོན་ལ་ ཁོང་ངེ་ ང་ འདམ་མེ་ ཛེད་ཏེ་ འིན་འབེན་། 13 ངེ་ སྤུན་རྒུན་, ང་ ཏོ་ཙོག་སེ་ མི་ ཏ་རུང་ མ་འགྱུར་རེ་ འིན་། འིན་ན་ ངེ་ ངུལ་མ་ ཚང་མ་ ཞེད་ཏེ་ ཡོང་ཅེ་ཅེན་ནེ་ ཏུའི་ཕི་ ཙོན་འགྲུའི་ མང་པོ་ ཅོའེན་། 14 པང་རྡུར་རེ་ན་ རྒྱུག་ཀན་ ལྟིང་འཇུག་རྒེ་ ཐིག་ཚུག་པ་ པང་ ཏང་ངེ་ ཙོག་སེ་, ཀོན་འཇོག་རྒེ་ མ་ཤི་ཀ་ ཡི་ཤུ་ རྒྱུད་ཏེ་ འབོ་ ཛེད་ཀ་ནེ་ རྡེ་བ་ཅན་ནེ་ སོལ་རེ་ ཆོག་ལ་ ང་ལ་ རྒྱུག་རྒེ་ཡོད་།

15 ཨ་ཧོ་ སེམ་ཡིད་རྡེ་ན་ ལྡན་ཀན་ ཚང་མེ་ ངེ་ ལབ་ཀན་རྒུ་ནི་ཀ་ ཁ་ཆམ་ རྒོ་ཤེ་ ནོག་། ཀལ་ཏེ་ ཁྱི་ཞི་ ནང་ནི་ སུ་ཞིག་རྒེ་ སམ་ཚུལ་ ཏེ་སང་ སོ་སོ་ ཡོད་ནི་, ཀོན་འཇོག་རྒེ་ ཁོང་རྒུན་ལ་ རྡེན་འབེ་ ལམ་འབོ་ སལ་སྤོ་ ཧ་ཀོ་ཅེ་ལ་ ཡ་ཏོ་ ཛེད་རྡེན་། 16 ཏ་ ཀོན་འཇོག་རྒེ་ ཏག་ས་ཚུག་པ་ ངོན་ཅུག་རྒེ་ ཛེད་ཀན་ ནང་ཞིན་ ཨ་ཧོ་རྒུ་ནི་ མི་ཙེ་རྦོ་ པུད་རྡེན་།

17 ངེ་ སྤུན་རྒུན་, ཁྱི་ཞ་རྒུ་ནི་ མི་ཙེ་, ངེ་ པུད་ཀན་ ཙོག་སེ་ པུད་ཧེ་, ཡང་ ང་ཞི་ སྤེ་ཀ་ འགྲུལ་ཧན་རྒུ་ནི་ཀ་ནི་ རྒྱ་ལེ་ ཅོའེ་རྡེ་ ཅོང་ཧེ་། 18 ངེ་ ཁྱི་ཞ་ ངུལ་ལ་ ལེན་ མང་པོ་ ཟེར་ ཚར་རྡེ་ འིན་, ཡང་ ཏ་རུང་ང་ ཆི་མག་ ཉམ་པོ་ ཟེ་འིན་, མང་པོ་ཞིག་ མ་ཤི་ཀེ་ རྐྱང་ཤིང་ངེ་ རྒྱཔ་འགལ་ འིན་ཀ་ནེ་ ལམ་མེ་ཀ་ འགྲུལ་རྡུག་། 19 ཁོང་རྒུན་ མེ་ཀན་ ཆ་ཅེ་ ཆོག་ལ་ ཆེན་ ནོག་, ཀྲོཏ་པ་རྦོ་ ཁོང་རྒུ་ནི་ ཀོན་འཇོག་ ནོག་, ཁོ་རང་རྒུ་ནི་ ཁྲེལ་མེད་རྡེ་ ལེ་ཧ་རྒུ་ནི་ཀ་ ཕོ་སོ་ ཅོ་ནོག་, འཇིག་རྟེན་པེ་ ཁག་ཅེན་ ཐེ་ཀན་རྒུ་ནི་ ཧོར་ལ་ ཁོང་རྒུ་ནི་ ཏུའི་རྒྱུན་ སམ་བ་ ཏང་ངེ་ནོག་། 20 འིན་ན་ ཨ་ཧོ་རྒུ་ནི་ རྡེ་བ་ཅན་ནེ་ ཡུལ་མི་ ནོག་, ཡང་ རྐྱབ་འགོན་ ཙོབོ་ ཡི་ཤུ་ མ་ཤི་ཀ་ ལོག་ཏེ་ ཕེབ་ཅེ་ཕི་ ཨ་ཧོ་རྒུ་ནི་ རིྃ་རྡེན་ སྲུང་ངེ་ནོག་།

21 ཁོ་རང་ངེ་ ཝང་ངེ་ ཡོག་ལ་ ཅི་ཚང་མ་ ཁྱོང་ཉེན་ནེ་ ཛེད་ཀ་ནེ་ མ་ཤི་ཀེ་ ཤུག་པེ་, ཨ་ཧོའེ་ ཤུག་མེད་ འི་ འཇིག་རྟེན་ནེ་ ཟུྃ་སྤོ་ནི་ ཁོ་རང་ ཙོག་སེ་ ཟི་ཞིད་ཅེན་ འགྱུར་ཤུག་རྒེ་ ཛེ་རྡེན་།