འགཱ་ལ་ཏི་ཡཱེ་ ཆོའེ་ཚོག་ལ་ པ་འུ་ལུའི་ ཆག་འབྲི་།
པ་འུ་ལུའི་ ཆོག་ནི་ འཇུ་།
1
འི་ ཡི་རྒེ་རྦོ་ ཡི་ཤུའི་ ཧུ་ཚབ་ པ་འུ་ལུའི་ ཆོག་ནི་ འིན་། ང་ མི་རྒུ་ནི་ རྡེ་ཞིག་ ཡང་ མི་ ཝང་ངེ་ མ་འདམ་མེ་, ཡི་ཤུ་ མ་ཤི་ཀ་ རྡང་ ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཀ་ནེ་ ཡབ་ ཀོན་འཇོག་རྒེ་ འདམ་མེ་ ཛེད་ཏེ་ འིན་། 2 འགཱ་ལ་ཏི་ཡཱེ་ན་ ཡོ་ཀ་ནེ་ ཆོའེ་ཚོག་རྒུན་ལ་, འི་ ཡི་རྒེ་རྦོ་ ཀལ་ཤེ་ན་ ང་ ཉམ་པོ་ ཡོ་ཀ་ནེ་ སྤུན་ ཚང་མ་ ཐུའི་རྡེ་ འིན་། 3 ཨ་ཧོ་རྒུ་ནི་ ཡབ་ ཀོན་འཇོག་ ཏང་ ཙོབོ་ ཡི་ཤུ་ མ་ཤི་ཀ་རྒུ་ནི་, ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ སལ་ལེ་ ཛེད་ཤིག་། 4 ཀོན་འཇོག་ ཨ་ཧོ་རྒུ་ནི་ ཡབ་རྦེ་ ཐུག་འདོད་ ནང་ཞིན་ ཡི་ཤུའི་, ཨ་ཧོ་རྒུན་ འདེད་ཏེ་ ཡོ་ཀ་ནེ་ ངན་པ་ འཇིག་རྟེན་ནི་ ནང་ནི་ ཐར་ཤུག་རྒེ་ ཛེད་ཅེ་ རྡང་ ཨ་ཧོ་རྒུ་ནི་ རྡིག་པེ་ཕི་, ཁོ་རང་ངེ་ མི་ཙེ་ ཆོད་པེ་ ཚུལ་ལ་ སལ་ལེ་ ཛེད་། 5 ཏོ་རྦེ་ ཅོའེ་རྡེ་, ཀོན་འཇོག་ལ་ ཚེ་རབ་ནི་ ཚེ་རབ་ སྤལ་ ཐོབ་ཤིག་, ཨ་མེན་།ནེ་ཚུལ་ ཟང་པོ་ ཅིག་ཅིག་ མ་ནི་ མེད་།
6 ཁྱི་ཞ་ འི་ཟམ་ འགྱོ་སྤ་ ཀོན་འཇོག་ ཕང་ངེན་ ཐག་རིང་ལ་ ཆ་ཅེ་རྦོ་ལ་ ང་ ཧ་ལེ་། ཀོན་འཇོག་རྒེ་ མ་ཤི་ཀེ་ ཐུག་ཞེ་ རྒྱུད་ཏེ་, ཁྱི་ཞ་རྒུན་ ཁོང་ ཉམ་པོ་ འབྲེལ་ ཅོ་ཅེ་ལ་ འབོ་ ཛེད་ཏེ་ འིན་འབེན་། འིན་ན་ ཁྱི་ཞ་རྒུན་ ཞེན་ཡང་ སོ་སོ་ ནེ་ཚུལ་ ཟང་པོ་ཞིག་རྒེ་ ལྟིང་འགྲྃ་ནི་ འགྲུལ་རྡུག་, 7 ཀའོ་ ངོའེ་སྤོ་ལ་ ནེ་ཚུལ་ ཟང་པོ་ཞིག་ འིན་ ཁོ་ནང་ མན་། འིན་ན་ མ་ཤི་ཀེ་ ནེ་ཚུལ་ ཟང་པེ་ ཏོན་ཏག་རྒེ་ན་ ནར་རྐྱི་ འགྱུར་ཞ་ ཁྱོང་ཀན་རྒུ་ནི་, ཁྱི་ཞི་ ཉིང་ངེ་ན་ ཐེ་ཚོམ་ རྐྱེ་ཅུག་རྒེན་ ཡོ་ཀན་འབོ་ ང་ ཧ་ཀོ་རག་།
