ཕི་ལི་པི་པ་ 2

ཡི་ཤུ་ འགྲུལ་ལེ་ ཛེད་ཀ་ནེ་ པབ་མེ་ ལམ་མེ་ཀ་ འགྲུལ་།

མ་ཤི་ཀེ་ འིན་ཅེ་རྦེ་ ཁྱི་ཞ་རྒུན་ལ་ སེམ་རུའི་ མ་ཐོབ་ཏེ་? ཅི་ མ་ཤི་ཀེ་ ཤེ་སྤེ་ན་ སེམ་སོ་ མ་ཐོབ་ཏེ་? ཅི་ ཁྱི་ཞ་རྒུན་ ཀོན་འཇོག་རྒེ་ ཐུག་ཡིད་ ཉམ་པོ་ འབྲེལ་རྡེ་ མེད་རྡེ་? ཅི་ ཁྱི་ཞ་རྒུན་ལ་ མ་ཤི་ཀེ་ ཡ་ཤ་ རྡང་ ཉིང་ཞེ་ མ་ཐོབ་རྦེ་? 2 ཀལ་ཏེ་ ཁྱི་ཞི་ན་ ཏོ་ ཚང་མ་ ཡོད་ནི་, ཉིང་ ཅིག་ འགྱུར་རྡེ་, ཅིག་ ཏང་ ཅིག་ལ་ ཤེ་སྤ་ ཅོའེ་རྡེ་, སེམ་ འདང་ འདོད་པེ་ན་ ཅིག་ འགྱུར་རྡེ་ ངེ་ ཐེད་པོ་རྒུན་ འདྲན་འདྲ་ ཀྲུབ་ཅུག་ཧེ་།

3 ཅི་ཞིག་ལ་ རང་འདོད་ ཡང་ ཞེན་མེ་ ཕོ་སོ་ ལྟན་ཅེ་ལ་ ཅང་ མ་ཅོ་ཧེ་, སེམ་ པབ་མོ་ ཉམ་པོ་ ཞེན་མ་ རང་ངེ་སང་ མང་ངེ་ རིན་ཅེན་ སམ་འདེ་ ཅོ་ཤིག་། 4 ཁྱི་ཞ་ རེ་རེ་ རང་ཏོན་ ཅིག་པོ་ མ་ཅོ་ལ་, ཞེན་མེ་ ཕན་ཏོག་རྒེ་ཕི་ལ་ སམ་བ་ ཏོང་ཧེ་།

5 ཁྱི་ཞ་རྒུ་ནི་ སམ་ཚུལ་ མ་ཤི་ཀ་ ཡི་ཤུའི་ ཙོག་སེ་ ཡོང་རྒོ་ཤེ་ ནོག་།

6 ཞེན་ ཁོང་ ཁོ་རང་ ཀོན་འཇོག་ འིན་འདེ་ལ་,

ཁོང་ངེ་ ཀོན་འཇོག་ འདྲན་འདྲ་ འིན་ཀ་ནེ་ ཀོ་སའོ་

ཐམ་འདེ་ པོ་རེན་ མ་ནི་ ས་མེ་ མ་ཛེད་།

7 འིན་ན་ ཁོང་ངེ་ རྡེ་བ་ཅན་ནེ་ ཐོབ་ཏང་ ཚང་མ་ ཕང་ངེ་ ཛེད་ཏེ་,

ཡོག་པོ་ ཙོག་སེ་ འགྱུར་རེ་ ཛེད་ཏེ་, མི་ ཚུལ་ལ་ རྐྱེ་ ཛེད་།

8 ཁོ་རང་ པབ་མོ་ ཅོའོ་ ཛེད་ཏེ་,

ཤི་ཅེ་ཚུག་པ་ལ་ ཀོན་འཇོག་རྒེ་ ཁ་ཉེན་ནེ་ ཛེད་,

ཡང་ ཅག་པ་ཞིག་ ཙོག་སེ་ རྐྱང་ཤིང་ངེ་ཀ་ ཀྲོྃ་ཤེ་རྦེ་།

9 ཏེ་རྒ་རྦེ་ཕི་ལ་ ཀོན་འཇོག་རྒེ་ ཁོང་ལ་ ཚང་མེ་སང་ སི་ཝ་ཅེན་ནེ་ མལ་རྦེ་ཀ་ ལྟག་རྒེ་ ཛེད་།

