མ་ཤི་ཀེ་ ཧུ་ཚབ་རྒུ་ནི་ ཆག་ལེ་།
མ་ཤི་ཀེ་ ཧུ་ཚབ་རྒུ་ནི་ ཆག་ལེ་རྡེ་ སྤེ་ཆེ་ ཧོར་།
ཙོབོ་ ཡི་ཤུ་ མ་ཤི་ཀེ་ ཧུ་ཚབ་རྒུ་ནི་ ཆག་ལེ་རྡེ་ ཧོར་ལ་ འི་ སྤེ་ཆའོ་ ལུ་ཀེ་ འབྲི་ ཛེད་རྡེ་ནོག་, ཁོང་ནི་ ལུ་ཀེ་ ནེ་ཚུལ་ ཟང་པོ་ འབྲི་ཛེད་ཀ་ནེ་ ཏེ་རྒ་ མིའུ་ ནོག་། ཁོང་ངེ་ འི་ སྤེ་ཆའོ་ ཡི་ཤུ་ མ་ཤི་ཀ་ ཀྲོང་རྡེ་ སོན་པོ་ ཞྃ་རྡེ་ ལྟིང་ནི་ ལོ་ སུམ་ཅུ་སོབ་ཞི་ ཉེ་ཁོར་ལ་ འབྲི་ ཛེད་། ལུ་ཀེ་ འི་ སྤེ་ཆའོ་ ཐེའུ་ཕེ་ལུ་ལ་ འབྲི་ཛེད་ཏེ་ ནོག་, ཀ་འབོ་ལ་ ཁོང་ངེ་ ངུལ་ལ་ མ་ཤི་ཀེ་ མི་ཙེ་ ཧོར་ལ་ ནེ་ཚུལ་ ཟང་པོ་ སྤེ་ཆ་འབོ་ལ་ འབྲི་ཛེད་ཏེ་ འིན་འབེན་།
འི་ སྤེ་ཆའོ་ ཁག་ཅེན་ཞིག་ ནོག་, ཅེ་ཟེར་ནི་ འི་རྦོ་ ནེ་ཚུལ་ ཟང་པེ་ སྤེ་ཆ་ ཞི་ཀ་ ཉམ་པོ་ འབྲེལ་རྡེ་ ཡོད་ཏེ་ ནོག་, ཀ་འབོ་རྒུ་ནི་ མ་ཤི་ཀེ་ ཆག་ལེ་ རྡང་ ལབ་ཞ་རྒུ་ནི་ ཧོར་ལ་ ཤེད་རྡེ་ཡོད་། ཡི་ཤུ་ རྡེ་བ་ཅན་ན་ ནེན་ནེ་ ཛེད་ཏེ་ ལྟིང་ནི་ ཆོའེ་ཚོག་རྒུན་ ཀ་ཟུག་རྒེ་ ལྡན་, ཏོ་རྦེ་ ཧོར་ ཤེད་ཅེ་ འི་ སྤེ་ཆའོ་ ནེ་ཚུལ་ ཟང་པོ་རྒུན་ ཉམ་པོ་ འབྲེལ་རྡེ་ ནོག་། འི་ སྤེ་ཆེ་ མ་ཤི་ཀེ་ན་ ཏེཏ་པ་ཅེན་རྒུན་ ཀ་ཟུག་རྒེ་ ཡ་ཧུ་འདཱེ་ ཡུལ་ནི་ འཇིག་རྟེན་ སོན་ཏེ་ མི་རིག་རྒེ་ན་ ཕེལ་ཧན་འབོ་ ལྟན་ནེ་ ཛེ་རྡེ་ནོག་། འགོ་མེ་ ལོ་ སུམ་ཅུ་སོབ་ཞི་ནི་ ཆོའེ་ཚོག་རྒུན་ ཀ་ཟུག་རྒེ་ ལྡན་འདེ་ ཕེལ་ཧན་འབེ་ ཧོར་ལ་ འི་ན་ འབྲི་རྡེ་ ཡོད་ཏེ་ ནོག་།
འི་ སྤེ་ཆེ་ ཡི་ཤུའི་ ཧུ་ཚབ་རྒུ་ནི་ ཀོན་འཇོག་རྒེ་ རྒྱལ་སྲིད་རྡེ་ ནེ་ཚུལ་ ཟང་པེ་ ཧོར་ལ་ ལབ་ཞ་ སལ་ཅེའོ་, ཡི་ཤུ་ མ་ཤི་ཀེ་ ཆག་ལེ་རྒུན་ ཏ་རུང་ང་ ཅོའོ་ ཛེད་ཀན་འབོ་ ལྟན་ནེ་ནོག་། ཡང་ ཀོན་འཇོག་རྒེ་ ཁོང་རྒུ་ནི་ ཕྲོ་ ཛེད་པ་ ཛེད་ཀན་རྒུན་ རྒྱུད་ཏེ་ ཁོང་རྒུ་ནི་ ཤེད་ཀན་རྒུན་ ཀྲང་པོ་ འིན་ཀན་འབོ་ ལྟན་ནེ་ནོག་, ཏོ་རྒུན་ མ་ཚེད་ ཀ་ཟུག་རྒེ་ ཆོའེ་ཚོག་རྒུན་ལ་ ནག་ ལྟན་ཀ་ནེ་ པ་འུ་ལུའི་ན་ འགྱུར་ཞ་ ཡོྃ་རྡེ་ ཡི་ཤུ་ མ་ཤི་ཀེ་ ཧོར་ལ་ ལབ་ཅེ་ རྡང་ ཆོའེ་ཤེད་ཅེ་ཕི་ ནག་པར་རྡོ་ ནམ་ཀན་འབོ་ལ་ ལྟན་ནེ་ནོག་།
འི་ སྤེ་ཆེ་ ཨ་ཧོ་ པ་འུ་ལུའི་ ཀ་ཟུག་ ནེ་ལུག་རྒེ་ན་ ཆོའེ་ཚོག་ སོ་སོ་ལ་ ཆག་འབྲི་རྒུན་ འབྲི་ཛེད་ཀན་འབོ་ ཧ་ཀོ་ཅེ་ལ་ རོག་ ཅོ་ནོག་, ཏེ་རྒ་ ནེ་ལུག་རྒུན་ པ་འུ་ལུ་ལ་ ནག་ ཐོང་ཀན་ ཚང་མ་ ཡང་ ཆོའེ་ཚོག་རྒུ་ནི་ རྡུང་ངལ་ ཐོང་ཀན་ ཚང་མ་ འེ་ན་ སྲ་རྡེ་ འིན་༎