8 ཀལ་ཏེ་ ང་ཞ་ ཅིག་རྒེ་ ཡང་ ནམ་ཀེ་ ཕོ་ཉ་ཞིག་རྒེ་, ང་ཞི་ ཁྱི་ཞ་ ལབ་ཀན་ མན་འབེ་ ཡང་ སོ་སོ་ ནེ་ཚུལ་ ཟང་པོ་ཞིག་ ལབ་རྦེ་ཡོད་ནི་, ཀོན་འཇོག་རྒེ་ ཏོ་རྒུན་ལ་ ཐ་མེད་པེ་ ཆེད་པ་ སལ་ལེ་ ཛེད་ཤིག་། 9 ངེ་ ངུལ་ལ་ ཟེར་ཧན་འབོ་ ཡང་ ཟེ་འིན་, སུ་ཞིག་ལ་ ཁྱི་ཞ་རྒུ་ནི་ ངུལ་ལ་ ཏེཏ་པ་ ཅོ་ཀན་རྒུ་ནི་སང་ ཞེན་ཡང་ སོ་སོ་ ནེ་ཚུལ་ ཟང་པོ་ཞིག་ ལབ་རྦེ་ཡོད་ནི་, ཀོན་འཇོག་རྒེ་ ཏོ་རྒུན་ལ་ ཐ་མེད་པེ་ ཆེད་པ་ སལ་ལེ་ ཛེད་ཤིག་།
10 ལྟོའེ་རྡང་, ངེ་ ཀོན་འཇོག་ནི་ རྟོད་པ་ ཐོབ་ཅེ་ ཙོན་འགྲུའི་ ཅོ་རུག་རྒེ་ ཡ་ མི་རྒུན་ཀ་ནི་? ཀལ་ཏེ་ ངེ་ མི་རྒུན་ ཐེད་ཅུག་ཉིན་ ཡོད་པེ་ནི་, ང་ མ་ཤི་ཀེ་ ཞབ་རྟོག་པ་ཞིག་ མན་འགྲོ་།
པ་འུ་ལུའི་ ཁྲིན་ མ་ཤི་ཀེ་ ཆོག་ནི་ ནོག་།
11 ཤེ་སྤ་ སྤུན་རྒུན་ ངེ་ ཁྱི་ཞ་རྒུན་ལ་ འི་རྦོ་ ཧ་ཀོ་རྒོའེ་ ས་མེ་རག་། ངེ་ ལབ་ཀ་ནེ་ ནེ་ཚུལ་ ཟང་པོ་རྦོ་, མི་ ཅོ་ཀན་ཞིག་ མན་། 12 ཏོ་ ང་ མི་ཞིག་རྒེ་ཀ་ནི་ མ་ཐོབ་, ཡང་ སུ་ཞིག་རྒེ་ ང་ མ་ལབ་, འིན་ན་ ང་ འི་རྦོ་ ཡི་ཤུ་ མ་ཤི་ཀེ་ཀ་ནི་ ཁ་ཀྲང་ལ་ ངོན་འདེ་ འིན་།
13 ཡ་ཧུ་འདཱ་པེ་ ཆོའེ་ན་ ཡོད་ཟ་ནི་, ང་ ཀ་ཟུག་ཤིག་ ཡོ་ཀན་འབོ་ ཁྱི་ཞ་རྒུན་ལ་ རྒྱུའི་ ཡོད་ཁྲོ་། ངེ་ ཀོན་འཇོག་རྒེ་ ཆོའེ་ཚོག་རྒུན་ལ་ ནག་ ཧོཔ་ ལྟན་འདེ་ ཏོ་རྒུན་ མེ་ཀན་ ཅོ་ཅེ་ན་ ཙོན་འགྲུའི་ རྒྱ་ལེ་ ཅོའེ་རྦེན་། 14 ཡ་ཧུ་འདཱ་པེ་ ཆོའེ་ན་, ང་ རྡང་ ལོ་ཅིག་པ་ ཞེན་ཡང་ ཡ་ཧུ་འདཱ་པ་རྒུ་ནི་སང་ ངེ་ མང་ངེ་ ཁེ་སྤ་ རྡང་ ཡར་རྒྱེ་ ཅོའེ་རྦེན་། ཡང་ ངེ་ ང་རང་ངེ་ ཕ་མེ་པོ་རྒུ་ནི་ ལུག་སྲོལ་རྒུན་ སྲུང་ཅེ་ལ་ ཉིང་ནི་ ཙོན་འགྲུའི་ ཏོ་རྒུ་ནི་སང་ མང་ངེ་ ཅོའེ་རྦེན་།
