པ་འུ་ལུའི་ ཞལ་ཟི་ ཏང་ པར་རྡོ་རྒུན་།
12
འི་ ཕོ་སོ་ ཅོ་ཅེའོ་ ཕན་ཏོག་ཅེན་ཞིག་ མན་ནྃ་, ངེ་ ཏ་རུང་ང་ ཅོ་རྒོའེ་། ངེ་ ཙོབོ་རྡེ་ ཆོག་ནི་ ཞལ་ཟིག་ ཏང་ ངོན་ཅུག་རྒེ་ ཛེད་ཀན་རྒུན་ ཁྱི་ཞ་རྒུན་ལ་ ཤེད་རྡེ་ཡོད་། 2 ལོ་ ཅུཔ་ཞི་ ངུལ་ལ་, ང་a ཀོན་འཇོག་ ཁོ་རང་ ཞུ་རྡེ་ ཛེད་ཀ་ནེ་ ཚང་མེ་སང་ ནམ་ཀ་ ཐོ་ཤོག་རྦེ་ན་ ཁྱེར་རེ་ ཛེད་། ཏོ་ ང་ ཟུྃ་སྤེ་ན་ འིན་འབེན་ནི་ ཡ་ སེམ་ཡིད་རྡེ་ན་, ང་ ཅང་ རྒྱུའི་མེད་, ཀོན་འཇོག་ ཅིག་པེ་ ཁྱེན་ནེ་ ཛེ་རྡེ་ནོག་། 3 འོ་ནེ་ ཟུྃ་སྤོ་ན་ འིན་འབེན་ནེ་ ཡ་ སེམ་ཡིད་རྡེ་ན་, ཀོན་འཇོག་ ཅིག་པེ་ ཁྱེན་ནེ་ ཛེ་རྡེ་ནོག་། འིན་ན་ ང་ ཡུ་རྒུན་ ནེན་ཏེན་ལ་ རྒྱུའི་ཡོད་, 4 ང་ ཚང་མེ་སང་ ནམ་ཀ་ ཐོ་ཤོག་རྦེ་ན་ ཁྱེར་རེ་ ཛེད་, ཡང་ ཚིག་ རྒྱུད་ཏེ་ ཤེད་ མི་ཉེན་ཅེ་ ཧ་ལེ་ཤེ་ ཞལ་ཏ་ རིག་ ཚོར་, ཀའོ་ མི་སུ་ཞི་ལ་ ཤེད་ མ་ཅུག་རྒེ་ ནོག་།5 ཞེན་ ཏེ་རྒ་ ཐོང་ངོམ་འབོ་ལ་ ཕོ་སོ་ ཅོ་ཅེ་ འོའེ་སྤ་ འིན་ནི་ ངེ་ ཏོ་ མ་ཅོ་ལ་, ང་རང་ངེ་ འུ་ཐུག་རྒུན་ ཅིག་པེ་ཀ་ ཕོ་སོ་ ཅོའེན་། 6 ཀལ་ཏེ་ ངེ་ ཏོ་རྒུ་ནི་ཀ་ ཕོ་སོ་ ཅོའེ་རྦི་ནི་, ངེ་ ང་རང་ སམ་བ་ མེ་ཀན་ཞིག་ འགྱུར་ མ་ཅུག་རྒེ་, ངེ་ ཤེད་ཀན་རྒུན་ ཟུན་ མན་ རྡེན་འབའ་ འིན་འགྲོ་། འིན་ན་ ངེ་ ཏུ་ཟུག་ མི་ཅོ་, ཅེ་ཟེར་ནི་ ངེ་ མི་ཙེ་ན་ ཐོང་ཀན་ ཡང་ ངེ་ ཁྲིན་རྒུ་ནི་ན་ ཚོར་ཧན་རྒུན་ མ་ཐེ་ལ་, ཞེན་ཡང་ རྟོད་པ་ རྒོའེ་ཤེ་ མེ་རག་། 7 ང་ ཏེ་ ཧ་ལེ་ཤེ་ ཞལ་ཟིག་ ཐོང་ཀན་རྒུ་ནི་ཀ་, ཕོ་སོ་ ཅོ་ མི་ཅུག་ཤི་ཕི་, ཚེར་མ་ ཤེ་ན་ ཟུག་ཏེ་ ཡོ་ཀན་ ཙོག་སེ་, ཀོན་འཇོག་རྒེ་ ངེ་ ཟུྃ་སྤེ་ན་ རྡུད་རྡེ་ ཀལ་ཧན་ ཡོག་པོ་ལ་ ནག་ ཏང་ པར་རྡོ་ ལྟན་ཅུག་རྒེ་ ཛེད་།
