ཡི་ཤུ་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ ཞྃ་རྡེ་ ཛེད་།
15
ངེ་ སྤུན་རྒུན་ ཏ་ ང་ ཁྱི་ཞ་རྒུན་ལ་ ངེ་ ངུལ་ལ་ ཤེད་ཀ་ནེ་ ནེ་ཚུལ་ ཟང་པེ་ ཧོར་ལ་ འི་ཏུ་ ཧུལ་ཅུག་ཧེ་། ཏེ་ཟ་ནི་ ཁྱི་ཞ་རྒུ་ནི་ ཏེ་ ནེ་ཚུལ་རྦོ་ལ་ ཏེཏ་པ་ ཅོའེ་རྡེ་, ཏ་རུང་ང་ ཏོ་རྦེ་ན་ རྟེམ་པོ་ ནོག་། 2 ཀལ་ཏེ་ ཁྱི་ཞ་རྒུ་ནི་ ངེ་ ཤེད་ཀ་ནེ་ ནེ་ཚུལ་ ཟང་པོ་ རྟེམ་པོ་ ཅོའེ་རྡེ་ ཏེཏ་པ་ ཅོའེན་ འདེད་ནི་, ཏེ་རྦེ་ ཅོའེ་རྡེ་ ཐར་སྤ་ ཐོབ་རྦེ་ནོག་། ཏེ་ནི་ ཏེཏ་པ་ ཅོ་ཀན་འབོ་ལ་ ཏོན་མེད་ ནོག་།3 ངེ་ ལག་ལ་ ལྟེད་རྡེ་ ཛེད་ཀན་ ཚང་མེ་སང་ ཁག་ཅེན་འབོ་, ངེ་ ཁྱི་ཞ་རྒུན་ལ་ ཏྃ་རྡེ་ འིན་འབེན་, ཏམ་པེ་ སུང་རབ་རྦེ་ན་ མོལ་རྡེ་ ཡོ་ཀན་ ནང་ཞིན་ལ་ ཏོ་ མ་ཤི་ཀ་ ཨ་ཧོ་རྒུ་ནི་ རྡིག་པེ་ཕི་ ཀྲོང་རྡེ་ ཛེད་། 4 ཡང་ ཏམ་པེ་ སུང་རབ་ ནང་ཞིན་ ཁོང་ སྤུར་ཧང་ངེ་ན་ པོར་ ཡང་ ཞག་ སུམ་པེ་ ཞག་ལ་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་། 5 ཁོང་ ཏང་པོ་ པི་ཏྲ་རེ་, ཏེ་ནེ་ མ་ཤི་ཀེ་ ཧུ་ཚབ་ ཅུག་ཉི་རྦེ་ འཇལ་རྡེ་ འིན་འབེན་། 6 ཏོ་རྦེ་ ལྟིང་ནི་ ཏུའི་ཅིག་རྒེ་ཀ་ ཁོ་རང་ངེ་ ལོབ་ཀྲུག་ ངཔ་རྒྱ་སང་ མང་ངེ་ཞིག་རྒེ་ འཇལ་, ཏོ་རྒུ་ནི་ ཕྲོ་ནི་ ཁ་ཅིག་ ཀྲོྃ་ ཚར་རྡེ་ འིན་ན་ མང་ཆེ་ཞིག་ ཏ་རུང་ང་ སོན་པོ་ ཡོད་ཏེ་ ནོག་། 7 ཏེ་ནི་ ཁོང་ ཁོ་རང་ངེ་ ནོ་, ཡ་ཀུབ་ ཡང་ ལྟིང་ནི་ ཧུ་ཚབ་ ཚང་མེ་ འཇལ་རྡེ་ འིན་འབེན་། 8 འིན་ན་ ལྟིང་འཇུག་ལ་ ཡམ་ཚེན་ ཚུལ་ལ་ རྐྱེ་ཧན་ ངེ་ལ་ ཁོང་ འཇལ་། 9 ང་ ཧུ་ཚབ་ ཚང་མེ་ ནང་ནི་ ཐུ་ཤོག་རྦོ་ འིན་། ངེ་ ཀོན་འཇོག་རྒེ་ ཆོའེ་ཚོག་རྒུན་ལ་ ནག་ ལྟན་ཅེ་ཀ་ནི་, ང་ ཧུ་ཚབ་ ཟེར་ཤེ་ འོའེ་སྤ་ལ་ མེད་།
