རོམ་པ་ 5

ཏེཏ་པེ་, ཐེད་པོ་ ཁྱོང་ངེ་ནོག་།

ཏ་ ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཏེཏ་པེ་ ཅོའེ་རྡེ་ ཀྲང་པོ་ ཐེའེ་ ཛེད་པེ་, ཨ་ཧོའེ་ ཙོབོ་ ཡི་ཤུ་ མ་ཤི་ཀ་ རྒྱུད་ཏེ་, ཨ་ཧོ་རྒུན་ལ་ ཀོན་འཇོག་ ཉམ་པོ་ ཐུན་འབྲེལ་ ཡོད་ཏེ་ ནོག་། 2 ཨ་ཧོ་རྒུ་ནི་ ཏེཏ་པེ་ ཅོའེ་རྡེ་ མ་ཤི་ཀེ་ ཨ་ཧོ་རྒུན་ལ་ འོའེ་སྤ་ མེ་ཀ་ནེ་ ཏེ་ མལ་རྦེ་ན་ འདེད་ཅེ་ལ་ ཁྱོང་ངེ་ ཛེད་། ཡང་ ཨ་ཧོ་རྒུན་ ལོ་ཁྱེལ་ རྡང་ ཐེད་པོ་ ཉམ་པོ་ ཀོན་འཇོག་རྒེ་ ཟི་ཞིད་པེ་ན་ འདྲེའེ་ ཉེན་ནེན་།

3 ཏེ་ནི་ མ་ཚེད་, ཨ་ཧོ་རྒུ་ནི་ ནག་པར་རྡོའེ་ ནང་ལ་ རྟོད་པ་ པུ་ལེ་ནོག་, ཅེ་ཟེར་ནི་ ཨ་ཧོ་ རྒྱུའི་ནོག་ ནག་པར་རྡོའེ་ ཟོད་པེ་སེམ་ རྐྱེ་ཅུག་ཅེ་, 4 ཟོད་སེམ་མེ་ ཤོད་ལམ་ ཟང་པོ་ ལྡན་ཅུག་ཅེ་, ཡང་ ཤོད་ལམ་ ཟང་པེ་ ཨ་ཧོ་རྒུན་ལ་ ཐར་པེ་ རེ་ཝེ་ ལོ་ཁྱེལ་ ཏང་ངེ་ནོག་། 5 ཡང་ འི་ རེ་ཝ་ ཡོད་ཅེ་རྦེ་ ཨ་ཧོ་རྒུ་ནི་ སེམ་རུའི་ ཆག་རྒེ་ མག་, ཅེ་ཟེར་ནི་ ཀོན་འཇོག་རྒེ་ ཨ་ཧོ་རྒུ་ནི་ སེམ་འབོ་ ཨ་ཧོ་ལ་ སལ་ཧ་ནེ་ ཏམ་པེ་ ཐུག་ཡིད་ རྒྱུད་ཏེ་, ཁོ་རང་ངེ་ ཡ་ཤེ་ ཧང་ངེ་ ཛེ་རྡེ་ནོག་།

6 ཀོན་འཇོག་རྒེ་ འདམ་མེ་ ཛེད་ཀ་ནེ་ ཏུའི་རྦེ་ཀ་, ཨ་ཧོ་རྒུ་ནི་ ཤུག་ ཚར་རྡེ་ ཨ་ཧོ་རྒུ་ནི་ན་ ཁྱུད་མེད་ཟ་ནི་, མ་ཤི་ཀ་ ཨ་ཧོ་ རྡིག་ཅེན་རྒུ་ནི་ཕི་ ཀྲོང་རྡེ་ ཛེད་། 7 མི་ མང་ཆེ་རྒུན་ མི་ཀྲང་པོ་ཞིག་རྒེ་ ཏོན་ལ་ ཤི་ མག་, ཅི་ རྒྱུའི་ ཅིག་ཅིག་ ཡོད་ཁྲོ་ ཀ་རྦེ་ ང་ མི་ ཟང་པེ་ ཏོན་ལ་ ཤི་ཉེན་ཅེ་རག་ ཟེར་སྲིད་རྡེན་། 8 འིན་ན་ ཨ་ཧོ་རྒུན་ རྡིག་ཅེན་ འིན་ཟ་ནི་, ཀོན་འཇོག་རྒེ་ མ་ཤི་ཀ་ ཨ་ཧོ་རྒུ་ནི་ ཏོན་ལ་ ཀྲོྃ་ས་ ལམ་ཅུག་རྒེ་ ཛེད་ཏེ་, ཁོང་ངེ་ ཨ་ཧོ་ལ་ ཤེ་སྤ་ ཆོན་མོ་ ཛེད་ཀན་འབོ་ ལྟན་ནེ་ ཛེད་། 9 ཡང་ མ་ཤི་ཀེ་ ཧུ་ཁྲག་ རྒྱུད་ཏེ་, ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཛེད་ཅེ་ཀ་ནི་, ཁོང་ངེ་ ཨ་ཧོ་རྒུན་ ནེན་ཏེན་ ཀོན་འཇོག་རྒེ་ ཐུག་སྲོའེ་ཀ་ནི་ རྐྱོབ་ཅེ་རྦོ་ལ་ ལོ་ཁྱེལ་ ཡོང་རྒོའེ་། 10 ཨ་ཧོ་རྒུན་ ཀོན་འཇོག་རྒེ་ འགྲ་ཝོ་ འིན་ཟ་ནི་, ཁོ་རང་ངེ་ སྲེ་ ཀྲོང་ཤེ་པོ་ རྒྱུད་ཏེ་, ཁོང་ངེ་ ཨ་ཧོ་རྒུན་ ཁོང་ ཉམ་པོ་ ཐུན་འབྲེལ་ ཛེད་། ཏེ་རྒ་ ཐུན་འབྲེལ་རྦེ་, ཁོ་རང་ངེ་ སྲེ་ སྲོག་ རྒྱུད་ཏེ་, ཁོང་ངེ་ ཨ་ཧོ་རྒུན་ རྐྱོབ་རྦེ་ ཛེད་ཅེ་རྦོ་ལ་ ལོ་ཁྱེལ་ སྲན་ཀྲེ་ རག་། 11 ཏ་ ཨ་ཧོ་རྒུ་ནི་ ཀོན་འཇོག་ ཉམ་པོ་ འབྲེལ་ སོ་མ་རྦེ་ན་ རྒ་མོ་ ཅོའེན་, ཅེ་ཟེར་ནི་ ཨ་ཧོའེ་ ཙོབོ་ ཡི་ཤུ་ མ་ཤི་ཀེ་, ཨ་ཧོ་རྒུན་ ཀོན་འཇོག་རྒེ་ ཡ་ཏོ་ འགྱུར་ཤུག་རྒེ་ ཛེད་།

