རྡིག་པ་ལ་ ཀོན་འཇོག་རྒེ་ ཁྲིམ་ཅེད་།
2
ཁྱི་ཞི་ རྡིག་པ་ ཅོ་ཀ་ནེ་ མི་རྒུན་ལ་ ཉེད་ཀལ་ ཅོ་ ཉེན་ནེ་ནོག་ ས་མེ་ནོག་, འིན་ན་ ཁྱི་ཞ་ལ་ ཏོ་རྒུན་ ཙོག་སེ་ རྡིག་ཅེན་ ནོག་, ཡང་ ཀོན་འཇོག་རྒེ་ ཁྲིམ་ཅེད་ནི་ ཐར་མི་ཉེན་། ཁྱི་ཞི་ ཞེན་མ་རྒུན་ལ་ ཁྲིམ་ཅེད་ ཏང་ཟ་ནི་ ཁྱི་ཞི་ ཁྱི་ཞ་རང་ལ་ ཉེད་ཀལ་ ཅོའེ་རྡེ་ ནོག་, ཅེ་ཟེར་ནི་ ཁྱི་ཞེ་ལ་ ཏེ་རྒ་ ཙོག་སེ་ ལེ་ཧ་ ཅོའེ་རྡེ་ ནོག་། 2 ཀོན་འཇོག་རྒེ་ ཀྲང་པོ་ ཁྲིམ་ཅེད་རྡེ་ན་, ཏོ་ཙོག་སེ་ ལེ་ཧ་ ཅོ་ཀན་རྒུན་ལ་ ཆེད་པ་ སལ་ལེ་ ཛེད་ཅེའོ་ ཨ་ཧོ་རྒུན་ལ་ རྒྱུའི་ནོག་། 3 ཞེན་མ་ ཏུ་ཟུག་ ལེ་ཧ་ ཅོ་ཀན་རྒུན་ལ་ ཉེད་ཀལ་ ཅོ་ཀན་, ཁྱི་ཞ་རྒུ་ནི་ཀ་ ཀོན་འཇོག་རྒེ་ ཁྲིམ་ཅེད་ མི་པབ་ ཅི་ ས་མེ་རག་, ནམ་ ཁྱི་ཞེ་ལ་ ཏེ་རྒ་ ཙོག་སེ་ ལེ་ཧ་ ཅོའེན་? 4 ཀོན་འཇོག་པོ་, ཁྱི་ཞ་རྒུན་ ཉམ་པོ་ ཙམ་ཤིག་ ཀ་ཀྲིན་ཅེན་, ཟོད་པེ་སེམ་ཅེན་ འདང་ ཟོད་པ་ཅེན་ འིན་ཀན་འབོ་ ཁྱི་ཞ་རྒུན་ལ་ ཐོང་ངེ་ མི་འདུག་རྒེ་? ཁོང་ངེ་ ཀ་ཀྲིན་ནེ་ རྒྱུ་ཚན་འབོ་, ཁྱི་ཞ་ རྡིག་པ་རྒུ་ནི་ཀ་ནི་ འགྱུར་རྡེ་ འགྱོད་པ་ ཅོ་ཅེ་ལ་ ཁྲིད་ཅེའོ་, ཁྱི་ཞ་རྒུན་ལ་ ཧ་ཀོ་ མེ་རག་རྒེ་?5 འིན་ན་ ཁྱི་ཞ་ ཀྱོང་པོ་ རྡང་ ཁྱི་ཞ་རང་ངེ་ རྡིག་པེ་ཀ་ནི་ སེམ་འགྱུར་ མི་ཅོ་ཅེའོ་, ཁྱི་ཞི་ ཁྱི་ཞ་རང་ངེ་ཀ་ འཇི་ནང་ཅེན་ནེ་ ཆེད་པ་རྒུན་ སག་རྒེན་ ནོག་། ཀོན་འཇོག་རྒེ་ ཐུག་སྲོའེ་ ཞག་པོ་ ལེབ་རྦེན་ ནམ་ ཀོན་འཇོག་རྒེ་ ཀྲང་པེ་ ཁྲིམ་ཅེད་པོ་ ངོ་ནེན་། 6 ཀོན་འཇོག་རྒེ་ “མི་ རེ་རེ་ལ་ རང་རང་ངེ་ ལེ་ཧ་ ནང་ཞིན་ ཁྲིམ་ཅེད་ ཛེ་རྡེན་།” 7 ཀོན་འཇོག་རྒེ་ སལ་ལེ་ ཛེད་ཅེ་ སྤལ་, སི་ཝ་ རྡང་ མ་ནི་ མི་ཤི་ཅེ་ ཟུྃ་སྤོ་, ཟོད་པ་ ཉམ་པོ་ ལེ་ཧ་ ཟང་པོ་ ཅོའེན་, ཙལ་ཧན་རྒུན་ལ་ ཁོང་ངེ་ ཐ་མེད་པེ་ མི་ཙེའོ་ སལ་ལེ་ ཛེ་རྡེན་། 8 འིན་ན་ རང་ངེ་ཕི་ མི་ཙེ་ པུད་རྡེན་, རྡེན་འབའ་འབོ་ ཕྃ་རྡེ་, ངན་པེ་ རྒྱབ་ནི་ འགྲུལ་ཧན་རྒུན་ལ་, ཀོན་འཇོག་རྒེ་ ཐུག་སྲོ་ རྡང་ ཆེད་པ་རྒུན་ ཕོག་རྒེན་། 9 ངན་པ་ ཅོའེན་ འདེད་ཀན་རྒུན་ལ་, ནག་ ཏང་ རྡུ་ངལ་ལེ་ ཆེད་པ་ ཕོག་རྒེན་, ངུལ་ལ་ ཡ་ཧུ་འདཱ་པ་རྒུན་ལ་ ཏེ་ལྟིང་ནི་ ཡ་ཧུ་འདཱ་པ་ མན་ཀན་རྒུན་ལ་། 10 འིན་ན་ ཟང་པོ་ ཅོ་ཀན་ ཚང་མ་ལ་ ཀོན་འཇོག་རྒེ་ ཆོག་ནི་ སྤལ་, སི་ཝ་ རྡང་ ཞིའི་རྡེ་རྒུན་ ཐོབ་རྦེན་, ངུལ་ལ་ ཡ་ཧུ་འདཱ་པ་རྒུན་ལ་ ཏེ་ལྟིང་ནི་ ཡ་ཧུ་འདཱ་པ་ མན་ཀན་རྒུན་ལ་, 11 ཅེ་ཟེར་ནི་ ཀོན་འཇོག་རྒེ་ སུ་ལ་ ཡ་པེ་ ཅོའོ་ ཛེད་རྡེ་ མག་།
12 མོ་ཤེ་ ཁྲིམ་མེ་ ཡོག་ལ་ མེ་ཀན་ ཡ་ཧུ་འདཱ་པ་ མན་ཀན་ རྡིག་པ་ ཅོ་ཀན་ ཚང་མ་ ཀོན་འཇོག་རྒེ་ ཆེད་པ་ སལ་ལེ་ ཛེ་རྡེན་། ཡང་ མོ་ཤེ་ ཁྲིམ་མེ་ ཡོག་ལ་ ཡོ་ཀན་ ཡ་ཧུ་འདཱ་པ་ རྡིག་པ་ ཅོ་ཀན་ ཚང་མ་ལ་ ཁྲིམ་ ནང་ཞིན་ ཁོང་ངེ་ ཁྲིམ་ཅེད་ སལ་ལེ་ ཛེ་རྡེན་། 13 ཁྲིམ་ ཉེན་ཅེ་ ཅིག་པོ་ མན་, ཏེ་རྒུ་ནི་ཀ་ ལག་ལེན་ ཅོ་ཀན་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེའེ་ ཛེ་རྡེན་། 14 ཀོན་འཇོག་རྒེ་ ཁྲིམ་ མེ་ཀ་ནེ་ ཡ་ཧུ་འདཱ་པ་ མན་ཀན་རྒུ་ནི་ རང་ཞིན་ལ་ ཁྲིམ་ ནང་ཞིན་ རྒོའེ་ཤེ་ ལེ་ཧ་རྒུན་ ཅོ་ཟ་ནི་, ཞེན་ ཁོང་རྒུན་ལ་ ཀོན་འཇོག་རྒེ་ ཆོག་ནི་ ཁྲིམ་འབོ་ མ་ཐོབ་རྦེ་ འིན་ན་, ཏོ་རྒུན་, ཁོང་རྒུ་ནི་ཕི་ ཁྲིམ་ཞིག་ ནོག་། 15 ཏོ་རྒུ་ནི་ ཉིང་ངེ་ན་ ཀོན་འཇོག་རྒེ་ ཁྲིམ་པོ་ འབྲི་རྡེ་ ཡོ་ཀན་ ལྟན་ནེ་ནོག་, ཅེ་ཟེར་ནི་ ཁོ་རང་རྒུ་ནི་ སེམ་ འདང་ སམ་ཚུལ་རྒུ་ནི་ ཁོང་རྒུན་ལ་ ཉེད་ཀལ་ ཡང་ རྐྱོན་མེད་ འིན་ཀན་འབོ་ ལྟན་ནེ་ནོག་། 16 ཡང་ ངེ་ ཤེད་ཀ་ནེ་ ནེ་ཚུལ་ ཟང་པོ་ ནང་ཞིན་, ཏེ་ ཞག་པོ་ ལེབ་རྦེན་, ནམ་ ཀོན་འཇོག་རྒེ་ ཡི་ཤུ་ མ་ཤི་ཀ་ རྒྱུད་ཏེ་ མི་ཚང་མེ་, སང་སྤེ་རེ་ སམ་ཚུལ་རྒུན་ལ་ ཁྲིམ་ཅེད་ ཛེ་རྡེན་།
