ཡོ་ཧཱ་ནན་ 20

སྤུར་ཧང་ ལྟོང་པ་།

ཟ་ཉི་མེ་ ཞག་ལ་ ང་མོ་ ཟ་ར་ཟི་རེ་ནི་ ནམ་ མ་ལང་ངེ་ ཡོད་ཟ་ནི་ མར་ཡམ་ མ་ཧ་འདལ་ལེན་མ་ སྤུར་ཧང་ལ་ སོང་, ཡང་ ཁོ་ སྤུར་ཧང་ངེ་ ཁེ་རྡོ་རྦོ་ ཐེན་འདེ་ ཐོང་། 2 ཁོ་ རྒྱུག་རྒེན་ ཤི་མོན་པི་ཏྲར་ རྡང་ ཞེན་ ལོབ་ཀྲུག་ ཡི་ཤུའི་ ཤེ་སྤ་ ཛེད་ཀན་འབེ་ཀ་ ཡོྃ་རྡེ་ ཟེར་, “ཁོང་རྒུ་ནི་ ཙོབོ་ སྤུར་ཧང་ནི་ ཕིང་འདེ་ ཁྱེར་རྡོག་ ཡང་ ཀ་རུ་ པོར་ ང་ཞ་ ཅང་ རྒྱུའི་མེད་།”

3 ཏེ་ནི་ པི་ཏྲར་ རྡང་ ཞེན་ ལོབ་ཀྲུག་པོ་ སྤུར་ཧང་ལ་ ཆ་ཅེ་ འགོ་ཟུག་། 4 ཁོང་རྒུན་ རྒྱུག་རྒེན་ ཆ་ཡོད་པེན་, འིན་ན་ ཞེན་ ལོབ་ཀྲུག་པོ་ པི་ཏྲ་རེ་སང་ འགྱོ་སྤ་ རྒྱུག་རྒེན་ ངུལ་ལ་ སྤུར་ཧང་ལ་ ལེཔ་། 5 ཁོའེ་ རྒུའི་རྡེ་ ལྟོའེ་, སྤུར་ལ་ སྲིལ་ཧ་ནེ་ རེ་རྒུན་ ཏེ་རྒ་ཀ་ པོར་རྡེ་ ཐོང་ འིན་ན་ ནང་ཀུ་ལ་ མ་སོང་། 6 ཏེ་ནི་ ཤི་མོན་པི་ཏྲར་ ཁོའེ་ རྒྱབ་ནི་ ཏེ་ཀ་ ལེབ་ཏེ་ ཁ་ཀྲང་ལ་ སྤུར་ཧང་ངེ་ ནང་ཀུ་ལ་ ཞུ་རྡེ་ སོང་། ཁོ་ལ་ ཏུ་རུ་ སྤུར་ལ་ སྲིལ་ཧ་ནེ་ རེ་རྒུན་ པོར་རྡེ་ ཐོང་, 7 ཡི་ཤུའི་ ཨུ་ལ་ ཧོན་འདེ་ ཡོ་ཀ་ནེ་ རེ་རྦོ་ ལྟབ་ཏེ་ ཞེན་ སྲིལ་ཧ་ནེ་ རེ་སང་ སོ་སོ་ལ་ པོར་རྡེ་ ཐོང་། 8 ཏེ་ནི་, ངུལ་ལ་ སྤུར་ཧང་ལ་ ལེབ་ཀ་ནེ་ ཞེན་ ལོབ་ཀྲུག་པོ་ ནང་ཀུ་ལ་ སོང་, ཏོ་རྒུན་ ཐོང་འདེ་ ཁོའེ་ ཏེཏ་པ་ ཅོའེ་། 9 ཁོང་རྒུན་ལ་ ཏ་རུང་ངེ་ལ་ ཏམ་པེ་ སུང་རབ་རྦེ་ན་ ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་ རྒོ་ཤེ་ ཁག་ཅེན་ འིན་ འབྲི་ཀན་འབོ་ ཧ་མ་ཀོ་ འིན་འབེན་། 10 ཏེ་ནི་ ལོབ་ཀྲུག་རྒུན་ ཁོ་རང་རྒུ་ནི་ ཁང་པ་ ལོག་ཏེ་ སོང་།

