ཨེ་ཕེ་སུའི་པ་ 1

ཨེ་ཕེ་སུ་ ཆོའེ་ཚོག་ལ་ པ་འུ་ལུའི་ ཆག་འབྲི་།

པ་འུ་ལུའི་ འཇུ་ ཞུའི་།

ང་ པ་འུ་ལུ་ ཀོན་འཇོག་རྒེ་ ཐུག་འདོད་ ནང་ཞིན་ལ་, མ་ཤི་ཀེ་ ཧུ་ཚབ་ འིན་།

ངེ་ འི་ ཡི་རྒེ་རྦོ་ ཨེ་ཕེ་སུའི་ རྒྱལ་སེ་ན་ ཡོ་ཀན་ ཀོན་འཇོག་རྒེ་ མི་ ཏམ་པ་རྒུན་ འདང་ ཏེཏ་པ་ཅེན་ ཡི་ཤུ་ མ་ཤི་ཀེ་ རྒྱབ་ནི་ འགྲུལ་ཧན་རྒུན་ལ་ འབྲི་ཡོད་།

2 ཨ་ཧོའེ་ ཀོན་འཇོག་ ཡབ་ ཏང་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ རྡང་ ཞིའི་རྡེ་ ཁྱི་ཞ་རྒུན་ལ་ སལ་ཤིག་།

སེམ་ཡིད་རྡེ་ ཅིན་ལབ་རྒུན་།

3 ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཡབ་, ཀོན་འཇོག་ལ་ རྟོད་པ་ པུལ་ཧེ་། ཁོང་ངེ་ མ་ཤི་ཀ་ རྒྱུད་ཏེ་ ཨ་ཧོ་རྒུན་ལ་ རྡེ་བ་ཅན་ནེ་ ཐུག་ཡིད་རྡེ་ ཅིན་ལབ་ ཚང་མ་ སལ་ལེ་ ཛེད་ཏེ་ ནོག་། 4 མ་ཤི་ཀ་ རྒྱུད་ཏེ་ ཀོན་འཇོག་རྒེ་ ཧུ་འདུན་ལ་ ཏམ་པ་ རྡང་ རྐྱོན་མེད་ ཛེད་ཅེ་ཕི་ འཇིག་རྟེན་ མ་ཆག་རྡེ་སང་ ངུལ་ལ་ ཁོང་ངེ་ ཨ་ཧོ་ལ་ ཤེ་སྤ་ ཛེད་ཏེ་ འདམ་མེ་ ཛེད་། 5 ཀོན་འཇོག་རྒེ་ ཁོ་རང་ངེ་ ཐུག་འདོད་ རྡང་ ཐེད་པོ་ ནང་ཞིན་, ཡི་ཤུ་ མ་ཤི་ཀ་ རྒྱུད་ཏེ་ ཨ་ཧོ་རྒུན་ ཁོང་ངེ་ སོའེ་རྦུ་ ནེ་ནེ་ ཛེད་ཅེ་ལ་ ངུལ་ནི་ཕ་ལ་ ཐག་ཅེད་རྡེ་ ཛེད་། 6 ཏོ་རྦེ་ཕི་ ཁོང་ངེ་ ཁོ་རང་ངེ་ སྲེ་ ཤེ་སྤ་ རྒྱུད་ཏེ་, ཨ་ཧོ་རྒུན་ལ་ རིན་ མེད་པེ་ སལ་ཧ་ནེ་ ཏེ་ སྤལ་ཅེན་ནེ་ ཐུག་ཞེ་རྦོ་ལ་ རྟོད་པ་ པུ་ལེན་། 7 ཀོན་འཇོག་ནི་ ཐུག་ཞེ་ པང་ཛོད་ འིན་ཅེ་ཀ་ནི་, ཁོ་རང་ངེ་ སྲེ་ ཁྲག་ རྒྱུད་ཏེ་, ཨ་ཧོ་རྒུན་ལ་ ར་ཝང་ ཉོ་ ཛེད་ཏེ་ ཨ་ཧོའེ་ རྡིག་པ་རྒུན་ལ་ ཤག་སྤ་ སལ་ལེ་ ཛེད་། 8 ཁོང་ངེ་ ཐུག་ཞེ་ མ་ཚེད་ ཤེ་རབ་ ཏང་ ཧ་ཀོ་ལ་ ཨ་ཧོ་རྒུ་ནི་ཀ་ ཉིང་ པེ་རྡེ་ ལུག་རྒེ་ ཛེད་།

