འགཱ་ལ་ཏི་ཡཱེ་ ཆོའེ་ཚོག་ལ་ པ་འུ་ལུའི་ ཆག་འབྲི་།
འགཱ་ལ་ཏི་ཡཱེ་ ཆོའེ་ཚོག་ལ་ པ་འུ་ལུའི་ ཆག་འབྲི་ ཧོར་།
འེ་རྒ་ ཆག་འབྲི་ རྡང་ ངུལ་མེ་ ཆོའེ་ཚོག་རྒེ་ འུ་རྐྱོང་རྒུན་ རྒྱུད་ཏེ་, ཨ་ཧོ་ལ་ འི་ ཆག་འབྲི་རྦོ་ ཙོབོ་ ཡི་ཤུ་ མ་ཤི་ཀེ་ ཧུ་ཚབ་ པ་འུ་ལུའི་ འབྲི་ཛེད་ཀན་འབོ་ རྒྱུའི་ ཆ་ནོག་།
པ་འུ་ལུའི་ འི་ ཆག་འབྲི་ འབྲི་ཛེད་ཀ་ནེ་ ཏུའི་པོ་ ཐག་ཅེད་ཅེ་ལ་ ཆོའེ་རྡེ་ ཁེ་སྤ་རྒུ་ནི་ན་ པོ་པུད་ཏེ་ ནོག་། ཁོང་ ཁ་ཅིག་རྒེ་ འི་རྦོ་ ཡི་ཤུ་ ཀྲོང་རྡེ་ སོན་པོ་ ཞང་ཏེ་ ལྟིང་ནི་ ལོ་ ཅོ་ང་ནི་ ཅུའི་རུག་ ཡང་ ཁ་ཅིག་རྒེ་ ལོ་ ཉི་ཤུ་ ནེ་ ཉི་ཤུ་སེབ་ཞི་ ཉེ་ཁོར་ལ་ འབྲི་ ཛེད་ཀག་ ཟེ་རེ་ནོག་།
པ་འུ་ལུའི་ འི་ ཡི་རྒེ་ འབྲི་ཅེ་ རྒྱུ་ཚན་འབོ་ ཡུ་ནོག་, ཁ་ཅིག་ ཟུའི་མེ་ ལོ་རྦོན་ ཆོའེ་ཚོག་ན་ ཞུ་རྡེ་ ཟུའི་མེ་ ལབ་ཞ་ ལབ་རྦེན་ ཡོད་པེན་། ཏེ་རྒུ་ནི་ ཏེཏ་པ་ཅེན་ ཡ་ཧུ་འདཱ་པ་ མན་ཀན་རྒུ་ནི་ ཡི་ཤུའི་ རྐྱོབ་རྦེ་ ཛེད་ཅེ་ ཅིག་པེ་ན་ རྡེན་ཆེ་ཤེ་ ཅིག་པོ་ མ་ནོག་ མོ་ཤེ་ ཁྲིམ་ལ་ ཁ་ཉེན་རྒོའེ་ ཟེར་རེ་ཡོད་པེན་ སྤེར་ན་ འགོཔ་ཅེཏ་a ཅོ་ཅེ་ རྡང་ ཆོའེ་ ཞག་ ཁག་ཅེན་རྒུན་ སྲུང་ཅེ་། པ་འུ་ལུའི་ ཁྲིམ་མེ་ཀ་ འགྲུལ་རྒོའེ་ མེད་ ཟེར་རྡེ་ ལབ་ཞ་ ཏང་ཅེ་རྦེ་ ཟུའི་མེ་ ལོབ་རྦོན་རྒུ་ནི་, པ་འུ་ལུ་ རྡེན་འབེ་ ཡི་ཤུའི་ ཧུ་ཚབ་ མག་ ཟེར་རྡེ་ རྐྱོན་འཇོད་ ཅོ་ཡོད་པེན་།
