རོམ་པ་ 6

རྡིག་པེ་ ཝང་འབོ་ ཅག་རྒེ་ ཛེད་།

ཏེ་ནི་ ཨ་ཧོའེ་ ཅི་ ཟེར་རྒོའེ་, ཀོན་འཇོག་རྒེ་ ཐུག་ཞེ་ རྒྱེ་ཤུག་ཅེ་ལ་, ཅི་ ཨ་ཧོ་རྒུ་ནི་ རྡིག་པ་ ཅོའེན་ ཆ་འགོའེ་? 2 མ་ནི་ མི་རྒོའེ་། ཨ་ཧོ་རྒུན་ རྡིག་པེ་ཕི་ ཤི་རྡེ་ འིན་ཅེ་ཀ་ནི་, ཏི་ནི་ ཨ་ཧོ་རྒུ་ནི་ ཏེ་རྒ་ མི་ཙེ་ ཀ་ཟུག་རྒེ་ པུད་རྡེན་? 3 མ་ཤི་ཀ་ ཡི་ཤུའི་ ཁྲུའི་ན་ འདྲེའེ་ཧན་རྒུ་ནི་ ཁོང་ངེ་ ཤི་ཅེ་ ནང་ལ་ འདྲེའེ་རྡེ་ འིན་ཀན་འབོ་, ཅི་ ཁྱི་ཞ་རྒུན་ལ་ རྒྱུའི་མེད་རྡེ་? 4 ཁྲུའི་ནེན་ཅེ་ རྒྱུད་ཏེ་, ཨ་ཧོ་རྒུན་ མ་ཤི་ཀ་ ཉམ་པོ་ ཤི་རྡེ་ ཧུང་ཀན་ ཙོག་སེ་ ནོག་། ཡང་ ཀ་ཟུག་ ཀོན་འཇོག་ ཡབ་རྦེ་ ཟི་ཞིད་རྡེ་ ཁྱུད་ རྒྱུད་ཏེ་, མ་ཤི་ཀ་ ཤི་ཀན་རྒུ་ནི་ ཕྲོ་ནི་ ལང་ངེ་ ཛད་པེ་, ཏ་ ཨ་ཧོ་རྒུ་ནི་ལ་ མི་ཙེ་ སོ་མ་ཞིག་ པུད་ཉེན་ཅེ་ ནོག་།

5 ཀལ་ཏེ་ ཁྲུའི་ནེན་ཅེ་རྦེ་, ཨ་ཧོ་རྒུན་ ཡི་ཤུ་ ཀྲོང་ཤེ་རྦེ་ན་ འདྲེའེ་ནི་, ཏེ་ནི་ ཨ་ཧོ་རྒུན་ ཁོང་ ཉམ་པོ་ སོན་པོ་ ལང་ཤེ་རྦེ་ ནང་ལ་ འདྲེའེ་ཤེའོ་ ནེན་ཏེན་ ནོག་། 6 ཨ་ཧོ་རྒུན་ལ་ རྒྱུའི་ནོག་, རྡིག་པེ་ ཝང་འབོ་ ཨ་ཧོའེ་ མི་ཙེ་ན་ མི་ལུའི་ཤེ་ཕི་, ཨ་ཧོ་རྒུ་ནི་ ཉིང་འབོ་ རྡིག་ཅེན་ ཟུྃ་སྤོ་རྦོ་ མ་ཤི་ཀ་ ཉམ་པོ་ རྐྱང་ཤིང་ངེ་ཀ་ རྐྱང་འདེ་ འིན་འབེན་། ཏ་ ཨ་ཧོ་རྒུན་ རྡིག་པེ་ ཚེ་ཡོག་ལ་ ལུའི་རྒོ་ཤེ་ མག་། 7 ཅེ་ཟེར་ནི་ ནམ་ ཨ་ཧོ་རྒུན་ མ་ཤི་ཀ་ ཉམ་པོ་ ཤི་, ཨ་ཧོ་རྒུན་ལ་ རྡིག་པེ་ ཝང་ནི་ ཐར་པ་ ཐོབ་ཏེ་ ནོག་། 8 ཡང་ ཨ་ཧོ་རྒུན་ མ་ཤི་ཀ་ ཉམ་པོ་ ཤི་ཅེ་ཀ་ནི་, ཁོང་ ཉམ་པོ་ མི་ཙེ་ པུད་ཅེ་རྦོ་ལ་ ཨ་ཧོ་རྒུན་ལ་ རྒྱུའི་ནོག་། 9 ཁོང་རྒུན་ ནེན་ཏེན་ འིན་ཀན་འབོ་ ཨ་ཧོ་རྒུན་ལ་ རྒྱུའི་ནོག་, ཅེ་ཟེར་ནི་ མ་ཤི་ཀ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་, ཁོང་ ཡང་ མ་ནི་ མི་ཤི་, ཏ་ ཁོང་ངེ་ཀ་ ཤི་ཅེ་ལ་ ཝང་ མེད་ ནོག་། 10 ནམ་ མ་ཤི་ཀ་ ཀྲོྃ་, རྡིག་པེ་ ཝང་འབོ་ ཅག་ཅེ་ལ་ ཁོང་ ལེན་ཏ་ ཅིག་ ཀྲོྃ་། འིན་ན་ ཏ་ ཁོང་ སོན་པོ་ ཞུ་རྡེ་, ཡང་ ཁོང་ངེ་ ཀོན་འཇོག་རྒེ་ སྤལ་ལེ་ཕི་ མི་ཙེ་ པུད་རྡེ་ ཛེ་རྡེ་ནོག་། 11 ཏེ་རྒ་ ཙོག་སེ་ ཁྱི་ཞ་རྒུན་ལ་ རྡིག་པེ་ ཝང་ངེ་ཕི་ ཤི་རྡེ་ ཡང་ མ་ཤི་ཀ་ ཡི་ཤུ་ རྒྱུད་ཏེ་, ཀོན་འཇོག་རྒེ་ སྤལ་ལེ་ཕི་ མི་ཙེ་ པུད་རྡེན་ འིན་ཀན་འབོ་ སམ་རྒོའེ་།

