པ་འུ་ལུའི་ ལྟིང་འཇུག་རྒེ་ ཁ་རྡ་རྒུན་།
13
ཏམ་པེ་ སུང་རབ་རྦེ་ན་ “ཉེད་ཀལ་ ཅི་ཞིག་ ཡོད་ན་ སྤང་པོ་ ཉི་ ཡ་ སུམ་ ཡོད་ཏེ་ མ་ནི་ ཁྲིམ་ཅེད་ ཏང་ མི་ཉེན་” མོལ་རྡེ་ ཡོ་ཀན་ ཙོག་སེ་ ང་ལ་ ལེན་ སུམ་པ་ ཁྱི་ཞ་རྒུན་ལ་ ཐུག་རྒེ་ལ་ ཡོང་ངེན་a། 2 ང་ ཁྱི་ཞ་རྒུན་ ཉམ་པོ་ ལེན་ ཉི་སྤ་ ཡོད་ཟ་ནི་, ངེ་ ཏེ་ རྡིག་པ་ ཅོ་ཀན་རྒུན་ལ་ སྤང་པུད་ཏེ་ འིན་འབེན་, ཀ་ཟུག་ ངེ་ ངུལ་ལ་ ཅོའོ་ ཙོག་སེ་, ཏ་ ཏག་ས་ལ་ ཡང་ ངེ་ ཁོང་རྒུན་ འདང་ ཞེན་ཡང་ ཚང་མ་ལ་ སྤང་པུད་རྡེ་ཡོད་, ལྟིང་མ་ ང་ ཡོང་ཟ་ནི་ རྡིག་པ་ ཅོ་ཀན་ སུ་ཞི་ལ་ ངེ་ ཆད་པེ་ཀ་ནི་ མི་ཐར་།3 མ་ཤི་ཀེ་ ང་ རྒྱུད་ཏེ་ ཞལ་ཏ་ སལ་ལེ་ ཛེད་ཀན་འབེ་ སྤང་པོ་ ཁྱི་ཞ་རྒུན་ལ་ རྒོའེ་ཤེ་ཀ་ནི་, ངེ་ ཏོ་རྒུན་ ལྟན་ནེན་། མ་ཤི་ཀེ་ ཁྱི་ཞ་ རྐྱོང་ཅེ་ ཡང་ ཡ་ཏོ་ ཛེད་ཟ་ནི་, ཁོང་ འུ་ཐུག་ མ་ཞུ་ལ་, མ་ ཤེད་ཅེན་ ཞུ་ ཛེ་རྡེ་ནོག་། 4 ཞེན་ འུ་ཐུག་རྒེ་ན་ ཁོང་ རྐྱང་ཤིང་ངེ་ཀ་ རྐྱང་འདེ་ ཀྲོང་ནྃ་, ཏ་ ཏག་ས་ ཀོན་འཇོག་རྒེ་ ཤེད་རྡེ་ན་, ཁོང་ སོན་པོ་ ཞུ་རྡེ་ནོག་། ཏེ་རྒ་ ཙོག་སེ་ མ་ཤི་ཀེ་ན་ ང་ཞ་རྒུ་ནི་ འུ་ཐུག་ འིན་, འིན་ན་ ཀོན་འཇོག་རྒེ་ ཝང་ འདང་ མ་ཤི་ཀ་ ང་ཞ་ ཉམ་པོ་ ཡོད་ཅེ་རྦེ་ ང་ཞི་ ཁྱི་ཞ་རྒུན་ལ་ རྐྱོང་ངེན་ ཡང་ ཡ་ཏོ་ ཅོའེན་།
5 ཁྱི་ཞ་ རང་ངེ་ ཏེཏ་པ་ ཀྲང་པོ་ འིན་ནེ་ མན་, ཏོ་ ལྟག་ཅེད་ ཅོའེ་ཧེ་། རང་འདང་རང་ལ་ ལྟག་ཅེད་ ཅོའེ་ཧེ་། ཡི་ཤུ་ མ་ཤི་ཀ་ ཁྱི་ཞ་རྒུ་ནི་ན་ ཞུ་རྡེ་ འིན་ཀན་འབོ་ རྒྱུའི་མེད་རྡེ་? ཏེ་མ་ནི་ ཏེཏ་པ་ ཀྲང་པེ་ ལྟག་ཅེད་རྡེ་ན་ ཁྱི་ཞ་རྒུན་ ཐར་ཁྱེལ་ མ་ཆ་ ནོག་། 6 ཡང་ ང་ཞ་ མ་ཤི་ཀེ་ རྡེན་འབེ་ ཧུ་ཚབ་ འིན་ཀ་ནེ་ ལྟག་ཅེད་རྡེ་ན་ ཁྲང་པོ་ འིན་ཀན་འབོ་ ཁྱི་ཞ་རྒུ་ནི་ ཧ་ཀོ་ཅེ་ལ་ ངེ་ རེ་ཝ་ ཅོའེན་།