10 འིན་ན་ ཏག་ས་ ང་ ཡོ་ཀན་འབོ་, ཀོན་འཇོག་རྒེ་ ངེ་ཀ་ མིག་ས་ལེ་ ཐུག་ཞེ་རྒུན་ པོ་ ཛེད་ཅེའོ་ འིན་, ཡང་ ཏོ་ ཀོད་ལ་ སོང་འདེ་ མག་། ཅེ་ཟེར་ནི་ ངེ་ ཞེན་ཡང་ ཧུ་ཚབ་རྒུ་ནི་སང་ ཙོན་འགྲུའི་ མང་ངེ་ ཅོའེ་རྡེ་ ལེ་ཧ་ ཅོ་ཡོད་། འིན་ན་ ཏོ་ ང་ མ་ནོག་, ཀོན་འཇོག་རྒེ་ ཁོ་རང་ངེ་ ཐུག་ཞེ་ རྒྱུད་ཏེ་, ངེ་ན་ ཆག་ལེ་ ཛེད་ཏེ་ ནོག་། 11 ངེ་ ཆོའེ་ཤེད་རྡེ་ཡོད་ཁྲོ་ ཡང་ ཁོང་རྒུ་ནི་, ཅང་ ཁྱེད་ མེད་ཏེ་ ནོག་། ཅེ་ཟེར་ནི་ ང་ཞ་ ཚང་མེ་ ཆོའེ་ ཙོག་སེ་ ཤེད་རྡེ་ནོག་, ཀའོ་ལ་ ཁྱི་ཞ་རྒུ་ནི་ ཏེཏ་པ་ ཅོའེ་རྡེ་ ནོག་།
ཤི་ཀན་རྒུན་ སོན་པོ་ ལང་ངེ་ ཛེད་ཅེ་།
12 འིན་ན་ ང་ འི་རྦོ་ ཤོད་ཧེ་, ང་ཞ་རྒུ་ནི་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་རྡེ་ ནོག་ ཟེར་རྡེ་, ཁྱི་ཞ་ ཁ་ཅིག་རྒེ་ ཤི་རྡེ་ ལྟིང་ནི་ སོན་པོ་ ལང་ཤེའོ་ མེ་ཀག་ ཅེ་ ཟེ་ནོག་? 13 ཀལ་ཏེ་ ཤི་རྡེ་ ལྟིང་ནི་ སོན་པོ་ ལང་ཤེའོ་ མེད་པེ་ནི་, ཏེ་ནི་ མ་ཤི་ཀ་ལ་ སོན་པོ་ ཞྃ་རྡེ་ མེད་ཁྲོ་། 14 ཡང་ ཀལ་ཏེ་ མ་ཤི་ཀ་ མ་ཞྃ་རྦེ་ནི་, ཏེ་ནི་ ང་ཞ་རྒུ་ནི་ ཆོའེ་ཤེད་ཅེ་ ཚང་མ་ ཕན་མི་ཐོག་ ནོག་, ཡང་ ཁྱི་ཞ་རྒུ་ནི་ ཏེཏ་པ་རྦོ་ལ་། 15 མ་ཚེད་ ང་ཞི་ ཧུ་ཚབ་རྒུ་ནི་ ཀོན་འཇོག་རྒེ་ སྤང་པོ་ ཟུན་ ཏྃ་རྡེ་ ནོག་, ཅེ་ཟེར་ནི་ ང་ཞ་རྒུ་ནི་ ཀོན་འཇོག་རྒེ་ མ་ཤི་ཀ་ སྤུར་ཧང་ངེ་ ནང་ནི་ སོན་པོ་ ལང་ངེ་ ཛེད་ཀན་འབེ་ སྤང་པོ་ ཏང་ངེ་ནོག་། འིན་ན་ ཀལ་ཏེ་ ཤི་རྡེ་ ལྟིང་ནི་ སོན་པོ་ ལང་ཤེའོ་ རྡེན་འབའ་ མན་འབེ་ནི་, ཏེ་ནི་ ཀོན་འཇོག་རྒེ་ མ་ཤི་ཀ་ སོན་པོ་ ལང་ངེ་ མ་ཛེད་རྡེ་ ནོག་། 16 ཡང་ ཀལ་ཏེ་ ཤི་རྡེ་ ལྟིང་ནི་ སོན་པོ་ ལྃ་ཤེའོ་ མེད་ནི་ ཏེ་ནི་ མ་ཤི་ཀ་ལ་ སོན་པོ་ མ་ཞང་ངེ་ ནོག་། 17 ཡང་ ཀལ་ཏེ་ མ་ཤི་ཀ་ སོན་པོ་ མ་ཞང་ངེ་ ཡོད་ན་, ཏེ་ནི་ ཁྱི་ཞ་རྒུ་ནི་ ཏེཏ་པ་རྒུན་ ཕན་མི་ཐོག་ཞིག་ ནོག་, ཡང་ ཁྱི་ཞ་རྒུན་ ཏ་རུང་ང་ ཁྱི་ཞི་ རྡིག་པེ་ན་ རྐྱོན་ཅེན་ ལུའི་རྡེ་ནོག་། 18 ཏེ་ནི་ མ་ཤི་ཀེ་ན་ ཏེཏ་པ་ ཡོད་ཏེ་ ཤི་ཀན་ ཚང་མ་ལ་ ཉ་ཝེ་ན་ ལེབ་ཏེ་ ནོག་། 19 ཀལ་ཏེ་ འེ་རྒ་ མི་ཙེ་ ཅིག་པེ་ན་ ཐར་ཤེ་ རེ་ཝེ་ཕི་ ཨ་ཧོའེ་ མ་ཤི་ཀེ་ཀ་ ཏེཏ་པ་ ཅོ་ཡོད་ནི་། ཏེ་ནི་ འཇིག་རྟེན་ནེ་ མི་ ཚང་མེ་ ཕྲོ་ནི་ ཨ་ཧོ་ ཚང་མེ་སང་ མི་ རྡིག་པ་རི་ ནོག་།
20 འིན་ན་ ངོའེ་སྤོ་ལ་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ཞང་ངེ་ ཛེད་ཏེ་ ནོག་། ཁོང་ནི་ ཤི་ཀན་ ཚང་མེ་ ནང་ནི་ ལྟོན་ཏོག་ ཀྲག་པེ་ འབྲེ་རྦུ་ ཏང་པོ་ ནོག་།
21 ཀ་ཟུག་རྒེ་ འཇིག་རྟེན་ནེ་ན་ ཤི་ཅེའོ་ ཨ་འདཱམ་ མིའུ་ རྒྱུད་ཏེ་ ཡོང་ངེ་ ཙོག་སེ་ ཏ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ཤེའོ་ མ་ཤི་ཀེ་ མིའུ་ རྒྱུད་ཏེ་ ཅུང་འདེ་ ནོག་། 22 ཨ་ཧོ་ ཚང་མ་ ཨ་འདཱམ་མེ་ ཕར་རྒྱུད་རྒུན་ འིན་ཅེ་ཀ་ནི་, ཤི་ནོག་། ཏེ་རྒ་ ཙོག་སེ་ མ་ཤི་ཀེ་ འིན་ཀན་ ཚང་མ་ལ་ མི་ཙེ་ སོ་མ་ཞིག་ སལ་ལེ་ ཛེ་རྡེ་ནོག་། 23 འིན་ན་ ཤི་རྡེ་ ལྟིང་ནི་ ལྃ་ཤེའོ་ ཚིར་ཧ་ཞིག་ ཡོད་ཏེ་ ནོག་། ལྟོན་ཏོག་རྒེ་ འགོ་མེ་ འབྲེ་རྦུ་ མ་ཤི་ཀ་, ལོག་ཏེ་ རྐྱོད་ཟ་ནི་, ཁོང་ངེ་ འིན་ཀན་ ཚང་མ་ སོན་པོ་ ལྃ་ངེ་ ཛེ་རྡེན་།