ཡང་ ཚང་མེ་སང་ སི་རྟང་ཅེན་ནེ་ ཚན་འབོ་ སལ་ལེ་ ཛེད་།

10-11 ཏེ་རྒ་ རྒྱུ་ཚན་འབེ་ཕི་ ཡི་ཤུའི་ ཚན་ ངོན་ ཟེ་ནི་,

རྡེ་བ་ཅན་ནེ་ན་, འཇིག་རྟེན་ནི་ཀ་ ཡང་ སེ་ ཡོག་ལ་,

སྲོག་ ཡོ་ཀན་ ཚང་མེ་ པིག་ཛུམ་ རྒྱབ་ཏེ་

ཡི་ཤུ་ མ་ཤི་ཀ་རྦོ་ ཙོབོ་ ནོག་ ཟེ་རེན་,

ཏོ་རྦེ་ ཀོན་འཇོག་ ཡབ་རྦ་ སྤལ་ ཁྱོང་ངེ་ ཛེ་རྡེན་།

འཇིག་རྟེན་ནེ་ན་ འོད་ ཙོག་སེ་ འགྱུར་།

12 ངེ་ ཤེ་སྤ་ ཡ་ཏོ་རྒུན་, ང་ ཁྱི་ཞ་རྒུན་ ཉམ་པོ་ ཡོད་ཟ་ནི་, ཁྱི་ཞི་ ཏུའི་རྒྱུན་ ངེ་ ལབ་ཞ་རྒུན་ ཁ་ཉེན་འདེ་ འགྲུ་ལེ་ ཙོག་སེ་, ང་ ཁྱི་ཞ་ ཉམ་པོ་ མེད་ཟ་ནི་ ཏེ་སང་ མང་ངེ་ ཁ་ཉོན་ཧེ་། ཡང་ ཀོན་འཇོག་རྒེ་ སི་ཝ་ རྡང་ ཁོང་ངེ་ འཇི་སྤེ་ན་ ལྟན་ནེ་ ཛེད་ཀ་ནེ་ ལམ་མེ་ཀ་ འགྲུ་ལེན་ ཐར་པེ་ཕི་ ཙོན་འགྲུའི་ ཅོའེ་ཧེ་། 13 ཅེ་ཟེར་ནི་ ཀོན་འཇོག་ ཁོ་རང་ངེ་ ཁྱི་ཞ་རྒུ་ནི་ན་ ཆག་ལེ་ ཛེད་ཏེ་ ཁོང་ ཐུག་ཐེད་ཀ་ནེ་ ལེ་ཧ་ ཅོ་ཅེ་ལ་ འདོད་པ་ རྡང་ ཁྱུད་ སལ་ལེ་ ཛེ་རྡེ་ནོག་།

