རོམ་པ་ 4

ཨབ་ར་ཧམ་མེ་ ཏེཏ་པེ་ སྤེ་།

ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ཤེ་ ཧོར་ལ་ ཨ་ཧོ་རྒུ་ནི་ ཕ་མེ་པོ་, ཨབ་ར་ཧམ་མེ་ ལོབ་ཀན་འབོ་ལ་ ཨ་ཧོ་ ཅི་ ཟེར་རྒོའེ་? 2 ཀལ་ཏེ་ ཁོའེ་ ལེ་ཧ་ ཟང་པོ་རྒུ་ནི་ ཁོ་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཐེ་ཡོད་ནི་, ཏེ་ནི་ ཁོ་ ཕོ་སོ་ ཅོ་ཅེ་ ཏོན་ཞིག་ ཡོད་ཁྲོ་། འིན་ན་ ཀོན་འཇོག་རྒེ་ ཚམ་ལ་ ཕོ་སོ་ ཅོ་ལྃ་ མེད་། 3 ཅེ་ཟེར་ནི་ ཏམ་པེ་ སུང་རབ་རྦེ་ན་ མོལ་རྡུག་, “ཨབ་ར་ཧམ་མེ་ ཀོན་འཇོག་ལ་ ཏེཏ་པ་ ཅོ་ཅེ་ཀ་ནི་, ཁོ་ ཀོན་འཇོག་རྒེ་ མི་ ཀྲང་པོ་ཞིག་ ཐེའེ་ ཛེད་།”

4 ལེ་ཧ་ ཅོ་ཀན་ནེ་ མི་ཞིག་ལ་ ཐོབ་ཀ་ནེ་ ལ་ཆ་འབོ་ ཁྱོའེ་མ་ཞིག་ མ་ནོག་, ཁོའེ་ ལེ་ཧ་ ཅོ་ཀ་ནེ་ ཐོབ་ཏང་འབོ་ ནོག་། 5 འིན་ན་ མི་རྒུན་ ཁོ་རང་རྒུ་ནི་ ལེ་ཧེ་ ཅོའེ་རྡེ་ མ་ནོག་, ཁོང་རྒུན་ལ་ ཀྲང་པོ་ ཅོའོ་ ཛེད་ཀན་ ཀོན་འཇོག་རྒེ་ན་ ཏེཏ་པ་ ཅོ་ཅེ་རྦེ་ ཀྲང་པོ་ ཐེའེ་ ཛེ་རྡེ་ནོག་། 6 ཏེ་རྒ་ ཙོག་སེ་ རྒྱ་སྤོ་ འདཱ་འབིད་རྡེ་ལ་, ལེ་ཧ་ མ་ཅོ་ལ་, ཀོན་འཇོག་རྒེ་, ཀྲང་པོ་ ཐེའེ་ ཛེད་ཀན་ ཅིན་ལབ་ཅེན་རྒུ་ནི་ ཧོར་ལ་ མོལ་,

7 “ཁ་ མི་ཉེན་ཅེ་ལ་ ཤག་སྤ་ ཐོབ་ཀན་རྒུན་ འདང་

རྡིག་པ་ ཀབ་རྦེ་ ཛེད་ཀན་རྒུན་,

ཙམ་ཤིག་རྒེ་ ཅིན་ལབ་ཅེན་ མག་།

8 ཙོབོ་རྡེ་, རྡིག་པ་རྒུན་ སི་ མ་ཛེད་ཀ་ནེ་ མི་འབོ་

ཙམ་ཤིག་རྒེ་ ཅིན་ལབ་ཅེན་ མག་།”