མར་ཡམ་ མག་འདལ་ལེན་ལ་ ཡི་ཤུ་ འཇལ་།

11 འིན་ན་ མར་ཡམ་ སྤུར་ཧང་ངེ་ ཕི་ལོག་ལ་ ངུའིན་ ཡོད་པེན་། ཁོའེ་ ངུའིན་ རྒུའི་རྡེ་ སྤུར་ཧང་ངེ་ ནང་ཀུ་ལ་ ལྟོའེ་། 12 ཁོ་ ཏུ་རུ་ ནམ་ཟ་ ཀར་སྤོ་ ཀོན་ཀ་ནེ་ ཕོ་ཉ་ ཉི་ ཡི་ཤུའི་ སྤུར་ པོར་སེ་ཀ་ ཅིག་པོ་ ཨུ་ ཆོག་ལ་ ཡང་ ཅིག་པོ་ ཞབ་ ཆོག་ལ་ འདེད་ཏེ་ ཐོང་།

13 ཕོ་ཉ་རྒུ་ནི་ མར་ཡམ་ལ་ མོལ་, “པོ་མོ་ ཁྱེ་རང་ ཅེ་ ངུ་ཡོད་?”

མར་ཡམ་མེ་ ལེན་ཏྃ་, “ཁོང་རྒུ་ནི་ ངེ་ ཙོབོ་ ཁྱེར་རྡོག་ ཡང་ ཀ་རུ་ ཁྱེར་ ང་ ཅང་ རྒྱུའི་མེད་།”

14 ཏོ་ ཟེར་ ཚར་རེ་རྡང་, ཁོ་ འགྱུར་རྦེ་ ཏུ་རུ་ ཡི་ཤུ་ ཞྃ་རྡེ་ འཇལ་, འིན་ན་ ཁོ་ ཡི་ཤུ་ འིན་ཀན་འབོ་ ངོ་ མ་ཤེ་། 15 ཡི་ཤུའི་ མོལ་, “པོ་མོ་ ཁྱེ་རང་ ཅེ་ ངུ་ཡོད་? ཁྱེ་རང་ངེ་ སུ་ ཙ་ལེ་ཡོད་?”

མར་ཡམ་མེ་ ཁོ་ ཚེ་འབད་ཀན་ འིན་ཀ་ སམ་འདེ་ ཁོང་ལ་ ཟེར་, “ཨ་ཅོ་, ཀལ་ཏེ་ ཉེ་རང་ངེ་ ཁོང་ངེ་ སྤུར་རྦོ་ ཁྱེར་རྡེ་ འིན་ནི་ ང་ ཤོད་རྡང་ ཀ་རུ་ པོར་རྡེ་ ཡོད་, ངེ་ ཁོང་ངེ་ སྤུར་རྦོ་ ཁྱེར་རེན་།”

16 ཡི་ཤུའི་ མོལ་, “མར་ཡམ་།”

ཏོ་ ཚོར་རེ་རྡང་, ཁོ་ འགྱུར་རྡེ་, ཡི་ཤུའི་ ཆོག་ལ་ ལྟོའེ་རྡེ་ ཨིབ་རི་པེ་ ཧད་རྡེ་ན་ ཟེར་, “རབ་འབུ་ནི་” ཡང་ནི་ ལོབ་རྦོན་ལེ་།

17 ཡི་ཤུའི་ ཁོ་, “ང་ མ་ཐམ་ ཅེ་ཟེར་ནི་ ང་ ཏ་རུང་ ང་རང་ངེ་ ཡབ་རྦེ་ཀ་ ལོག་ཏེ་ མ་ཆ་ འིན་། ཏེ་སང་ སོང་འདེ་ ངེ་ སྤུན་རྒུན་ལ་ ཟེར་, ‘ང་ནི་ ངེ་ ཡབ་ ཏང་ ཁྱི་ཞི་ ཡབ་, ངེ་ ཀོན་འཇོག་ ཏང་ ཁྱི་ཞི་ ཀོན་འཇོག་ས་ ལོག་ཏེ་ ཆ་ཡོད་།’”