ཏོ་ཙོག་སེ་ ནེ་ལུག་ ཆ་ཅེ་ཀ་ནི་, པ་འུ་ལུའི་ འི་ ལབ་ཞ་རྒུན་ ས་ལེན་ ཆག་འབྲི་རྦོ་ འབྲི་ ཛེད་།
ཏང་པོ་, ཁོང་ ཀོན་འཇོག་ ཏང་ ཙོབོ་ ཡི་ཤུའི་ འདམ་མེ་ ཛེད་ཀ་ནེ་ ཧུ་ཚབ་ འིན་ཀན་འབོ་ སལ་སྤོ་ ཅོའོ་ ཛེད་།
ཉི་སྤ་, པ་འུ་ལུ་ ཡ་ཧུ་འདཱ་པ་ མན་ཀན་རྒུ་ནི་ཕི་ མ་ཤི་ཀེ་ ཧུ་ཚབ་ ཡང་ ཁོང་ངེ་ ཁྲིན་རྒུན་ ཀྲང་པོ་ རྡང་ ལོ་ཁྱེལ་ཅེན་ འིན་ཀན་འབོ་ལ་ ཡེ་རུ་ཤ་ལེམ་མེ་ན་ ཡོ་ཀ་ནེ་ མ་ཤི་ཀེ་ ཧུ་ཚབ་ ཚང་མེ་ ཁ་ཆམ་ ཛེད་ཀན་།
སུམ་པ་, མ་ཤི་ཀེ་ཀ་ ཏེཏ་པ་ ཅོ་སང་ ངུལ་ལ་ པ་འུ་ལུའི་ ཁྲིམ་རྒུན་ མ་སྲན་ཀྲེ་ ཉིང་ནི་ སྲུང་ཅེ་ སོན་འགྲུའི་ ཅོ་ཀན་ འིན་ན་ ཐར་པ་ ཐོབ་ཏེ་ ལྟིང་ནི་, ཀོན་འཇོག་རྒེ་ ཁོའོ་, ཁོང་ངེ་ ནེ་ཚུལ་ ཟང་པོ་ ཤེད་ཅེ་ལ་ སལ་།
ཞི་པ་, འི་ ཟུའི་མེ་ ལོབ་རྦོན་རྒུ་ནི་ མ་ཤི་ཀེ་ ནེ་ཚུལ་ ཟང་པེ་ན་ འགྱུར་ཞ་ ཅོ་ཅེ་, ཡང་ ཀལ་ཏེ་ འགཱ་ལ་ཏི་ཡཱ་པ་ ཏེཏ་པ་ཅན་རྒུན་, ཁོང་རྒུ་ནི་ ལྟིང་འགྲྃ་ནི་ འགྲུལ་ནི་ ཐར་པ་རྦོ་ མེ་ཀན་ ཅོའེ་རྡེ་ ཁོང་རྒུན་ ཁྲིམ་མེ་ ཡོག་པོ་ འགྱུ་རེན་།
ང་པ་, མོ་ཤེ་ ཁྲིམ་རྒུན་ ཁ་ཉེན་ཅེ་ མ་ནོག་, ཀོན་འཇོག་རྒེ་ ཐུག་ཞེ་ན་ མ་ཤི་ཀེ་ཀ་ ཏེཏ་པ་ ཅིག་པོ་ རྒྱུད་ཏེ་, ཨ་ཧོ་རྒུན་ལ་ ཐར་པ་ ཐོབ་རྦེ་ནོག་།
ཀྲུག་པ་, འི་ ཐར་པ་རྦེ་ ཨ་ཧོ་རྒུན་ལ་ མི་ཙེ་ སོ་མ་ཞིག་ སལ་ལེ་ནོག་, ཡང་ ཨ་ཧོ་རྒུན་ ཀོན་འཇོག་རྒེ་ ཐུག་ཡིད་རྡེ་ ཁྲིད་རྡེན་ ར་ཝང་ངེ་ མི་ཙེ་ཞིག་ པུད་ཉེན་ནེ་ནོག་༎