རོམ་པ་ 7

ཞི་མེཏ་རྡེ་ འབྲེལ་ལེ་ སྤེ་།

ཏ་ ཁྲིམ་ ཤེ་ཧན་ ངེ་ སྤུན་, ཁྱི་ཞ་རྒུན་ལ་ ཅི་ རྒྱུའི་མེད་རྡེ་? ཁྲིམ་མེ་ ཝང་འབོ་ མི་ཞིག་རྒེ་ཀ་ ཁོ་ སོན་པོ་ ཡོད་ཡོད་ཚུག་པ་, འགྲུལ་ལེ་ནོག་། 2 སྤེར་ན་, ཁྲིམ་ ནང་ཞིན་ ན་མ་ ཅོ་ཀ་ནེ་ པོ་མོ་རྦེ་ ཁོ་རང་ངེ་ མག་པ་ སོན་པོ་ ཡོད་ཡོད་ཚུག་པ་ ཁོ་ ཉམ་པོ་ ལོ་ཁྱེལ་ཅེན་ནེ་ འབྲེལ་ པོར་རྒོའེ་། འིན་ན་ ཀལ་ཏེ་ ཁོའེ་ མག་པ་ ཤི་ནི་, ཁོ་ མག་པ་ ཉམ་པོ་ ལོ་ཁྱེལ་ཅེན་ འདེད་ཅེ་ ཁྲིམ་པོ་ སྲུང་ཅེ་ནི་ པུད་ཏེ་ ནོག་། 3 ཀལ་ཏེ་ མག་པ་རྦོ་ སོན་པོ་ ཡོད་ཟ་ནི་, ཏེ་ པོ་མོ་རྦེ་ ཞེན་ཞིག་ལ་ ན་མ་ ཅོ་ནི་, ཁོའེ་ ཞི་མེད་ མན་ཀན་ ཞེན་མི་ཞིག་ ཉམ་པོ་ ལུའི་འབྲེལ་ ཅོ་ཀ་ནེ་ རྡིག་པ་ ཅོའེ་རྡེ་ ནོག་། འིན་ན་ ཀལ་ཏེ་ ཁོའེ་ མག་པའོ་ ཤི་རྡེ་ ལྟིང་ནི་, ཡང་ ན་མ་ ཅོ་ནི་, ཁོ་ ཁྲིམ་ ནང་ཞིན་ ལོག་ཡེམ་མེ་ རྡིག་པ་ ཅོ་ཅེ་ནི་ མ་འགལ་ལེ་ ནོག་།