12 ཏེ་ནི་ ངན་པེ་ འདོད་པ་རྒུ་ནི་ ཁ་ མི་ཉེན་ཅེ་ཕི་ ཁྱི་ཞ་རྒུ་ནི་ ཤི་ཅེ་ཅེན་ནེ་ ཟུྃ་སྤེ་ཀ་ རྡིག་པ་ ཝང་སྲུལ་ མ་ཅུག་ཧེ་། 13 ཁྱི་ཞ་རྒུ་ནི་ ཟུྃ་སྤེ་ ཁག་ཅིག་ལ་, རྡིག་པེ་ ཡོག་པོ་ ཅོའེན་ ངན་པེ་ ལག་ཆ་ རིག་རྒ་ འགྱུར་ མ་ཅུག་རྒ་, ཁྱི་ཞ་རང་རྒུན་ ཅི་ས་ཐོག་ནི་ ཀོན་འཇོག་ལ་ པུལ་ཧེ་། ཅེ་ཟེར་ནི་ ཁྱི་ཞ་རྒུན་ ཤི་རྡེ་ འིན་འབེན་, འིན་ན་ ཏ་ ཁྱི་ཞ་རྒུན་ལ་ མི་ཙེ་ སོ་མ་ཞིག་ ཡོད་ཏེ་ ནོག་། ཏོ་རྦེ་ཕི་ ཁྱི་ཞ་རྒུ་ནི་ ཟུྃ་སྤོ་རྦོ་ ཀོན་འཇོག་ལ་ སྤལ་ ཐོབ་ཅེ་ལ་ འོའེ་སྤེ་ ལེ་ཧ་རྒུན་ ཅོ་ཅེ་ ལག་ཆ་ ཙོག་སེ་ ཀོལ་ཧེ་། 14 ཏ་ རྡིག་པ་ནི་ ཁྱི་ཞ་རྒུ་ནི་ སྤོན་འབོ་ མག་, ཅེ་ཟེར་ནི་ ཁྱི་ཞ་རྒུ་ནི་ ཁྲིམ་མེ་ ང་ཡོག་ལ་ མི་ཙེ་ མ་པུད་རྡེ་, ཀོན་འཇོག་རྒེ་ ཐུག་ཞེ་ ར་ཝང་ངེ་ ང་ཡོག་ལ་ མི་ཙེ་ པུད་རྡེ་ནོག་།

