རོམ་པ་ 1

རོམ་མེ་ ཆོའེ་ཚོག་ལ་ པ་འུ་ལུའི་ ཆག་འབྲི་།

པ་འུ་ལུའི་ ཆོག་ནེ་ འཇུ་ ཞུའི་།

འི་ ཡི་རྒེ་རྦོ་ ང་ པ་འུ་ལུ་, མ་ཤི་ཀ་ ཡི་ཤུའི་ ཞབ་ཤི་, ཀོན་འཇོག་རྒེ་ འདམ་མེ་ ཛེད་ཀན་ ཧུ་ཚབ་, ནེ་ཚུལ་ ཟང་པོ་ ཤེད་རྡེ་ལ་ ལམ་ཅུག་རྒེ་ ཛེད་ཀ་ནེ་ ཆོག་ནི་ འིན་། 2 ཀོན་འཇོག་རྒེ་ འི་ ནེ་ཚུལ་ ཟང་པོ་ནི་ ཏུའི་ མང་པེ་ ངུལ་ལ་ ཁོ་རང་ངེ་ ལུང་རྟོན་པ་རྒུན་ རྒྱུད་ཏེ་, ཏམ་པེ་ སུང་རབ་རྦེ་ན་ ཞལ་ཆེཏ་ ཛེད་ཏེ་ འིན་འབེན་། 3 ནེ་ཚུལ་ ཟང་པོ་ ཁོ་རང་ངེ་ སྲེ་ ཧོར་ལ་ ནོག་། འཇིག་རྟེན་ནེ་ མི་ཙེ་ན་ ཁོང་, རྒྱ་སྤོ་ འདཱ་འབིད་རྡེ་ རྒྱུད་ནི་ རྐྱེ་ ཛེད་ཏེ་ 4 ཏམ་པེ་ ཐུག་ཡིད་རྡེ་ ཤེད་ རྒྱུད་ཏེ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་ ཁོང་ ཀོན་འཇོག་རྒེ་ སྲེ་ འིན་ཀན་འབོ་ ལྟན་ནེ་ ཛེད་། ཁོང་ནི་ ཡི་ཤུ་ མ་ཤི་ཀ་, ཨ་ཧོའེ་ ཙོབོ་ འིན་། 5 མ་ཤི་ཀ་ རྒྱུད་ཏེ་ ཀོན་འཇོག་རྒེ་ ང་ཞ་རྒུན་ལ་ ཧུ་ཚབ་རྦེ་ ཚུལ་ལ་, ཀང་ལུྃ་ས་ ཡ་ཧུ་འདཱ་པ་ མན་ཀན་རྒུན་ལ་ ཀོན་འཇོག་རྒེ་ ཅོའོ་ ཛེད་ཀན་རྒུན་ ཤེད་ཅེ་ ཝང་ཆ་ རྡང་ སི་ཝ་རྒུན་ སལ་ལེ་ ཛེད་། ཁོང་ངེ་ ཏུ་ཟུག་ ཅོའོ་ ཛེད་ཅེ་ རྒྱུ་ཚན་འབོ་, ཡ་ཧུ་འདཱ་པ་ མན་ཀན་རྒུ་ནི་ ཁོང་ངེ་ ཁ་ཉེན་ཅེ་ རྡང་ ཏེཏ་པ་ ཅོའེ་རྡེ་ ཁོང་ངེ་ ཚན་ལ་ སི་ཝ་ ཁྱོང་ཅེའོ་ ནོག་།

6 ཡང་ རོམ་པ་ ཁྱི་ཞ་རྒུན་ ཡི་ཤུ་ མ་ཤི་ཀེ་ ཁོ་རང་ངེ་ མི་ འདམ་མེ་ ཛེད་ཀ་ནེ་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ནོག་། 7 ངེ་, ཀོན་འཇོག་རྒེ་ ཤེ་སྤ་ ཅོའོ་ ཛེད་ཏེ་ ཁོང་ངེ་ མི་ ཏམ་པ་རྒུན་ འགྱུར་ཤེ་ལ་ འབོ་ ཛེད་ཀ་ནེ་ ཁྱི་ཞ་ རོམ་པ་ ཚང་མ་ལ་ འབྲི་ཡོད་། ཀོན་འཇོག་ ཨ་ཧོ་རྒུ་ནི་ ཡབ་ རྡང་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་ ཏང་ སེམ་རྡེ་ ཁྱི་ཞ་རྒུན་ལ་ སལ་ལེ་ ཛེད་ཤིག་།