4 ཏེ་རྒ་རྦེ་ཕི་ལ་ ངེ་ ཤེ་སྤ་ སྤུན་རྒུན་, ཁྱི་ཞ་རྒུན་ མ་ཤི་ཀ་ ཉམ་པོ་ ཤི་ཟ་ནི་, ཁྱི་ཞ་རྒུན་ ཁྲིམ་མེ་ ཝང་ངེ་ཀ་ནི་ ཤི་རྡེ་ ནོག་། ཏ་ ཁྱི་ཞ་རྒུན་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་ཧན་འབོ་ ཉམ་པོ་ ཅིག་འགྲིལ་ སོང་འདེ་ ནོག་། ཏོ་རྦེ་ ཅོའེ་རྡེ་ ཨ་ཧོ་རྒུ་ནི་ ཀོན་འཇོག་རྒེ་ཕི་ ལེ་ཧ་ ཟང་པེ་ འབྲེ་རྦུ་ མིན་ཅུག་ཉེན་ནེན་། 5 ཨ་ཧོ་རྒུན་ ངུལ་མེ་ ཤོད་པེ་ ཝང་ངེ་ན་ ཡོད་ཟ་ནི་, ཨ་ཧོ་རྒུ་ནི་ན་ རྡིག་པེ་ འདོད་པ་རྒུ་ནི་ ལེ་ཧ་ ཅོ་ཡོད་པེན་། ཡང་ ཁྲིམ་མེ་, ཏེ་ འདོད་པ་ ངན་པ་རྒུན་ ལྃ་ཅུག་ཏེ་ རྡིག་པེ་ ལེ་ཧེ་ ལྟོན་ཏོག་ མིན་ཅུག་རྒེ་ནོག་, ཀ་རྦེ་ འབྲེ་རྦུ་ ཤི་ཅེའོ་ ནོག་། 6 འིན་ན་ ཏ་ ཨ་ཧོ་རྒུན་ ཁྲིམ་མེ་ཀ་ནི་ པུད་ཏེ་ ནོག་, ཅེ་ཟེར་ནི་ ཨ་ཧོ་རྒུན་ རྡམ་འདེ་ པོར་ཧན་ནེ་ ཁྲིམ་འབེ་ཕི་ ཤི་རྡེ་ ནོག་། ཏ་ འབྲི་ཀ་ནེ་ ཁྲིམ་འབེ་ ཞབ་རྟོག་ མ་ཅོ་ལ་, ཏམ་པེ་ ཐུག་ཡིད་རྡེ་ན་ མི་ཙེ་ སོ་མ་ཞིག་ པུད་རྡེན་, ཨ་ཧོ་རྒུ་ནི་ ཀོན་འཇོག་ལ་ ཞབ་རྟོག་ ཞུའིན་།

ཀོན་འཇོག་རྒེ་ ཁྲིམ་རྦེ་, ཨ་ཧོའེ་ རྡིག་པ་ ལྟན་ནེ་ ཛེད་།

7 ཅི་ ཏེ་ནི་, ངེ་ ཀོན་འཇོག་རྒེ་ ཁྲིམ་པོ་ ངན་པ་ ནོག་ ཟེར་རྡེ་ ནོག་རྒེ་? མ་ནི་ མག་། ངོའེ་སྤོ་ལ་ ང་, ང་རང་ངེ་ རྡིག་པ་རྒུན་ ལྟན་ཀན་འབོ་ ཏེ་རྒ་ ཁྲིམ་འབོ་ འིན་འབེན་། ཀལ་ཏེ་ ཁྲིམ་འབེ་ “ཞན་མེ་ འིན་ཀན་འབོ་ལ་ འདོད་པ་ མ་ཅོ་” མ་ཟེར་རྦེ་ནི་, ཞེན་མེ་ འིན་ཀན་ལ་ འདོད་པ་ ཅོ་ཅེའོ་ རྡིག་པ་ འིན་ཀན་ ང་ རྒྱུའི་མ་ཆ་ ཡོད་ཁྲོ་། 8 འིན་ན་ རྡིག་པེ་, ཏེ་ ཀཱ་འབོ་ ཀོལ་རྡེ་ ངེ་ན་ ཞེན་མེ་ འིན་ཀན་འབོ་ལ་ འདོད་པ་ ཅོ་ཅེ་ན་ ཚང་མ་ རྐྱེ་ཅུག་། ཀལ་ཏེ་ ཁྲིམ་ མེད་པེ་ནི་, རྡིག་པ་, ཏེ་ ཝང་འབོ་ མེད་ཁྲོ་། 9 ཏུའི་ཞིག་ལ་ ངེ་ ཁྲིམ་མེ་ ཧ་ཀོ་མེད་པེ་ མི་ཙེ་ པུད་རྡེ་ཡོད་པེན་, འིན་ན་ ང་ ཀོན་འཇོག་རྒེ་ ཀཱ་འབོ་ ཧ་ཀོ་ནི་, ངེ་ མི་ཙེ་ན་ རྡིག་པེ་ ལེ་ཧ་ ཅོ་ཅེ་ འགོ་ཟུག་, ཡང་ ང་ ཤི་། 10 ཏེ་ནི་ ངེ་ ཐོང་, ཏེ་རྒ་ ཁྲིམ་མེ་ ཀཱ་རྦེ་, ང་ མི་ཙེ་ ཁྱོང་ཅེ་ ཚབ་ལ་, ངེ་ཕི་ ཤི་ཅེ་ ཁྲིམ་ཅེད་པོ་ ཁྱོྃ་། 11 རྡིག་པེ་ ཏེ་ ཀཱ་འབོ་ ཕན་ཏོག་ ནེན་འདེ་ ང་ འགོམ་ཧོར་, ཡང་ ཏེ་རྒ་ ཀཱ་འབོ་ ཀོལ་ཏེ་ ངེ་ཀ་ ཤི་ཅེ་ ཁྲིམ་ཅེད་པོ་ ཁྱོྃ་། 12 འིན་ན་ ཁྲིམ་འབོ་ ཏག་ས་ ཏམ་པ་ ནོག་, ཡང་ ཏོ་རྦེ་ ཀཱ་རྒུན་ ཏམ་པ་, ཀྲང་པོ་ རྡང་ ཟང་པོ་ ནོག་།