24 ཏོ་རྦེ་ ལྟིང་ནི་ ཐ་མ་འབོ་ ལེབ་རྦེན་, ཁོང་ངེ་ ཝང་སྲུལ་རྦེ་, ཝང་ འདང་ ཤེད་ ཡོ་ཀན་ ཚང་མ་ མེ་ཀན་ ཅོའོ་ ཛེད་ཏེ་ རྒྱལ་སྲིད་པོ་ ཡབ་ ཀོན་འཇོག་རྒེ་ ཆག་ལ་ པུ་ལེན་། 25 ཀོན་འཇོག་རྒེ་ ཁོ་རང་ངེ་ འགྲ་ཝོ་ ཚང་མ་, མ་ཤི་ཀེ་ ཞབ་རྦེ་ ཡོག་ལ་ ཁྱོང་ཁྱོང་ཚུག་པ་, ཁོང་ངེ་ ཝང་སྲུལ་ལེ་ ཛེད་རྒོའེ་། 26 ཡང་ ཤི་ཅེ་རྦོ་ ལྟིང་འཇུག་རྒེ་ འགྲ་ཝོ་ མེ་ཀན་ ཅོ་ཅེ་ཅེན་འབོ་ ནོག་། 27 ཏམ་པེ་ སུང་རབ་རྦེ་ན་ མ་ཤི་ཀེ་ ཧོར་ལ་ མོལ་རྡེ་ ནོག་ “ཀོན་འཇོག་རྒེ་ ཅི་ཚང་མ་ ཁོང་ངེ་ ཝང་ངེ་ ཡོག་ལ་ པོ་རེ་ ཛེད་” འོ་ནེ་ “ཅི་ཚང་མ་ ཁོང་ངེ་ ཝང་ངེ་ ཡོག་ལ་ པོ་རེ་ ཛེད་” མོལ་ལེ་ ཛེད་ཟ་ནི་, མ་ཤི་ཀ་ ཝང་ཆ་ སལ་ལེ་ ཛེད་ཀན་ ཀོན་འཇོག་ ཁོ་རང་ ཏོ་རྦེ་ན་ ཐེའེ་ མ་ཛེད་རྡེ་ ནོག་། 28 ཏེ་ནི་ ཁོང་ངེ་ ཅི་ཚང་མ་ མ་ཤི་ཀེ་ ཝང་ངེ་ ཡོག་ལ་ ཁྱོྃ་ ཚར་རེ་རྡང་, མ་ཤི་ཀེ་ ཁོ་རང་ ཀོན་འཇོག་རྒེ་ ཝང་ངེ་ ཡོག་ལ་ པོ་རེ་ ཛེ་རྡེན་, ཏེ་ནི་ ཀོན་འཇོག་རྒེ་ ཀང་ལུང་ས་ ཅི་ཚང་མེ་ཀ་ ཝང་སྲུལ་ལེ་ ཛེ་རྡེན་།
29 ཀལ་ཏེ་ ཤི་ཀན་ཞིག་ སོན་པོ་ མ་ལང་ནི་, ཏེ་ནི་ ཁ་ཅིག་རྒེ་, ཤི་ཀན་རྒུ་ནི་ ཚབ་ལ་ ཁྲུའི་ནེན་ཅེ་རྦོ་ལ་ ཅི་ རྒྱུ་ཚན་ ཡོ་ཀག་? ཀལ་ཏེ་ ཤི་ཀན་འབོ་ སོན་པོ་ ལང་ངེ་ མེད་ནི་, ཁོང་རྒུ་ནི་ ཏུ་ཟུག་ ཅི་ཕི་ ཅོའེ་རྡེ་ ནོག་།