18 མར་ཡམ་ མ་ཧ་འདལ་ལེན་མ་ སོང་འདེ་ ལོབ་ཀྲུག་རྒུན་ལ་ ཟེར་, “ང་ ཡི་ཤུ་ འཇལ་” ཡང་ ཁོའེ་ ཁོང་རྒུན་ལ་ ཡི་ཤུའི་ མོལ་ཧན་ ཚང་མ་ ཤེད་།

ལོབ་ཀྲུག་རྒུན་ལ་ ཡི་ཤུ་ འཇལ་།

19 ཟ་ཉི་མེ་ ཞག་རྒེ་ ཕི་ཏོག་, ལོབ་ཀྲུག་རྒུན་ ཛོམ་འདེ་ ཡ་ཧུ་འདཱ་པེ་ འུ་རྐྱོང་རྒུན་ལ་ འཇིའི་རྦེ་ རྒོ་ སྲན་ཀྲེ་ ཅུག་ཏེ་ འདེད་ཏེ་ ཡོད་ཟ་ནི་, ཧུན་མེད་ལ་ ཡི་ཤུ་ ཁོང་རྒུ་ནི་ རྐྱིལ་ལ་ རྐྱོད་ ཡང་ མོལ་, “ཀོན་འཇོག་རྒེ་ ཞིའི་རྡེ་ ཁྱི་ཞ་ ཉམ་པོ་ ལུའི་ཤིག་།” 20 ཏོ་ མོལ་རྡེ་ ཁོང་ངེ་ ཁོ་རང་ངེ་ ཆག་ ཏང་ སིབ་མེ་ མ་ཀ་རྒུན་ ཁོང་རྒུན་ལ་ ལྟན་ནེ་ ཛེད་། ཙོབོ་ འཇལ་ཤེ་ཀ་ནི་ ལོབ་ཀྲུག་རྒུན་ མ་སྲན་ཀྲེ་ ཐེད་། 21 ཡི་ཤུའི་ ཡང་ ཁོང་རྒུན་ལ་ མོལ་, “ཀོན་འཇོག་རྒེ་ ཞིའི་རྡེ་ ཁྱི་ཞ་ ཉམ་པོ་ ལུའི་ཤིག་, ཡབ་རྦེ་ ང་ ཀལ་ལེ་ ཛེད་ཀན་ ཙོག་སེ་ ངེ་ལ་ ཁྱི་ཞ་རྒུན་ལ་ ཀལ་ལེ་ཡོད་།” 22 ཏུ་ཟུག་ མོལ་རྡེ་ ཁོང་རྒུ་ནི་ཀ་ ཕུ་ སལ་ལེ་ ཛེད་ཏེ་ མོལ་, “ཏམ་པེ་ ཐུག་ཡིད་ ནེན་ཧེ་། 23 ཀལ་ཏེ་ སུ་ཞིག་རྒེ་ རྡིག་པ་ ཁྱི་ཞི་ ཤག་སྤ་ ཏང་ནི་ ཀོན་འཇོག་རྒེ་ ཁོང་རྒུ་ནི་ རྡིག་པ་ ཤག་སྤ་ ས་ལེན་, ཡང་ ཀལ་ཏེ་ སུ་ཞིག་རྒེ་ རྡིག་པ་ ཁྱི་ཞི་ ཤག་སྤ་ མ་ཏང་ནི་ ཀོན་འཇོག་རྒེ་ ཁོང་རྒུ་ནི་ རྡིག་པ་ ཤག་སྤ་ མི་སལ་།”

ཡི་ཤུ་ ཐོ་མཱ་ལ་ འཇལ་།

24 ལོབ་ཀྲུག་ ཅུག་ཉི་ ཕྲོ་ནི་ ཅིག་ ཐོ་མཱ་ ཀ་འབོ་ལ་ ཚག་ཀྲུག་ ཟེར་རྡེ་ཡོད་པེན་ ཡི་ཤུ་ རྐྱོད་རྡེ་ ཏུའི་ལ་ ཞེན་ ལོབ་ཀྲུག་རྒུ་ནི་ ཕྲོ་ མེད་པེན་། 25 ཞེན་ ལོབ་ཀྲུག་རྒུ་ནི་ ཁོ་ ཟེར་, “ང་ཞ་ ཙོབོ་ ཡི་ཤུ་ འཇལ་།”