ཨ་འདཱམ་ འདང་ མ་ཤི་ཀ་།

12 ནམ་ ཨ་འདཱམ་མེ་ རྡིག་པ་ ཅོའེ་, ཏེ་ མི་ ཅིག་པོ་ རྒྱུད་ཏེ་ འཇིག་རྟེན་ནེ་ན་ རྡིག་པ་ འགོ་ཟུག་། ཨ་འདཱམ་མེ་ རྡིག་པེ་ ཤི་ཅེ་ ཁྱོྃ་རྦེ་, ཤི་ཅེའོ་ མི་ཚང་མེ་ཀ་ ཕེལ་, ཅེ་ཟེར་ནི་ མི་ཚང་མེ་ རྡིག་པ་ ཅོའེ་། 13 ཁྲིམ་ ཐོབ་རྦེ་སང་ ངུལ་ལ་ རྡིག་པ་ འཇིག་རྟེན་ནེ་ན་ ཡོད་པེན་། འིན་ན་ ཏོ་ རྡིག་པ་ ཐེའེ་ མ་ཛེད་, ཅེ་ཟེར་ནི་ ཏེ་ཏེ་ཚུག་པ་ ཅག་ཅེ་ལ་ ཁྲིམ་ཞིག་ མ་ནི་ མེད་པེན་། 14 འིན་ན་ ཨ་འདཱམ་མེ་ ཏུའི་ནི་ ཏྃ་རྡེ་ མོ་ཤེ་ ཏུའི་ཚུག་པ་, མི་རྒུ་ནི་ ཨ་འདཱམ་ ཙོག་སེ་ ཀཱ་ ཅག་ཏེ་ རྡིག་པ་ མ་ཅོ་ནྃ་, ཁོང་རྒུན་ ཤི་། ཨ་འདཱམ་འབོ་ རྐྱོད་ཅེ་ཅེན་འབེ་, ལྟའ་རྦོ་ འིན་འབེན་། 15 འིན་ན་ ཨ་འདཱམ་མེ་ རྡིག་པ་ རྡང་ ཀོན་འཇོག་རྒེ་ ཐུག་ཞེ་ སོལ་རེ་རྦེ་ན་ མ་ཁྱེད་པར་ ཆོན་མོ་ཞིག་ ཡོད་ཏེ་ ནོག་, ཅེ་ཟེར་ནི་ ཨ་འདཱམ་, འི་ མི་ ཅིག་པེ་ རྡིག་པེ་, མང་པོ་ཞིག་རྒེ་ཀ་ ཤི་ཅེ་ ཁྱོྃ་། འིན་ན་ ཏེ་སང་ ཀྲག་པོ་རྦོ་ ཀོན་འཇོག་རྒེ་ ཧ་ལེ་ཤེ་ ཐུག་ཞེ་ རྡང་ མང་པོ་ཞིག་ལ་ ཤག་སྤེ་ སོལ་རེ་རྦོ་ འིན་འབེན་, ཀའོ་ མི་ ཉི་སྤ་ ཡི་ཤུ་ མ་ཤི་ཀ་, རྒྱུད་ཏེ་ སལ་། 16 ཡང་ ཀོན་འཇོག་རྒེ་ ཐུག་ཞེ་ སོལ་རེ་རྦེ་ འབྲེ་རྦུ་རྦོ་, ཏེ་ མི་ ཅིག་པེ་ རྡིག་པེ་ འབྲེ་རྦུ་ ཙོག་སེ་ མེད་ཏེ་ ནོག་། ཨ་འདཱམ་མེ་ རྡིག་པེ་ ཅོའེ་རྡེ་ ཀོན་འཇོག་རྒེ་ ཤི་ཅེ་ ཆེད་པེ་ ཁྲིམ་ཅེད་ སལ་། འིན་ན་ ཀོན་འཇོག་རྒེ་ རིན་ མ་ཤལ་ཧན་ནེ་ སོལ་རེ་རྦོ་, ཨ་ཧོ་རྒུ་ནི་ཀ་ རྡིག་པ་ མང་པེ་ རྐྱོན་ ཡོད་ནྃ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཅོ་ཅེ་ལ་ ཁྲིད་རྡེ་ནོག་། 17 འི་ ཨ་འདཱམ་, མི་ ཅིག་པེ་ རྡིག་པེ་ ཅོའེ་རྡེ་ ཤི་ཅེ་ ཝང་ མི་ མང་པོ་ཞིག་རྒེ་ཀ་ སྲུལ་། འིན་ན་ ཡི་ཤུ་ མ་ཤི་ཀ་, མི་ ཅིག་པོ་ རྒྱུད་ཏེ་, ཀོན་འཇོག་རྒེ་ ཧ་ལེ་ཤེ་ ཐུག་ཞེ་ རྡང་ ཀྲང་པོ་ འགྱུར་ཤེ་ སོལ་རེ་ ཐོབ་ཀན་ ཚང་མེ་ན་ ཙམ་ཤིག་རྒེ་ མང་ངེ་ ཀྲག་པོ་ ཝང་ མི་སྲུལ་།

