ཏམ་པེ་ ཐུག་ཡིད་རྡེ་ན་ མི་ཙེ་ པུད་ཅེ་།
8
ཏོ་རྦེ་ཕི་ ཏ་ མ་ཤི་ཀ་ ཡི་ཤུའི་ འིན་ཀན་རྒུ་ནི་ མི་རྒུན་ལ་ ཀོན་འཇོག་རྒེ་ ཆེད་པ་ སལ་ལེ་ མན་ནོག་། 2 ཅེ་ཟེར་ནི་ མ་ཤི་ཀ་ ཡི་ཤུ་ རྒྱུད་ཏེ་, མི་ཙེ་ སལ་ཧ་ནེ་ ཐུག་ཡིད་རྡེ་ ཁྱུད་པེ་ ཁྱི་ཞ་, ཤི་ཅེ་ ཆོག་ལ་ ཁྲིད་ཀ་ནེ་ རྡིག་པེ་ ཝང་ནི་ ཐར་ཤུག་རྒེ་ ཛེད་། 3 ཨ་ཧོ་རྒུ་ནི་ རྡིག་པེ་ ཤོད་པེ་, མོ་ཤེ་ ཁྲིམ་འབོ་ ཤུག་མེད་ ཅོ་ཅེ་ཀ་ནི་, ཏོ་ལ་ ཨ་ཧོ་རྒུན་ རྐྱོབ་ མ་ཉེན་ནེ་ ནོག་, ཏོ་རྦེ་ཕི་ ཁྲིམ་ལ་ ཅོ་ མ་ཉེན་ཀན་འབོ་ ཀོན་འཇོག་རྒེ་ ཛེད་། ཨ་ཧོ་ རྡིག་ཅེན་རྒུན་ལ་ ཡོ་ཀན་ ཙོག་སེ་ ཟུྃ་སྤེ་ན་ ཁོང་ངེ་ ཁོ་རང་ངེ་ སྲེ་ འཇིག་རྟེན་ནེ་ཀ་ ལམ་ཅུག་ལ་ ཛེད་ཏེ་ ཨ་ཧོའེ་ རྡིག་པེ་ཕི་ ཆོད་པ་ པུ་ལེ་ ཛེད་། ཏུ་ཟུག་ ཛེད་ཏེ་ ཁོང་ངེ་ ཨ་ཧོ་རྒུ་ནི་ཀ་ རྡིག་པེ་ ཝང་འབོ་ མེ་ཀན་ ཛེད་། 4 ཁོང་ངེ་ ཏོ་ ཅོའོ་ ཛེད་ཅེ་ རྒྱུ་ཚན་འབོ་, ཁྲིམ་མེ་ འོའེ་སྤེ་ རྒོའེ་ཤེ་ཅན་རྒུན་, རྡིག་པེ་ ཤོད་པེ་ན་ མི་ཙེ་ མ་པུ་རྡེ་ལ་, ཐུག་ཡིད་རྡེ་ན་ མི་ཙེ་ པུད་ཀན་ ཨ་ཧོ་རྒུ་ནི་ན་, འདྲན་འདྲ་ ཀྲུཔ་ཅེའོ་ ནོག་།5 རྡིག་པེ་ ཤོད་པེ་ ཝང་ངེ་ ཡོག་ལ་ ལུའི་ཧན་རྒུ་ནི་, ཏུའི་རྒྱུན་ རྡིག་པེ་ ལེ་ཧ་ ཅོའེན་ ས་མེ་ནོག་། འིན་ན་ ཏམ་པེ་ ཐུག་ཡིད་རྡེ་ ཝང་ངེ་ ཡོག་ལ་ ཡོ་ཀན་རྒུ་ནི་, ཏུའི་རྒྱུན་ ཐུག་ཡིད་ ཐུག་ཉེ་ཤེ་ ལེ་ཧ་ ཅོའེན་ ས་མེ་ནོག་། 6 རྡིག་ཅེན་ མི་རྒུ་ནི་ སམ་བ་རྦེ་, ཤི་ཅེ་ ཆོག་ལ་ ཁྲིད་རྡེ་ནོག་། འིན་ན་ ཐུག་ཡིད་རྡེ་ ཝང་ངེ་ ཡོག་ལ་ ཡོ་ཀ་ནེ་ སམ་བ་རྦེ་, མི་ཙེ་ རྡང་ ཞིའི་རྡེ་ ཆོག་ལ་ ཁྲིད་རྡེ་ནོག་། 7 རྡིག་པེ་ ཤོད་པེ་ ཏུའི་རྒྱུན་ ཀོན་འཇོག་རྒེ་ རྒྱཔ་འགལ་ ཅོ་ནོག་, ཅེ་ཟེར་ནི་ ཏོ་རྦེ་ ཀོན་འཇོག་རྒེ་ ཁྲིམ་ལ་ ཁ་ མ་ཉེན་, ཡང་ ཁ་ མ་ནི་ མི་ཉེན་། 8 ཏེ་རྒ་རྦེ་ཕི་ལ་ རྡིག་པེ་ ཤོད་པེ་ ཝང་ངེ་ ཡོག་ལ་ འདེད་ཀན་རྒུ་ནི་, ཀོན་འཇོག་ ཐུག་ཉེ་ཅུག་ མ་ནི་ ཉེན་ནེ་ མག་།