ཀོན་འཇོག་རྒེ་ ནེ་ཚུལ་ ཟང་པོ་།

8 ཚང་མེ་སང་ ངུལ་ལ་, ངེ་ ཁྱི་ཞ་ ཚང་མེ་ཕི་ ཡི་ཤུ་ མ་ཤི་ཀ་ རྒྱུད་ཏེ་ ཀོན་འཇོག་ལ་ ཐུག་ཞེ་ཆེ་ ཞུའིན་, ཅེ་ཟེར་ནི་ མ་ཤི་ཀེ་ན་ ཡོ་ཀ་ནེ་ ཁྱི་ཞི་ ཏེཏ་པེ་ ཧོར་ལ་ འཇིག་རྟེན་ སོན་ཏེ་ མི་རྒུ་ནི་ སྤེ་ར་ ཏང་འདུག་། 9 ངེ་ མོ་ལམ་ ཞུ་ཟ་ནི་ ཁྱི་ཞ་རྒུན་ ཏུའི་རྒྱུན་ འི་ཏུ་ ཅོའེན་, ཏོ་རྦེ་ སྤང་པོ་ ཀོན་འཇོག་ འིན་, ཁོང་ངེ་ སྲེ་ ནེ་ཚུལ་ ཟང་པོ་ ཕེལ་ཅུག་ཅེ་ལ་ ངེ་ ང་རང་ངེ་ ཉིང་ངེ་ ཐིལ་ནི་ ཞབ་རྟོག་ ཞུ་ཡོད་།

10 ངེ་ མོ་ལམ་ ཚང་མེ་ན་, ཀལ་ཏེ་ ཀོན་འཇོག་ ཐུག་རྒོང་ངེ་ཡོད་ནི་, ང་ ཁྱི་ཞ་རྒུན་ ཉམ་པོ་ ཐུག་ཅེ་ལ་ ཧབ་ཤིག་ སལ་ ཟེ་རེན་ ཞུ་ཝ་ པུ་ལེ་ཡོད་། 11 ཙོབོ་རྡེ་ན་ ཤེད་ཅེན་ འགྱུར་ཤེ་ལ་ ཡ་ཏོ་ ཅོ་ཀ་ནེ་ ཐུག་ཡིད་རྡེ་ ཁྱུད་རིག་ ཁྱི་ཞ་རྒུན་ལ་ ཁྱོང་ཅེ་ཕི་ ང་ ཁྱི་ཞ་ ཉམ་པོ་ ཐུག་ཅེ་ལ་ ཏེཏ་པ་ སྲན་ཀྲེ་ རག་། 12 ཏོ་རྦེ་, ངེ་ ཁྱི་ཞ་རྒུན་ལ་, ཡང་ ཁྱི་ཞི་ ང་ ཏེཏ་པེ་ན་ སེམ་རུའི་ རྐྱེ་ཅུག་ ཉེན་ནེན་།

13 ཤེ་སྤ་ སྤུན་རྒུན་, ངེ་ ལེན་ མང་པོ་ ཁྱི་ཞ་རྒུན་ལ་ ཐུག་ཅེ་ ཐབ་ ཅོའེ་རྦེན་, འིན་ན་ ཏག་ས་ཚུག་པ་ རྒག་ཏེ་ པོར་ཧན་འབོ་ ཁྱི་ཞ་རྒུན་ལ་ རྒྱུའི་ ཆ་རྒོའེ་ ས་མེ་རག་། ང་ ཁྱི་ཞ་རྒུ་ནི་ ཕྲོ་ ལེ་ཧ་ ཅོ་ཅེ་ རྡང་ ཐུག་ཡིད་རྡེ་ འབྲེ་རྦུ་རྒུན་ ལྟ་ཅེ་ འདོད་པ་ རག་, ཀ་ཟུག་ ངེ་ ཞེན་ཡང་ ཡ་ཧུ་འདཱ་པ་ མན་ཀན་རྒུ་ནི་ ཕྲོ་ ཐོང་། 14 འགི་རིག་རྒེ་ ལབ་ཞེ་ན་ ཡོན་ཏེན་ ཡོ་ཀན་ ཡང་ མེ་ཀན་ ཉ་ཧ་ ཡང་ ཤེ་རབ་ཅེན་ འདང་ ཧ་འགྲང་ ཉ་ཧ་, ནེ་ཚུལ་ ཟང་པོ་ ཤེད་ཅེ་ ཁག་ ང་ ཕོག་ཏེ་ འིན་། 15 ཏེ་ཀ་ནི་, ཁྱི་ཞ་ རོམ་མེ་ རྒྱལ་སེ་ན་ ཡོ་ཀན་རྒུན་ལ་ ནེ་ཚུལ་ ཟང་པོ་ ཤེད་ཅེ་ལ་ ང་ རིྃ་རྡེ་རག་།

