འགཱ་ལ་ཏི་ཡཱ་པ་ 2

ཧུ་ཚབ་ ཚང་མེ་ པ་འུ་ལུའི་ ལབ་ཞ་རྒུན་ལ་ རྒྱབ་རྐྱོར་ ཛེད་།

ཏེ་ནི་ ལོ་ ཅུཔ་ཞི་ ལྟིང་ནི་, ང་ ཡང་ ལོག་ཏེ་ ཡེ་རུ་ཤ་ལེམ་ལ་ འབཱར་ན་འབཱ་ ཉམ་པོ་ སོང་པེན་། ངེ་ ཏི་ཏུའི་ལ་ ང་ཞ་ ཉམ་པོ་ ཁྲིད་ཏེ་ ཁྱེར་རྦེན་། 2 ཀོན་འཇོག་རྒེ་ ང་ ངོན་ཅུག་རྒེ་ ཛེད་ཀན་འབེ་ ཅོའེ་རྡེ་, ང་ ཏུ་རུ་ སོང་པེན་, ཡང་ ཡེ་རུ་ཤ་ལེམ་མེ་ ཆོའེ་ཚོག་རྒེ་ འུ་རྐྱོང་ འིན་ཀན་རྒུན་ ཅིག་པོ་ ཡོད་ཟ་ནི་, ངེ་ ཡ་ཧུ་འདཱ་པ་ མན་ཀན་རྒུན་ལ་ ནེ་ཚུལ་ ཟང་པོ་ ཤེད་ཀན་འབེ་ ཧོར་ལ་ ཁོང་རྒུན་ལ་ ཤེད་པེན་, ཅེ་ཟེར་ནི་ ངེ་ ཅོའེན་ ཡོ་ཀན་ ཡང་ ཅོའེ་ཧན་ནེ་ ཏེ་ ཙོན་འགྲུའི་རྒུན་ ཀོད་ལ་ སོང་འདེ་ མན་ནེ་ཧེ་, སམ་འདེ་ འཇིག་རྡེ་ཡོད་པེན་། 3 ཁོང་རྒུ་ནི་ ང་ ཆོག་རྐྱོར་ ཅོའེ་, ཡང་ ངེ་ ཁྲོ་པ་ ཡ་ཧུ་འདཱ་པ་ མན་ཀན་ ཏི་ཏུའི་ལ་ འགོཔ་ཅེཏ་ ཅོ་རྒོ་ཤེའོ་ ཁག་ཅེན་ མ་སམ་།

4 འི་ ཏྲི་ཝ་རྦོ་ སོང་, ཅེ་ཟེར་ནི་ མ་ཤི་ཀ་ ཡི་ཤུའི་ན་ ང་ཞ་རྒུན་ལ་ ར་ཝང་ ཡོ་ཀན་འབོ་ ལྟ་ཅེ་ལ་, ཟུའི་མེ་ སྤུན་ རིག་ ང་ཞ་རྒུ་ནི་ ཆོའེ་ཚོག་རྒེ་ ཕྲོ་ སང་སྤེ་རེ་ ཐོག་ནི་ འདྲེའེ་རྡེ་ ནོག་། ཡང་ ར་ཝང་འབོ་ ཀོག་ཏེ་ ཁྱེར་རྡེ་, ཡ་ཧུ་འདཱ་པེ་ ཁྲིམ་རྒུ་ནི་ ཚེ་ཡོག་ འགྱུར་ཤུག་ཅེ་ལ་ ཐེད་ཏུག་། 5 འིན་ན་ ང་ཞི་ ཁོང་རྒུ་ནི་ ཟེར་ཧན་རྒུན་ལ་ སྲིབ་ཅིག་རྒེ་ཕི་ལ་, ཁ་ མ་ཆམ་འབེན་, ཅེ་ཟེར་ནི་ ང་ཞི་ ནེ་ཚུལ་ ཟང་པོ་ ཀྲང་པོ་ནི་ ཁྱི་ཞ་རྒུ་ནི་ཕི་ རྐྱོབ་ཏེ་ པོ་རེ་ལ་ ཐེད་རྡེ་ཡོད་པེན་།