30 ཡང་ སོན་པོ་ ལང་ཤེའོ་ མེད་པེ་ནི་, ཏེ་ནི་ ཅི་ཕི་ ང་ཞི་ ང་ཞ་རང་ངེ་ མི་ཙེ་ འཇི་སྤེ་ན་ ཏུའི་རྒྱུན་ པོ་རེ་ནོག་? 31 སྤུན་རྒུན་, ནེན་ཏེན་ལ་ ངེ་ ཞག་ཏང་ ཤི་ཅེ་ འཇི་སྤ་རྒུན་ རྡོང་ལེན་ ཅོའེན་། ཡང་ ཨ་ཧོའེ་ ཙོབོ་ མ་ཤི་ཀ་ ཡི་ཤུའི་ ཁྱི་ཞ་རྒུ་ནི་ན་ ཆག་ལེ་ ཟང་པོ་ ཅོའོ་ ཛེད་ཀན་འབེ་ན་ ངེ་ ཕོ་སོ་ ཚོར་ཧན་འབོ་ལ་, རྡེན་འབའ་ ནོག་། 32 ཡང་ ཀལ་ཏེ་ ཤི་རྡེ་ ལྟིང་ནི་ སོན་པོ་ ལང་ཤེའོ་ མེད་ནི་, རི་ན་ འདེད་ཀ་ནེ་ སེམ་ཅེན་ ཙོག་སེ་, ཏེ་ ཨེ་ཕེ་སུའི་པ་རྒུན་ ཉམ་ཀན་འབེ་ ང་ ཅི་ ཕན་ཏོག་ ཡོྃ་། ཡང་ ཏེཏ་པ་ མེ་ཀན་རྒུ་ནི་ ཟེར་ཧན་ ཙོག་སེ་ ཨ་ཧོ་ངེ་ལ་ ཟེར་སྲིད་ཅེ་ ནོག་, “ཤོག་ཧེ་, ཟེན་ ཐུང་ངེན་, ཅེ་ཟེར་ནི་ ཐོ་རེ་ ཨ་ཧོ་རྒུན་ ཤི་ནོག་།” 33 “ཤི་རྡེ་ ལྟིང་ནི་ སོན་པོ་ ལྃ་རྡེ་ མག་” ཟེར་ཧན་རྒུན་ ཙོག་སེ་ ཁྱི་ཞ་རྒུན་ པུང་ངུ་ མ་འགྱུར་ཧེ་། “ཁྲོ་པ་ ངན་པེ་ ཤོད་པ་ ཟང་པོ་ ཤིག་རྒེ་ནོག་” ཟེར་ཅེ་པོ་ འི་ཏུ་ ཅོའེ་ཧེ་། 34 ཀྲང་པོ་ མན་ཀ་ནེ་ སམ་བ་ ཕྃ་རྡེ་ ཤེ་རབ་ཅེན་ རིག་ འགྱུར་རྡེ་ རྡིག་པ་ མ་ཅོ་ཧེ་། ཁྱི་ཞ་རྒུན་ ཁྲེལ་ཅུག་ཅེ་ལ་ ངེ་ ཟེ་འིན་, ཁྱི་ཞ་ ཁ་ཅིག་ལ་ ཀོན་འཇོག་ ཤེ་ ཁོ་རང་ མི་ཤེ་།
ཤི་ཀ་ནེ་ ཟུྃ་སྤོ་ ལང་ངེ་ ཛེད་ཅེ་།
35 འིན་ན་ ཁྱི་ཞ་རྒུ་ནི་ ཕྲོ་ནི་ ཁ་ཅིག་རྒེ་, “ཀ་ཟུག་རྒེ་ ཤི་ཀན་ཞིག་ ལང་ ཉེན་ནེ་ནོག་? ཁོང་རྒུན་ལ་ ཟུྃ་སྤོ་ ཀ་ཟུག་ཤིག་ ཡོང་ངེ་ནོག་?” ཟེར་རྡེ་ འདྲི་སྲིད་ཅེ་ ནོག་། 36 ཅི་ ཧ་འགྲང་ ཙོག་སེ་ ཏྲི་ཝ་ཞིག་ ནོག་། ཁྱི་ཞ་རྒུ་ནི་ ས་ངོན་ ཏབ་ཟ་ནི་, ཏོ་ མི་ཞིག་ ཤི་རྡེ་ ས་ཀྱེཏ་རྡེ་ན་ ཧུྃ་ཧན་ ཙོག་སེ་ ཧུྃ་རྡེ་ མ་ཐེ་ལ་, རྐྱེ་ མག་། 