ཕི་ལི་པི་ ཆོའེ་ཚོག་ལ་ པ་འུ་ལུའི་ ཆག་འབྲི་།
པ་འུ་ལུའི་ འཇུ་ ཞུའི་།
1
འི་ ཡི་རྒེ་རྦོ་ ཡི་ཤུ་ མ་ཤི་ཀེ་ ཞབ་རྟོག་པ་ པ་འུ་ལུ་ རྡང་ ཏི་མོ་ཐི་ ཆོག་ནི་ འིན་། ངེ་ ཕི་ལིབ་པི་ ཀྲོང་ཁྱེར་རེ་ན་ མ་ཤི་ཀ་ ཡི་ཤུའི་ འིན་ཀ་ནེ་ མི་ ཏམ་པ་རྒུན་, ཆོའེ་ཚོག་རྒེ་ འུ་རྐྱོང་རྒུན་ འདང་ ཞབ་རྟོག་ ཞུ་ཀན་རྒུན་ལ་ འབྲི་འིན་།2 ཨ་ཧོའེ་ ཀོན་འཇོག་ ཡབ་ ཏང་ ཙོབོ་ ཡི་ཤུ་ མ་ཤི་ཀེ་ ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ སལ་ལེ་ ཛེད་ཅེ་ལ་ ང་ཞི་ མོ་ལམ་ ཞུ་ཡོད་།
པ་འུ་ལུའི་ ཕི་ལིབ་པི་ ཆོའེ་ཚོག་ལ་ མོ་ལམ་ ཞུའི་།
3 ཁྱི་ཞ་རྒུན་ འི་ཏུ་ ཅོ་ཟ་ནི་, ངེ་ ང་རང་ངེ་ ཀོན་འཇོག་ལ་ ཐུག་ཞེ་ཆེ་ ཞུ་ཡོད་། 4 ཡང་ ཏུའི་རྒྱུན་ ངེ་ ཁྱི་ཞ་རྒུ་ནི་ཕི་ ཐེད་པོ་ ཉམ་པོ་ མོ་ལམ་ ཞུ་ཡོད་། 5 ཅེ་ཟེར་ནི་ ཁྱི་ཞ་རྒུ་ནི་ ཏེཏ་པ་ ཅོའེ་རྦི་ནི་ཕ་ལ་ ཏག་ས་ཚུག་པ་, ནེ་ཚུལ་ ཟང་པོ་ ཕེལ་ཤེ་ ཆག་ལེ་ན་ ང་ ཡ་ཏོ་ ཅོའེན་ཞིག་ འིན་། 6 ཡང་ ཁྱི་ཞ་རྒུ་ནི་ སེམ་མེ་ན་ འི་ ཆག་ལེ་ ཟང་པོ་རྦོ་ འགོ་ཟུག་ ཛེད་ཀ་ནེ་ ཀོན་འཇོག་རྒེ་, ཡི་ཤུ་ མ་ཤི་ཀ་ ལོག་ཏེ་ ཕེབ་ཅེ་ ཞག་ལ་, ཏེ་ ཆག་ལེ་པོ་ འདྲན་འདྲ་ ཀྲུཔ་ཅུག་རྒེ་ ཛེད་ཅེའོ་ ང་ ལོ་ཁྱེལ་ རག་།
7 ཁྱི་ཞ་ ངེ་ ཉིང་ངེ་ན་ ལུའི་ཤེ་ཀ་ནི་, ངེ་ ཁྱི་ཞ་ ཚང་མེ་ ཧོར་ལ་ ཏུ་ཟུག་ སམ་ཅེའོ་ རང་ཞིན་ ནོག་། ང་ ཙོན་ནེ་ན་ ཡང་ ཁྲིམ་ཁུང་ལ་ ནེ་ཚུལ་ ཟང་པོ་ རྐྱོབ་རྦེན་, ཡང་ ཏོ་ རྡེན་འབའ་ འིན་ཀན་འབོ་ ལྟན་ནེན་ ཡོད་ཁྲོ་, ཀོན་འཇོག་རྒེ་ ཐུག་ཞེ་ རྒྱུད་ཏེ་ ཁྱི་ཞ་རྒུན་ལ་ ང་ ཉམ་པོ་ ཁོང་ངེ་ ཞབ་རྟོག་རྒེ་ན་ འདྲེའེ་རྡེ་ ནོག་། 8 ངེ་ལ་ ཁྱི་ཞ་, མ་ཤི་ཀ་ ཡི་ཤུ་ ཙོག་སེ་ ཤེ་སྤ་ ཅོ་ཅེ་རྦེ་, ང་ ཁྱི་ཞ་ ཚང་མ་ ཡང་ ཐུག་ཅེ་ལ་ རིྃ་རྡེན་ ཡོ་ཀན་འབེ་, སྤང་པོ་ ཀོན་འཇོག་ འིན་།