13 ཏེ་ནི་ ཅི་, ཟང་པོ་ འིན་ཀ་ནེ་ ཁྲིམ་འབེ་, ང་ ཤི་ཅེའོ་ ཁྱོྃ་རྡེ་? མ་ནི་ མི་ཁྱོྃ་། རྡིག་པེ་, ཟང་པོ་ འིན་ཀན་འབེ་ ཕན་ཏོག་ ནེན་འདེ་ ངེ་ཀ་ ཤི་ཅེ་ ཁྲིམ་ཅེད་པོ་ ཁྱོྃ་། འོ་ནེ་ ཀོན་འཇོག་རྒེ་ ཀཱ་ རྒྱུད་ཏེ་ ཨ་ཧོ་ལ་ རྡིག་པ་ མྃ་རྡེ་ ངན་པ་ འིན་ཀན་འབོ་ ཧ་ཀོ་ནོག་།

རྡིག་པེ་ རྒྱཔ་འགལ་ལ་ ནོལ་ཤེ་།

14 ཨ་ཧོ་རྒུན་ལ་ རྒྱུའི་ནོག་, ཀོན་འཇོག་རྒེ་ ཁྲིམ་འབེ་ མི་ཙེ་ ཀྲང་པོ་ པུད་ཅེ་ལ་ ཁྲིད་རྡེ་ནོག་, འིན་ན་ ང་ ང་རང་ངེ་ རྡིག་ཅེན་ འདོད་པ་རྒུ་ནི་ ཁྲིད་ཏུག་། ཏོ་ནི་ ང་ རྡིག་པེ་ ཚེ་ཡོག་ལ་ ཙོང་ཀན་ ཙོག་སེ་ ནོག་། 15 ངེ་ ཅོའེན་ ཡོ་ཀན་འབོ་ ང་ ཧ་ཀོ་ མེ་རག་, ཅེ་ཟེར་ནི་ ང་ ཀྲང་པོ་ ཅོ་ཉིན་ ཡོད་ནྃ་ ངེ་ ཅོའོ་ མི་འདུག་, མ་ཚེད་ ངེ་ ཏོ་ ཅོ་རུག་ ཀ་འབོ་ལ་ ངེ་ སོག་པོ་ ཅོའེན་། 16 ཡང་ ཀལ་ཏེ་ ངེ་ མི་ཅོ་ སམ་ཀ་ནེ་ ལེ་ཧ་རྦོ་ ཅོ་ནི་, ཏེ་ནི་ ཁྲིམ་ ཟང་པོ་ འིན་ཀན་འབོ་ལ་ ངེ་ སེམ་མེ་ ཆོག་རྐྱོར་ ཅོའེ་རྡེ་ ནོག་། 17 ཏེ་ནི་ ངན་པ་ ཅོ་ཀན་འབོ་ ང་ མན་ ངེ་ན་ ནེ་རྡེ་ ཡོ་ཀ་ནེ་ རྡིག་པ་རྦོ་ ནོག་། 18 ཡང་ ང་ རྒྱུའི་ཡོད་, ངེ་ན་ ཟང་པོ་ ཅང་ཀྱྃ་ ལུའི་རྡེ་ མེད་, ཏོ་ ངེ་ རྡིག་ཅེན་ ཤོད་པ་རྦོ་ འིན་། ང་ ཀྲང་པོ་ ཅོ་ཉིན་ ཡོད་ནྃ་ ང་ ཅོ་ཉེན་ནེ་ མི་འདུག་། 19 ངེ་ ཟང་པོ་ ཅོ་ཉིན་ ཡོད་ནྃ་ ཅོའོ་ མི་འདུག་། ངེ་ ངན་པ་ ཅོ་ཉིན་ མེད་ནྃ་ ཏོ་ ཅོ་རུག་། 20 ཏ་ ཀལ་ཏེ་ ངེ་ ཅོ་ཉིན་ མེ་ཀན་འབོ་ ཅོ་ནི་, ཏེ་ནི་ ནེན་ཏེན་ལ་ ངན་པ་ ཅོ་ཀན་འབོ་ ང་ མན་, ངེ་ན་ ནེ་རྡེ་ ཡོ་ཀ་ནེ་ རྡིག་པ་རྦོ་ ནོག་།

