ཤི་ཀ་ནེ་ མི་ཙེ་ ཆོག་ལ་།
2
ཀོན་འཇོག་རྒེ་ ཁ་ མི་ཉེན་ཅེ་ རྡང་ རྡིག་པ་རྒུ་ནི་ ཅོའེ་རྡེ་, ཁྱི་ཞ་རྒུན་ སེམ་ཡིད་རྡེ་ ཐོག་ནི་ ཤི་རྡེ་ འིན་འབེན་། 2 ཏེ་ཏུའི་ལ་ ཁྱི་ཞ་རྒུན་ འཇིག་རྟེན་པ་ ཏེཏ་པ་ མེ་ཀན་རྒུ་ནི་ ལམ་མེ་ཀ་ འགྲུ་ལེ་ཡོད་པེན་, ཡང་ འཇིག་རྟེན་ནི་ སེམ་ཡིད་ ངན་པ་རྒུ་ནི་ ཝང་སྲུལ་པ་ རྡུད་རྡེ་ ལྟིང་འགྲྃ་ནི་ སོང་འདེ་ འིན་འབེན་། ཁོའེ་ ཏ་རུང་ང་ ཀོན་འཇོག་རྒེ་ ཁ་ མི་ཉེན་ཀན་རྒུ་ནི་ན་ ལེ་ཧ་ ཅོ་ནོག་། 3 ངུལ་མ་ཞིག་ལ་, ཨ་ཧོ་རྒུན་ལ་ ཁོང་རྒུན་ ཙོག་སེ་ རྡིག་པེ་ འདོད་པ་ ཚང་མ་ ཀྲུཔ་ཅུག་རྒེན་, ཏེ་ རྡིག་པེ་ འདོད་པ་ རྡང་ སམ་ཚུལ་ལེ་ ལམ་མེ་ཀ་ འགྲུ་ལེ་ཡོད་པེན་། ཁོང་རྒུན་ ཙོག་སེ་ ཨ་ཧོ་རྒུ་ནི་ལ་ ཀོན་འཇོག་རྒེ་ ཐུག་སྲོ་ རྡང་ ཆེད་པ་ པབ་ཅེའོ་ འོའེ་སྤ་ འིན་འབེན་།4-5 རྡིག་པ་རྒུ་ནི་ ཅོའེ་རྡེ་ ཨ་ཧོ་རྒུན་ སེམ་ཡིད་རྡེ་ ཐོག་ནི་ ཤི་རྡེ་ འིན་འདེ་, ཉིང་ཞེ་ ཀང་འདེ་ ཡོ་ཀ་ནེ་ ཀོན་འཇོག་རྒེ་ ཨ་ཧོ་རྒུན་ལ་ ཤེ་སྤ་ ཆོན་མོ་ ཛེད་པེ་, ཁོང་ངེ་ ཨ་ཧོ་རྒུན་ མ་ཤི་ཀ་ ཉམ་པོ་ སོན་ཅུག་རྒེ་ ཛེད་། ཁོང་ངེ་ ཐུག་ཞེ་ ཅིག་པོ་ རྒྱུད་ཏེ་, ཁྱི་ཞ་རྒུན་ རྐྱོབ་རྦེ་ཛེད་། 6 ཨ་ཧོ་རྒུ་ནི་ ཐུན་འབྲེལ་ མ་ཤི་ཀ་ ཡི་ཤུ་ ཉམ་པོ་ ཡོད་ཅེ་རྦེ་, ཁོང་ངེ་ ཨ་ཧོ་རྒུན་ མ་ཤི་ཀ་ ཉམ་པོ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་, རྡེ་བ་ཅན་ནེ་ན་ ཞུ་ཁྲིའི་རྒུ་ནི་ཀ་ མ་ཤི་ཀ་ ཉམ་པོ་ པོ་རེ་ ཛེད་། 7 ཀོན་འཇོག་རྒེ་ ཏོ་ ཅོའོ་ ཛེད་, ཅེ་ཟེར་ནི་ མ་འོང་པེ་ ཏུའི་ན་ མ་ཤི་ཀ་ ཡི་ཤུ་ རྒྱུད་ཏེ་ ཨ་ཧོ་རྒུ་ནི་ ཁོང་ངེ་ ཀ་ཀྲིན་ འདང་ ཐུག་ཞེ་ ཙམ་ཤིག་རྒེ་ ཧ་ལེ་ཤེ་ འིན་ཀན་འབོ་, ཚང་མ་ལ་ ལྟན་ཅེ་ ཐུག་འདོད་ ཡོད་ཏེ་ ནོག་།
