ཕི་ལི་པི་པ་ 4

ཏེ་རྒ་རྦེ་ཕི་ལ་ སྤུན་རྒུན་, ངེ་ ཤེ་སྤ་ ཅོ་ཀན་ འདང་ ཐུག་ཅེ་ལ་ ང་ རིྃ་རྡེན་ ཡོད་, ཁྱི་ཞ་ ངེ་ རྐྱིད་པོ་ རྡང་ ཐོར་ཤོག་ འིན་། ངེ་ ཤེ་སྤ་ ཡ་ཏོ་རྒུན་ ཙོབོ་ ཡི་ཤུའི་ན་ རྟེམ་པོ་ འདོད་ཧེ་།

སེམ་རུའི་རྡེ་ སྤེ་ར་རྒུན་།

2 ངེ་ སྲིང་མོ་ ཨེ་འོ་འདི་ཡ་ རྡང་ སིན་ཏི་ཀེ་, ཁྱི་ཞ་ ཉ་ཧེ་ན་ མི་འགྲིག་ཅེ་ ཡོ་ཀན་རྒུན་ མེ་ཀན་ ཅོའེ་རྡེ་ འཇུ་འཇུ་ ཐུན་ཧེ་, ཅེ་ཟེར་ནི་ ཁྱི་ཞ་རྒུན་ ཙོབོ་རྡེ་ ནོག་། 3 ཡང་ ངེ་ ལོ་ཁྱེལ་ཅེན་ ཁྲོ་པ་ ཁྱེ་རང་ངེ་, ཏེ་ པོ་མོ་ ཉ་ཧ་ ཐུན་ཅུག་ཅེ་ན་ ཡ་ཏོ་ ཅོའེ་། ཁོང་རྒུ་ནི་ ང་ ཉམ་པོ་ ཡི་ཤུ་ མ་ཤི་ཀེ་ ནེ་ཚུལ་ ཟང་པོ་ ཤེད་ཅེ་ན་ མང་པོ་ ཙོན་འགྲུའི་ ཅོའེ་, ཡང་ ཀེ་ལེ་མན་ རྡང་ ངེ་ ཞེན་ ཁྲོ་པ་རྒུན་ ཉམ་པོ་ལ་ ལེ་ཧ་ ཅོའེ་རྡེ་ འིན་འབེན་, ཀའོ་རྒུ་ནི་ མིང་ མི་ཙེ་ སྤེ་ཆེ་ན་ ཀོན་འཇོག་རྒེ་ འབྲི་ཛེད་ཏེ་ ནོག་།

4 ཙོབོ་ ཡི་ཤུའི་ན་ ཏུའི་རྒྱུན་ ཐེད་པོ་ འདོད་ཧེ་། ངེ་ ཡང་ ཟེ་འིན་ ཐེད་པོ་ འདོད་ཧེ་། 5 ཁྱི་ཞ་ འཇམ་པོ་ འིན་ཀན་འབོ་ ཁྱི་ཞི་ ཤོད་པ་ རྒྱུད་ཏེ་ ཚང་མ་ལ་ ཐོང་ཅུག་ཧེ་། ཞེད་ མ་ཞེད་, ཙོབོ་ འགྱོ་སྤ་ ལོག་ཏེ་ ཕེབ་རྦེ་ ཛེ་རྡེན་།

6 ཅི་ཞིག་རྒེ་ཕི་ལ་ ཚེར་ མ་ཚེར་ཧེ་, འིན་ན་ ནེ་ལུག་ ཚང་མེ་ན་ ཀོན་འཇོག་ལ་ མོ་ལམ་ ཞུའིན་ ཁྱི་ཞ་རྒུ་ནི་ རྒོའེ་ཤེ་ཅན་རྒུན་ སལ་ཅེ་ལ་ ཞུ་ཝ་ པུལ་ཟ་ནི་ ཐུག་ཞེ་ཆེ་ ཞུའི་ཧེ་། 7 ཏེ་ནི་ ཨ་ཧོ་རྒུན་ལ་ ཀོན་འཇོག་རྒེ་ ཞིའི་རྡེ་ ཐོབ་རྦེན་, ཀའོ་ ཨ་ཧོ་རྒུ་ནི་ ཧ་ཀོ་ནི་ ཐལ་རྡེ་ ཡོད་, ཡང་ མ་ཤི་ཀ་ ཡི་ཤུའི་ན་ ཁོང་ངེ་ ཞི་རྡེ་, ཁྱི་ཞི་ ཉིང་ འདང་ སེམ་རྒུན་ རྐྱོབ་ཏེ་ པོ་རེ་ ཛེ་རྡེན་།