16 འི་ ནེ་ཚུལ་ ཟང་པོ་ལ་ ང་ ཁྲེལ་ལེ་ མེ་རག་, ཅེ་ཟེར་ནི་ ཡུ་ ཏེཏ་པ་ཅེན་ནེ་ མི་ཚང་མ་ རྐྱོབ་ཉེན་ཅེ་ ཀོན་འཇོག་རྒེ་ ཤུག་པོ་ ནོག་, ཏང་པོ་ ཡ་ཧུ་འདཱ་པ་རྒུན་ལ་ ཏེ་ནི་ ཡ་ཧུ་འདཱ་པ་ མན་ཀན་རྒུན་ལ་། 17 འི་ ནེ་ཚུལ་ ཟང་པོ་རྦེ་ ཨ་ཧོ་ ཀོན་འཇོག་རྒེ་ ཧུ་འདུན་ལ་ ཀ་ཟུག་རྒེ་ ཀྲང་པོ་ འགྱུར་ཤེའོ་ ལྟན་ནེ་ནོག་, ཀའོ་ འགོ་ཟུག་ནི་ འཇུག་ཚུག་པ་ ཏེཏ་པ་ རྒྱུད་ཏེ་ ཀྲུཔ་རྦེ་ནོག་། ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ ཡོད་ཏེ་ ནོག་, “ཏེཏ་པ་ རྒྱུད་ཏེ་ མི་ ཀྲང་པོ་ཞིག་ལ་ མི་ཙེ་ ཐོབ་རྦེ་ནོག་།”

རྡིག་པེ་ཀ་ ཀོན་འཇོག་རྒེ་ ཐུག་སྲོ་།

18 འིན་ན་ ཁོ་རང་རྒུ་ནི་ ངན་པེ་ ལེ་ཧ་རྒུ་ནི་ རྒྱབ་ལ་, རྡེན་འབའ་འབོ་ ཀབ་ཏེ་ པོར་ཧན་ནེ་ མི་, ངན་པ་ རྡང་ རྡིག་ཅེན་ ཚང་མེ་ རྒྱཔ་འགལ་ལ་, ཀོན་འཇོག་རྒེ་ ཐུག་སྲོ་ རྡེ་བ་ཅན་ནེ་ ལྟན་ནེ་ ཛེ་རྡེན་ ནོག་། 19 ཏོ་རྒུན་ལ་ ཀོན་འཇོག་རྒེ་ རྡེན་འབེ་ ཧོར་ལ་ རྒྱུའི་ཡོད་ཏེ་ ནོག་, ཅེ་ཟེར་ནི་ ཁོང་ངེ་ ཏོ་རྒུན་ ཁོང་རྒུན་ལ་ སལ་སྤོ་ ཛེད་ཏེ་ ལྟན་ནེ་ ཛེད་ཏེ་ འིན་འབེན་། 20 འཇིག་རྟེན་ ཛེད་པེ་ནི་ཕ་ལ་ མི་རྒུ་ནི་, ཀོན་འཇོག་རྒེ་ ཛེད་ཀན་ ཚང་མ་ རྒྱུད་ཏེ་, སལ་སྤོ་ ཅོའེ་རྡེ་, མ་ཐོང་ཀ་ནེ་ ཁོང་ངེ་ ཁྱུད་རྒུན་ ཐོང་འདེ་ ནོག་, ཀའོ་རྒུན་ ཁོང་ངེ་ ཐ་མེད་པེ་ ཝང་ འདང་ ཀོན་འཇོག་རྒེ་ ཤོད་པ་རྒུན་ ནོག་། ཏེ་རྒ་རྦེ་ཕི་ལ་ ཁོང་རྒུ་ནི་ ཅང་ རྐྱོན་ ཅོ་ མི་ཉེན་།