37 ཡང་ ཁྱི་ཞ་རྒུ་ནི་ ཏབ་ཀན་འབོ་ རྐྱེ་ཀ་ནེ་ ཚེ་སྤེ་ མ་ནོག་ ཁྱི་ཞ་རྒུ་ནི་ ཏབ་ཀ་ནེ་ ཀྲོ་ ཡ་ ཡང་རིག་རྒེ་ ས་ངོན་ཞིག་ ནོག་། 38 ཏེ་ནི་ ཀོན་འཇོག་རྒེ་ ཏོ་ལ་ ཁོ་རང་ངེ་ ཐུག་འདོད་ ནང་ཞིན་ལ་, ཟུྃ་སྤོ་ སོ་མ་ཞིག་ སལ་ལེ་ ཛེ་རྡེ་ནོག་། ས་ངོན་ རེ་རེ་ ཏེ་རྒ་ རིག་རྡེ་ ཟུྃ་སྤེ་ན་ ལྡན་ནེ་ནོག་། 39 ཏེ་རྒ་ ཙོག་སེ་ ཤེ་ན་ མང་པོ་ ཡོད་ཏེ་ ནོག་, ནཱ་ ཅིག་པོ་ མི་, ཡང་ཅིག་ སེམ་ཅེན་, ཡང་ཅིག་ ཅ་ཅིའུ་, ཡང་ཅིག་ ཉ་ ནོག་།
40 ནམ་ཀེ་ ཟུྃ་ ཏང་ འཇིག་རྟེན་ནི་ ཟུྃ་ ཉི་ ཡོད་ཏེ་ ནོག་། ནམ་ཀེ་ ཟུྃ་སྤོ་རྒུ་ནི་ ཟི་ཞིད་པོ་ནི་ འཇིག་རྟེན་ནི་ ཟུྃ་སྤོ་རྒུ་ནི་སང་ སོ་སོ་ རིག་ ཡོད་ཏེ་ ནོག་། 41 ཉི་མ་ ཁོ་རང་ལ་ ཟི་ཞིད་ན་ ཅིག་, ཡང་ ལྡ་ཝ་ རྡང་ ཧར་མ་རྒུན་ལ་ ཞེན་ཡང་ ཟི་ཞིད་ན་ ཅིག་ ཡོད་ཏེ་ ནོག་, ཧར་མ་ ཚང་མེ་ ནང་ལ་ ཁོ་རང་ ཅིག་ ཏང་ ཅིག་རྒེ་ན་ ཟིལ་ སོ་སོ་ན་ ཡོད་ཏེ་ ནོག་།
42 ཏེ་རྒ་ ཙོག་སེ་, ཤི་རྡེ་ ལྟིང་ནི་ སོན་པོ་ ལྃ་ཤེ་རྦོ་ལ་ ནོག་། ཨ་ཧོ་རྒུན་ ཤི་ཟ་ནི་, ཨ་ཧོ་རྒུ་ནི་ འཇིག་རྟེན་ནེ་ ཟུྃ་སྤོ་རྒུན་ ས་ཀྱེཏ་རྡེ་ན་ ཧུང་ངེ་ནོག་, འིན་ན་ ཏོ་རྒུན་ ཏུའི་རྒྱུན་ ལུའི་ཤེ་ཕི་ སོན་པོ་ ལང་ངེ་ ཛེད་ཅེ་ ནོག་། 43 ཞེན་ ཏེ་རྒུན་ སྤལ་ མེད་ཏེ་ ཧུྃ་ནང་, ཏོ་རྒུན་ ཟིལ་ལེ་ན་ ལང་ངེ་ནོག་། ཏོ་རྒུན་ ཤེད་མེ་ཀ་ནེ་ན་ ཧུང་ངེ་ནོག་, འིན་ན་ ཏོ་རྒུན་ ཤེད་ཅེན་ འགྱུར་རྡེ་ ལང་ངེ་ ཛེད་ཅེ་ ནོག་། 44 ཏོ་རྒུན་ མི་ ཟུྃ་སྤེ་ ཚུལ་ལ་ ཧུང་ངེ་ནོག་, འིན་ན་ སེམ་ཡིད་རྡེ་ ཟུྃ་སྤོ་རྒུ་ནི་ ཚུལ་ལ་ ལང་ངེ་ ཛེ་རྡེན་, ཀ་ཟུག་ རང་ཞིན་ནི་ ཟུྃ་སྤོ་རྒུན་ ཡོད་རྡེ་ ཙོག་སེ་, སེམ་ཡིད་རྡེ་ ཟུྃ་སྤོ་རྒུན་ལ་ ཡོད་ཏེ་ ནོག་།