8 ཏེཏ་པ་ རྒྱུད་ཏེ་ ཐུག་ཞེ་ ཅོའེ་རྡེ་, ཁྱི་ཞ་རྒུན་ལ་ ཐར་པ་ ཐོབ་ཏེ་ འིན་འབེན་, ཡང་ ཏེ་ ཐར་པ་འབོ་ ཁྱི་ཞི་ ཙོན་འགྲུའི་ མ་ནོག་, ཀོན་འཇོག་རྒེ་ ཆོག་ནི་ སལ་ཧ་ནེ་ སོལ་རེ་ ནོག་། 9 ཐར་པ་འབོ་ ཨ་ཧོའེ་ ལེ་ཧ་ ཟང་པོ་ ཅོའེ་རྡེ་ མན་ཅེ་ཀ་ནི་, ཨ་ཧོ་ སུ་ཞིག་ལ་ ཏོ་རྦེ་ཀ་ ཕོ་སོ་ ལྟན་ མི་ཉེན་། 10 ཨ་ཧོ་ ཏག་ས་ ཡོ་ཀན་འབོ་ ཀོན་འཇོག་རྒེ་ ཅོའོ་ ཛེད་ཏེ་ ནོག་། ཀོན་འཇོག་རྒེ་ ངུལ་ལ་, ཀྲལ་འགྲིག་ ཅོའོ་ ཛེད་ཀ་ནེ་ ལེ་ཧ་ ཟང་པོ་རྒུན་ ཅོ་ཅེ་ཕི་, ཁོང་ངེ་ ཨ་ཧོ་རྒུན་ མ་ཤི་ཀ་ ཡི་ཤུའི་ན་, མི་ སོ་མ་ རིག་ ཅོའོ་ ཛེད་།
མ་ཤི་ཀེ་ན་ ཅིག་འགྲིལ་།
11 ཏ་ ཡུ་རྦོ་ འི་ཏུ་ པོར་ཧེ་, ཁྱི་ཞ་ རྐྱེ་ཟ་ནི་ ཡ་ཧུ་འདཱ་པ་ མན་ཀན་ ཡང་ ཡ་ཧུ་འདཱ་པ་རྒུ་ནི་ ཁྱི་ཞ་ འགོཔ་ཅེཏ་ མ་ཅོ་ཀན་ ཀྲིཔ་རྒུན་ ཟེ་ཡོད་པེན་, ཅེ་ཟེར་ནི་ ཁོང་རྒུན་ འགོཔ་ཅེཏ་ ཅོ་ཀན་ འིན་ཀན་འབེ་ཀ་ མ་མང་པོ་ ཕོ་སོ་ ཅོ་ཡོད་པེན་, ཀ་རྦེ་ ཁོང་ངེ་ སེམ་རྒུན་ལ་ མ་ནོག་, ཟུྃ་སྤོ་ ཅིག་པོ་ལ་ འགྱུར་ཞ་ ཁྱོང་ངེ་ནོག་། 12 ཏེ་ཟ་ནི་ ཁྱི་ཞ་རྒུ་ནི་ མ་ཤི་ཀ་ ཉམ་པོ་ ཅང་ འབྲེལ་ མེད་པེན་། ཁྱི་ཞ་རྒུན་ ཨིས་ར་ཡེལ་ལེ་ མིར་རྒྱུད་རྡེ་ ཕྲོ་ ཐེའེ་ མེད་པེན་, ཡང་ ཀོན་འཇོག་རྒེ་ ཁོང་རྒུན་ལ་ ཛེད་ཀ་ནེ་ ཞལ་ཆེཏ་རྡེ་ན་ ཁྱི་ཞ་རྒུན་ སྲེ་ མ་ཛེད་། ཁྱི་ཞ་རྒུན་ འི་ འཇིག་རྟེན་ནེ་ན་ ཀོན་འཇོག་ ཏང་ རེ་ཝ་ མེ་ཀ་ནེ་ མི་རྒུན་ འིན་འབེན་། 13 འིན་ན་ ངུལ་ལ་ ཀོན་འཇོག་ནི་ མ་ ཐག་རིང་ལ་ ཡོ་ཀན་རྒུན་, མ་ཤི་ཀེ་ ཧུ་ཁྲག་ རྐྱང་ཤིང་ངེ་ཀ་ པོ་ ཛེད་ཅེ་རྦེ་, ཏག་ས་ ཀོན་འཇོག་རྒེ་ མ་ཤི་ཀ་ ཡི་ཤུའི་ན་ ཁྱི་ཞ་རྒུན་ ཁོ་རང་ངེ་ ཉེ་མོ་ལ་ ཁྱོང་ངེ་ ཛེད་ཏེ་ འིན་།