9 ཏ་ ཅི་, འི་ ཅིན་ལབ་པོ་ ཡ་ཧུ་འདཱ་པ་ ཅིག་པེ་ཕི་ ནོག་རྒེ་, ཡང་ འགོཔ་ཅེཏ་ མ་ཅོ་ཀ་ནེ་ ཡ་ཧུ་འདཱ་པ་ མན་ཀན་རྒུ་ནི་ཕི་ལ་? ང་ཞི་ ཟེ་འིན་, ཁོའེ་ ཏེཏ་པེ་ ཅོའེ་རྡེ་ ཨབ་ར་ཧམ་ལ་ ཀོན་འཇོག་རྒེ་ ཀྲང་པོ་ ཐེའེ་ ཛེད་། 10 འིན་ན་ ཏོ་ ནམ་ སོང་? ཁོ་ ཀྲང་པོ་ ཐེའེ་ ཛེད་ཅེའོ་, ཁོ་ འགོཔ་ཅེཏ་ མ་ཅོའེ་ ངུལ་ལ་ སོང་ངེ་ ཡ་ འགོཔ་ཅེཏ་ ཅོའེ་རྡེ་ ལྟིང་ནི་ སོང་? ཏོ་ ཁོ་ འགོཔ་ཅེཏ་ ཅོའེ་རྡེ་ ལྟིང་ནི་ མག་, ངུལ་ལ་ སོང་། 11 འགོཔ་ཅེཏ་ ཅོ་སང་ ངུལ་ལ་, ཨབ་ར་ཧམ་ལ་ ཏེཏ་པ་ ཡོད་ཅེ་ ཡང་ ཀོན་འཇོག་རྒེ་ ཁོ་ ཀྲང་པོ་ འིན་ཀན་, ཁོ་རང་ངེ་ ཞལ་ནི་ མོལ་ལེ་ ཛེད་ཅེའོ་, འགོཔ་ཅེཏ་ ཅོ་ཀ་ནེ་ ལྟའ་རྦོ་ འིན་འབེན་། ཏེ་རྒ་འབེ་ཕི་ལ་ ཨབ་ར་ཧམ་ནི་ འགོཔ་ཅེཏ་ མ་ཅོ་ལ་ ཏེཏ་པ་ ཅོ་ཀན་རྒུ་ནི་ ཨ་རྦ་ ཙོག་སེ་ ནོག་། ཡང་ ཏོ་རྒུན་ ཁོ་རང་རྒུ་ནི་ ཏེཏ་པེ་ ཅོའེ་རྡེ་ ཀྲང་པོ་ ཐེའེ་ ཛེ་རྡེ་ནོག་། 12 ཨབ་ར་ཧམ་ འགོཔ་ཅེཏ་ ཅོ་ཀན་རྒུ་ནི་ལ་ ཨ་རྦ་ ཙོག་སེ་ ནོག་, འིན་ན་ འགོཔ་ཅེཏ་ ཅོ་སང་ ངུལ་ལ་ ཨབ་ར་ཧམ་ལ་ ཡོ་ཀ་ནེ་ ཏེཏ་པ་ ཙོག་སེ་ ཁོང་རྒུན་ལ་ ཡོང་རྒོའེ་།

13 ཀོན་འཇོག་རྒེ་ ཨབ་ར་ཧམ་ འདང་ ཁོའེ་ ཕར་རྒྱུད་རྒུན་ལ་ འཇིག་རྟེན་ སོན་ཏེ་ སལ་ཅེ་ལ་ ཞལ་ཆེཏ་ ཛེད་། འིན་ན་ ཏོ་ ཨབ་ར་ཧམ་ལ་ ཁྲིམ་ ཁ་ཉེན་ཅེ་རྦེ་ ཅོའེ་རྡེ་ མ་ནོག་, ཏེཏ་པ་ རྒྱུད་ཏེ་ ཀོན་འཇོག་ ཉམ་པོ་ ཀྲང་པོ་ འབྲེལ་ ཡོད་ཅེ་རྦེ་ ཐོབ་ཏེ་ ནོག་། 14 ཀལ་ཏེ་ ཀོན་འཇོག་རྒེ་ ཞལ་ཆེཏ་པོ་ ཁྲིམ་ ཁ་ཉེན་ཀན་ ཅིག་པེ་ཕི་ འིན་འབེན་ནི་, ཏེ་ནི་ ཏེཏ་པ་ རྒོའེ་ཤེ་ མེད་ཁྲོ་ ཡང་ ཀོན་འཇོག་རྒེ་ ཞལ་ཆེཏ་པོ་ ཏོན་མེད་ འིན་འགྲོ་། 15 ཀོན་འཇོག་རྒེ་ ཐུག་སྲོ་, ཁྲིམ་ ཅག་ཅེ་རྦེ་ ཅོའེ་རྡེ་ པབ་རྦེ་ནོག་། འིན་ན་ ཀལ་ཏེ་ ཁྲིམ་ མེད་ནི་ ཏོ་ ཀ་ཟུག་རྒེ་ ཅག་རྒེན་?

16 ཏེ་རྒ་རྦེ་ཕི་ལ་ ཞལ་ཆེཏ་པོ་ ཏེཏ་པ་ རྒྱུད་ཏེ་ ཐོབ་རྦེ་ནོག་། འི་རྦོ་ རིན་ མ་ཏང་ཀ་ནེ་ ཁྱོའེ་མ་ཞིག་ ནོག་། ཡང་ ཁྲིམ་པོ་ ཁ་ཉེན་ནེན་འགྲོ་ ཡང་ མེད་ཁྲོ་, ཀལ་ཏེ་ ཨ་ཧོ་ལ་ ཨབ་ར་ཧམ་ ཙོག་སེ་ ཏེཏ་པ་ ཡོད་ནི་, ཨ་ཧོ་ ཚང་མ་ལ་ ཏེ་ ཁྱོའེ་མ་རྦོ་ ཐོབ་ཅེ་ ནེན་ཏེན་ ནོག་། ཅེ་ཟེར་ནི་ ཨབ་ར་ཧམ་ནི་ ཏེཏ་པ་ ཅོ་ཀན་ ཚང་མེ་ ཨ་རྦ་ ནོག་། 17 ཏེ་རྒ་རྦེ་ཕི་ལ་ ཀོན་འཇོག་རྒེ་ ཏམ་པེ་ སུང་རབ་རྦེ་ན་ ཨབ་ར་ཧམ་ལ་ མོལ་, “ངེ་ ཁྱེ་རང་ལ་ མིར་རྒྱུད་ མང་པེ་ ཨ་རྦ་ ཅོའེན་།” ཡུ་རྦོ་ སོང་ ཅེ་ཟེར་ནི་ ཨབ་ར་ཧམ་མེ་ ཤི་ཀན་རྒུན་ སོན་པོ་ ལང་ངེ་ ཛེད་ཀན་ ཡང་ ཅང་ མེ་ཀ་ནེ་ ནང་ནི་ སོ་མ་ ཆ་ཅུག་རྒེ་ ཛེད་ཀ་ནེ་ ཀོན་འཇོག་རྒེ་ན་ ཏེཏ་པ་ ཅོའེ་།