8 ལྟིང་འཇུག་ལ་, སྤུན་རྒུན་, རྡེན་འབའ་ འིན་ཀན་, སི་ཝེ་ འོའེ་སྤ་, ཀྲང་པོ་ ཅོ་ཀན་, སང་མ་, ཤེ་སྤ་ཅེན་, རྟོད་པེ་ འོའེ་སྤ་ཅེན་ ཡང་ ཏོ་རྒུ་ནི་སང་ མང་ངེ་ ཀྲག་པོ་ རྡང་ རྟོད་པེ་ འོའེ་སྤ་ ཐོབ་ཅེ་ཅེན་རྒུ་ནི་ཀ་ ཁྱི་ཞི་ སམ་བ་རྦོ་ རྟེམ་པོ་ པོར་ཧེ་། 9 ཁྱི་ཞ་རྒུ་ནི་ ངེ་ཀ་ནི་ ལོབ་ཀན་, ཡང་ ཐོབ་ཀན་, ཡང་ ཚོར་ཧན་, ཡང་ ངེ་ ཅོ་ལ་ ཐོང་ཀན་རྒུན་ ལག་ལེན་ནི་ན་ ཁྱོང་ཧེ་, ཏེ་ནི་ ཞིའི་རྡེ་ ཀོན་འཇོག་ ཁྱི་ཞ་རྒུན་ ཉམ་པོ་ ཞུ་རྡེན་།

པ་འུ་ལུའི་ ཁོང་རྒུ་ནི་ ཁྱོའེ་མ་ལ་ ཐུག་ཞེ་ཆེ་ ཞུའི་།

10 ཏ་ ལྟིང་འཇུག་ལ་ ཁྱི་ཞ་རྒུ་ནི་ ངེ་ཕི་ ཡང་ ནྃ་ ཏང་ཅེ་ཀ་ནི་, ངེ་ ཙོབོ་ མ་ཤི་ཀ་ རྟོད་པ་ པུ་ལེ་ཡོད་། ནེན་ཏེན་ལ་ ཁྱི་ཞ་རྒུ་ནི་ ཏུའི་རྒྱུན་ ངེ་ཕི་ ཚེར་ཧ་ ཅོ་ཡོད་པེན་, འིན་ན་ ང་ ཡ་ཏོ་ ཅོ་ཅེ་ ཧབ་ ཁྱི་ཞ་རྒུན་ལ་ མ་ཐོབ་རྦེ་ ནོག་། 11 ངེ་ ཏོ་ ང་ རྒོའེ་ཤེ་ ཡོད་ཅེ་ཀ་ནི་ ཟེ་རེ་མེད་། ང་ ནེ་ལུག་ ཚང་མེ་ན་ ཚིམ་འདེ་ རྐྱིད་པོ་ འདེད་ཅེའོ་ ཧ་ཀོ་རྡེ་ འིན་། 12 རྒོའེ་ཤེ་ན་ ཡང་ མང་པོ་ ཡོད་ཅེའོ་, ཀ་ཟུག་ཤིག་ ཡོང་ཅེན་ ང་ རྒྱུའི་ཡོད་, ཡང་ ནེ་ལུག་ ཚང་མེ་ན་ རྐྱིད་པོ་ ཉམ་པོ་ འདེད་ཅེ་ སང་སྤེར་རྦོ་ ང་ ཧ་ཀོ་རྡེ་ ཡོད་, ཡང་ནི་ ང་ ཟ་རྒྱུ་ མང་པོ་ ཡོད་ཁྲོ་ ཡ་ ལྟོག་རི་, ང་ མ་མང་པོ་ ཡོད་ཁྲོ་ ཡ་ ཧོན་མེ་ ན་། 13 མ་ཤི་ཀེ་ ང་ ཤེད་ སལ་ཅེའོ་ ང་ ནེ་ལུག་ ཀ་ཟུག་ཤིག་ འིན་ན་ ཁུར་ ཉེན་ནེ་ཡོད་། 14 ཏེ་ན་ ངེ་ རྡུ་ངལ་རྒུ་ནི་ན་ ཐུའི་རྡེ་ ང་ ཡ་ཏོ་ ཅོ་ཅེའོ་ ཁྱི་ཞི་ ང་ ཐུག་ཞེ་ ཛེད་ཏེ་ ནོག་།