21 ཏོ་རྒུ་ནི་ ཀོན་འཇོག་ ཤེ་རྡེན་ ཡོད་ཏེ་ལ་, ཁོང་ལ་ འོའེ་སྤེ་ སི་ཝ་ མ་ཏྃ་ ཡང་ ཐུག་ཞེ་ཆེ་ལ་ མ་ཞུའི་། འིན་ན་ ཀོན་འཇོག་ ཀ་ཟུག་ཤིག་ འིན་, ཏེ་ ཧོར་ལ་ ཧ་འགྲང་རྒུན་ ཙོག་སེ་ སམ་བ་ ཏང་ཅེ་ འགོ་ཟུག་, ཀ་རྦེ་ ཅོའེ་རྡེ་ ཏོ་རྒུན་ ལྡེད་པ་ མེ་ཀན་ ཙོག་སེ་ འགྱུར་རྡེ་ ལག་མོ་ སམ་བ་ ཏང་ མ་ཉེན་། 22 ཁོང་རྒུ་ནི་ ཁོ་རང་རྒུན་ ཁྲམ་པ་ཅེན་ འིན་ ཟེར་ན་, ཏོ་རྒུན་ པུང་ངུ་ ཙོག་སེ་ འགྱུར་རྡེ་ ནོག་། 23 ཡང་ ཁོང་རྒུ་ནི་ ཟི་ཞིད་ཅེན་ འདང་ ཏུའི་རྒྱུན་ སོན་པོ་ འིན་ཀ་ནེ་ ཀོན་འཇོག་ལ་ མ་ཅོལ་ལེ་ ཤི་ཅེ་ཅེན་ནེ་ མི་, ཡང་ ཅི་སྤ་, ཡང་ སེམ་ཅེན་ ཡ་ ས་འཇར་རེ་ འབུ་ཙིག་རྒུ་ནི་ ཟུའི་རྡེ་ན་ ཅོ་ཀ་ནེ་ ཧུ་འདྲ་ ཅོལ་ལེ་ནོག་།

24 ཏོ་རྦེ་ཕི་ལ་ ཀོན་འཇོག་རྒེ་ ཏེ་ མི་རྒུན་ ཁོ་རང་རྒུ་ནི་ རྡིག་པེ་ འདོད་པ་ ནང་ཞིན་ ཅོ་ཅེ་ལ་ ཕྃ་ངེ་ ཛེད་། ཏོ་རྦེ་ ཅོའེ་རྡེ་ ཁོང་རྒུ་ནི་ ཁོ་རང་ ཅིག་ ཏང་ ཅིག་རྒེ་ ཟུྃ་སྤོ་ ཉམ་པོ་ ཁམ་ལོག་ ཏང་ ཀྲིཔ་ ལེ་ཧ་རྒུན་ ཅོའེ་། 25 ཁོང་རྒུ་ནི་ ཀོན་འཇོག་རྒེ་ རྡེན་འབེ་ ཚབ་ལ་ ཟུའི་མེ་ ལབ་ཞ་རྒུན་ ཀོལ་, ཡང་ འཇིག་རྟེན་ ཛེད་ཀན་ ཀོན་འཇོག་ ཀ་འབོ་ལ་ ཏུའི་རྒྱུན་ རྟོད་པེ་ འོའེ་སྤ་ འིན་, ཨ་མེན་། ཁོང་ལ་ མ་ཅོལ་ལེ་ ཁོང་ངེ་ ཚབ་ལ་ ཁོང་ངེ་ ཛེད་ཀན་རྒུན་ལ་ ཅོལ་ཤེ་ རྡང་ ཞབ་རྟོག་ ཞུའི་། 26 ཏེ་རྒ་རྦེ་ཕི་ལ་ ཀོན་འཇོག་རྒེ་ ཏོ་རྒུན་ ཁོ་རང་རྒུ་ནི་ ཁྲེལ་མེད་རྡེ་ འདོད་པ་རྒུན་ ཅོ་ཅེ་ལ་ ཕང་ངེ་ ཛེད་། པོ་མོ་རྒུ་ནི་ལ་ རང་ཞིན་ནེ་ ལུའི་འབྲེལ་ལེ་ ཚབ་ལ་ ཁོ་རང་ ཅིག་ ཏང་ ཅིག་རྒེ་ པར་ལ་ ལུའི་འབྲེལ་རྒུན་ པོར་། 27 ཏེ་རྒ་ ཙོག་སེ་ པུ་ཙ་རྒུ་ནི་ལ་ རང་ཞིན་ནེ་ ལུའི་འབྲེལ་རྦོ་ ཕྃ་རྡེ་, ཁོ་རང་ པུ་ཙ་རྒུ་ནི་ པར་ལ་ ལུའི་འབྲེལ་ལེ་ འདོད་པ་ མང་པོ་ ཅོའེ་། ཡང་ པུ་ཙ་རྒུ་ནི་ ཞེན་ པུ་ཙ་ ཉམ་པོ་ ཁྲེལ་མེད་རྡེ་ ལེ་ཧ་ ཅོའེ་རྦེ་, ཁོང་རྒུན་ལ་ ཁོ་རང་རྒུ་ནི་ ཟུྃ་སྤེ་ན་ ཏེ་ ལེ་ངན་འབེ་ ཆེད་པ་ ཕོག་།