9 ངེ་ མོ་ལམ་ ཞུའིན་, ཀོན་འཇོག་རྒེ་ ཁྱི་ཞ་ ཅིག་ ཏང་ ཅིག་ལ་ ཤེ་སྤ་ ཅོ་ཅེ་ན་ ཤེ་རབ་ ཏང་ ཧ་ཀོ་ མང་ངེ་ སལ་ལེ་ ཛེད་ཤིག་། 10 མ་ཤི་ཀ་ ལོག་ཏེ་ ཕེབ་ཅེ་ ཏུའི་ཚུག་པ་, སེམ་ ལག་མོ་ རྡང་ རྐྱོན་མེད་ ལུའི་ཤེ་ཕི་, ཚང་མེ་སང་ ཁག་ཅེན་ ཅི་ འིན་ཀན་འབོ་ ཁྱི་ཞ་ རྒྱུའི་ ཆ་ཅེ་ལ་, ངེ་ འདོད་པ་ ཅོའེན་། 11 ཡི་ཤུ་ མ་ཤི་ཀ་ རྒྱུད་ཏེ་, ཀྲང་པོ་ འབྲེ་རྦུ་ ཡོང་ཀན་ ཉམ་པོ་ ཁྱི་ཞི་ རང་ངེ་ མི་ཙེ་ ཧོང་ཧེ་, ཏོ་རྦེ་ ཀོན་འཇོག་ལ་ སྤལ་ རྡང་ རྟོད་པ་ ཁྱོང་ངེ་ནོག་།
ནེ་ཚུལ་ ཟང་པེ་ ཡར་རྒྱེ་།
12 སྤུན་རྒུན་, ངེ་ ས་མེ་རག་ ཁྱི་ཞ་རྒུན་ལ་ འི་རྦོ་ རྒྱུའི་ ཆ་རྒོའེ་། ང་ སོང་ཀན་ ཚང་མེ་ ནེ་ཚུལ་ ཟང་པེ་ ཡར་རྒྱེ་ན་ ཡ་ཏོ་ ཅོའེ་རྡེ་ འིན་། 13 རྒྱ་སྤེ་ ཁར་རེ་ན་ ཡོ་ཀ་ནེ་ མག་མི་ རྡང་ ཞེན་ མི་ཚང་མ་, ཡི་ཤུ་ ཞབ་རྟོག་ ཞུ་ཅེ་རྦེ་, ང་ ཙོན་ལ་ ཧར་ཧན་འབོ་ ཧ་ཀོ་རྡེ་ ནོག་། 14 ཡང་ ང་ ཙོན་ལ་ ཧར་ཤེ་རྦེ་, ཙོབོ་ ཡི་ཤུའི་ཀ་ ཏེཏ་པ་ པོར་ཧན་ སྤུན་ མང་པོ་ཞིག་ལ་ སེམ་ཤུག་ རྐྱེ་རྡེ་, ཧམ་བ་ ཉམ་པོ་ འཇིག་ཤེ་ མེད་པེ་, ཀོན་འཇོག་རྒེ་ ཀའ་ ཞེན་མ་རྒུན་ལ་ ཤེད་རྡེན་ ནོག་།
15 ཁ་ཅིག་རྒེ་ ངེ་ཀ་ ཕྲ་རྡོག་ ཡོྃ་རྡེ་ མིང་ཅེན་ འགྱུར་ཤེ་ འདོད་པ་ པོར་རྡེ་ མ་ཤི་ཀེ་ ཧོར་ལ་ ཤེད་ཅེའོ་ རྡེན་འབའ་ ནོག་། འིན་ན་ ཞེན་ ཁ་ཅིག་རྒེ་ མ་ཤི་ཀེ་ ཧོར་ལ་ སེམ་ ཟང་པོ་ ཐོག་ནི་ ཤེད་རྡེན་ ནོག་། 16 ཡ་ཤེ་ན་ མ་ཤི་ཀེ་ ཧོར་ལ་ ཤེད་ཀན་རྒུན་ལ་, ཀོན་འཇོག་རྒེ་ ནེ་ཚུལ་ ཟང་པོ་ རྐྱོབ་ཅེ་ལ་ ང་ འི་རུ་ པོ་རེ་ ཛེད་ཀན་འབོ་ ཧ་ཀོ་རྡེ་ ནོག་། 17 འིན་ན་ ངེ་ཀ་ ཕྲ་རྡོག་ ཡང་ མིང་ཅེན་ འགྱུར་འདོད་ ཡོད་ཏེ་ མ་ཤི་ཀེ་ ཧོར་ལ་ ཤེད་ཀན་རྒུ་ནི་ སེམ་ ཟང་པོ་ ཐོག་ནི་ མ་ཤེད་རྡེ་, ང་ ཙོན་ནེ་ན་ ཡོད་ཏུའི་ ནག་ མང་ངེ་ ཐོང་ཅུག་ཅེ་ཕི་ ཤེད་རྡེན་ ནོག་།
མ་ཤི་ཀེ་ཕི་ པ་འུ་ལུའི་ མི་ཙེ་།
18 རྒྱུ་ཚན་འབོ་ ཟང་པོ་ འིན་འགྲོ་ ཡ་ ངན་པ་, ཏོ་ ཁག་ཅེན་ཞིག་ མག་, ཁག་ཅེན་འབོ་ མ་ཤི་ཀེ་ ཧོར་ལ་ ནེ་ཚུལ་ ཟང་པོ་ ཤེད་རྡེན་ ཡོ་ཀན་འབོ་ ནོག་, ཏེ་རྒ་རྦེ་ཕི་ལ་ ང་ ཐེད་པོ་ འིན་། འོ་ནེ་ ངེ་ ཏ་རུང་ང་ ཐེད་པོ་ ཅོའེན་། 19 ཁྱི་ཞ་རྒུ་ནི་ མོ་ལམ་ འདང་ ཡི་ཤུ་ མ་ཤི་ཀེ་ ཐུག་ཡིད་རྡེ་ ཡ་ཏོ་ རྒྱུད་ཏེ་, ང་ ཏེ་ རྡུ་ངལ་རྒུ་ནི་ ཐར་པ་ ཐོབ་ཅེའོ་ ང་ རྒྱུའི་ཡོད་།
20 ངེ་ སེམ་མེ་ འདོད་པ་ རྡང་ རེ་ཝ་ ཆོན་མོ་རྦོ་ མ་ཤི་ཀེ་ ཧོར་ལ་ ཤེད་ཅེ་ལ་ ཁྲེལ་ མ་ཁྲེལ་ལེ་ སེམ་ཤུག་ ཉམ་པོ་ ཤེད་ཅེའོ་ འིན་, ཀ་ཟུག་ ངེ་ ཅོའེན་ ཡོྃ་རྡེ་ འིན་། ཏ་ ང་ ཤི་ནྃ་ ཡ་ སོན་ནང་, ང་རང་ངེ་ མི་ཙེ་ན་ མ་ཤི་ཀ་ སི་ཝ་ ཁྱོང་ཅེའོ་ ངེ་ འདོད་པ་ འིན་། 21 ང་ སོན་པོ་ འདེད་ཅེ་རྦོ་ མ་ཤི་ཀ་ སི་ཝ་ ཁྱོང་ཅེ་ཕི་ འིན་, ཡང་ ཤི་ཅེ་རྦོ་ ངེ་ཕི་ ཏེ་སང་ མང་ངེ་ ཕན་ཏོག་ཅེན་ཞིག་ འིན་, ཅེ་ཟེར་ནི་ ང་ ཁོང་ ཉམ་པོ་ ལུའི་རྡེན་། 22 ང་ འི་ ཟུྃ་སྤེ་ན་ འདེད་ནི་, ངེ་ མ་ཤི་ཀེ་ཕི་ འབྲེ་རྦུ་ མིན་ ཅུག་རྒེན་, འིན་ན་ ང་ ཅང་ རྒྱུའི་མེད་ ཏོ་ ཉ་ཧེ་ ནང་ནི་ ཀའོ་ རྒྱ་ལེ་ འིན་། 23 ངེ་ སེམ་མེ་ན་ ཐེ་ཚོམ་ རག་, ཏེ་ ཉ་ཧེ་ ནང་ནི་ ཀའོ་ ངེ་ འདམ་མེན་། ང་ འི་ འཇིག་རྟེན་འབོ་ ཕྃ་རྡེ་ མ་ཤི་ཀ་ ཉམ་པོ་ རྡེ་བ་ཅན་ནེ་ན་ ལུའི་ཤེ་ འདོད་པ་ རག་, ཀའོ་ ངེ་ཕི་ མང་ངེ་ རྒྱལ་ལེ་ཞིག་ འིན་། 24 འིན་ན་ ང་ ཏ་རུང་ངེ་ ཁྱི་ཞ་རྒུན་ ཉམ་པོ་ ལུའི་ཤེའོ་, ཁྱི་ཞ་རྒུ་ནི་ཕི་ མང་ངེ་ ཕན་ཏོག་ ཆེ་ ནོག་།