14-15 སུ་ཞིག་ལ་ ཁྱི་ཞ་རྒུན་ལ་ ཉེད་ཀལ་ མི་ཉེན་ཅེ་ཕི་, ཅི་ཞིག་ ཅོ་ནྃ་ ཟེར་རྒྱུ་ མ་ཏང་ལ་ ཡང་ ཟེར་ལེན་ མེད་རྡེ་ ཅོའེ་ཧེ་། ཡང་ ཀོན་འཇོག་རྒེ་ ཕྲུ་རྒུ་ ཙོག་སེ་, ཁྱི་ཞི་ མི་ཙེ་རྦོ་ རྐྱོན་མེད་ ཏང་, སང་མ་ཞིག་ པུད་ཧེ་། ཏེ་ནི་ འགོ་ཧོར་ཧན་ འདང་ རྡིག་ཅེན་ ཀང་འདེ་ ཡོ་ཀ་ནེ་ འཇིག་རྟེན་ནེ་ན་ ཁྱི་ཞ་རྒུན་ ཧར་མ་ འདང་ཤེན་ ཙོག་སེ་ ཐོང་ངེན་། 16 ཐ་མེད་པེ་ མི་ཙེ་ ཁྱོང་ཀ་ནེ་ ཀའ་འབོ་ རྟེམ་པོ་ ཐམ་འདེ་ འདོད་ཧེ་, ཏེ་ནི་ ཡི་ཤུ་ མ་ཤི་ཀ་ ལོག་ཏེ་ ཕེབ་ཅེ་ ཞག་ལ་, ཁྱི་ཞ་རྒུ་ནི་ ཕྲོ་ ངེ་ ཙོན་འགྲུའི་ ཚང་མ་ ཏོན་མེད་ལ་ མ་ཆ་, ང་ ཁྱི་ཞ་རྒུ་ནི་ཀ་ ཕོ་སོ་ ཚོར་རེན་། 17 ངེ་ མི་ཙེ་རྦོ་ ཁྱི་ཞ་རྒུ་ནི་ ཏེཏ་པ་ཅེན་ནེ་ ཞབ་རྟོག་རྒེ་ སྲོག་ཆོད་ པུལ་ཧ་ནེ་ཀ་ ཆུ་པུད་ ཙོག་སེ་ པོ་ནི་ ང་ ཐེད་པོ་ རག་, ཡང་ ངེ་ ཁྱི་ཞ་རྒུན་ ཉམ་པོ་ རྐྱིད་པོ་ ཅོའེན་། 18 འོ་ནེ་, ཁྱི་ཞ་རྒུ་ནི་ལ་ ང་ ཉམ་པོ་ ཐེད་པོ་ རྡང་ རྐྱིད་པོ་ ཅོ་རྒོ་ཤེ་ ནོག་།

ཏི་མོ་ཐི་ རྡང་ ཨེ་པབ་ཕོ་རོ་ཏི་ཏུ་ ཧོར་ལ་།

19 ཀལ་ཏེ་ ཙོབོ་ ཡི་ཤུའི་ རྒོང་སྤ་ སལ་ནི་, ངེ་ ཏི་མོ་ཐི་ ཁྱི་ཞི་ཀ་ འགྱོ་སྤ་ ལམ་ཅུག་ཅེ་ རེ་ཝ་ པོ་རེ་ཡོད་། ཏེ་ནི་ ཁོའེ་ ཁྱི་ཞ་རྒུ་ནི་ ཧོར་ལ་ ནེ་ཚུལ་ ཤེད་ཏེ་ ང་ ཐེད་པོ་ ཆ་ཅུག་རྒེན་། 20 ཁྱི་ཞི་ཕི་ རྡེན་འབའ་ སམ་ཀན་ ཁོ་རྡང་ ཙོག་སེ་ ཡང་སུ་ལ་ ང་ ཉམ་པོ་ མེད་། 21 ཅེ་ཟེར་ནི་ ཞེན་མ་ ཚང་མེ་ རང་ཏོན་ མ་ནི་ མ་ཤི་ཀ་ ཡི་ཤུའི་ ཐུག་འདོད་རྡེ་ཕི་ ཚེར་ཧ་ ཅོའོ་ མི་འདུག་། 22 འིན་ན་ ཁྱི་ཞ་རྒུན་ལ་ ཏི་མོ་ཐི་ ཁོ་རང་ ལོ་ཁྱེལ་ཅེན་ ལྟན་ཀན་འབོ་ རྒྱུའི་ནོག་, ཅེ་ཟེར་ནི་ ཁོའེ་ པུ་ཙ་ཞིག་རྒེ་ རང་ངེ་ ཨ་རྦ་ ཞབ་རྟོག་ ཞུ་ ཙོག་སེ་, ནེ་ཚུལ་ ཟང་པོ་ ཤེད་ཅེ་ན་ ང་ ཉམ་པོ་ ཞབ་རྟོག་ ཞུའི་རྡེ་ འིན་། 23 འེ་ཀ་ ང་ ཉམ་པོ་ ཆ་ཅེ་རྦོ་ཧ་ཀོ་རྡང་, ངེ་ ཁོ་ ཁྱི་ཞི་ཀ་ ལམ་ཅུག་ཅེ་ རེ་ཝ་ འིན་། 24 ང་ ལོ་ཁྱེལ་ རག་, ཙོབོ་རྡེ་ ང་ལ་ ཁྱི་ཞ་རྒུན་ ཡོད་ས་ འགྱོ་སྤ་ ཡོང་ཅུག་རྒེ་ ཛེ་རྡེན་།

