ཀོ་རིན་ཐི་ ཆོའེ་ཚོག་ལ་ པ་འུ་ལུའི་ ཆག་འབྲི་ ཉི་སྤ་།
པ་འུ་ལུའི་ ཆོག་ནེ་ འཇུ་།
1
འི་ ཡི་རྒེ་རྦོ་ ཀོན་འཇོག་རྒེ་ ཐུག་འདོད་ ནང་ཞིན་ལ་, མ་ཤི་ཀ་ ཡི་ཤུའི་ ཧུ་ཚབ་ལ་ འདམ་མེ་ ཛེད་ཀ་ནེ་ པ་འུ་ལུའི་ ཆོག་ནི་ འིན་། ཨ་ཧོའེ་ སྤུན་ ཏི་མོ་ཐི་ ང་ ཉམ་པོ་ ཡོད་, ཡང་ ངེ་ འི་ ཡི་རྒེ་རྦོ་ ཀོ་རིན་ཐི་ ཀོན་འཇོག་རྒེ་ ཆོའེ་ཚོག་ མ་ཚེད་, ཨ་ཀ་ཡཱ་ ཡུལ་ལེ་ན་ ཡོ་ཀ་ནེ་ ཀོན་འཇོག་རྒེ་ མི་ ཏམ་པ་ ཚང་མ་ལ་ ཀ་ལེ་ཡོད་། 2 ཀོན་འཇོག་ ཨ་ཧོ་རྒུ་ནི་ ཡབ་ ཏང་ ཙོབོ་ ཡི་ཤུ་ མ་ཤི་ཀེ་ ཁྱི་ཞ་རྒུན་ལ་ ཐུག་ཞེ་ རྡང་ ཞིའི་རྡེ་ སལ་ལེ་ ཛེད་ཤིག་།ཀོན་འཇོག་རྒེ་ སེམ་ལ་ ཞིའི་རྡེ་ སལ་ལེ་ ཛེད་།
3 ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀེ་ ཡབ་ ཀོན་འཇོག་ལ་ རྟོད་པ་ པུལ་ཧེ་། ཁོང་ནི་, ཉིང་ཞེ་ ཨ་རྦ་ རྡང་ སེམ་སོ་ ཚང་མེ་ ཀོན་འཇོག་ ཞུ་རྡེ་ནོག་། 4 ཨ་ཧོ་རྒུ་ནི་ལ་ ཞེན་མ་རྒུན་ལ་ སེམ་མེ་ན་ ཞིའི་རྡེ་ ཏང་ཉེན་ཅེ་ཕི་, ཀོན་འཇོག་རྒེ་ ཨ་ཧོ་རྒུན་ལ་ པར་རྡོ་ ཚང་མེ་ན་ སེམ་སོ་ སལ་ལེ་ ཛེ་རྡེ་ནོག་། ཀོན་འཇོག་རྒེ་ ཨ་ཧོ་རྒུན་ལ་ སལ་ལེ་ ཛེད་ཀ་ནེ་ ཏེ་རྒ་ ཙོག་སེ་ ཞིའི་རྡེ་ ཨ་ཧོ་རྒུ་ནི་ལ་ པར་རྡོའེ་ན་ ཡོ་ཀན་རྒུན་ལ་ ཏང་ཉེན་ནེན་། 5 མ་ཤི་ཀེ་ན་ ཨ་ཧོ་རྒུ་ནི་ རྡུ་ངལ་རྒུན་ རྐྱེན་ ཆ་ཟ་ནི་, ཨ་ཧོའེ་ སེམ་མེ་ན་ ཞིའི་རྡེ་ལ་ མ་ཤི་ཀ་ རྒྱུད་ཏེ་ རྐྱེན་།
6 ཀལ་ཏེ་ ང་ཞ་རྒུན་ པར་རྡོའེ་ ལྕིད་རྡེ་ ནེན་འདེ་ ཡོད་ནི་, ཏོ་ ཁྱི་ཞ་རྒུན་ལ་ ཐར་པ་ རྡང་ ཁྱི་ཞི་ན་ ཞིའི་རྡེ་ཕི་ འིན་། ཡང་ ཀལ་ཏེ་ ང་ཞ་རྒུན་ལ་ ཞིའི་རྡེ་ སལ་ལེ་ ཛེད་ནི་, ཏོ་རྦོ་ལ་ ཁྱི་ཞ་རྒུ་ནི་ སེམ་སོ་ཕི་ འིན་། ཏེ་ནི་ ང་ཞ་རྒུ་ནི་ ཁུར་རེན་ ཡོ་ཀན་ ཙོག་སེ་ རྡུ་ངལ་རྦོ་ ཁྱི་ཞ་རྒུ་ནི་ལ་ ཟོད་པ་ རྡང་ ཉིང་རུའི་ ཉམ་པོ་ ཁུར་རེན་། 7 ང་ཞ་རྒུན་ལ་ ལོ་ཁྱེལ་ རག་, ཁྱི་ཞ་རྒུན་ ང་ཞི་ རྡུ་ངལ་རྒུ་ནི་ན་ འདྲེའེ་ཤེ་ཀ་ནི་, ཁྱི་ཞ་རྒུན་ ང་ཞི་ སེམ་སོའེ་ ནང་ལ་ འདྲེའེ་རྡེན་།
8 སྤུན་རྒུན་, ཁྱི་ཞ་རྒུན་ལ་ ང་ཞི་ ཨ་སི་ཨཱེ་ ཡུལ་ལེ་ན་ པར་རྡོ་ ཁུར་ཧན་རྒུན་ ཧ་ཀོ་རྒོ་ཤེ་ ནོག་, ཏེ་ ཁུ་རུའི་ ལྕིད་པོ་ ང་ཞ་རྒུ་ནི་ ཁྱུད་རྡེ་སང་ མང་ངེ་ ཐལ་རྡེ་ ཡོད་ཅེ་ཀ་ནི་, ང་ཞི་ སོན་པོ་ ལུའི་ཤེ་ རེ་ཝ་ མེ་ཀན་ སོང་། 9 རྡེན་འབའ་, ང་ཞ་རྒུན་ ཤི་ནོག་ སམ་། འིན་ན་ ང་ཞ་རྒུན་ལ་ ང་ཞ་རང་ངེ་ ཁྱུད་རྒུ་ནི་ཀ་ རག་ལེ་རྡེ་ མ་འདེད་ལ་, ཤི་ཀན་རྒུན་ སོན་པོ་ ལང་ངེ་ ཛེད་ཀན་ ཀོན་འཇོག་རྒེ་ཀ་ རག་ལེ་རྡེ་ འདེད་རྒོ་ཤེ་ཕི་, ཏོ་རྒུན་ ཅུང་འདེ་ ནོག་། 10 ཁོང་ངེ་ ང་ཞ་རྒུན་ ཤི་ཅེ་ འཇི་སྤ་རྒུ་ནི་ཀ་ནི་ ཐར་ཤུག་རྒེ་ ཛེད་ཏེ་ ནོག་, ཡང་ ཡང་ ཐར་ཤུག་རྒེ་ ཛེ་རྡེན་། ཁོང་ངེ་ ཡོང་ཅེ་ཅེན་ནེ་ ཏུའི་ ནང་ལ་, ང་ཞ་རྒུན་ ཐར་ཤུག་རྒེ་ ཛེད་ཅེ་རྦེ་ཀ་ ང་ཞ་རྒུ་ནི་ ལོ་ཁྱེལ་ པོ་རེ་ཡོད་། 11 ཡང་ ཁྱི་ཞ་རྒུ་ནི་ ང་ཞི་ཕི་, མོ་ལམ་ ཞུ་ཅེ་རྒུན་ རྒྱུད་ཏེ་ ང་ཞ་རྒུན་ལ་ ཡ་ཏོ་ ཅོ་ནོག་། ཏེ་ནི་ མི་ མང་པོ་ཞིག་རྒེ་ ཀོན་འཇོག་ལ་ ཐུག་ཞེ་ཆེ་ ཞུའིན་, ཅེ་ཟེར་ནི་ ཀོན་འཇོག་རྒེ་ ཐུག་ཞེ་ ཉམ་པོ་, མང་པོ་ཞིག་རྒེ་ ང་ཞི་ སྲུང་རྐྱོབ་རྦེ་ཕི་ མོ་ལམ་ ཞུ་ཀན་རྒུན་ལ་ ལེན་སལ་ལེ་ ཛེད་ཏེ་ ནོག་།
པ་འུ་ལུ་ མི་རྐྱོད་ཅེ་ རྒྱུ་ཚན་།
