ཀོན་འཇོག་རྒེ་ རྡེན་ཆེ་ཤེ་།
3
ཅི་ ཏེ་ནི་ ཡ་ཧུ་འདཱ་པ་ཞིག་ འིན་ཅེ་རྦེ་ ཕན་ཏོག་ ཡོད་ཏེ་ ནོག་རྒེ་ ཡ་ འགོཔ་ཅེཏ་ ཅོ་ཅེ་རྦོ་ལ་ ཅི་ རིན་ཞིག་ ཡོད་ཏེ་ ནོག་? 2 འོ་ནེ་, ཕན་ཏོག་ མང་པོ་ ཡོད་ཏེ་ ནོག་། ཏང་པོ་རང་ ཀོན་འཇོག་རྒེ་ ཁོ་རང་ངེ་ ཀཱ་རྒུན་ ཡ་ཧུ་འདཱ་པ་རྒུན་ལ་ ལྟེད་རྡེ་ ཛེད་།3 ཀལ་ཏེ་ ཏོ་རྒུ་ནི་ ཕྲོ་ནི་ ཁ་ཅིག་ལ་ ཏེཏ་པ་ མེད་ནི་ ཅི་ ཁོང་རྒུན་ལ་ ཏེཏ་པ་ མེད་ཅེ་རྦེ་, ཀོན་འཇོག་ལ་ རྡེན་ཆེ་ཤེ་ མེ་ཀན་ འགྱུར་རེ་ནོག་རྒེ་? 4 མ་ནི་ འགྱུར་རེ་ མག་། ཚང་མ་ ཟུན་ཅེན་ འིན་ནི་, ཀོན་འཇོག་ ཁོ་རང་ངེ་ ཞལ་ཆེཏ་རྒུ་ནི་ཀ་ ཀྲང་པོ་ ཞུ་རྡེ་ནོག་, ཀ་ཟུག་ ཏམ་པེ་ སུང་རབ་རྦེ་ན་ འབྲི་རྡེ་ ནོག་,
“ཉེ་རང་ངེ་ མོལ་ཧན་ ཚང་མ་ ཀྲང་པོ་ འིན་ཀན་ ལྟན་ནེན་,
ཡང་ ཉེ་རང་ལ་ ཁྲིམ་ཁུང་ངེ་ན་ རྒྱལ་ ཐོབ་རྦེན་།”
5 འིན་ན་ ཁ་ཅིག་རྒེ་ ཟེ་སྲིད་ཅེ་ ནོག་, “ཨ་ཧོའེ་ རྡིག་པེ་ ལེ་ཧ་རྒུ་ནི་ ཀོན་འཇོག་ ཀྲང་པོ་ འིན་ཀན་འབོ་ མང་ངེ་ སལ་སྤོ་ ཅོའེ་རྡེ་ ལྟན་ནེ་ཡོད་ནི་, ཏེ་ནི་ ཁོང་ངེ་ ཨ་ཧོ་རྒུན་ལ་ ཆེད་པ་ སལ་ཅེའོ་ མི་འོའེ་སྤ་ཞིག་ མ་ནོག་རྒེ་?” ཏོ་རྒུན་, མི་ཞིག་རྒེ་ སམ་ཚུལ་ ནང་ཞིན་ ཟེར་རྡེ་ནོག་། 6 ནེན་ཏེན་ མག་། ཀལ་ཏེ་ མི་འོའེ་སྤ་ འིན་འབེན་ནི་, ཏེ་ནི་ ཀོན་འཇོག་རྒེ་ འཇིག་རྟེན་པ་རྒུན་ལ་ ཁྲིམ་ཅེད་ ཀ་ཟུག་རྒེ་ ཛེད་རྡེན་? 7 ཁ་ཅིག་རྒེ་ ཟེར་རྒྱུ་ ཏྃ་རྡེ་ ཟེ་སྲིད་ཅེ་ ནོག་, “ཀལ་ཏེ་ ངེ་ ངན་པ་ ཅོ་ཅེ་རྦེ་, ཀོན་འཇོག་ ཀྲང་པོ་ འིན་ཀན་འབོ་ མང་ངེ་ སལ་སྤོ་ ཐོང་འདེ་, ཁོང་ལ་ སྤལ་ ཐོབ་རྦེ་ཡོད་ནི་, ཏེ་ནི་ ཅི་ ཀོན་འཇོག་རྒེ་ ང་ རྡིག་ཅེན་ འིན་ཀན་འབེ་ཕི་ ཤི་ཅེ་ ཁྲིམ་ཅེད་ ཛེ་རྡེ་ནོག་?” 8 ཡང་ ཁ་ཅིག་རྒེ་, “ཟང་པོ་ མང་ངེ་ ཆ་ཅེ་ཕི་ ངན་པ་ རིག་ ཅོའེ་ཧེ་” ཟེར་རྡུག་ ཟེར་རྡེ་ ང་ཞི་ རྒྱཔ་འགལ་ལ་ ཟུན་ ཏང་ངེ་ནོག་། ཏུ་ཟུག་ ཟེར་ཧན་རྒུན་ལ་ ཀོན་འཇོག་རྒེ་ ཆོག་ནེ་ ཤི་ཅེ་ ཆེད་པ་ ཐོབ་ཅེའོ་ འོའེ་སྤ་ ནོག་།