འིན་ན་ ཐོ་མཱེ་ ཁོང་རྒུན་ལ་ ཟེར་, “ནམ་ཚུག་པ་ ངེ་ ཁོང་ངེ་ ཆག་རྒེ་ཀ་ ཟི་རུའི་ མལ་རྒུན་ མི་ཐོང་ ཡང་ ཏོ་རྒུ་ནི་ན་ ང་ན་ ཛུ་རྒུ་ མི་ཏང་, ཡང་ ང་ན་ ལག་པ་ ཁོང་ངེ་ སིབ་མེ་ན་ ཏྃ་རྡེ་ མ་ནི་ ང་ རྡེན་ཆེ་ཤེ་ མེ་རག་།”

26 ཞག་ རྒྱེད་རྡེ་ ལྟིང་ནི་ ཡི་ཤུའི་ ལོབ་ཀྲུག་རྒུན་ ཡང་ ཏེ་རྒ་ ཁང་པེ་ན་ ཛོམ་འདེ་ ཐོ་མཱ་རྡང་ ཁོང་རྒུན་ ཉམ་པོ་ ཡོད་པེན་། རྒོ་ སྲན་ཀྲེ་ ཅུག་ཏེ་ ཡོད་ན་ ཡི་ཤུ་ རྐྱོད་ཏེ་ ཁོང་རྒུ་ནི་ ཕྲོ་ ཞྃ་རྡེ་ མོལ་, “ཀོན་འཇོག་རྒེ་ ཞིའི་རྡེ་ ཁྱི་ཞ་ ཉམ་པོ་ ལུའི་ཤིག་” 27 ཏེ་ནི་ ཁོང་ངེ་ ཐོ་མཱ་ལ་ མོལ་, “ཁྱེ་རང་ངེ་ ཛུ་རྒུ་ ངེ་ ལག་པེ་ན་ ཙུག་ཏེ་ ལྟོའེ་, ཡང་ ལག་པ་ རྐྱང་འདེ་ ངེ་ སིབ་མེ་ མ་ཀེ་ན་ ཙུག་། ཐེ་ཚོམ་ ཕང་ཏེ་ ལོ་ཁྱེལ་ ཅོའེ་།”

28 ཐོ་མཱེ་ ཡི་ཤུ་ ཟེར་, “ངེ་ ཙོབོ་ ཡང་ ངེ་ ཀོན་འཇོག་ལེ་།”

29 ཡི་ཤུའི་ ཁོ་ མོལ་, “ཁྱེ་རང་ངེ་ ང་ ཐོང་ཅེ་ཀ་ནི་ ཏེཏ་པ་ ཅོའེ་། འིན་ན་ ང་ མ་ཐོང་ལ་ ངེ་ཀ་ ཏེཏ་པ་ ཅོ་ཀན་རྒུན་ ཅིན་ལབ་ཅེན་ ནོག་།”

30 ཡི་ཤུའི་ ལོབ་ཀྲུག་རྒུན་ ཉམ་པོ་ ཡོད་ཟ་ནི་ ཞེན་ ཧ་ལེ་ཤེ་ ཛེད་པ་ མང་པོ་ ཛེད་, ཀཱ་རྒུན་ འི་ སྤེ་ཆེ་ན་ འབྲི་རྡེ་ མེད་། 31 འིན་ན་ ཁྱི་ཞ་རྒུ་ནི་ ཡི་ཤུ་ ཁོ་རང་ ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ ཡང་ ཀོན་འཇོག་རྒེ་ སྲེ་ འིན་ཀན་འབེ་ཀ་ ཏེཏ་པ་ ཅོ་ཅེ་ཕི་ ངེ་ ཡུ་རྒུན་ འབྲི་རྡེ་ འིན་, ཡང་ ཏོ་ལ་ ཏེཏ་པ་ ཅོ་ཅེ་རྦེ་ ཁྱི་ཞ་རྒུན་ལ་ ཁོང་ངེ་ ཝང་ རྒྱུད་ཏེ་ ཐ་མེད་པེ་ མི་ཙེ་ ཐོབ་རྦེན་།