6 ཡང་ ཡེ་རུ་ཤ་ལེམ་མེ་ ཆོའེ་ཚོག་རྒེ་ འུ་རྐྱོང་ འིན་ཀན་རྒུ་ནི་ ངེ་ ལབ་རྦེན་ ཡོ་ཀན་འབེ་ཀ་ ཅང་ ནེན་འདེ་ ཟེར་ཤེ་ མི་འདུག་པེན་ ཏོ་ཙོག་སེ་ ཀོ་སེ་ཀ་ ཡོད་ཅེ་རྦེ་ ངེ་ཕི་, ཅང་ ཁྱེད་ མེད་, ཅེ་ཟེར་ནི་ ཀོན་འཇོག་རྒེ་ སུ་ཞི་ལ་ ཡ་པེ་ ཅོའོ་ ཛེད་རྡེ་ མག་། 7 ཏོ་ མ་ཚེད་ ཀོན་འཇོག་རྒེ་ པི་ཏྲར་ལ་ ཡ་ཧུ་འདཱ་པ་རྒུན་ལ་, ཆོའེ་ཤེད་ཅེ་ ཁག་ ཀལ་ལེ་ ཛེད་ཀན་ ཙོག་སེ་, ཡ་ཧུ་འདཱ་པ་ མན་ཀན་རྒུན་ལ་, ནེ་ཚུལ་ ཟང་པོ་ ཤེད་ཅེ་ ཁག་ ང་ སལ་ལེ་ ཛེད་ཀན་འབོ་, ཏེ་ འུ་རྐྱོང་རྒུ་ནི་ ཐོང་འདེ་ ནོག་། 8 ཡི་ཤུའི་ ཧུ་ཚབ་ པི་ཏྲར་ རྒྱུད་ཏེ་, ཡ་ཧུ་འདཱ་པ་རྒུ་ནི་ན་ ཆག་ལེ་ ཛེད་ཀ་ནེ་ ཏེ་རྒ་ ཀོན་འཇོག་པེ་, ང་ ཡི་ཤུའི་ ཧུ་ཚབ་ རྒྱུད་ཏེ་ ཡ་ཧུ་འདཱ་པ་ མན་ཀན་རྒུ་ནི་ ནྃ་ལ་, ཆག་ལེ་ ཛེད་ཏེ་ ནོག་།

9 ཆོའེ་ཚོག་རྒེ་ འུ་རྐྱོང་ ཚང་མེ་སང་ ཁག་ཅེན་ ཐེའེ་ ཛེད་ཀན་ ཡ་ཀུབ་, པི་ཏྲར་ རྡང་, ཡོ་ཧཱ་ནན་རྒུ་ནི་ ངེ་ ལེ་ཧ་རྒུ་ནི་ ཧོར ཚོར་རྡེ་, ཀོན་འཇོག་རྒེ་ ང་ ཐུག་ཞེ་ སལ་ལེ་ ཛེད་ཏེ་ འིན་ཀན་འབོ་ ཧ་ཀོ་། ཡང་ འབཱར་ན་འབཱ་ རྡང་ ང་ ཁོང་རྒུ་ནི་ ཁྲོ་པ་ ལེ་ཅེད་པ་ ཐེའེ་ ཛེད་ཏེ་, ང་ཞ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ཆོའེ་ཤེད་ཅེ་, ཡང་ ཁོང་རྒུ་ནི་ ཡ་ཧུ་འདཱ་པ་རྒུ་ནི་ ཕྲོ་ ལེ་ཧ་ ཅོ་ཅེ་ལ་ ཐག་ཅེད་རྡེ་ ཛེད་། 10 ཉལ་རྦ་ཅེན་རྒུན་ལ་ ཡ་ཏོ་ ཅོ་ཅེ་ ཞུ་ཝ་ ཅིག་པོ་ནི་, ཁོང་རྒུ་ནི་ ང་ཞ་ ཏྃ་། ཏེ་རྒ་ ལེ་ཧ་རྦོ་ ཅོ་ལ་ ང་ རིྃ་རྡེ་ཡོད་པེན་།