8 ལེན་ སུམ་ ངེ་ ཙོབོ་ལ་ ཏེ་ པར་རྡོ་རྒུན་ འཇུ་འཇུ་ ཁྱེར་རེ་ ཛེད་ ཞུའི་རྦེན་། 9 འིན་ན་ ཁོང་ངེ་ མོལ་, “ཁྱེ་རང་ལ་ ངེ་ ཐུག་ཞེ་ ཅིག་པོ་ རྒོའེ་ཤེ་ ཡོད་ཏེ་ ནོག་། འུ་ཐུག་རྒེ་ན་ ངེ་ ཁྱུད་པོ་ མ་ ཤུག་ཤེན་ འགྱུར་རེ་ཡོད་།” ཏོ་རྦེ་ཕི་ ངེ་ ང་རང་ངེ་ འུ་ཐུག་རྒེ་ན་ ཐེད་པོ་ ཉམ་པོ་ མང་ངེ་ ཕོ་སོ་ ཅོའེན་ ཅེ་ཟེར་ནི་ ང་ རྒྱུད་ཏེ་ མ་ཤི་ཀེ་ ཁྱུད་པོ་ ཆག་ལེ་ ཛེ་རྡེ་ནོག་། 10 ཏེ་རྒ་རྦེ་ཕི་ལ་ མ་ཤི་ཀེ་ ཏོན་ལ་, ང་ ང་རང་ངེ་ འུ་ཐུག་, ཁྲེལ་རྦ་ ལྟན་ཅེ་, ཀག་སྤོ་ རྡང་ པར་རྡོའེ་ན་ རྐྱིད་པོ་ ཚོར་རེ་རག་, ཅེ་ཟེར་ནི་ འུ་ཐུག་ ཡོད་ཏུའི་ ང་ ཤུག་ཤེན་ འིན་།
ཀོ་རིན་ཐི་ ཆོའེ་ཚོག་རྒུ་ནི་ཕི་ པ་འུ་ལུའི་ ཐུག་ཚེར་།
11 ཁྱི་ཞ་ ཀོ་རིན་ཐི་པ་རྒུ་ནི་ ང་ ཕོ་སོ་ ཅོ་ཅུག་ཏེ་ སམ་བ་ མེ་ཀན་ཞིག་ ཙོག་སེ་ འགྱུར་ཤུག་། ཞེན་ ཁྱི་ཞ་རྒུ་ནི་ ངེ་ཕི་ ངོ་ཁྲོཏ་ཅེན་ནེ་ ཡི་རྒེ་རྒུན་ འབྲི་རྒོ་ཤེ་ ཡོད་པེན་། ང་ ཅང་ མན་ནྃ་ ཏེ་ ཀྲག་པོ་ ཧུ་ཚབ་ འིན་ ཟེར་ཧན་རྒུ་ནི་སང་ ཐུ་ མན་། 12 ང་ ཁྱི་ཞ་རྒུན་ ཉམ་པོ་ ཡོད་ཟ་ནི་, ཟོད་པ་ ཉམ་པོ་ ངེ་ ལྟའ་, ཧ་ལེ་ཤེ་ ཛེད་པ་ རྡང་ ཁྱུད་ མང་པོ་ ཅོའེ་རྡེ་, ངེ་ ནེན་ཏེན་ལ་ ང་ མ་ཤི་ཀེ་ ཧུ་ཚབ་ འིན་ཀན་འབོ་, ལྟན་འདེ་ ཏྃ་རྦེན་། 13 ངེ་ ཁྱི་ཞ་རྒུན་ལ་ ཞེན་ ཆོའེ་ཚོག་རྒུ་ནི་སང་ ཐུ་ ཀ་ཟུག་རྒེ་ སིག་ཏོག་? ཏོ་ ཁྱི་ཞ་རྒུན་ལ་ མུལ་ རོག་རྒེ་ན་ ལྕིད་ མི་ཀལ་ཅེ་རྦེ་ འིན་ནེ་? ཐུག་ཞེ་ ཛེད་ཏེ་ ངེ་ འི་ ནོར་ཁྲུལ་རྦོ་ལ་ ཤག་སྤ་ ཏོང་ཧེ་།