མི་སུ་ཞི་ལ་ ཀྲང་པོ་ མག་།
9 ཏེ་ནི་ འདོར་རྡུའི་རྡེ་ ཅི་ ཨ་ཧོ་ ཡ་ཧུ་འདཱ་པ་རྒུན་ ཞེན་མ་རྒུ་ནི་སང་ རྒྱ་ལེ་ འིན་ ཟེར་ ཉེན་ནེན་ནེ་? མན་, མ་ནི་ ཟེར་ མི་ཉེན་། ཅེ་ཟེར་ནི་ ང་ཞི་ ཡ་ཧུ་འདཱ་པ་ རྡང་ ཡ་ཧུ་འདཱ་པ་ མན་ཀན་ ཚང་མ་, རྡིག་པེ་ ཝང་ངེ་ ཡོག་ལ་ ཡོ་ཀན་འབོ་ ལྟན་ཚར་རྡེ་ འིན་། 10 ཀ་ཟུག་རྒེ་ ཏམ་པེ་ སུང་རབ་རྦེ་ན་ ཀོན་འཇོག་རྒེ་ མོ་ལེ་ ཛེད་,
“སུ་ཞི་ལ་ ཀྲང་པོ་ མག་, ཅིག་ཅིག་ལ་།
11 སུ་ཞིག་ལ་ ཧ་ཀོ་ཅེ་ ཙོན་འགྲུའི་ མ་ཅོ་ལ་ ནོག་,
སུ་ཞིག་ལ་ ཀོན་འཇོག་ ཀྲང་པོ་ ཤེ་ཉིན་ མེད་རྡེ་ ནོག་།
12 ཚང་མེ་ ཀོན་འཇོག་ལ་ རྒྱབ་རྒྱུར་ཤེ་རྦེ་ ཚང་མ་ རིན་མེད་ འགྱུར་རྡེ་ ནོག་།
སུ་ཞིག་ལ་ ཟང་པོ་ ཅོའོ་ མག་, ཅིག་ཅིག་ལ་།”
13 “ཁོང་རྒུ་ནི་ སྤེ་ར་རྒུན་, པེ་རྡེ་ ཡོ་ཀ་ནེ་ རོམ་ཀང་ངེ་
ནང་ནི་ ཡོང་ཀ་ནེ་ ཀྲི་ངན་ ཙོག་སེ་ ནོག་།
ཁོང་རྒུ་ནི་ ལྕེ་རྒུན་ ཟུན་ནེ་ ཀང་འདེ་ ཡོད་ཏེ་ ནོག་།”
“ཏུག་རུལ་ལེ་ ཁལ་སྤག་ནི་ ཏུག་ འགྲུ་ལེ་ནོག་།”
14 “ཁོང་རྒུ་ནི་ ཁ་, ངན་ ཏབ་ཅེ་ རྡང་ ཕོག་ཅེ་ སྤེ་རེ་ ཀང་འདེ་ ནོག་།”
15 “ཁོང་རྒུན་ མི་སེད་ཅེ་ལ་ རིྃ་རྡེ་ནོག་།
16 ལྟོང་ཅུག་ཅེ་ རྡང་ རྡུག་པོ་ ཏང་ཅེ་རྒུན་
ཁོང་རྒུ་ནི་ ལྟིང་འགྲྃ་ནི་ ཡོང་ངེ་ནོག་།
17 ཁོང་རྒུན་ལ་ ཞིའི་རྡེ་ ལམ་འབོ་ ཤེ་རྡེ་ མག་།”
18 “ཀོན་འཇོག་རྒེ་ འཇི་ནང་ ཁོང་རྒུ་ནི་ན་ མ་ནི་ མེད་ཏེ་ ནོག་།”