18 རེ་ཝ་ པོར་ཤེ་ རྒྱུ་ཚན་ མེད་ ཟ་ནི་ལ་, ཨབ་ར་ཧམ་མེ་ རེ་ཝ་ ཅོའེན་ འདེད་ཅེ་ཀ་ནི་, ཁོ་ མིར་རྒྱུད་ མང་པེ་ ཨ་རྦ་ འགྱུར་, ཀ་ཟུག་ ཀོན་འཇོག་རྒེ་ ཁོ་ མོལ་, “ཁྱེ་རང་ལ་ ཕར་རྒྱུད་ མ་མང་པོ་ཞིག་ ཡོང་ངེན་།” 19 ཡང་ ཨབ་ར་ཧམ་མེ་ ལོ་ ཧ་ལམ་ རྒྱ་ ཟམ་ཤིག་ སོན་ཏེ་ ཁོའེ་ ཟུྃ་སྤོ་ རྒེ་རྡེ་ ཤི་ཅེ་ ཙོག་སེ་ ཡང་, ཁོའེ་ ན་མ་ སཱ་ར་ ཕྲུ་རྒུ་ རྐྱེ་ཅེ་ ཁྱུད་ནི་ ཐལ་ནྃ་, ཨབ་ར་ཧམ་མེ་ ཏེཏ་པ་ ཡོལ་ མ་ཡོལ་ལ་ རྟེམ་པོ་ ལུའི་། 20 ཨབ་ར་ཧམ་མེ་ ཀོན་འཇོག་རྒེ་ ཞལ་ཆེཏ་པེ་ཀ་ ཐེ་ཚོམ་ མ་ནི་ མ་ཅོའེ་, མ་ཚེད་ ཁོའེ་ ཏེཏ་པ་རྦོ་ མང་ངེ་ ཤེད་ཅེན་ འགྱུར་རྡེ་ ཁོའེ་ ཀོན་འཇོག་ལ་ སྤལ་ ཁྱོྃ་། 21 ཀོན་འཇོག་ལ་ ཞལ་ཆེཏ་ ཛེད་ཀན་འབོ་ འདྲན་འདྲ་ ཀྲུབ་ཅུག་ཉེན་ནེ་ ཛེད་ཅེ་རྦེ་ཀ་ ཁོ་ ནེན་ཏེན་ ལོ་ཁྱེལ་ ཡོད་པེན་། 22 ཡང་ “ཨབ་ར་ཧམ་མེ་ ཏེཏ་པེ་ ཅོའེ་རྡེ་ ཀོན་འཇོག་རྒེ་ ཁོ་ ཀྲང་པོ་ ཐེའེ་ ཛེད་།” 23 ཀོན་འཇོག་རྒེ་ ཁོ་ ཀྲང་པོ་ ཐེའེ་ ཛེད་ཀན་ འབྲི་ཛེད་ཅེའོ་, ཨབ་ར་ཧམ་ ཅིག་པེ་ ཕན་ཏོག་རྡེ་ཕི་ མག་, 24 ཨ་ཧོའེ་ ཕན་ཏོག་རྡེ་ཕི་ལ་ འིན་འབེན་། ཀལ་ཏེ་ ཡི་ཤུ་ ཨ་ཧོ་རྒུ་ནི་ ཙོབོ་, ཤི་ཀན་རྒུ་ནི་ ཕྲོ་ནི་ ལྃ་ངེ་ ཛེད་ཀན་ ཀོན་འཇོག་རྒེ་ན་ ཨ་ཧོ་ ཏེཏ་པ་ ཅོ་ནི་, ཁོང་ངེ་ ཨ་ཧོ་རྒུན་ལ་ ཀྲང་པོ་ ཐེའེ་ ཛེད་ཅེ་རྦོ་, ཨ་ཧོའེ་ ཕན་ཏོག་པོ་ ནོག་། 25 ཀོན་འཇོག་རྒེ་ ཡི་ཤུ་, ཨ་ཧོ་རྒུ་ནི་ རྡིག་པེ་ཕི་, ཀྲོྃ་ངེ་ལ་ ལྟེད་རྡེ་ ཛེད་། ཡང་ ཨ་ཧོ་རྒུན་ ཀྲང་པོ་ འགྱུར་ཤེ་ལ་ ཁོང་ངེ་ ཡི་ཤུ་ སོན་པོ་ ལང་ངེ་ ཛེད་།