ཡ་ཧུ་འདཱ་པ་རྒུན་ འདང་ ཁྲིམ་།
17 ཁྱི་ཞ་རང་ལ་ ཡ་ཧུ་འདཱ་པ་ ཟེར་ཧན་རྒུ་ནི་, ཀོན་འཇོག་རྒེ་ ཁྲིམ་འབེ་ཀ་ རྡེན་ཆེ་ཤེ་ ཅོའེ་རྡེ་ ཀོན་འཇོག་ ཉམ་པོ་ མིག་ས་ལེ་ འབྲེལ་ཡོད་ ཟེར་རྡེ་ ཕོ་སོ་ ཅོ་ནོག་། 18 ཁོང་ངེ་ ཐུག་འདོད་རྒུན་ ཡང་ འོའེ་སྤ་ འིན་ཀན་འབོ་, ཁྱི་ཞ་རྒུན་ལ་ རྒྱུའི་ཡོད་ ཟེར་རྡེ་ ཕོ་སོ་ ཅོ་ནོག་, ཅེ་ཟེར་ནི་ ཁྱི་ཞ་རྒུན་ལ་ ཁོང་ངེ་ ཁྲིམ་པོ་ ལབ་ཏེ་ ནོག་། 19 ཁྱི་ཞི་ ནེན་ཏེན་ལ་ ཁྱི་ཞ་ ཞ་ར་རྒུན་ལ་ ལམ་ལྟན་ཀན་, མུན་ཀྲག་རྒེ་ན་ ཡོ་ཀན་རྒུན་ལ་ འོད་ འིན་, ས་མེ་ནོག་། 20 ཁྱི་ཞི་ སམ་བ་ མེ་ཀན་ པུང་ངུ་རྒུན་ལ་ ལབ་ཞ་ ཏང་ཀན་, ཕྲུ་རྒུ་ ཙོག་སེ་ ཅོ་ཀན་རྒུ་ནི་ཕི་ རྒྱར་རྒེན་ འིན་ ས་མེ་ནོག་, ཅེ་ཟེར་ནི་ ཁྱི་ཞ་རྒུ་ནི་ མོ་ཤེ་རྡེ་ ཁྲིམ་པོ་ རྒྱུད་ཏེ་ ཁྱི་ཞ་རྒུན་ལ་ ཡོན་ཏེན་ འདང་ ཀྲང་པོ་ ཆ་ཚང་ ཡོད་ཏེ་ འིན་ ས་མེ་ནོག་།
21 ཏེ་ནི་ ཞན་མ་ ལབ་ཀན་, ཁྱི་ཞ་རྒུ་ནི་, ཁྱི་ཞ་རང་ངེ་ ལབ་ཞ་རྒུན་ ཅེ་ ཉེན་ནེ་མེད་? ཞེན་མ་རྒུན་ལ་ ཧུ་མ་ཧུ་ ཟེར་རྡེ་ ལབ་ཏུག་, ཅེ་ ཁྱི་ཞ་རང་རྒུ་ནི་ ཧུ་ཡོད་? 22 ཁྱི་ཞི་ ཟེ་རེ་ནོག་, མི་རྒུ་ནི་ རང་ངེ་ ཞི་མེད་ མན་པ་ ཞེན་མ་ ཉམ་པོ་ ལུའི་འབྲེལ་ པོར་ མ་རྒོའེ་, ཅེ་ ཁྱི་ཞ་རྒུ་ནི་ ཞེན་མ་ ཉམ་པོ་ ལུའི་འབྲེལ་ པོ་རེ་ཡོད་? ཁྱི་ཞ་རྒུ་ནི་ ཧུ་འདྲ་ ཅོལ་ཤེ་ལ་ སོག་པོ་ ཅོ་ནོག་, ཅེ་ ཁྱི་ཞི་ ཏེ་ ཧུ་འདྲ་ པོར་སེ་ ཆོད་ཀང་རྒུ་ནི་ ཧུ་ཡོད་རྡེ་? 