9 ཀོན་འཇོག་རྒེ་ མ་ཤི་ཀ་ རྒྱུད་ཏེ་ ཀྲུཔ་ཅུག་རྒེ་ ཛེད་ཅེ་ སང་སྤེ་རེ་ ཐབ་པོ་, ཨ་ཧོ་རྒུན་ལ་ ངོན་ཅུག་རྒེ་ ཛེད་, ཏེ་ ཐབ་པེ་ ཁོང་ངེ་ ཐུག་འདོད་ ཟང་པོ་ འདྲན་འདྲ་ ཀྲུཔ་། 10 ཏེ་ ཐབ་པོ་ནི་, འདམ་མེ་ ཛེད་ཀ་ནེ་ ཏུའི་རྦོ་ ལེབ་རྦེ་རྡང་, ཁོང་ངེ་ རྡེ་བ་ཅན་ འདང་ འཇིག་རྟེན་ནེ་ན་ སྲོག་ ཡོ་ཀན་ ཚང་མ་ ཀུག་ཏེ་, མ་ཤི་ཀེ་ ཝང་ངེ་ ཡོག་ལ་ པོ་རེ་ ཛེ་རྡེན་། 11 ཀོན་འཇོག་རྒེ་ མ་ཤི་ཀ་ རྒྱུད་ཏེ་ ཨ་ཧོ་རྒུན་ འདམ་མེ་ ཛེད་ཏེ་ ཨ་ཧོ་རྒུན་ལ་ རྡེ་བ་ཅན་ནེ་ན་ ནོར་ཧལ་རྒུན་ ཐོབ་ཏེ་ ནོག་, ཅེ་ཟེར་ནི་ ཁོང་ངེ་ ངུལ་ནེ་ཕ་ལ་ ཁོང་ངེ་ ཐུག་འདོད་ ནང་ཞིན་ ཅི་ཚང་མ་ འདྲན་འདྲ་ ཀྲུབ་ཅུག་ཅེ་ལ་ ཐབ་ ཛེད་ཏེ་ འིན་འབེན་།

12 ཀོན་འཇོག་རྒེ་ འདོད་པ་རྦོ་, ང་ཞ་ ཡ་ཧུ་འདཱ་པ་ མ་ཤི་ཀེ་ཀ་ རྡེན་ཆེ་ཤེ་ ཅོ་ཀན་ ཏང་པོ་ མི་རྒུ་ནི་, ཁོང་ལ་ སྤལ་ རྡང་ རྟོད་པ་ ཁྱོང་ཅེའོ་ འིན་འབེན་། 13 ཡང་ ཁྱི་ཞ་ ཡ་ཧུ་འདཱ་པ་ མན་ཀན་རྒུ་ནི་ལ་ ཐར་པ་ ཐོབ་ཅེ་ རྡེན་འབེ་ ཁྲིན་འབོ་ ཚོར་རྡེ་, མ་ཤི་ཀེ་ཀ་ ཏེཏ་པ་ ཅོ་ཅེ་ཀ་ནི་, ཀོན་འཇོག་རྒེ་ ཁྱི་ཞ་རྒུ་ནི་ཀ་ ཁོ་རང་ངེ་ ཐེ་ཙེའོ་ སལ་, ཀའོ་ ཁོང་ངེ་ ཞལ་ཆེཏ་ ཛེད་ཀ་ནེ་ ཏམ་པེ་ ཐུག་ཡིད་ ནོག་། 14 ཏམ་པེ་ ཐུག་ཡིད་པོ་, ཀོན་འཇོག་རྒེ་ ཨ་ཧོ་ རྡེ་བ་ཅན་ནེ་ ནོར་ཧལ་ སལ་ལེ་ ཛེད་ཅེ་ རྡང་ ཨ་ཧོ་རྒུན་ ཁོ་རང་ངེ་ མི་རྒུན་ ཙོག་སེ་ འདེད་ཅེ་ཕི་ ཉོ་ ཛེད་ཅེ་, ཁོང་ངེ་ ཁ་ཅེད་པོ་ ནོག་། ཁོ་རང་ལ་ སྤལ་ རྡང་ རྟོད་པ་ ཐོབ་ཅེ་ཕི་, ཀོན་འཇོག་རྒེ་ ཏོ་ ཅོའོ་ ཛེད་།