14 མ་ཤི་ཀ་ ཁོ་རང་ངེ་ ཡ་ཧུ་འདཱ་པ་ རྡང་ ཡ་ཧུ་འདཱ་པ་ མན་ཀན་རྒུ་ནི་ན་ ཞིའི་རྡེ་ ཁྱོང་ངེ་ ཛེད་། མ་ཤི་ཀེ་ འི་ རྡེ་ ཉ་ཧེ་ན་ ཡོ་ཀ་ནེ་ སོག་པོ་ སིག་པ་རྦོ་ ཤིག་རྒེ་ ཛེད་ཏེ་ ཅིག་ འགྱུར་ཤུག་རྒེ་ ཛེད་། 15 ཁོང་ངེ་ ཡ་ཧུ་འདཱ་པ་རྒུ་ནི་ ཆོའེ་ ཀཱ་ཁྲིམ་ འདང་ ཀཱ་རྒྱ་རྒུན་ མེ་ཀན་ ཅོའོ་ ཛེད་ཏེ་ མ་ཤི་ཀེ་ འི་ རྡེ་ ཉ་ཧ་, ཁོ་རང་ངེ་ན་ མི་རིག་ སོ་མ་ཞིག་ ཅོའོ་ ཛེད་ཅེ་རྦེ་, ཁོང་རྒུ་ནི་ན་ ཞིའི་རྡེ་ ཁྱོང་ངེ་ ཛེད་། 16 ཁོང་ རྐྱང་ཤིང་ངེ་ཀ་ ཀྲོང་ངེ་ ཛེད་ཅེ་རྦེ་ ཁོང་ངེ་ འི་ མི་རིག་ ཉ་ཧ་ ཀོན་འཇོག་ ཉམ་པོ་ ཐུན་ཅུག་རྒེ་ ཛེད་ཏེ་, ཡུ་ ཉ་ཧེ་ན་ ཡོ་ཀ་ནེ་ སོག་པོ་ མེ་ཀན་ ཅོའོ་ ཛེད་།
17 མ་ཤི་ཀ་ ཕེབ་ཏེ་ ཁྱི་ཞ་ ཀོན་འཇོག་ནི་ མ་ ཐག་རིང་ལ་ ཡོ་ཀན་ འདང་ ང་ཞ་ ཀོན་འཇོག་རྒེ་ ཉེ་མོ་ལ་ ཡོ་ཀན་ ཉ་ཧ་ ཞིའི་རྡེ་ ནེ་ཚུལ་ ཟང་པོ་ ཤེད་རྡེ་ ཛེད་། 18 ཅེ་ཞུ་ནི་ མ་ཤི་ཀ་ རྒྱུད་ཏེ་, ཨ་ཧོ་རྒུ་ནི་ ཡབ་ ཀོན་འཇོག་ལ་ ཏམ་པེ་ ཐུག་ཡིད་ ཅིག་ རྒྱུད་ཏེ་ མོ་ལམ་ ཞུ་ཉེན་ནེན་།
ཙོབོ་རྡེ་ཕི་ ཀོན་འཇོག་རྒེ་ ཁང་པ་།
19 ཏེ་རྒ་རྦེ་ཕི་ལ་ ཁྱི་ཞ་ ཡ་ཧུ་འདཱ་པ་ མན་ཀན་རྒུན་, ཏི་ནི་ཕ་ལ་ མ་ཤེ་ཀན་ འདང་ ཞེན་ཡུལ་ལེ་ མི་རིག་ མག་། ཀོན་འཇོག་རྒེ་ ཏང་པེ་ མི་རྒུན་ ཉམ་པོ་ ཁྱི་ཞ་རྒུན་ལ་, ཁོང་ངེ་ རྒྱལ་སྲིད་རྡེ་ མི་, ཡང་ ཀོན་འཇོག་ ཁོ་རང་ངེ་ ནང་མི་རྒུན་ ནོག་། 20 ཨ་ཧོ་རྒུན་ ཀོན་འཇོག་རྒེ་ ཁང་པ་ ནོག་, ཀའོ་ ཧུ་ཚབ་རྒུན་ འདང་ ལུང་རྟོན་པ་རྒུ་ནི་ མག་རྡེན་ནེ་ཀ་ སིག་རྡེ་ འིན་, ཡང་ མ་ཤི་ཀ་ ཡི་ཤུ་ ཁོ་རང་ནི་, ཏེ་ ཁང་པེ་ ཀྲུར་རྡོ་ ཁག་ཅེན་འབོ་ འིན་། 21 མ་ཤི་ཀེ་ན་ ཛོམ་འདེ་ ཨ་ཧོ་རྒུན་ ཙོབོ་རྡེ་ཕི་, ཏམ་པེ་ ཀོན་འཇོག་རྒེ་ ཁང་པ་ཞིག་ ལྡན་ནེན་ ནོག་། 22 ཡང་ མ་ཤི་ཀ་ རྒྱུད་ཏེ་ ཁྱི་ཞ་ ཡ་ཧུ་འདཱ་པ་ མན་ཀན་རྒུན་ལ་, ཀོན་འཇོག་རྒེ་ ཏམ་པེ་ ཐུག་ཡིད་ ནེ་རྡེ་ ཛེད་ཀ་ནེ་ མལ་ འགྱུ་རེན་ ནོག་།