7 ཁྱི་ཞ་རྒུ་ནི་ ངན་པ་ མི་ཅོ་ཤེ་ལ་ ང་ཞི་ ཀོན་འཇོག་ལ་ མོ་ལམ་ ཞུ་ཡོད་། ང་ཞི་ ཁྱི་ཞ་རྒུན་ཀ་ ཝང་ ཡོད་, ཏོ་ ལྟན་ཅེ་ཕི་ མོ་ལམ་ མ་ཞུ་ལ་, ཁྱི་ཞ་རྒུན་ རྒྱལ་ལེ་ ལེ་ཧ་ ཅོ་ལ་ ང་ཞི་ མོ་ལམ་ ཞུ་ཡོད་། ཞེན་ ང་ཞ་རྒུན་ ང་ཞི་ ཝང་འབོ་ ལྟན་ཅེ་ན་ ཐར་ཁྱེལ་ མ་ལུའི་ཀན་ ཙོག་སེ་ ཐོང་སྲིད་ཅེ་ ནོག་། 8 ང་ཞ་རྒུ་ནི་ ཀྲང་པེ་ ལབ་ཞེ་ རྒྱཔ་འགལ་ ཅོ་ མི་ཉེན་, འིན་ན་ ཀྲང་པོ་ ཅིག་པེ་ཕི་ ལེ་ཧ་ ཅོའེན་། 9 ཀལ་ཏེ་ ཁྱི་ཞི་ ཏེཏ་པ་ ཤེད་ཅེན་ ཅོ་ནི་ ང་ཞ་རྒུན་ འུ་ཐུག་ ཐོང་ཅེ་ལ་ ཐེད་པོ་ རག་། ཁྱི་ཞ་རྒུན་ ཏེཏ་པེ་ན་ སོན་ཏེ་ ལྡན་ཅེ་ལ་ ང་ཞི་ མོ་ལམ་ ཞུ་ཡོད་།
10 ང་ ཡོང་ཟ་ནི་, ངེ་ ཁྱི་ཞ་རྒུན་ལ་ ཆེད་པ་ སྲན་ཀྲེ་ ཏང་ མི་རྒོ་ཤེ་ཕི་, ང་ ཡོང་ངེ་སང་ ངུལ་ལ་, འི་ ཡི་རྒེ་རྦོ་ ཁྱི་ཞ་རྒུན་ལ་ འབྲི་འིན་, ཅེ་ཟེར་ནི་ ཙོབོ་རྡེ་ ང་ སལ་ལེ་ ཛེད་ཀ་ནེ་ ཝང་ཆའོ་ ཁྱི་ཞ་རྒུ་ནི་ ཏེཏ་པ་ མེ་ཀན་ ཆ་ཅུག་ཅེ་ མ་ནོག་, རྟེམ་པོ་ ཅོ་ཅེ་ལ་ ཀོལ་ཉིན་རག་།
པ་འུ་ལུའི་ ལྟིང་འཇུག་རྒེ་ འཇུ་ རྡང་ ཅིན་ལབ་།
11 སྤུན་རྒུན་ འི་ ལྟིང་འཇུག་རྒེ་ ཚིག་པོ་ ཉམ་པོ་ ངེ་ ཡི་རྒེ་ འབྲི་ཅེ་འབོ་ ཚར་ཤུག་རྒེ་ཡོད་། རྐྱིད་པོ་ ཅོའེ་ཧེ་, ཏེཏ་པེ་ན་ སོན་ཏེ་ ལྡན་ཅུག་ཧེ་, ཀའོ་ ངེ་ ཅོའེ་ ཟེར་ ཏེ་རྒ་རྦོ་ ཅོའེ་ཧེ་, ཅིག་ རྡང་ ཅིག་རྒེ་ པར་ལ་ ཐུན་འབྲེལ་ རྡང་ ཞིའི་རྡེ་ ཉམ་པོ་ འདོད་ཧེ་, ཏེ་ནི་ ཤེ་སྤ་ རྡང་ ཞིའི་རྡེ་ ཀོན་འཇོག་ ཁྱི་ཞ་རྒུན་ ཉམ་པོ་ ཞུ་རྡེ་ ཛེད་རྡེན་།
12 ཅིག་ ཏང་ ཅིག་ལ་ ཤེ་སྤ་ ཉམ་པོ་ འཇུ་ ཞུའི་།b 13 འི་རུ་ ཡོ་ཀ་ནེ་ ཀོན་འཇོག་རྒེ་ མི་ ཏམ་པ་རྒུ་ནི་, ཁྱི་ཞ་རྒུན་ལ་ འཇུ་ ཞུ་རུག་།
14 ཙོབོ་ ཡི་ཤུ་ མ་ཤི་ཀེ་ ཐུག་ཞེ་, ཀོན་འཇོག་རྒེ་ ཤེ་སྤ་ རྡང་ ཏམ་པེ་ ཐུག་ཡིད་རྡེ་ འབྲེལ་ ཁྱི་ཞ་རྒུན་ ཉམ་པོ་ ལུའི་ཤིག་༎