25 འིན་ན་ ངེ་ སྤུན་, ཁྲོ་པ་ རྡང་ ཁྲོ་པ་ མག་མི་ འིན་ཀ་ནེ་ ཨེ་པབ་ཕོ་རོ་ཏི་ཏུ་ ཁྱི་ཞི་ཀ་ ལོག་ཏེ་ ལམ་ཅུག་ཅེའོ་ ཁག་ཅེན་ སམ་། ཁོ་ ཁྱི་ཞི་ ཚབ་ ཅོའེ་རྡེ་ ངེ་ རྒོའེ་ཤེ་ཅན་རྒུན་ལ་ ལྟ་ཏོག་ ཅོ་ཅེ་ཕི་ ཁྱི་ཞ་རྒུ་ནི་ ལམ་ཅུག་ཏེ་ འིན་། 26 ཁོ་ ཁྱི་ཞ་ ཚང་མ་ སྲན་ཀྲེ་ ཐུག་ཉིན་ འདུག་, ཡང་ ཁྱི་ཞ་རྒུན་ལ་ ཁོ་ ཟུར་མོ་ འདུག་ ཟེར་རྡེ་ ཚོར་ཤེ་ཀ་ནི་, ཁོའེ་ ཁྱི་ཞ་རྒུ་ནི་ཕི་ ཚེར་ཧ་ ཅོ་རུག་། 27 ནེན་ཏེན་ལ་ ཁོ་ ཟུར་མོ་ སྲན་ཀྲེ་ ཡོྃ་, ཡང་ ཤི་ཅེ་ ཡོད་པེན་། འིན་ན་ ཀོན་འཇོག་རྒེ་ ཁོའེ་ཀ་ ཐུག་ཞེ་ ཛེད་, ཁོ་ ཅིག་པེ་ཀ་ མན་, ང་ ཚེར་ཧེ་ཀ་ ཚེར་ཧ་ མི་ཆ་ཤི་ཕི་ ངེ་ཀ་ལ་ ཐུག་ཞེ་ ཛེད་།

28 ཁྱི་ཞ་རྒུ་ནི་ ཁོ་ ཐོང་འདེ་ ཐེད་པོ་ ཆ་ཅེ་ རྡང་ ངེ་ སེམ་མེ་ ནང་ལ་ ཁྱི་ཞི་ཕི་ ཚེར་ཧ་རྦོ་ ཉུང་ཙེ་ ཆ་ཅེ་ལ་ ཁོ་ ཁྱི་ཞི་ཀ་ ལམ་ཅུག་ཅེ་ ང་ འདོད་པ་ ཆོན་མོ་ རག་། 29 མ་སྲན་ཀྲེ་ ཐེད་པོ་ ཉམ་པོ་ ཁྱི་ཞ་རྒུ་ནི་ ཙོབོ་རྡེ་ན་ ཁོ་ རང་ངེ་ སྤུན་ ཙོག་སེ་ རྒ་སུའི་ ཞུའི་, ཡང་ ཁོ་ ཙོག་སེ་ མི་རྒུན་ལ་ སི་ཝ་ ཅོའེ་། 30 ཅེ་ཟེར་ནི་ མ་ཤི་ཀེ་ ཞབ་རྟོག་རྒེ་ན་ ཁོའེ་ ཁོ་རང་ལ་ ནྃ་ མ་ཏང་ལ་, ཁྱི་ཞི་ ཚབ་ལ་ ང་ ཡ་ཏོ་ ཅོའེན་ ཁོ་ ཤི་ཅེ་ ཐུག་།