15 ཕི་ལིབ་པི་ ཆོའེ་ཚོག་ ཁྱི་ཞ་ རྒྱུའི་ནོག་, ངེ་ འགོ་མ་རང་ ཁྱི་ཞ་ ནེ་ཚུལ་ ཟང་པོ་ ཁྱོྃ་རྡེ་, མ་ཀེ་འདོ་ནི་ཡཱེ་ ཡུལ་ནི་ ང་ ཆ་ཟ་ནི་, ཁྱི་ཞ་ མན་པ་ ཡང་ སུ་ ཆོའེ་ཚོག་ཞིག་ལ་ ང་ རྒོའེ་ཤེ་ན་ ཡ་ཏོ་ མ་ཅོའེ་། 16 ཡང་ ང་ ཐེ་ས་ལོ་ནི་ཀེ་ རྒྱལ་སེ་ན་ རྒོའེ་ཤེ་ ཡོད་ ཟ་ནི་ལ་, ཁྱི་ཞ་རྒུ་ནི་ ང་ ལེན་ མང་པོ་ ཁྱོའེ་མ་ ཀལ་། 17 ངེ་ ཏོ་ ཁྱི་ཞ་རྒུ་ནི་ ང་ ཁྱོའེ་མ་ ཀལ་རྡེ་ ལེབ་ཅེ་ཕི་ ཟེར་རྡེ་ མན་ འིན་ན་ ཀོན་འཇོག་རྒེ་ ཁྱི་ཞ་ སལ་ཅེ་ སོལ་རེ་རྦེ་ཀ་ ནེན་འདེ་ སལ་ལེ་ ཛེད་ཅེ་ལ་ ཟེ་འིན་།

18 སྤུན་ ཨེ་པབ་ཕོ་རོ་ཏི་ཏུ་ ཉམ་པོ་ ཁྱི་ཞི་ ང་ ཀལ་ཧ་ནེ་ ཁྱོའེ་མ་རྒུན་ ངེ་ རྒོ་ཤེ་སང་ མང་ངེ་ འདུག་པེ་, ཏ་ ང་ ཡང་ ཅང་ རྒོའེ་ཤེ་ མེད་། ཏོ་རྒུ་ནི་ ཏྲི་ཞིམ་ཅེན་ནེ་ སྲོག་ཆོད་, ཀོན་འཇོག་ ཐུག་ཐེད་ཀན་ འདང་ འོའེ་སྤ་ ནོག་། 19 ཡང་ ངེ་ ཀོན་འཇོག་རྒེ་ མ་ཤི་ཀ་ ཡི་ཤུ་ རྒྱུད་ཏེ་ ཁོ་རང་ངེ་ ཟི་ཞིད་རྡེ་ པང་ཛོད་ནི་ ཁྱི་ཞ་རྒུན་ལ་ རྒོའེ་ཤེ་ ཡོ་ཀན་ ཚང་མ་ སལ་ལེ་ ཛེ་རྡེན་།

20 ཨ་ཧོའེ་ ཀོན་འཇོག་ ཏང་ ཡབ་བ་ ཏུའི་རྒྱུན་ནི་ཏུའི་རྒྱུན་ལ་ སྤལ་ ཐོབ་ཤིག་, ཨ་མེན་།

ལྟིང་འཇུག་རྒེ་ འཇུ་།

21 ཡི་ཤུ་ མ་ཤི་ཀེ་ན་ ཏེཏ་པ་ ཡོ་ཀ་ནེ་ མི་ ཏམ་པ་རྒུན་ལ་ འཇུ་ ཞུའི་, ཡང་ ང་ ཉམ་པོ་ ཡོ་ཀ་ནེ་ སྤུན་རྒུ་ནི་ལ་ ཁྱི་ཞ་རྒུན་ལ་ འཇུ་ ཞུ་རུག་། 22 འི་རུ་ ཡོ་ཀ་ནེ་ ཞེན་ཡང་ མི་ ཏམ་པ་, མིག་ས་ལེ་ རོམ་མེ་ རྒྱ་སྤེ་ ཁར་རེ་ན་ ལེ་ཧ་ ཅོ་ཀན་རྒུ་ནི་ལ་, ཁྱི་ཞ་རྒུན་ལ་ འཇུ་ ཞུ་རུག་།

23 ཙོབོ་ ཡི་ཤུ་ མ་ཤི་ཀེ་ ཐུག་ཞེ་ ཁྱི་ཞ་རྒུ་ནི་ སེམ་ ཉམ་པོ་ ཞུ་ཤིག་, ཨ་མེན་༎