25 ཁྱི་ཞ་རྒུན་ ཏེཏ་པེ་ན་ ལྡན་ཅེ་ རྡང་ ཐེད་པོ་ ཅོ་ཅེ་ཕི་, ང་ ཁྱི་ཞ་རྒུན་ ཉམ་པོ་ འདེད་ཅེ་ ཡང་ འི་ ཟུྃ་སྤེ་ན་ ཏ་རུང་ང་ ལུའི་ཤེའོ་, ང་ ཐེ་ཚོམ་ མེད་པ་ རྒྱུའི་ཡོད་། 26 ང་ ཡོང་ངེ་རྡང་, ཁྱི་ཞ་རྒུ་ནི་ མ་ཤི་ཀ་ ཡི་ཤུ་ མང་ངེ་ རྟོད་པ་ པུ་ལེན་, ཅེ་ཟེར་ནི་ ཁོང་ངེ་ ང་ ཁྱི་ཞ་རྒུ་ནི་ཀ་ ལོག་ཏེ་ ཁྱོང་ངེ་ ཛེད་།
རྡེ་བ་ཅན་ནེ་ ཡུལ་མི་ ཙོག་སེ་ འདེད་རྒོའེ་།
27 ཚང་མེ་སང་ ཁག་ཅེན་འབོ་, ཁྱི་ཞ་རྒུ་ནི་ མ་ཤི་ཀེ་ ནེ་ཚུལ་ ཟང་པེ་ཕི་ འོའེ་སྤ་ཅེན་ནེ་ མི་ཙེ་ཞིག་ པུད་རྒོ་ཤེ་ ནོག་། ང་ ཁྱི་ཞ་རྒུན་ ཡོད་ས་ ཡོྃ་རྡེ་ ཐོང་ངེན་ ཡང་ ངེ་ ཁྱི་ཞ་རྒུ་ནི་ ཧོར་ལ་ ཚོར་རེན་, ནེ་ཚུལ་ ཟང་པེ་ ཁྲིན་འབེ་ཕི་, ཁྱི་ཞ་རྒུན་ སེམ་མེ་ན་ ཅིག་འགྲིལ་ སོང་འདེ་ མག་མི་ ཅིག་རྒེ་ ཚུལ་ལ་ ནོལ་ལེན་ འདེད་ཅེའོ་ ང་ རྒྱུའི་ཆེན་། 28 ཅི་ཚང་མེ་ན་ རྒྱཔ་འགལ་ ཅོ་ཀན་རྒུ་ནི་ཀ་ནི་ འཇིའི་ མ་འཇིའི་། ཁོང་རྒུན་ལ་ མི་འཇིའི་ཤེའོ་ ཁོང་རྒུན་ མེ་ཀན་ ཅོའོ་ ཛེད་ཅེ་, ཡང་ ཁྱི་ཞ་རྒུན་ རྐྱོབ་རྦེ་ ཛེད་ཅེ་ ལྟའ་ཞིག་ ནོག་, ཀོན་འཇོག་རྒེ་ ཏེ་ ཚང་མ་ ཆ་ཅུག་རྒེ་ ཛེ་རྡེན་། 29 ཀོན་འཇོག་རྒེ་ ཁྱི་ཞ་རྒུན་ལ་ མ་ཤི་ཀ་ ཏེཏ་པ་ ཅོ་ཅེ་ ཅིག་པོ་ མ་ནོག་, ཁོང་ངེ་ཕི་ རྡུ་ངལ་ ཁུར་ཤེ་ སི་ཝ་རྦོ་ སལ་ལེ་ ཛེད་ཏེ་ འིན་། 30 ཁྱི་ཞ་རྒུན་ལ་ ང་ སོང་ཀ་ནེ་ ནག་ ཙོག་སེ་ ཐོང་ངེན་ ནོག་, ང་ ནག་ ཐོང་ཀན་འབོ་ ཁྱི་ཞ་རྒུ་ནི་ ཐོང་འདེ་ ནོག་, ཡང་ ང་ ཏ་རུང་ང་ ཐོང་ངེན་ ཡོ་ཀན་འབོ་ ཁྱི་ཞི་ ཚོར་རེན་ ནོག་།