19 ནེན་ཏེན་ལ་ ཁྲིམ་འབོ་, ཁྲིམ་ ཐོབ་ཀ་ནེ་ མི་རྒུ་ནི་ཕི་ ནོག་། ཁྲིམ་ སལ་ཅེ་ རྒྱུ་ཚན་འབོ་ མི་རྒུན་ལ་ རྐྱོན་ ཅོ་ཅེ་ནི་ རྒག་ཅེ་, ཡང་ འཇིག་རྟེན་ སོན་ཏེ་ ཀོན་འཇོག་རྒེ་ ཧུ་འདུན་ལ་ རྐྱོན་འཇེན་ འིན་ཀན་འབོ་ ལྟན་ཅེ་པོ་ ནོག་། 20 ཅེ་ཟེར་ནི་ སུ་ཞི་ལ་ ཁྲིམ་མེ་ ཀཱ་ ནང་ཞིན་ ཅོ་ཅེ་ ཅིག་པོ་ནི་ ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་རེ་ མག་། ཁྲིམ་མེ་ ཨ་ཧོ་རྒུན་ ཙམ་ཤིག་ རྡིག་ཅེན་ འིན་ཀན་འབོ་ སལ་སྤོ་ ཅོའེ་རྡེ་ ལྟན་ནེ་ནོག་།
ཏེཏ་པ་ རྒྱུད་ཏེ་ ཀྲང་པོ་ འགྱུར་ཤེ་།
21 འིན་ན་ ཏ་ ཀོན་འཇོག་རྒེ་ ཨ་ཧོ་རྒུན་ལ་ ཁོང་ངེ་ ཧུ་འདུན་ལ་ ཁྲིམ་ རྒྱུད་ཏེ་ མག་, ཀྲང་པོ་ འགྱུར་ཤེ་ ཞེན་ལམ་འབོ་ ལྟན་ནེ་ ཛེད་, ཀ་ཟུག་ མོ་ཤེ་ རྡང་ ལུང་རྟོན་པ་རྒུ་ནི་ སྤེ་ཆ་རྒུ་ནི་ན་ ཞལ་ཆེཏ་ ཛེད་ཏེ་ ནོག་། 22 ཡི་ཤུ་ མ་ཤི་ཀེ་ན་ ཏེཏ་པ་ རྒྱུད་ཏེ་, ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེའེ་ཛེད་ཏེ་ ནོག་། ཡང་ ཨ་ཧོ་ སུ་རིག་ འིན་ན་ ཅང་ ཁྱེད་ མེད་ཏེ་ ནོག་།
23 མི་ཚང་མེ་ རྡིག་པ་ ཅོའེ་རྡེ་ ནོག་, ཡང་ ཀོན་འཇོག་རྒེ་ ཨ་ཧོའེ་ཕི་ ཟི་ཞིད་རྡེ་ ཐུག་འདོད་ ཡོ་ཀ་ནེ་ ཚད་ཚུག་པ་ ཨ་ཧོ་ ལེཔ་ མ་ཉེན་ནེ་ ནོག་། 24 འིན་ན་ ཀོན་འཇོག་རྒེ་, ཨ་ཧོ་རྒུན་ལ་ འོའེ་སྤ་ མན་ཀ་ནེ་ ཐུག་ཞེ་ རྒྱུད་ཏེ་ ཀྲང་པོ་ ཐེའེ་ ཛེད་། ཁོང་ངེ་ ཏོ་ ཅོའོ་ ཛེད་, ནམ་ མ་ཤི་ཀ་ ཡི་ཤུ་ རྒྱུད་ཏེ་ ཨ་ཧོ་རྒུན་ ཨ་ཧོའེ་ རྡིག་པེ་ ཚེ་ཡོག་ནི་ ཐར་ཤུག་རྒེ་ ཛེད་། 25 ཀོན་འཇོག་རྒེ་ ཡི་ཤུ་ རྡིག་པེ་ ཏོན་ལ་ ཆོད་པེ་ ཚུལ་ལ་ པུ་ལེ་ ཛེད་། ཡི་ཤུའི་ ཧུ་སྲོག་ ཆོད་པ་ པུལ་རྡེ་ ཁྲག་ པོ་ ཛེད་ཀན་འབེ་ཀ་ རྡེན་ཆེ་ཤེ་ ཅོ་ཀ་ནེ་ མི་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེའེ་ ཛེ་རྡེ་ནོག་། འི་ ཆོད་པ་རྦེ་ ཀོན་འཇོག་ འོའེ་སྤ་ ཛེད་ཀན་འབོ་ ལྟན་ནེ་ནོག་, ནམ་ ཁོང་ངེ་ ངུལ་ལ་ རྡིག་པ་ ཅོ་ཀན་རྒུན་ལ་ ཆེད་པ་ མ་སལ་ལེ་ སྲེན་འདེ་ ཞུའུ་། 26 ཟོད་པ་ སྲན་ཀྲེ་ ཅོའེ་རྡེ་ ཀོན་འཇོག་རྒེ་ ཏོ་ ཅོའོ་ ཛེད་, འིན་ན་ ཏ་ ཏག་ས་ ཁོང་ངེ་ ཨ་ཧོ་རྒུ་ནི་ རྡིག་པེ་ཕི་ ཡི་ཤུ་ སྲོག་ཆོད་ལ་ པུ་ལེ་ ཛེད་། ཏུ་ཟུག་ ཅོའོ་ ཛེད་ཅེ་རྦེ་, ཀོན་འཇོག་རྒེ་ ཁོ་རང་ ཀྲང་པོ་ འིན་ཀན་ འདང་ ཡི་ཤུའི་ན་ ཏེཏ་པ་ ཅོ་ཀན་རྒུན་ ཀྲང་པོ་ ཅོའོ་ ཛེད་ཀན་འབོ་ ལྟན་ནེ་ ཛེད་།
27 ཏེ་ནི་ ཅི་ རྒྱུ་ཚན་འབེ་ཕི་, ཨ་ཧོའེ་ ཕོ་སོ་ ཅོའེན་? ཅང་ངེ་ཕི་ལ་ ཅོ་ མི་ཉེན་, ཅེ་ཟེར་ནི་ ཨ་ཧོ་ རྡིག་པ་ མེ་ཀན་ ཐེའེ་ ཛེད་ཅེའོ་ ཁྲིམ་ལ་ ཁ་ཉེན་ཅེ་ མ་ནོག་, ཏེཏ་པ་ ཅོ་ཅེ་རྦེ་ཀ་ རག་ལེ་རྡེ་ ནོག་། 28 སོང་པེ་སང་ ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཁྲིམ་ ཁ་ཉེན་ཅེ་རྦེ་ ཀྲང་པོ་ ཐེའེ་ མ་ཛེད་རྡེ་, ཏེཏ་པ་ ཅོ་ཅེ་རྦེ་ ཀྲང་པོ་ ཐེའེ་ ཛེད་། 29 ཅི་, ཀོན་འཇོག་ ཡ་ཧུ་འདཱ་པ་ ཅིག་པེ་ ཀོན་འཇོག་ ཞུ་རྡེ་ ནོག་རྒེ་? ཁོང་ ཡ་ཧུ་འདཱ་པ་ མན་ཀན་རྒུ་ནི་ལ་ ཀོན་འཇོག་ ཞུ་རྡེ་ མ་ནོག་རྒེ་? འོ་ནེ་, ཁོང་ ནོག་། 30 ཀོན་འཇོག་ ཅིག་ ཞུ་རྡེ་ནོག་, ཡང་ ཁོང་ངེ་ མི་རྒུན་ ཏེཏ་པ་ ཅིག་པོ་ རྒྱུད་ཏེ་ ཁོ་རང་ངེ་ ཧུ་འདུན་ལ་ ཀྲང་པོ་ ཐེའེ་ ཛེ་རྡེ་ནོག་, ཡ་ཧུ་འདཱ་པ་ འིན་འགྲོ་ ཡ་ ཡ་ཧུ་འདཱ་པ་ མན་འགྲོ་། 31 ཅི་ ཏེ་ནི་ ཨ་ཧོ་རྒུ་ནི་ ཏེཏ་པ་རྦོ་ ཁག་ཅེན་ སི་རྦེ་, ཁྲིམ་འབོ་ ཞེད་ནྃ་ འགྲིག་ཏེ་ ནོག་རྒེ་? མ་ནི་ མག་། ངོའེ་སྤོ་ལ་ ཏེཏ་པ་ ཡོད་ཅེ་ཀ་ནི་, ཨ་ཧོའེ་ རང་ཞིན་ལ་, ཁྲིམ་པོ་ འདྲན་འདྲ་ ཀྲུཔ་ཅུག་རྒེ་ནོག་།