15 ཏེ་ནི་ ཅི་, ཨ་ཧོ་རྒུན་ ཁྲིམ་མེ་ ང་ཡོག་ལ་ མན་འདེ་, ཐུག་ཞེ་ ང་ཡོག་ལ་ འིན་ཅེ་རྦེ་ རྡིག་པ་ ཅོ་རྒོའེ་? མ་ནི་ མི་རྒོའེ་། 16 ཁྱི་ཞི་ ཁ་ཉེན་ཅེ་ལ་ འདམ་ཀན་འབེ་, ཁྱི་ཞ་ ཡོག་པོ་ འགྱུར་ཤེའོ་, ཧ་ཀོ་ མེ་རག་རྒེ་? ཀལ་ཏེ་ རྡིག་པེ་ ཡོག་པོ་ འགྱུར་ཤུག་ནི་, ཏོ་རྦེ་ ཁྱི་ཞ་རྒུན་ ཉ་ཝེ་ན་ ཁྲིད་རྡེན་, འིན་ན་ ཀོན་འཇོག་རྒེ་ ཁ་ཉེན་ནི་, ཏོ་རྦེ་ ཁྱི་ཞ་རྒུན་ མི་ཙེ་ ཀྲང་པོ་ཞིག་རྒེ་ན་ ཁྲིད་རྡེན་། 17 ཁྱི་ཞ་ རྡིག་པེ་ ཚེ་ཡོག་ འིན་འབེན་, འིན་ན་ ཏ་ ཁྱི་ཞ་རྒུ་ནི་ ང་ཞི་ ལབ་ཞ་ ཏང་ཀན་རྒུ་ནི་ཀ་ སེམ་ སོན་ཏེ་ནི་ ཁ་ཉེན་ཅེ་རྦེ་ཀ་ ངེ་ ཀོན་འཇོག་ལ་ ཐུག་ཞེ་ཆེ་ ཞུ་ཡོད་། 18 ཏ་ ཁྱི་ཞ་རྒུན་ རྡིག་པེ་ཀ་ནི་ ཐར་རྡེ་ ཀྲང་པོ་ མི་ཙེ་ཞིག་ པུད་ཅེ་ ཚེ་ཡོག་ འགྱུར་རྡེ་ ནོག་།

19 སེམ་ཤུག་ མེ་ཀ་ནེ་ མི་ འིན་ཅེ་རྦེ་, ཁྱི་ཞ་རྒུན་ལ་ འི་ ཚང་མ་ ཧ་ཀོ་ཅུག་ཅེ་ལ་ ངེ་ ཚེ་ཡོག་རྒེ་ སྤེ་རྦོ་ ཀོལ་ལེན་། ངུལ་ལ་ ཁྱི་ཞི་, ཁྱི་ཞ་རང་རྒུན་ མང་པེ་སང་ མང་པོ་ ངན་པ་ རྡང་ ཀྲིཔ་རྦེ་ ཉ་ཧེ་ ཚེ་ཡོག་ འགྱུར་ཤུག་། ཏ་ ཏམ་པེ་ འགྱུར་ཤེ་ཕི་ ཁྱི་ཞི་ རང་འདང་རང་ མི་ཙེ་ ཀྲང་པོ་ཞིག་རྒེ་ ཚེ་ཡོག་ འགྱུར་ཤུག་རྒོའེ་། 20 ཁྱི་ཞ་རྒུན་ རྡིག་པེ་ ཚེ་ཡོག་ འིན་ཟ་ནི་, ཁྱི་ཞ་རྒུན་ལ་ མི་ཙེ་ ཀྲང་པོ་ཞིག་ པུད་ཅེ་ ཚེར་ཧ་ མ་ནི་ མེད་པེན་། 21 ཡང་ ཏོ་རྦེ་ འབྲེ་རྦུ་ ཀ་ཟུག་ཤིག་ ཡོྃ་? ཏ་ ཁྱི་ཞ་རྒུན་ ཏུ་ཟུག་ ཅོ་ཀན་རྒུ་ནི་ཀ་ ཙམ་ཤིག་རྒེ་ ཁྲེལ་རྦ་ ཚོར་རེ་ནོག་, ཀ་རྦེ་ འབྲེ་རྦུ་ ཐ་མེད་པེ་ ཤི་ཅེའོ་ ནོག་། 22 འིན་ན་ ཁྱི་ཞ་རྒུན་ རྡིག་པེ་ ཝང་ངེ་ ཡོག་ནི་ ཐར་རྡེ་, ཀོན་འཇོག་རྒེ་ ཚེ་ཡོག་ འགྱུར་རྡེ་ ནོག་། ཏ་ ཁྱི་ཞ་རྒུ་ནི་ ཏམ་པ་ ཆོག་ལ་ ཁྲིད་ཀ་ནེ་ ལེ་ཧ་རྒུན་ ཅོའེན་ ནོག་, ཀ་རྦེ་ འབྲེ་རྦུ་རྦོ་ ཐ་མེད་པེ་ མི་ཙེ་རྦོ་ འིན་། 23 རྡིག་པེ་ ལ་ཆ་འབོ་ ཤི་ཅེའོ་ ནོག་། འིན་ན་ ཨ་ཧོ་རྒུ་ནི་ ཙོབོ་ མ་ཤི་ཀ་ ཡི་ཤུ་ རྒྱུད་ཏེ་ ཀོན་འཇོག་རྒེ་ ཆོན་ལ་ སལ་ལེ་ ཛེད་ཀ་ནེ་ སོལ་རེ་རྦོ་, ཐ་མེད་པེ་ མི་ཙེའོ་ འིན་།