ཡི་ཤུ་ ལོབ་ཀྲུག་ རྡུན་ལ་ འཇལ་།
21
ཏི་འབེ་རི་ཡཱེ་ ཚོའེ་ ཐ་མ་ ཡང་ ལན་ཅིག་ ཡི་ཤུའི་ ཁོ་རང་ ལོབ་ཀྲུག་རྒུན་ལ་ ངོན་ཅུག་རྒེ་ ཛེད་, ཏོ་ འི་ཟུག་ལ་ སོང་། 2 ཤི་མོན་པི་ཏྲར་, ཚག་ཀྲུག་ ཟེར་ཧ་ནེ་ ཐོ་མཱ་, འགཱ་ལིལ་ལེ་ ཡུལ་ཞོང་ངེ་ ཀ་ནཱ་པ་ ན་ཐན་ནི་ཡེལ་, ཟེ་འབེ་འདེ་ པུ་ཙ་ ཉ་ཧ་ རྡང་ ཡང་ ལོབ་ཀྲུག་ ཉི་རྡང་ ཏུ་རུ་ ཛོམ་འདེ་ ཡོད་པེན་།3 ཏེ་རྒ་ ཏུའི་ལ་ ཤི་མོན་ པི་ཏྲ་རེ་ ཁོང་རྒུན་ལ་ ཟེར་, “ང་ ཉ་ ཟུམ་མེ་ལ་ ཆ་ཡོད་།”
ཁོང་རྒུ་ནི་, “ང་ཞ་ལ་ ཉམ་པོ་ ཡོང་ངེན་” ཟེར་། ཏོ་ ཟེར་རྡེ་ ཁོང་རྒུན་ ཆུ་འགྲུལ་ལེ་ན་ ཞོན་འདེ་ སོང་, འིན་ན་ ཏེ་ ཚེན་འབོ་ སོན་ཏེ་ ཁོང་རྒུ་ནི་ ཉ་ མ་ནི་ མ་ཟུམ་།
4 ནམ་ལྃ་རྡེ་རྡང་ ཡི་ཤུ་ ཚོའེ་ ཐ་མ་ ཞྃ་རྡེ་ ཡོད་པེན་, འིན་ན་ ལོབ་ཀྲུག་རྒུ་ནི་ ཁོང་ ཡི་ཤུ་ འིན་ཀན་འབོ་ ངོ་ མ་ཤེ་། 5 ཡི་ཤུའི་ ཁོང་རྒུན་ལ་ འབོ་ ཛེད་ཏེ་ མོལ་, “ཡ་ཏོ་རྒུན་ ཁྱི་ཞ་ ཉ་ མ་ཐུབ་རྦེ་?”
ཁོང་རྒུ་ནི་ ཟེར་, “མ་ཐུབ་།”
6 ཡི་ཤུའི་ ཁོང་རྒུན་ལ་ མོལ་, “ཁྱི་ཞི་ ཉ་འདོལ་རྦོ་ ཆུ་འགྲུལ་ལེ་ ཡོའེ་སྤ་ ཆོག་ལ་ ཕོང་ཧེ་, ཏེ་ནི་ ཁྱི་ཞ་ ཉ་ ཐུབ་རྦེན་།”
ཁོང་རྒུ་ནི་ ཡི་ཤུའི་ མོལ་ཧན་འབོ་ ཅོའེ་, ཡང་ འི་ཟམ་ ཉ་ མ་མང་པོ་ ཁད་, ཉ་འདོལ་རྦོ་ ཆུ་འགྲུལ་ནི་ ཐེན་འདེ་ ཁྱོང་ མ་ཉེན་།
7 ཏེ་ནི་ ཡི་ཤུའི་ ལོབ་ཀྲུག་ ཤེ་སྤ་རྦེ་, ཤི་མོན་པི་ཏྲར་ལ་ ཟེར་, “ཁོང་ནི་ ཙོབོ་ལེ་ ནོག་།” ཏོ་ ཚོར་རེ་རྡང་ ཤི་མོན་ པི་ཏྲ་རེ་ ཁོ་རང་ངེ་ ཀོའེ་རྦོ་ ཀོན་ ཀའོ་ ཁོའེ་ ངུལ་ལ་ ཉ་ ཟུམ་ཅེ་ཕི་ པུད་ཏེ་ ཡོད་པེན་། ཡང་ ཆུའི་ན་ ཞུ་རྡེ་ ཐ་མ་ སོང་། 8 ཞེན་ ལོབ་ཀྲུག་རྒུ་ནི་ ཉ་ ཀང་ཀ་ནེ་ ཉ་འདོལ་རྦོ་ ཆུ་འགྲུལ་ལ་ ཏག་ ཡང་ ཀྲུད་འདེ་རྡེན་ པི་ཏྲ་རེ་ ལྟིང་འགྲྃ་ནི་ ཆུ་འགྲུལ་རྦོ་ ཁྱོྃ་, ཁོང་རྒུན་ ཚོའེ་ ཐ་མ་ནི་ མ་ ཐག་རིང་ལ་ མེད་པེན་, ཧ་ལམ་ མི་ཀྲར་ རྒུབ་ཅུ་ ཀོག་ཉི་ ཟམ་། 9 ཡང་ ཐ་མ་ ལེབ་རྦེ་རྡང་, ཁོང་རྒུ་ནི་ སོ་ལེ་ མེ་ཀ་ ཉ་ རྡང་ ཏི་རྒིར་རྒུན་ ཐོང་།
10 ཡི་ཤུའི་ ཁོང་རྒུན་ལ་, “ཁྱི་ཞ་རྒུ་ནི་ ཏག་ས་ ཟུམ་ཀ་ནེ་ ཉ་ ཁ་ཅིག་ འེ་ཀ་ ཁྱོང་” མོལ་། 11 ཤི་མོན་པི་ཏྲར་ ཆུ་འགྲུལ་ལེ་ན་ སོང་འདེ་ ཉ་འདོལ་རྦོ་ ཆུའི་ ཐ་མ་ཚུག་པ་ ཀྲུད་ཏེ་ ཁྱོྃ་, ཀའོ་ ཉ་ ཆོན་མོ་ རྒྱ་རྡང་ ངཔ་ཅུ་ང་སུམ་མེ་ ཀང་འདེ་ ཡོད་པེན་, ཉ་ ཏེ་ཟམ་ མང་པོ་ ཡོད་ཏེ་ལ་ ཉ་འདོལ་རྦོ་ མ་ཆེད་རྡེ་ཡོད་།
12 ཡི་ཤུའི་ ཁོང་རྒུན་ལ་, “ང་ཏོག་ ཚལ་མ་ ཟ་ལ་ ཤོག་ཧེ་” མོལ་། ལོབ་ཀྲུག་རྒུ་ནི་ ཕྲོ་ནི་ སུ་ཞིག་ལ་ ཁོང་ལ་ “ཉེ་རང་ སུ་ འིན་?” ཟེར་རྡེ་ འདྲི་ཅེ་ ཧམ་བ་ མ་ཡོྃ་། ཁོང་རྒུན་ལ་ ཁོང་ ཙོབོ་ ཞུ་རྡེ་ འིན་ཀན་འབོ་ ཤེ་རྡེ་ འིན་འབེན་། 13 ཡི་ཤུ་ རྐྱོད་ཏེ་ ཏི་རྒིར་ རྡང་ ཉ་ ནམ་འདེ་ ཁོང་རྒུན་ལ་ སལ་ལེ་ཛད་། 14 ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་རྡེ་ ལྟིང་ནི་ ལེན་ སུམ་པ་ ལོབ་ཀྲུག་རྒུན་ལ་ ངོན་ཅུག་རྒེ་ ཛེད་ཏེ་ འིན་འབེན་།
ཡི་ཤུ་ རྡང་ ཤི་མོན་པི་ཏྲར་།
15 ཁོང་རྒུ་ནི་ ང་ཏོག་ ཚལ་མ་ འདོན་ ཚར་རེ་རྡང་, ཡི་ཤུའི་ ཤི་མོན་པི་ཏྲར་ལ་ འདྲི་ ཛེད་, “ཤི་མོན་ ཡོ་ཧཱ་ནན་ནེ་ པུ་ཙ་, རྡེན་འབའ་ ཁྱེ་རང་ངེ་ ང་ ཁོང་རྒུ་ནི་སང་ མང་ངེ་ ཤེ་སྤ་ ཅོ་ཡོད་རྡེ་?”