18 འོ་ནེ་, ཨ་འདཱམ་མེ་ རྡིག་པ་ ཅིག་ཅིག་པེ་, མི་ཚང་མེ་ཀ་ ཤི་ཅེ་ ཆེད་པ་ ཕོག་། འིན་ན་ མ་ཤི་ཀེ་ ཆག་ལེ་ ཀྲང་པོ་ ཅིག་ཅིག་རྒེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཅོའོ་ ཛེད་ཏེ་ མི་ཚང་མ་ལ་ མི་ཙེ་ སོ་མ་ཞིག་ སལ་ལེ་ ཛེད་། 19 མི་ ཅིག་རྒེ་ ཀོན་འཇོག་རྒེ་ ཁ་ མི་ཉེན་ཅེ་རྦེ་, མང་པོ་ཞིག་ རྡིག་ཅེན་ འགྱུར་ཤུག་། འིན་ན་ ཞེན་ཡང་ མི་ ཅིག་རྒེ་ ཀོན་འཇོག་རྒེ་ ཁ་ཉེན་ཅེ་རྦེ་, མང་པོ་ཞིག་ མི་ ཀྲང་པོ་ འགྱུར་ཤུག་རྒེ་ ཛེ་རྡེན་། 20 མི་རྒུན་ ཙམ་ཤིག་ རྡིག་ཅེན་ འིན་ཀན་འབོ་ ལྟན་ཅེ་ཕི་ ཀོན་འཇོག་རྒེ་ ཁྲིམ་པོ་ སལ་ལེ་ ཛེད་། འིན་ན་ ཁྲིམ་འབེ་ རྡིག་པ་ ངན་པ་ འིན་ཀན་འབོ་ མང་ངེ་ སལ་སྤོ་ ཅོའེན་འདང་, ཀོན་འཇོག་རྒེ་ ཧ་ལེ་ཤེ་ ཐུག་ཞེ་རྦོ་ ཏེ་སང་ མང་ངེ་ ཀྲ་རྒེ་ ནོག་། 21 ཀ་ཟུག་ རྡིག་པེ་ མི་ཚང་མེ་ཀ་ ཝང་སྲུལ་རྡེ་ ཤི་ཅེའོ་ ཁྱོྃ་, ཏོ་རྦེ་ ཚབ་ལ་ ཀོན་འཇོག་རྒེ་ ཧ་ལེ་ཤེ་ ཐུག་ཞེ་ སོལ་རེ་རྦེ་ ཝང་སྲུལ་ལེ་ ཛེད་ཏེ་, ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀ་ རྒྱུད་ཏེ་, ཀོན་འཇོག་རྒེ་ ཧུ་འདུན་ལ་ ཨ་ཧོ་རྒུན་ ཀྲང་པོ་ ཅོའོ་ ཛེད་རྡེན་། ཡང་ ཨ་ཧོ་རྒུན་ ཐ་མེད་པེ་ མི་ཙེ་ ཆོག་ལ་ ཁྲིད་རྡེ་ ཛེ་རྡེན་།