28 ཁོང་རྒུ་ནི་ ཀོན་འཇོག་ ཤེ་རྒོ་ཤེའོ་ ཕན་མི་ཐོག་ཤིག་ ནོག་ སམ་ཅེ་ཀ་ནེ་, ཀོན་འཇོག་རྒེ་ ཏོ་རྒུན་ སམ་བ་མེ་ཀན་རྒུན་ ཙོག་སེ་ སམ་བ་ ཏང་ཅེ་ལ་ ཕང་ངེ་ ཛེད་། ཏུ་ཟུག་ ཅོའོ་ ཛེད་ཅེ་རྦེ་, ཏོ་རྒུ་ནི་ ཅོ་ མི་རྒོ་ཤེ་ ལེ་ངན་རྒུན་ ཅོའེ་། 29 ཏོ་རྒུ་ནི་ མི་ཙེ་རྦོ་ ངན་པ་ ཚང་མེ་ ཀང་, སྤེར་ན་ ངན་སེམ་ཅེན་, ནབ་སེམ་ཅེན་, ཞེན་མ་ སོག་པོ་ ཅོ་ཀན་, སེམ་མེ་ན་ ཚིག་ཀན་, མི་སེད་, ཁྲུག་པ་ ཏང་ཅེ་, འགོ་ཧོར་ཤེ་, ནར་རྐྱི་ ཞེན་མ་རྒུན་ལ་ སེམ་མེ་ན་ ཕོག་ཅུག་ཅེ་ རྡང་ སྤེར་མེན་ ཏང་ཅེ་། 30 ཏོ་ མི་རྒུན་ ཞེན་མ་རྒུ་ནི་ ཧོར་ལ་ སྤེ་ར་ སོག་པོ་ ཟེར་ཧན་, ཀོན་འཇོག་ལ་ སོག་པོ་ ཅོ་ཀན་, ཞེན་ལ་ སི་ཝ་ མི་ཅོ་ཀན་, ཕོ་སོ་ཅེན་ འདང་ རང་རྟོད་ ཏང་ཀན་ ནོག་། ཏོ་རྒུན་ རྡིག་པ་ ཅོ་ཅེ་ ལམ་ སོ་མེ་ ཧོར་ལ་ སམ་བ་ ཏང་ཀན་ འདང་ ཁོ་རང་རྒུ་ནི་ ཕ་མེ་ ཁ་ མི་ཉེན་ཀན་, 31 ཧ་ཀོ་ཉིན་ མེ་ཀན་, ཁ་ཅེད་ ཅག་ཀན་, ཤེ་སྤ་ རྡང་ ཉིང་ཞེ་ མེ་ཀན་རྒུན་ ནོག་། 32 ཀོན་འཇོག་རྒེ་ ཀཱ་རྒྱ་ ནང་ཞིན་ ཏུ་ཟུག་ ལེ་ཧ་ ཅོ་ཀན་རྒུན་ལ་ ཤི་རྒོ་ཤེ་ འོའེ་སྤ་ འིན་ཀན་འབོ་ རྒྱུའི་ཡོད་ཏེ་ལ་, ཏེ་རྒ་ ལེ་ངན་རྒུན་ ཅོ་ཅེ་ མ་ཚེད་, ཞེན་མ་ ཏོ་ཙོག་ ཅོ་ཀན་རྒུན་ལ་ རྟོད་པ་ ཏང་འདུག་།