ཁོའེ་ ལེན་ཏྃ་, “ཅོ་ཡོད་ལེ་, ཙོབོ་ ངེ་ ཉེ་རང་ངེ་ ཤེ་སྤ་ ཅོ་ཀན་འབོ་ ཉེ་རང་ངེ་ ཁྱེན་ནེ་ནོག་།”
ཡི་ཤུའི་ ཁོའོ་, “ངེ་ ལུག་རྒུན་ ཚོའེ་” མོལ་། 16 ཡི་ཤུའི་ ལེན་ ཉི་སྤ་ ཁོ་ འདྲི་ ཛེད་, “ཤི་མོན་ ཡོ་ཧཱ་ནན་ནེ་ པུ་ཙ་, རྡེན་འབའ་ ཁྱེ་རང་ངེ་ ང་ ཤེ་སྤ་ ཅོ་ཡོད་རྡེ་?”
ཁོའེ་ ལེན་ཏྃ་, “ཅོ་ཡོད་ལེ་, ཀྱེ་ ཙོབོ་ ངེ་ ཉེ་རང་ལ་ ཤེ་སྤ་ ཅོ་ཀན་འབོ་ ཉེ་རང་ངེ་ ཁྱེན་ནེ་ནོག་།”
ཡི་ཤུའི་ ཁོ་, “ཏེ་ནི་ ངེ་ ལུག་རྒུན་ ཚོའེ་” མོལ་།
17 ཁོང་ངེ་ ལེན་ སུམ་པ་ ཁོ་ འདྲི་ ཛེད་, “ཡོ་ཧཱ་ནན་ནེ་ པུ་ཙ་ ཤི་མོན་, ཁྱེ་རང་ངེ་ ང་ ཤེ་སྤ་ ཅོ་ཡོད་རྡེ་?”
ཡི་ཤུའི་ ཁོ་ ལེན་ སུམ་པ་ “ཁྱེ་རང་ངེ་ ང་ ཤེ་སྤ་ ཅོ་ཡོད་རྡེ་” མོལ་རྡེ་ འདྲི་ ཛེད་པེ་ པི་ཏྲར་ལ་ སེམ་མེ་ན་ ཕོག་, པི་ཏྲ་རེ་ ཟེར་, “ཙོབོ་ ཉེ་རང་ལ་ ཅི་ཚང་མ་ ཁྱེན་ནེ་ནོག་, ངེ་ ཉེ་རང་ལ་ ཤེ་སྤ་ ཅོ་ཀན་འབོ་ ཉེ་རང་ངེ་ ཁྱེན་ནེ་ནོག་།”
ཡི་ཤུའི་ ཁོ་, “ངེ་ ལུག་རྒུན་ ཚོའེ་” མོལ་།
18 ཡི་ཤུའི་ མོལ་, “ངེ་ ཁྱེ་རང་ལ་ ཏེན་ ཏེན་ ཟེ་འིན་, ཁྱེ་རང་ ཁྱོག་ཏོང་ ཡོད་ཟ་ནི་, ཁྱེ་རང་ རང་ངེ་ ཀོའེ་ལག་ ཀོན་འདེ་ ཀ་རུ་ ཆེན་ སམ་ན་ ཆ་ཡོད་པེན་, འིན་ན་ རྒེ་རྡེ་རྡང་ ཁྱེ་རང་ངེ་ ལག་པ་ རྐྱང་ངེན་ ཡང་ ཞེན་མ་ཞིག་རྒེ་ ཧོན་འདེ་ ཁྱེ་རང་ མི་ཐེད་ཀ་ནེ་ ས་ཅ་རྒུན་ལ་ ཁྲིད་ཏེ་ ཁྱེར་རེན་།” 19 ཡི་ཤུའི་ པི་ཏྲར་ ཤི་ཚུལ་རྦོ་ རྒྱུད་ཏེ་ ཀོན་འཇོག་ལ་ སྤལ་ ཁྱོང་ཅེའོ་ ཁོ་ ཧ་ཀོ་ཅེ་ལ་ ཏོ་རྦོ་ མོལ་། ཏེ་ནི་ ཡི་ཤུའི་ ཁོ་ མོལ་, “ངེ་ ལྟིང་འགྲྃ་ནི་ འགྲོྃ་།”