12 ང་ཞ་རྒུ་ནི་ ལོ་ཁྱེལ་ རྡང་ སེམ་ ལག་མོ་ ཉམ་པོ་ ཟེར་ཉེ་ནེན་, ང་ཞ་རྒུན་ འི་ འཇིག་རྟེན་པ་ ཡང་ མིག་ས་ལེ་ ཁྱི་ཞ་རྒུན་ ཉམ་པོ་ འདེད་ཟ་ནི་, ཀོན་འཇོག་རྒེ་ སལ་ཧ་ནེ་ མི་ཙེ་ ཏམ་པ་ རྡང་ ཀྲང་པེ་ ཚུལ་ལ་ པུད་པེན་། ང་ཞ་རྒུན་ མི་ ཤེ་རབ་རྦེ་ཀ་ མན་, ཀོན་འཇོག་རྒེ་ ཐུག་ཞེ་ཀ་ རག་ལེ་རྡེ་ འདེད་པེན་། 13 ངེ་ ཡི་རྒེ་རྒུན་ སལ་སྤོ་ འིན་, ཏོ་རྒུ་ནི་ན་, ཡང་ ཏོན་ཏག་ ཅང་ རྦེ་རྡེ་ མེད་, ཡང་ ཁྱི་ཞ་རྒུན་ལ་ ཧ་ཀོ་ཅེ་ལ་ ལ་མོ་ ཡོད་། ངེ་ རེ་ཝ་ ཅོའེན་, ཞག་ཤིག་ ཁྱི་ཞ་རྒུ་ནི་ ང་ཞི་ ཉིང་ངེ་ན་ ཡོ་ཀན་ ཚང་མ་ ཧ་ཀོ་ ཉེན་ནེན་། 14 ཁྱི་ཞ་རྒུ་ནི་ ང་ཞ་ ཏག་ས་ སིང་ ཧ་ཀོ་ མ་ཉེན་ནྃ་, ཙོབོ་ ཡི་ཤུ་ ལོག་ཏེ་ ཕེབ་ཅེ་ ཞག་ལ་, ཁྱི་ཞ་རྒུ་ནི་ ང་ཞ་, སལ་སྤོ་ ཅོའེ་རྡེ་ ཧ་ཀོ་ཅེ་ཀ་ནི་, ཁྱི་ཞ་རྒུན་ལ་ ང་ཞི་ཀ་ ཕོ་སོ་ ཚོར་རེན་ ཀ་ཟུག་ ཁྱི་ཞི་ཀ་ ང་ཞ་རྒུན་ལ་ ཕོ་སོ་ ཚོར་རེ་ཡོད་། 15-16 ཁྱི་ཞི་ ཧ་ཀོའེན་ ང་ ལོ་ཁྱེལ་ ཡོད་པེ་, ངེ་ཀ་ནི་ ཁྱི་ཞ་ ཕན་ཏོག་ མང་ངེ་ ཐོབ་ཅེ་ཕི་, ང་ ཁྱི་ཞ་རྒུན་ ཉམ་པོ་ ཐུ་རྒེ་ ཡོང་ཅེ་ལ་ ལེན་ ཉི་ ཐབ་ལྡིང་རྦེན་། ཏང་པོ་ མ་ཀེ་འདོ་ནི་ཡཱེ་ ཡུལ་ལ་ ཆ་ཟ་ནི་ ཡང་ ཉི་སྤ་ ལོག་ཏེ་ ཡོང་ཟ་ནི་, ཏེ་ནི་ ང་ ཡ་ཧུ་འདཱེ་ ཡུལ་ལེ་ན་ པེ་ལ་ ཆ་ཟ་ནི་, རྒོའེ་ཤེ་ཅན་རྒུན་ ཁྱི་ཞ་རྒུ་ནི་ ཏང་ཅེ་ རེ་ཝ་ལ་ འིན་འབེན་། 17 འིན་ན་ ཁྱི་ཞ་ ཁ་ཅིག་རྒེ་, ཁོའེ་ ཐབ་ལྡིང་རྒུ་ནི་ན་ འགྱུར་ཞ་ ཅི་ཕི་ ཁྱོང་ངེ་ནོག་ ཟེར་རྡེ་ འདྲི་སྲིད་ཅེ་ ནོག་? ཅེ་ ཁྱི་ཞ་རྒུ་ནི་, ངེ་ ང་རང་ངེ་ ཐབ་ལྡིང་རྒུན་ སམ་བ་ མ་ཏྃ་ལ་ ཅོའེ་རྡེ་ ནོག་ སམ་མེ་ རག་རྒེ་? ཅི་ ཁྱི་ཞ་རྒུ་ནི་, ང་ འཇིག་རྟེན་པ་རྒུན་ ཙོག་སེ་ ནོག་ ས་མེ་ རག་རྒེ་, ཀའོ་རྒུ་ནི་ “ཅོའེན་” ཟེ་རེ་ནོག་ འིན་ན་ ཅོའོ་ མག་?