14 ང་ ཁྱི་ཞ་རྒུན་ས་ ལེན་ སུམ་པ་ ཡོང་ངེ་ཡོད་, ཡང་ ང་ ཁྱི་ཞ་རྒུ་ནི་ཀ་ ལྕིད་ཅིག་ མི་འགྱུར་། ཁྱི་ཞ་རྒུ་ནི་ རྒྱུ་ནོར་ མན་, ང་ ཁྱི་ཞ་རྒུན་ རྒོའེ་རྡེ་ཡོད་ ཅེ་ཟེར་ནི་ ཕྲུ་རྒུ་རྒུ་ནི་ ཕ་མ་རྒུན་ལ་ རྒོ་ཤེ་ཅེན་རྒུན་ མ་རིག་ལ་, ཕ་མ་རྒུ་ནི་ ཕྲུ་རྒུ་རྒུན་ལ་ རྒོ་ཤེ་ཅེན་རྒུན་ རིག་ཏེ་ ཏང་ངེ་ནོག་། 15 ཁྱི་ཞ་རྒུ་ནི་ཕི་ ངེ་ ང་རང་ འདང་ ང་ ཡོ་ཀན་ ཚང་མ་, མ་ ཐེད་པོ་ ཉམ་པོ་ རྐྱག་རྒེན་། ཀལ་ཏེ་ ངེ་ ཁྱི་ཞ་རྒུན་ལ་ ཤེ་སྤ་ མང་ངེ་ ཅོ་ནི་, ཁྱི་ཞི་ ང་ ཤེ་སྤ་ ཉུང་ཙེ་ ཅོའེ་ནེ་?
16 ང་ ཁྱི་ཞ་རྒུ་ནི་ཕི་ པར་རྡོ་ མན་ཀན་འབོ་ ཁྱི་ཞ་རྒུན་ལ་ རྒྱུའི་ཡོད་ཏེ་ ནོག་། འིན་ན་ ཁ་ཅིག་རྒེ་ ང་ རྐྱོན་འཇེན་ འིན་ཅེ་ཀ་ནི་, ཁྱི་ཞ་རྒུན་ཀ་ནི་ རྐྱོན་ ཅོའེ་རྡེ་ ཕན་ཏོག་ ནེན་འདེ་ ནོག་ སམ་འདུག་། 17 འིན་ན་ ཀ་ཟུག་རྒེ་? ཅི་ ཁྱི་ཞི་ཀ་ ལམ་ཅུག་ཀ་ནེ་ ཏེ་ མི་རྒུན་ རྒྱུད་ཏེ་ ངེ་ ཁྱི་ཞི་ཀ་ནི་ ཕན་ཏོག་ ནེན་ནེ་? 18 ཁྱི་ཞ་ ཐུག་རྒེ་ལ་ ཆ་ཅེ་ཕི་ ངེ་ སྤུན་ ཏི་ཏུའི་ལ་ སེམ་རུའི་ ཏྃ་རྡེ་ ཁོ་ ཉམ་པོ་ ཞེན་ཡང་ སྤུན་ཞིག་ ལམ་ཅུག་ཟ་ནི་, ཅི་ སྤུན་ ཏི་ཏུའི་ ཁྱི་ཞ་རྒུ་ནི་ཀ་ནི་ ཕན་ཏོག་ ནེན་ནེ་? མ་ནི་ མ་ནེན་། ལམ་ ཅིག་ཅིག་རྒེ་ཀ་ འགྲུ་ལེན་, སེམ་ཡིད་ ཅིག་ཅིག་ ཉམ་པོ་ ང་ཞ་རྒུ་ནི་ ལེ་ཧ་རྒུན་ ཙོག་སེ་ ཅོའེན་ མ་ནོག་རྒེ་?