21 ཏ་ ཨ་ཧོའེ་ན་ ཝང་ཞིག་རྒེ་ ལེ་ཧ་ ཅོ་ཀན་འབོ་ ང་ ཧ་ཀོ་, ངེ་ ཀྲང་པོ་ ཅོ་ཉིན་ ཡོད་ཟ་ནི་, ངན་པ་ ང་ ཉམ་པོ་ འདེད་ཏེ་ ཡོང་འདུག་། 22 ངེ་ སེམ་ སོན་ཏེ་ན་ ཀོན་འཇོག་རྒེ་ ཁྲིམ་ལ་ ཤེ་སྤ་ ཅོའེན་། 23 འིན་ན་ ངེ་ན་, ཏེ་ ཝང་འབེ་ ངེ་ ཁྲིམ་ ཁ་ཉེན་ཅེ་ འདོད་པེ་ རྒྱཔ་འགལ་ལ་ ནོ་ལེ་རག་། ཏེ་ ཝང་འབེ་, ང་, ངེ་ན་ ཡོ་ཀ་ནེ་ རྡིག་པེ་ ཚེ་ཡོག་ འགྱུར་ཤུག་ཏུག་། 24 ང་ ཙམ་ཤིག་རྒེ་ རྡུག་པོ་ མི་ཞིག་ མག་! སུའི་ ང་ ཤི་ཅེ་ ཁྱོང་ཀ་ནེ་ འི་ ཟུྃ་སྤེ་ ནང་ནི་ ཐར་ཤུག་རྒེན་? 25 ཀོན་འཇོག་རྒེ་ ཐུག་ཞེ་ཆེ་! ང་ ཐར་ཤུག་ཀན་འབོ་ ཨ་ཧོའེ་ ཙོབོ་ ཡི་ཤུ་ མ་ཤི་ཀ་ ནོག་། སོང་འབེ་སང་ ཐོང་འདུག་, འི་རྦོ་ ཀ་ཟུག་རྒེ་ ནོག་? ང་རང་ངེ་ སེམ་མེ་ན་ ངེ་ རྡེན་འབའ་ ཀོན་འཇོག་རྒེ་ ཁྲིམ་པོ་ ཁ་ཉེན་ཉིན་རག་, འིན་ན་ ངེ་ རྡིག་པེ་ ཤོད་པེ་ ཅོའེ་རྡེ་ ང་ རྡིག་པེ་ ཡོག་པོ་ འིན་།