45 ཏམ་པེ་ སུང་རབ་རྦེ་ན་ མོལ་རྡེ་ ནོག་ “ཨ་འདཱམ་ མི་ ཏང་པོ་, སྲོག་ ཡོ་ཀ་ནེ་ མི་ཞིག་ ཛེད་ཏེ་ འིན་འབེན་” འིན་ན་ ཐ་མེ་ ཨ་འདཱམ་, ཀའོ་ མ་ཤི་ཀ་ ཞུ་རྡེ་ འིན་, ཁོང་ནི་ ཐུག་ཡིད་རྡེ་ མི་ཙེ་ སལ་ཧན་ ཞུ་རྡེ་ནོག་། 46 ཏང་པོ་རྦོ་ ཐུག་ཡིད་རྡེ་ ཟུྃ་སྤོ་ མ་ནོག་, རང་ཞིན་ནེ་ ཟུྃ་སྤོ་ཞིག་ འིན་འབེན་, ཏེ་ ལྟིང་ནི་ ཐུག་ཡིད་རྡེ་ ཟུྃ་སྤོ་ ཅུང་འདེ་ ནོག་། 47 ཨ་འདཱམ་ མི་ ཏང་པོ་, འཇིག་རྟེན་ནེ་ ཐལ་འབེ་ཀ་ནི་ ཅོའོ་ ཛེད་ཏེ་ འིན་འབེན་, འིན་ན་ མི་ ཉི་སྤ་ མ་ཤི་ཀ་ རྡེ་བ་ཅན་ནི་ ཕེབ་ཏེ་ འིན་འབེན་། 48 འཇིག་རྟེན་ནེ་ མི་རྒུན་ འཇིག་རྟེན་ནེ་ མིའུ་ ཙོག་སེ་, ཡང་ རྡེ་བ་ཅན་ནེ་ མི་རྒུན་ རྡེ་བ་ཅན་ནེ་ མི་ ཙོག་སེ་ ཡོང་ངེ་ནོག་། 49 ཀ་ཟུག་ ཏག་ས་ ཨ་ཧོ་རྒུན་ འཇིག་རྟེན་ནེ་ མིའུ་ ཙོག་སེ་ འིན་, ཞག་ཤིག་ ཨ་ཧོ་རྒུན་ རྡེ་བ་ཅན་ནེ་ མིའུ་ ཙོག་སེ་ འགྱུར་ཤེ་ ནོག་།
50 སྤུན་རྒུན་, ངེ་ ཟེར་ཤེ་ ཏོན་ཏག་པོ་ནི་, ཨ་ཧོ་རྒུ་ནི་ འི་ ཟུྃ་སྤོ་ལ་ ཀོན་འཇོག་རྒེ་ རྒྱལ་སྲིད་ ནོར་ཧལ་ལ་ ཐོབ་རྦེ་ མག་། ཤི་ཅེ་ཅེན་ནེ་ འི་ ཟུྃ་སྤོ་ལ་ ཏུའི་རྒྱུན་ ལུའི་ཤེ་ཅེན་ནེ་ ཀོན་འཇོག་རྒེ་ རྒྱལ་སྲིད་པོ་ ནོར་ཧལ་ལ་ མི་ཐོབ་། 51 འིན་ན་ ངེ་ ཁྱི་ཞ་རྒུན་ལ་ ཀོན་འཇོག་རྒེ་ སང་སྤེར་ ཐབ་ལྡིང་འབོ་ ངོན་ཅུག་རྡེན་། ཨ་ཧོ་རྒུ་ནི་ ནང་ནི་ ཚང་མ་ མི་ཤི་, འིན་ན་ ཨ་ཧོ་ ཚང་མེ་ན་ འགྱུར་ཞ་ ཁྱོང་ངེ་ ཛེ་རྡེན་། 