པ་འུ་ལུའི་ པི་ཏྲར་ལ་ རྐྱོན་འཇོད་ ཅོའོ་ ཛེད་།

11 འིན་ན་ པི་ཏྲར་ ཨན་ཏི་ཡོག་རྒེ་ རྒྱལ་སེ་ན་ ཡོད་ཟ་ནི་, ཁོང་ངེ་ ཅོའེ་ཧན་འབོ་ ནོར་ཁྲུལ་ ནེན་ཏེན་ འིན་ཅེ་ཀ་ནི་, ང་ ཁོང་ལ་ རྡོང་ངེ་ཀ་ རྒྱཔ་འགལ་ ཅོ་རྒོའེ་། 12 ངུལ་ལ་ ཁོང་ངེ་ ཡ་ཧུ་འདཱ་པ་ མན་ཀ་ནེ་ མ་ཤི་ཀ་པ་རྒུན་ ཉམ་པོ་ ཁར་ཞི་ ཟ་ཡོད་པེན་། འིན་ན་ ཡ་ཀུབ་རྦེ་ ཡ་ཏོ་ ཁ་ཅིག་ ཏུ་རུ་ ལེབ་རྦེ་རྡང་, པི་ཏྲ་རེ་ ཏེ་ སྤུན་ ཡ་ཧུ་འདཱ་པ་ མན་ཀན་རྒུན་ ཉམ་པོ་ འབྲེལ་ མ་པོར་ ཡང་ ཁར་ཞི་ལ་ མ་ཟོའེ་, ཅེ་ཟེར་ནི་ ཁོ་ འགོཔ་ཅེཏ་ ཅོ་རྒོ་ཤེ་ ཁག་ཅེན་ སམ་ཀ་ནེ་ ཡ་ཀུབ་རྦེ་ ཡ་ཏོ་རྒུ་ནི་ ཉེད་ཀལ་ ཅོ་ཅེ་ལ་ འཇིའི་རྡེ་ཡོད་པེན་། 13 ཏོ་རྦེ་ འབྲེ་རྦུ་, ཞེན་ཡང་ ཡ་ཧུ་འདཱ་པ་ མ་ཤི་ཀ་པ་རྒུན་ པི་ཏྲ་རེ་ ངའིན་ན་ འདྲེའེ་རྡེ་, མ་ཚེད་ འབཱར་ན་འབཱ་འདང་ ཁོང་རྒུ་ནི་ ངའིན་ན་ སོང་།

14 ཁོང་རྒུན་ ནེ་ཚུལ་ ཟང་པེ་ ངོའེ་སྤེ་ ཁྲིན་འབོ་ རྒྱབ་ནི་ མ་འགྲུལ་ཀན་འབོ་, ངེ་ ཐོང་ངེ་རྡང་, ངེ་ ཚང་མེ་ འདུན་ལ་ པི་ཏྲར་ལ་ ཟེར་རྦེན་, “ཁྱེ་རང་ ཡ་ཧུ་འདཱ་པ་ཞིག་ལ་ རྐྱེ་རྡེ་ལ་, ཡ་ཧུ་འདཱ་པེ་ ཁྲིམ་རྒུན་ ཕྃ་རྡེ་, ཡ་ཧུ་འདཱ་པ་ མན་ཀན་རྒུན་ ཙོག་སེ་ མི་ཙེ་ པུད་ཏུག་། ཏ་ ཁྱེ་རང་ངེ་ འི་ ཡ་ཧུ་འདཱ་པ་ མན་ཀ་ནེ་ སྤུན་རྒུན་ལ་, ཅི་ཕི་ ཡ་ཧུ་འདཱ་པེ་ ལུག་སྲོལ་ལེ་ ནང་ཞིན་ འགྲུལ་ཤེ་ལ་, ཝང་ ཏང་ངེ་ཡོད་།”

15 “ཨ་ཧོ་ ཉ་ཧ་ནི་, རྐྱེ་རྦེ་ནི་ཕ་ལ་ ཡ་ཧུ་འདཱ་པ་ ནོག་། ཞེན་མ་རྒུ་ནི་ རྡིག་ཅེན་ ནོག་ ཟེར་ཧན་ ཡ་ཧུ་འདཱ་པ་ མན་ཀན་རྒུན་ ཙོག་སེ་ མག་། 16 འིན་ན་ ཨ་ཧོ་རྒུན་ལ་ རྒྱུའི་ནོག་, མི་ཞིག་ ཁྲིམ་རྒུན་ལ་ ཁ་ཉེན་ཅེ་རྦེ་ མ་ནོག་, ཡི་ཤུ་ མ་ཤི་ཀེ་ན་ ཏེཏ་པ་ ཡོད་ཅེ་རྦེ་, ཀོན་འཇོག་རྒེ་ ཧུ་འདུན་ལ་, ཀྲང་པོ་ ཐེའེ་ ཛེ་རྡེ་ནོག་། ཁྲིམ་རྒུན་ ཁ་ཉེན་ཅེའོ་ མ་ནོག་, མ་ཤི་ཀ་ ཡི་ཤུའི་ན་ ཏེཏ་པ་ ཅོ་ཅེ་ རྒྱུད་ཏེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེའེ་ ཛེད་ཅེ་ཕི་, ཨ་ཧོ་རྒུ་ནི་ མ་ཤི་ཀ་ ཡི་ཤུའི་ན་ ཏེཏ་པ་ ཅོའེ་རྡེ་ ནོག་། ཅེ་ཟེར་ནི་ སུ་ཞི་ལ་ ཁྲིམ་ ཁ་ཉེན་ཅེ་རྦེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེའེ་ ཛེ་རྡེ་ མག་།”

