རོམ་མེ་ ཆོའེ་ཚོག་ལ་ པ་འུ་ལུའི་ ཆག་འབྲི་།
རོམ་མེ་ ཆོའེ་ཚོག་ལ་ པ་འུ་ལུའི་ ཆག་འབྲི་ ཧོར་།
འེ་རྒ་ ཆག་འབྲི་ རྡང་ ངུལ་མེ་ ཆོའེ་ཚོག་རྒེ་ འུ་རྐྱོང་རྒུན་ རྒྱུད་ཏེ་, ཨ་ཧོ་ལ་ འི་ ཆག་འབྲིའོ་ ཙོབོ་ ཡི་ཤུ་ མ་ཤི་ཀེ་ ཧུ་ཚབ་ པ་འུ་ལུའི་ འབྲི་ཛེད་ཀན་འབོ་ རྒྱུའི་ ཆ་ནོག་།
ཆོའེ་ན་ ཁེ་སྤ་རྒུ་ནི་, འི་ ཆག་འབྲི་ རྡང་ ཞེན་ཡང་ ཆག་འབྲི་རྒུན་ལ་ སར་ཤོད་ ཅོ་ཅེ་རྦེ་, པ་འུ་ལུའི་ འི་ ཆག་འབྲིའོ་ མ་ཤི་ཀ་ ཀྲོྃ་རྡེ་ སོན་པོ་ ཞྃ་རྡེ་ ལྟིང་ནི་ ཧ་ལམ་ ལོ་ ཉི་ཤུ་སག་ཉི་ ཡང་ ཉི་ཤུ་སག་སུམ་ ཉེ་ཁོར་ལ་, ཁོང་ ཀོ་རིན་ཐི་ན་ ཡོད་ཟ་ནི་, འབྲི་ཛེད་ཀན་འབོ་ ཧ་ཀོ་ནོག་།
པ་འུ་ལུའི་ འི་ ཆག་འབྲིའོ་ ཞེན་ཡང་ ཆག་འབྲི་རྒུ་ནི་སང་ སོ་སོ་ཞིག་ ཡོད་ཏེ་ ནོག་། ཞེན་ ཆག་འབྲི་རྒུ་ནི་ན་ ཁོང་ངེ་ ཆོའེ་ཚོག་རྒེ་ན་ ཡོ་ཀ་ནེ་ ཟུའི་མེ་ ལབ་ཞ་ ཡང་ རྡིག་པ་རྒུ་ནི་ སྤང་པུད་ཏེ་ ཀྲང་པེ་ ལམ་མེ་ཀ་ ལོག་ཏེ་ ཁྱོང་ཅེ་ལ་ འབྲི་ ཛེད་། འིན་ན་ འི་ ཆག་འབྲི་ འགོ་ཟུག་པེ་ཀ་ 1:16-17 ཁོང་ངེ་ ཏེཏ་པེ་ ཧོར་ལ་ རྡེན་འབའ་རྒུ་ནི་ འདོར་ལྡུའི་ཞིག་, ཡང་ ཆག་འབྲི་ ལུའི་ཧ་ནེ་ ཁག་པེ་ན་ ཏོ་རྦེ་ ཧོར་ལ་ མྃ་རྡེ་ ཞིབ་སལ་ ཅོའེ་རྡེ་ འབྲི་ཛད་།
འི་ ཆག་འབྲི་ འགོ་མེ་ ལེའུ་ རྒྱད་པེ་ན་ པ་འུ་ལུའི་ ཞིབ་སལ་ ཅོའེ་རྡེ་ ཡུ་རྒུ་ནི་ ཧོར་ལ་ འབྲི་ཛེད་ཏེ་ ནོག་།
ཏང་པོ་, ཀ་ཟུག་རྒེ་ རྡིག་ཅེན་ཞིག་ལ་ ཏེཏ་པ་ རྒྱུད་ཏེ་ ཀྲང་པོ་ ཐེ་ཛེད་ཅེ་ རྡང་, ཁོའེ་ཀ་ནི་ ཉ་ཝེ་ ཆེད་པའོ་ ཏུའི་རྒྱུན་ནི་ཕི་ ཐེན་ནེ་ ཛེད་ཅེ་རྒུན་ ལྟན་ནེ་ ཛེད་། ཡང་ མོ་ཤེ་ ཁྲིམ་ལ་ ཁ་ཉེན་ཅེ་ ཅིག་པོ་ རྒྱུད་ཏེ་ མི་ཞིག་ ཀྲང་པོ་ ཐེ་ཛེད་ཅེ་འབོ་ལ་ ཁོང་ངེ་ རྒྱབ་འགལ་ ཛེད་།