19 ཁྱི་ཞ་རྒུ་ནི་ ང་ཞི་ ཏོ་རྒུན་ ང་ཞ་རང་ རྐྱོབ་ཅེ་ཕི་ ཟེར་རྡེ་ནོག་ སམ་མེ་ཡོད་རྡེ་? མ་ཤི་ཀེ་ ཞབ་རྟོག་པ་ འིན་ཅེ་རྦེ་ ང་ཞི་ ཏོ་རྒུན་ ཁྱི་ཞ་རྒུན་ལ་ ཤེད་རྡེ་ཡོད་, ཏོ་རྦེ་ སྤང་པོ་ ཀོན་འཇོག་རྒེ་ སལ་ལེ་ ཛེ་རྡེ་ནོག་། ཤེ་སྤ་ ཡ་ཏོ་རྒུན་, ཁྱི་ཞ་ ཏེཏ་པེ་ན་ ཤེད་ཅེན་ འགྱུར་ཤེ་ཕི་ ང་ཞི་ ཏེ་ ཚང་མ་ ཅོའེ་རྦེན་། 20 ང་ འཇིའི་རྡེ་རག་ ང་ ཡོྃ་ཟ་ནི་, ཁྱི་ཞ་རྒུ་ནི་ མི་ཙེ་ པུད་ཟོ་ ཐོང་འདེ་, ང་ ཐེད་པོ་ མི་ཆ་། ཡང་ ངེ་ ཅོ་ཀན་འབེ་ཀ་ ཁྱི་ཞ་རྒུན་ ཐེད་ མི་ཐེད་, ཅེ་ཟེར་ནི་ ཁྱི་ཞ་རྒུ་ནི་ན་ ཁྲུག་པ་, ཕྲ་རྡོག་, སྲོ་, རང་འདོད་ཅེན་, ཤོད་ལམ་མེ་ ཧོར་ལ་ ངན་པ་ ཟེར་ཤེ་, ཞེན་མ་ འབར་ཤེ་, རང་རྟོད་ ཏང་ཅེ་ རྡང་, ལེ་ཧ་ ཅོ་ཅེ་ལ་ ཚིར་ཧ་ མེ་ཀན་, ཏོ་རྒུན་ ཐོང་ཅེ་ལ་ ང་ འཇིའི་རྡེ་རག་། 21 འོ་ནེ་ ང་ འཇིའི་རྡེ་རག་, ང་ ཁྱི་ཞ་རྒུན་ས་ ཡོང་ཟ་ནི་ ཀོན་འཇོག་རྒེ་ ང་ ཡང་ ཁྲེལ་རྦ་ ཚོར་ ཤུག་རྒེ་ ཛེ་རྡེན་, ཅེ་ཟེར་ནི་ ཁྱི་ཞ་ མང་པོ་ཞིག་རྒེ་ ཏ་རུང་ང་ ངུ་ལེ་ རྡིག་པ་རྒུན་ མ་ཕང་ལ་, ཡང་ ཀྲིཔ་, ལུའི་འབྲེལ་ ངན་པ་ རྡང་, འོའེ་སྤེ་ ལུའི་འབྲེལ་ལེ་ ཚད་ནི་ ཐལ་རྡེ་ ཅོ་ཀན་རྒུ་ནི་ཀ་ འགྱོད་པ་ མ་ཅོ་ལ་ འིན་ཀན་འབོ་ ཐོང་འདེ་ ང་ རྡུག་པོ་ ཅོ་རྒོའེ་རྡེན་།