52 ཏོ་རྒུན་ ཧུན་མེད་ལ་ མིག་ འགུལ་འགུལ་ལ་ ཆ་ཀན་ ཙོག་སེ་ ནོག་ ནམ་ ཀོན་འཇོག་རྒེ་ ཕོ་ཉ་རྒུ་ནི་ ཐ་མེ་ ཏུང་འབོ་ ཕུའིན་། ཏུང་འབོ་ ཕུ་རྡང་, ཤི་རྡེ་ ཡོ་ཀན་ ཚང་མ་ ཏུའི་རྒྱུན་ནི་ཕི་ སོན་པོ་ ལང་ངེ་ ཛེད་ཅེ་ རྡང་ ཨ་ཧོ་ སོན་པོ་ ལུའི་ཧན་རྒུ་ནི་ན་ འགྱུར་ཞ་ ཁྱོང་ངེ་ ཛེད་རྡེན་། 53 ཨ་ཧོ་རྒུ་ནི་ རུལ་ཤེ་ཅེན་ནེ་ ཟུྃ་སྤོ་ མི་རུལ་ཤེ་ ཡང་ ཤི་ཅེ་ཅེན་ནེ་ ཟུྃ་སྤོ་ ཏུའི་རྒྱུན་ སོན་པོ་ ལུའི་ཧན་ འགྱུར་རྒོའེ་།
54 ཨ་ཧོ་རྒུ་ནི་ ཤི་ཅེ་ཅེན་ནེ་ ཟུྃ་སྤོ་རྒུན་ མ་ནི་ མི་ཤི་ཅེན་ནེ་ ཟུྃ་སྤེ་ན་ འགྱུར་རེ་རྡང་, འི་ ཏམ་པེ་ སུང་རབ་པོ་ འདྲན་འདྲ་ ཀྲུབ་ཅེ་ ནོག་, “ཀོན་འཇོག་རྒེ་ རྒྱལ་ཁེ་ན་ ཤི་ཅེའོ་ མེ་ཀན་ ཛེད་།”
55 “ཝ་ ཤི་ཅེ་, ཏ་ ཁྱེ་རང་ངེ་ རྒྱལ་ཁ་རྦོ་ ཀ་རེ་།
ཝ་ ཤི་ཅེ་, ཏ་ ཁྱེ་རང་ངེ་ ནོད་པ་ ཀ་ཟུག་རྒེ་ རྐྱལ་ལེན་?”
56 རྡིག་པེ་ ཅོའེ་རྡེ་ མི་རྒུ་ནི་ཀ་ ཤི་ཅེ་ ཆ་ནོག་, ཡང་ ཁྲིམ་ རྒྱུད་ཏེ་ ཨ་ཧོ་ལ་ རྡིག་པེ་, མ་ འཇི་སྤ་ ལྟོང་ཅུག་ཀ་ནེ ཝང་འབོ་ ཧ་ཀོ་ནོག་། 57 འིན་ན་ ཀོན་འཇོག་ལ་ ཐུག་ཞེ་ཆེ་, ཁོང་ངེ་ ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀ་ རྒྱུད་ཏེ་ ཨ་ཧོ་རྒུན་ལ་ རྡིག་པ་ རྡང་ ཤི་ཅེ་ཀ་ རྒྱལ་ཁ་ སལ་ལེ་ ཛེ་རྡེ་ནོག་།
58 ཏོ་རྦེ་ཕི་ ངེ་ སྤུན་རྒུན་, ཏེཏ་པེ་ན་ ཤེད་ཅེན་ འདང་ རྟེམ་པོ་ འགྱུར་ཧེ་། ཏུའི་རྒྱུན་ ཙོབོ་རྡེ་ཕི་ རིང་རྡེན་ཞིག་ ཞབ་རྟོག་ ཞུའི་ཧེ་, ཅེ་ཟེར་ནི་ ཙོབོ་རྡེ་ཕི་ ཅི་ཞིག་ ཅོ་ནྃ་, ཀོད་ལ་ མི་ཆ་ཤེའོ་ ཁྱི་ཞ་རྒུན་ལ་ རྒྱུའི་ནོག་།