ཉི་སྤ་, ཀ་ཟུག་རྒེ་ ཏེཏ་པ་ཅེན་ རྐྱོབ་ཀན་ཞིག་ལ་ མི་ཙེ་ན་ རྡིག་པེ་ ཝང་ངེ་ཀ་ནི་ རྒྱལ་ཁ་ ཐོབ་ཅེ་ རྡང་ ནེ་རྡེ་ ཡོ་ཀ་ནེ་ ཏམ་པེ་ ཐུག་ཡིད་རྡེ་ ཁྱུད་ རྒྱུད་ཏེ་ ཏམ་པེ་ མི་ཙེ་ཞིག་ པུད་ཅེ་རྒུན་ ལྟན་ནེ་ ཛེད་།
སུམ་པ་, ཏེཏ་པ་ཅེན་ཞིག་ལ་ ཞག་ཤིག་ འི་ རྡིག་ཅེན་ ཟུྃ་སྤོ་ ཕྃ་རྡེ་ རྡིག་པེ་ ཚོད་ལྟོའེ་ན་ མ་ཆ་ཀ་ནེ་ ཟུྃ་སྤོ་ཞིག་ ཐོབ་ཅེ་, ཀའོ་ ཏུའི་རྒྱུན་ སོན་པོ་ ལུའི་རྡེན་།
ཀལ་ཏེ་ ཏག་ས་ ཁོང་ངེ་ ཨིས་ར་ཡེལ་པ་རྒུ་ནི་ ཏེཏ་པ་ མི་ཅོ་ཤེ་རྦོ་ རྒྱུད་ཏེ་, ཡ་ཧུ་འདཱ་པ་ མན་ཀན་རྒུན་ ཁོང་ངེ་ རྒྱལ་སྲིད་རྡེ་ན་ ཁྱོང་ངེ་ ཛེ་རྡེན་ ཡོད་ནི་, ཏེ་ནི་ ལྟིང་འཇུག་རྒེ་ ཏུའི་ལ་, ཀོན་འཇོག་རྒེ་ ཛེད་ཀ་ནེ་ ཐ་མེད་པེ་ ཞལ་ཆེཏ་ ཨིས་ར་ཡེལ་པ་རྒུན་, རྐྱོབ་རྦེ་ ཛེད་ཅེའོ་ ཀ་ཟུག་རྒེ་ འདྲན་འདྲ་ ཀྲུཔ་ཅུག་རྒེན་? པ་འུ་ལུའི་ ཏོ་རྦེ་ ལན་འབོ་ ཞིབ་སལ་ ཅོའེ་རྡེ་ ལེའུ་ རྒུ་ནི་ ཅུ་ཅིག་ན་ འབྲི་ཛེད་ཏེ་ ནོག་།
ལེའུ་ ཅུ་ཉི་ནི་ ཅོ་ང་ན་ པ་འུ་ལུའི་ ཏེཏ་པ་ཅེན་ཞིག་རྒེ་ ཞག་ཏང་ངེ་ མི་ཙེ་ན་ ལག་ལེན་ལ་ ཀ་ཟུག་རྒེ་ ཁྱོང་ཅེའོ་ ཞིབ་སལ་ ཅོའེ་རྡེ་ ལབ་རྦེ་ ཛེད་, སྤེར་ན་ མི་ཙེ་ ཀྲང་པོ་ཞིག་ པུད་ཅེ་: ཏོ་ ཆོའེ་ཚོག་རྒེ་ན་ ཞེན་མ་ ཏེཏ་པ་ཅན་རྒུན་ ཉམ་པོ་ ཐུན་འབྲེལ་ ཡང་ ཞུང་ངེ་ སྤོན་འབོ་རྒུན་ ཉམ་པོ་ སམ་ཚུལ་ རྡང་ ཅོ་ཚུལ་ ཟང་པོ་ ཀ་ཟུག་རྒེ་ པོར་ཤེ་, ཏེཏ་པ་ཅན་རྒུན་ལ་ ཁོང་ངེ་ ཏེཏ་པེ་ ཧོར་ལ་ ཁྲེལ་རྒོད་ ཏང་ མི་ཅོ་ཤེ་ ཡང་ ཞེན་ ཏེཏ་པ་ཅན་རྒུ་ནི་ཕི་ ཕན་ཏོག་ཅེན་ནེ་ མི་ཙེ་ཞིག་ ཀ་ཟུག་རྒེ་ པུད་ཅེ་༎