20 པི་ཏྲ་རེ་ རྒྱབ་ ལོག་ཏེ་ ལྟོའེ་རྦེ་ ཡི་ཤུའི་ ཤེ་སྤ་ ཛེད་ཀ་ནེ་ ལོབ་ཀྲུག་པོ་ ཁོང་རྒུ་ནི་ རྒྱབ་ནི་ ཡོང་ངེ་ཡོད་པེན་, ཁོ་ ཕི་ཏོག་རྒེ་ འདོན་ཏང་ངེ་ ཏུའི་ལ་ ཡི་ཤུ་ ཀན་རྡེ་ “ཀྱེ་ ཙོབོ་ ཉེ་རང་ལ་ འགྲ་ཝོ་ ལག་ལ་ ལྟེད་ཀན་འབོ་ སུ་ འིན་” ཟེར་རྡེ་ འདྲི་ཀ་ནེ་ ལོབ་ཀྲུག་པོ་ འིན་། 21 པི་ཏྲ་རེ་ ཁོ་ ཐོང་འདེ་ ཡི་ཤུ་ འདྲི་, “ཀྱེ་ ཙོབོ་ ཁོ་ ཅི་ ཆེན་?”
22 ཡི་ཤུའི་ ལེན་སལ་, “ཀལ་ཏེ་ ངེ་ ང་ ལོག་ཏེ་ ཡོང་ཡོང་ཚུག་པ་ ཁོ་ སོན་པོ་ པོ་རེ་ ཐེད་ནི་ ཁྱེ་རང་ལ་ ཅི་ རག་? ཁྱེ་རང་ ངེ་ ལྟིང་འགྲྃ་ནི་ འགྲོྃ་།” 23 ཏོ་རྦེ་ཕི་ སྤུན་རྒུ་ནི་ན་ འི་ ལོབ་ཀྲུག་པོ་ མ་ནི་ མི་ཤི་ཅེ་ ནོག་ ཟེར་རྡེ་ འུ་ཡ་ ཕེལ་། འིན་ན་ ཡི་ཤུའི་ ཁོ་ མ་ནི་ མི་ཤི་ མོལ་རྡེ་ མན་འབེན་, ཁོང་ངེ་, “ཀལ་ཏེ་ ངེ་ ང་ ལོག་ཏེ་ ཡོང་ཡོང་ཚུག་པ་ ཁོ་ སོན་པོ་ པོ་རེ་ ཐེད་ནི་ ཁྱེ་རང་ལ་ ཅི་ རག་?” ཅིག་པོ་ མོལ་རྡེ་ འིན་འབེན་།
24 ཏེ་རྒ་ ལོབ་ཀྲུག་པོ་ནི་ འི་ སྤེ་ཆེ་ན་ འི་ ཚང་མེ་ ཧོར་ལ་ འབྲི་རྡེ་ སྤང་པོ་ ཏང་ཀན་འབོ་ འིན་, ཡང་ ང་ཞ་རྒུན་ལ་ ཁོའེ་ སྤང་པོ་རྒུན་ རྡེན་འབའ་ འིན་ཀན་འབོ་ རྒྱུའི་ཡོད་། 25 ཡི་ཤུའི་ ཞེན་ ཆག་ལེ་ མང་པོ་ ཛེད་ཏེ་ ནོག་། ཀལ་ཏེ་ ཏེ་ ཚང་མ་ འབྲི་རྡེ་ ཡོད་པེ་ནི་, ངེ་ སམ་མེ་རག་ འི་ འཇིག་རྟེན་འབོ་ སོན་ཏེ་ན་ ཏེ་ སྤེ་ཆ་རྒུན་ པོར་སེ་ མལ་ལ་ མེད་ཁྲོ་༎