23 ཁྲིམ་ ཤེ་རྡེ་ཡོད་ ཟེར་རྡེ་ མྃ་རྡེ་ ཕོ་སོ་ ཅོ་ཀན་ ཁྱི་ཞ་རྒུ་ནི་ ཁྲིམ་འབོ་ ཅག་ཅེ་ རྒྱུད་ཏེ་ ཀོན་འཇོག་ལ་ སི་ཝ་ མ་ཅོ་ལ་ ནོག་། 24 ཏམ་པེ་ སུང་རབ་རྦེ་ན་, “ཁྱི་ཞི་ ཅོའེ་རྡེ་ ཡ་ཧུ་འདཱ་པ་ མན་ཀན་རྒུ་ནི་ ཀོན་འཇོག་ལ་ ཏེཏ་ལོག་ ཞུའི་རྡེ་ ནོག་” མོལ་རྡེ་ ཡོ་ཀན་འབོ་ལ་ ང་ ཧ་ལེ་རྡེ་ མེ་རག་།
25 ཡ་ཧུ་འདཱ་པེ་ ལུག་སྲོལ་ ནང་ཞིན་ འགོཔ་ཅེཏ་ ཅོ་ཅེ་རྦེ་ ཕན་ཏོག་ མེད་ཏེ་ ནོག་ ནམ་ཚུག་པ་ ཀོན་འཇོག་རྒེ་ ཁྲིམ་རྒུན་ ཁ་མི་ཉེན་། འིན་ན་ ཀལ་ཏེ་ ཁྱི་ཞི་ ཁྲིམ་པོ་ ཅག་རྒེ་ཡོད་ནི་, ཁྱི་ཞ་ རྡང་ འགོཔ་ཅེཏ་ མ་ཅོ་ཀ་ནེ་ ཡ་ཧུ་འདཱ་པ་ མན་ཀན་རྒུ་ནི་ པར་ལ་ ཅང་ ཁྱེད་ མེད་རྡེ་ ནོག་། 26 ཡ་ཧུ་འདཱ་པ་ མན་ཀན་རྒུན་ འགོཔ་ཅེཏ་ མ་ཅོའེ་རྦེན་། ཡིན་ནང་ ཀལ་ཏེ་ ཁོང་རྒུན་ ཁྲིམ་འབོ་ ཁ་ཉེན་ནེ་ཡོད་ནི་, ཀོན་འཇོག་ ནེན་ཏེན་ལ་ ཁོང་རྒུན་ ཁོ་རང་ངེ་ མི་རྒུན་ འིན་ ཐེའེ་ ནོག་། 27 ནེན་ཏེན་ལ་, འགོཔ་ཅེཏ་ མ་ཅོ་ཀན་ ཡ་ཧུ་འདཱ་པ་ མན་ཀན་རྒུ་ནི་, ཁྲིམ་ལ་ ཁ་ཉེན་ཅེ་རྦེ་, ཁྱི་ཞ་རྒུན་ལ་ ཉེད་ཀལ་ ཅོའེ་རྡེ་ ནོག་, ཀའོ་རྒུན་ལ་ ཁྲིམ་ ཐོབ་, འིན་ན་ ཁ་ མ་ཉེན་།
28 ཁྱི་ཞ་ ཟུྃ་སྤོ་ ཐོག་ནི་ ཡ་ཧུ་འདཱ་པེ་ ཕ་མ་ནེ་ རྐྱེ་རྡེ་ འིན་ཅེ་ ཡང་, ཁྱི་ཞ་རྒུན་ལ་ ཡ་ཧུ་འདཱ་པེ་ ལུག་སྲོལ་ ནང་ཞིན་ འགོཔ་ཅེཏ་ ཅོ་ཅེ་རྦེ་, ཁྱི་ཞ་རྒུན་ རྡེན་འབེ་ ཡ་ཧུ་འདཱ་པ་ རིག་ འགྱུར་རེ་ མག་། 29 འིན་ན་ ཀོན་འཇོག་ ཉམ་པོ་ ཀྲང་པོ་ འབྲེལ་ ཡོ་ཀན་འབོ་, རྡེན་འབེ་ ཡ་ཧུ་འདཱ་པ་ཞིག་ ནོག་། ཡང་ རྡེན་འབེ་ འགོཔ་ཅེཏ་ ཅོ་ཅེའོ་, ཁྲིམ་ལ་ ཁ་ཉེན་ཅེའོ་ མག་, རང་ངེ་ ཉིང་ངེ་ན་ འགྱུར་ཞ་ ཁྱོང་ཅེའོ་ ནོག་། ཡང་ འགྱུར་ཞ་ ཡོང་ཀ་ནེ་ མི་ཞིག་རྒེ་, མི་རྒུན་ མན་བ་, ཀོན་འཇོག་རྒེ་ རྟོད་པ་ ཙལ་ལེ་ནོག་།