18 འིན་ན་ ཀ་ཟུག་ ཀོན་འཇོག་ ལོ་ཁྱེལ་ཅེན་ ཞུ་རྡེ་ འིན་, ངེ་ ཁྱི་ཞ་རྒུན་ལ་ “ང་ ཡོང་ངེན་” ཟེར་ཧ་ནེ་ ཁ་ཆད་པོ་ལ་ ཀྲང་པོ་ འིན་འབེན་། ངེ་ “མན་” ཟེར་ཤེ་རྦོ་ལ་ “འིན་” མི་ཟེར་། 19 ཀོན་འཇོག་རྒེ་ སྲེ་, ཡི་ཤུ་ མ་ཤི་ཀེ་ “འིན་” ཡང་ “མན་” མོལ་ཤེ་ན་ ཐ་མ་ཐེ་ཚོམ་ ཅོའོ་ ཛེ་རྡེ་ མག་། ཁྱི་ཞ་རྒུན་ལ་ སྤུན་ སེ་ལེ་a, ཏི་མོ་ཐི་ རྡང་ ངེ་ ཆོའེ་ཤེད་ཀན་འབོ་ ཁོང་ ཞུ་རྡེ་ འིན་, ཡང་ ཁོང་ནི་ ཀོན་འཇོག་རྒེ་ “ཅོའོ་ ཛེད་ཅེ་ལ་” ལྟའ་རྦོ་ ནོག་། 20 ཅེ་ཟེར་ནི་ མ་ཤི་ཀ་ རྒྱུད་ཏེ་, ཀོན་འཇོག་རྒེ་ ཞལ་ཆེཏ་ ཚང་མ་ ཀྲུཔ་ཅུག་རྒེ་ ཛེ་རྡེ་ནོག་, ཏོ་རྦེ་ཕི་ ང་ཞ་རྒུ་ནི་ “ཨ་མེན་” ཟེར་རྡེ་ ཀོན་འཇོག་ལ་ རྟོད་པ་ པུ་ལེན་།
21 ང་ཞ་ རྡང་ ཁྱི་ཞ་ ཉ་ཧེ་ ཏེཏ་པ་ མ་ཤི་ཀེ་ན་ རྟེམ་པོ་ འགྱུར་ཤུག་རྒེ་ ཛེད་ཀན་འབོ་ ཀོན་འཇོག་ ཞུ་རྡེ་ནོག་། ཐར་སྤེ་ཕི་ ཁོང་ངེ་ ཨ་ཧོ་རྒུན་ ཁོང་ལ་ ཞབ་རྟོག་ ཞུ་ལ་ འདམ་མེ་ ཛེད་ཏེ་ ནོག་། 22 ཀོན་འཇོག་རྒེ་ ཏམ་པེ་ ཐུག་ཡིད་ ཨ་ཧོ་རྒུ་ནི་ ཉིང་ངེ་ན་ ཐེ་ཙེ་ ཙོག་སེ་ པོ་རེ་ ཛེད་ཏེ་, ཨ་ཧོ་རྒུན་ ཁོང་ངེ་ འིན་ཀན་འབོ་ ལྟན་ནེ་ ཛེད་, ཡང་ ཏུ་ཟུག་ ཛེད་ཅེ་རྦེ་ ཀོན་འཇོག་རྒེ་ ཨ་ཧོ་རྒུན་ལ་ ཛེད་ཀ་ནེ་ ཞལ་ཆེཏ་ ཚང་མ་ ཀྲུཔ་ཅེ་ ནེན་ཏེན་ ཅོ་ ཛེད་།
23 ཏ་ ངེ་ ཟེར་ཤེ་ཅེན་རྒུན་ ཀྲང་པོ་ འིན་ཀ་ནེ་ སྤང་པོ་ ཀོན་འཇོག་ འིན་། ང་ ཀོ་རིན་ཐི་ལ་ ལོག་ཏེ་ མི་ཡོང་ཤིག་ རྒྱུ་ཚན་འབོ་, ཁྱི་ཞ་རྒུན་ ངེ་ ཧོཔ་ ཁར་རྐྱག་ཀ་ནི་ རྐྱོབ་ཅེ་ འིན་འབེན་། 24 ཏོ་, ཁྱི་ཞི་ ཏེཏ་པ་ ཅོ་ཀན་འབོ་ ལག་ལེན་ནེ་ན་ ཁྱོང་ ཟེར་རྡེ་ ཝང་ ཏང་ཅེ་འབོ་ མན་, འིན་ན་ ཁྱི་ཞ་རྒུན་ རྐྱིད་པེ་ ཀང་ཅེ་ཕི་ ང་ཞི་ ཁྱི་ཞ་རྒུན་ ཉམ་པོ་ ལེ་ཧ་ ཅོ་ཉིན་རག་། ཁྱི་ཞ་རང་ངེ་ ཏེཏ་པ་ ཅིག་པོ་ འགྱུར་རྡེ་ ཁྱི་ཞ་རྒུན་ རྟེམ་པོ་ ལུའི་རྡེན་།