15-16 འིན་ན་ ཀོན་འཇོག་རྒེ་ ཁོ་རང་ངེ་ ཧ་ལེ་ཤེ་ ཐུག་ཞེ་ན་, ང་ རྐྱེ་སང་ ངུལ་ལ་ འདམ་མེ་ ཛེད་ཏེ་ འབོ་ ཛེད་། ཡི་ཤུའི་ ཧོར་ལ་ ནེ་ཚུལ་ ཟང་པོ་ནི་ ཡ་ཧུ་འདཱ་པ་ མན་ཀན་རྒུན་ལ་ ཤེད་ཅེ་ཕི་, ཁོ་རང་ངེ་ སྲེ་རྦོ་ ང་ ངོན་ཅུག་རྒེ་ ཛེད་ཅེ་ལ་, ཀོན་འཇོག་ ཐུག་ཐེད་རྡེ་ ཛེད་། ཡུ་རྦེ་ ཧོར་ལ་ ངེ་ སུ་མི་ཞིག་རྒེ་ ཀ་ནི་ལ་ ཁ་རྡ་ མ་སལ་རྦེན་, 17 ཡང་ ངེ་སང་ ངུལ་ལ་ ཧུ་ཚབ་ འིན་ཀན་རྒུན་ ཉམ་པོ་ ཏེ་ ཧོར་ལ་ ཀྲཔ་ ཅོ་ལ་, ང་ ཡེ་རུ་ཤ་ལེམ་ལ་ མ་སོང་འབེན་། འིན་ན་ ཏེ་རྒ་མ་རྒ་ ང་ ཨ་རབ་ཡུལ་ལ་ སོང་པེན་, ཡང་ ཏེ་ལྟིང་ནི་ ང་ འདཱ་མེ་ཁེ་ རྒྱལ་ས་ ལོག་ཏེ་ ཡོང་རྦེན་།
18 ཏེ་ནི་ ལོ་ སུམ་མེ་ ལྟིང་ནི་, ང་ ཡེ་རུ་ཤ་ལེམ་ པི་ཏྲར་ལ་a ཐུག་ཅེ་ཕི་, སོང་འདེ་ ཞག་ ཅོ་ང་ ཁོང་ ཉམ་པོ་ འདེད་པེན་། 19 ཏེ་ཏུའི་ལ་ ཙོབོ་རྡེ་ ནོ་ ཡ་ཀུབ་ ཅིག་པོ་ མ་ནི་, ཞེན་ཡང་ ཧུ་ཚབ་ སུ་ཞི་ལ་ ང་ མ་ཐུག་། 20 ངེ་ ཁྱི་ཞ་ འབྲི་འིན་ ཡོ་ཀན་རྒུན་ ཟུན་མན་ཀ་ནེ་ སྤང་པོ་, ཀོན་འཇོག་ འིན་།
21 ཏོ་རྦེ་ ལྟིང་ནི་, ང་ སི་རི་ཡཱ་ རྡང་ སི་ལི་སི་ཡཱེ་ ཡུལ་ལ་ སོང་འབེན་། 22 ཡང་ ཏེ་ཏུའི་ཚུག་པ་, ཡ་ཧུ་འདཱེ་ ཆོའེ་ཚོག་རྒུ་ནི་ མ་ཤི་ཀ་པ་རྒུན་ ང་ ཉམ་པོ་ མ་ཐུག་རྒེ་ འིན་འབེན་། 23 འིན་ན་ ཁོང་རྒུན་ལ་ མི་རྒུན་ཀ་ནི་ འེ་རྒ་རྦོ་ ཚོར་རྡེ་ ནོག་, “ངུལ་ལ་ ཨ་ཧོ་རྒུན་ལ་ ནག་པར་རྡོ་ ལྟན་ཀ་ནེ་ མི་རྦེ་, ཏ་ ཏག་ས་ ཏེ་རྒ་ ཏེཏ་པེ་ ཧོར་ལ་ ཆོའེ་ཤེད་ཏུག་, ཀའོ་ ཁོའེ་ ཏུའི་ཞིག་ལ་ མེ་ཀན་ ཅོ་ཅེ་ ཙོན་འགྲུའི་ ཅོ་ཡོད་པེན་།” 24 ཡང་ ངེ་ སོང་ཀན་འབེ་ ཅོའེ་རྡེ་, ཁོང་རྒུ་ནི་ ཀོན་འཇོག་ལ་ རྟོད་པ་ པུལ་རྡེ་ འིན་འབེན་།