17 ཀལ་ཏེ་ ཨ་ཧོ་རྒུ་ནི་ མ་ཤི་ཀེ་ན་ ཏེཏ་པ་ ཡོད་ཅེའོ་ རྒྱུད་ཏེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེ་ཅེ་ སལ་ལེ་ཡོད་ནི་, འིན་ན་ ཁྲིམ་ ཕང་ཅེ་རྦེ་ ཨ་ཧོ་རྒུ་ནི་ན་ རྐྱོན་ ཐོང་ངེ་ཡོད་ནི་, ཅི་ ཏོ་རྦེ་ ཏོན་འབོ་, མ་ཤི་ཀེ་ ཨ་ཧོ་རྒུན་ རྡིག་པེ་ན་ ཁྲིད་ཏེ་ ཁྱེར་རེ་ ཛེད་ཏེ་ ནོག་རྒེ་? མ་ནི་ མག་། 18 འིན་ན་ ཀལ་ཏེ་ ངེ་ ངུལ་ལ་ ཤི་ཀ་ནེ་ ཁྲིམ་འབོ་, ཡང་ སིག་ནི་, ཏོ་རྦེ་ ང་ རྡིག་ཅེན་ཞིག་ འིན་ཀན་འབོ་ ལྟན་ནེ་ནོག་། 19 ངེ་ ཁྲིམ་ ཚང་མ་ སྲུང་ མི་ཉེན་ཅེ་ཀ་ནི་, ཏོ་རྦེ་ ང་ ཤི་རྒོ་ཤེ་ ཁྲིམ་ཅེད་། སོང་འབེ་སང་ ཁྲིམ་མེ་ཕི་ ང་ ཤི་རྡེ་ འིན་ ཡང་ནི་ ཀོན་འཇོག་རྒེ་ ཏོན་ལ་ མི་ཙེ་ པུད་ཅེ་ཕི་, ངེ་ ཁྲིམ་ ཚང་མ་ སྲུང་ཅེ་ ཕྃ་རྡེ་ མེད་། 20 མ་ཤི་ཀ་ རྐྱང་ཤིང་ངེ་ཀ་ རྐྱང་ངེ་ ཛེད་ཟ་ནི་, ངེ་ ངུལ་མེ་ མི་ཙེ་རྦོ་ལ་ རྐྱང་འདེ་ མེད་། ཏི་ནི་ཕ་ལ་ འི་ མི་ཙེ་ ངེ་ མན་, མ་ཤི་ཀ་ འི་ན་ ཞུ་རྡེ་ཡོད་། ཏ་ ངེ་ ཀོན་འཇོག་རྒེ་ སྲེ་ན་, རྡེན་ཆེ་ཤེ་ ཅོའེ་རྡེ་ འི་ འཇིག་རྟེན་ནེ་ ཟུྃ་སྤེ་ན་ འདེད་རྡེ་ཡོད་། ཁོང་ངེ་ ང་ ཤེ་སྤ་ ཛེད་ཏེ་ ཁོ་རང་ངེ་ སྲོག་, ངེ་ཕི་ སལ་ལེ་ ཛེད་། 21 ངེ་ ཀོན་འཇོག་རྒེ་ ཐུག་ཞེ་རྦོ་ ནང་མེད་ ཅོ་ཉེན་ཅེ་ མག་། ཀལ་ཏེ་ ཁྲིམ་རྒུན་ སྲུང་ཅེ་རྦེ་, ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེ་ཡོད་ནི་, ཏེ་ནི་ མ་ཤི་ཀ་ ཀྲོྃ་ རྒོའེ་ཤེ་ མེད་ཏེ་ ནོག་།