ཐུག་ཞེ་ཆེ་ རྡང་ མོ་ལམ་།

15 ཁྱི་ཞ་རྒུ་ནི་ ཙོབོ་ ཡི་ཤུའི་ཀ་ ཏེཏ་པ་ ཅོ་ཅེ་ རྡང་ ཀོན་འཇོག་རྒེ་ མི་ ཏམ་པ་ ཚང་མ་ལ་ ཤེ་སྤ་ ཅོ་རུག་ ཟེར་རྡེ་ ང་ ཚོར་རྦེ་ནི་ཕ་ལ་, 16 ངེ་ མོ་ལམ་རྒུ་ནི་ན་ ཁྱི་ཞ་རྒུན་ འི་ཏུ་ ཅོའེན་ ཏུའི་རྒྱུན་ ཁྱི་ཞ་རྒུ་ནི་ཕི་ ཀོན་འཇོག་ལ་ ཐུག་ཞེ་ཆེ་ ཞུ་ཡོད་། 17 ཀོན་འཇོག་, ཨ་ཧོའེ་ ཙོབོ་ ཡི་ཤུ་ མ་ཤི་ཀེ་ ཟི་ཞིད་ཅེན་ནེ་ ཡབ་, ཁྱི་ཞ་རྒུན་ལ་ ཁོང་ མང་ངེ་ རྒྱ་ལེ་ ཤེ་ཤེ་ཕི་, ཁོང་ངེ་ ཁྱི་ཞ་རྒུན་ལ་ ཐུག་ཡིད་རྡེ་ ཤེ་རབ་ སལ་ཅེ་, ཡང་ ཁོ་རང་ ཁྱི་ཞ་རྒུན་ལ་ ངོན་ཅུག་རྒེ་ ཛེད་ཅེ་ལ་, ངེ་ ཏུའི་རྒྱུན་ ཞུ་ཝ་ པུ་ལེ་ཡོད་། 18 ཀོན་འཇོག་རྒེ་ རིན་ཅེན་ རྡང་ སྤལ་ཅེན་ ནོར་ཧལ་ འིན་ཀ་ནེ་, ཏམ་པ་ མི་ འབོ་ ཛེད་ཀན་རྒུན་ལ་, ཁོང་ངེ་ སལ་ཧ་ནེ་ རེ་ཝ་ ཧ་ཀོ་ཅེ་ཕི་, ཁྱི་ཞ་རྒུ་ནི་ སེམ་པོ་ འོད་རྡེ་ ཧང་ཅུག་རྒེ་ ཛེད་ཅེ་ལ་ ངེ་ མོ་ལམ་ ཞུ་ཡོད་།

19 ཡང་ ཨ་ཧོ་ ཏེཏ་པ་ཅན་རྒུ་ནི་ ཀོན་འཇོག་རྒེ་ ཧ་ལེ་ཤེ་ ཤེད་པེ་ ཨ་ཧོ་རྒུ་ནི་ན་ ཆག་ལེ་ ཛེད་ཅེའོ་ རྒྱུའི་ ཆ་ཉེན་ཅེ་ཕི་ལ་ ངེ་ མོ་ལམ་ ཞུ་འིན་། ཏེ་རྒ་ ཧ་ལེ་ ཤུག་པེ་, 20 མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་, རྡེ་བ་ཅན་ནེ་ན་ ཀོན་འཇོག་རྒེ་ ཆག་ ཡོའེ་སྤེ་ ཁྲིའི་ཀ་ ཞུ་ཤུག་རྒེ་ ཛེད་། 21 འི་ཏུའི་ མ་ཚེད་ ཡོང་ཅེ་ཅེན་ནེ་ ཏུའི་རྦེ་ ནང་ལ་, མ་ཤི་ཀེ་ ཝང་འབེ་ རྡེ་བ་ཅན་ འདང་ ཐང་ཀེ་ཀ་ ཡོ་ཀ་ནེ་ སྤོན་འབོ་, ཝང་སྲུལ་པ་, ཝང་ཆ་ ཡོ་ཀན་ འདང་, འུ་རྐྱོང་རྒུ་ནི་སང་ ཐོ་ཤོག་རྦོ་ ནོག་། 22 ཆོའེ་ཚོག་རྒེ་ ཕན་ཏོག་རྡེ་ཕི་ ཀོན་འཇོག་རྒེ་ ཅི་ཚང་མ་ མ་ཤི་ཀེ་ ཞབ་རྦེ་ ཡོག་ལ་ སལ་རྡེ་, ཁོང་ ཅི་ཚང་མེ་ཀ་ འུ་ཁྲིད་ལ་ ཧོ་ ཛེད་། 23 ཆོའེ་ཚོག་པོ་, མ་ཤི་ཀེ་ ཧུ་ཟུག་ ནོག་, ཡང་ ཁོང་ ཏོ་རྦེ་ན་ ལུའི་རྡེ་ ཆོའེ་ཚོག་པོ་ ཆེད་ལག་ མེ་ཀན་ ཛེད་། ཁོང་ངེ་ ཀང་ལུང་ས་ ཅི་ཚང་མེ་ན་ ཁོ་རང་ ཧང་ངེ་ ཛེད་།