9 ཀལ་ཏེ་ ཀོན་འཇོག་རྒེ་ ཐུག་ཡིད་ ཁྱི་ཞི་ན་ ཞུ་རྡེ་ཡོད་ནི་, ཁྱི་ཞ་རྒུན་ རྡིག་པེ་ ཤོད་པེ་ ཝང་ངེ་ ཡོག་ལ་ མེད་པེ་, ཐུག་ཡིད་རྡེ་ ཝང་ངེ་ ཡོག་ལ་ ཡོད་ཏེ་ ནོག་། ཡང་ སུ་ཞིག་རྒེ་ན་ མ་ཤི་ཀེ་ ཐུག་ཡིད་ མེད་, ཏེ་ མིའུ་ མ་ཤི་ཀེ་ མག་། 10 མ་ཤི་ཀ་ ཁྱི་ཞ་རྒུ་ནི་ན་ ཞུ་རྡེ་ནོག་, རྡིག་པེ་ ཅོའེ་རྡེ་ ཁྱི་ཞ་ ཟུྃ་རྡེ་ ཐོག་ནི་ ཤི་ནོག་ འིན་ན་, ཐུག་ཡིད་རྡེ་ ཁྱི་ཞ་ མི་ཙེ་ སལ་ལེ་ནོག་, ཅེ་ཟེར་ནི་ ཁྱི་ཞ་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཅོའོ་ ཛེད་། 11 ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་ཤུག་རྒེ་ ཛེད་ཀ་ནེ་ ཀོན་འཇོག་རྒེ་ ཐུག་ཡིད་ ཁྱི་ཞ་རྒུ་ནི་ན་ ལུའི་རྡེ་ནོག་། ཡང་ ཀ་ཟུག་ ཀོན་འཇོག་རྒེ་ མ་ཤི་ཀ་ ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ཞྃ་ཤུག་རྒེ་ ཛེད་, ཁྱི་ཞི་ན་ ཡོ་ཀ་ནེ་ ཏེ་རྒ་ ཐུག་ཡིད་པོ་ རྒྱུད་ཏེ་, ཁོང་ངེ་, ཁྱི་ཞི་ ཤི་ཅེ་ཅེན་ནེ་ ཟུག་པོ་ལ་ སྲོག་ སལ་ལེ་ ཛེ་རྡེན་།
12 ཏོ་རྦེ་ཕི་ ངེ་ ཤེ་སྤ་ སྤུན་རྒུན་, ཁྱི་ཞ་རྒུན་ལ་ རྡིག་པེ་ ཤོད་པ་ ཅོའེ་ ཟེར་ཧན་འབོ་ལ་ ཁ་ཉེན་རྒོའེ་ མེད་ཏེ་ ནོག་། 13 ཀལ་ཏེ་ ཁྱི་ཞ་རྒུ་ནི་ ཏོ་རྦེ་ ཟེར་ཧན་ ནང་ཞིན་ མི་ཙེ་ པུད་ནི་, ཁྱི་ཞ་རྒུན་ ཤིན་། འིན་ན་ ཀལ་ཏེ་ ཏམ་པེ་ ཐུག་ཡིད་རྡེ་ ཁྱུད་ རྒྱུད་ཏེ་ ཁྱི་ཞི་ རྡིག་པེ་ ཤོད་པེ་ ལེ་ཧ་རྒུན་ ཤི་ཅུག་ནི་, ཁྱི་ཞ་རྒུ་ནི་ རྡེན་འབེ་ མི་ཙེ་a པུད་རྡེ་ནོག་། 14 ཅེ་ཟེར་ནི་ ཀོན་འཇོག་རྒེ་ ཐུག་ཡིད་རྡེ་ ཁྲིད་ཀན་རྒུན་ ཀོན་འཇོག་རྒེ་ ཕྲུ་རྒུ་ ནོག་།
15 ཁྱི་ཞ་རྒུན་ལ་ འཇིའི་ཤེ་ ཚེ་ཡོག་ འགྱུར་ཤུག་ཀ་ནེ་ ཐུག་ཡིད་པོ་ ཐོབ་ཏེ་ མག་། འིན་ན་ ཀོན་འཇོག་རྒེ་, ཕྲུ་རྒུའི་ ཚུལ་ལ་ སོའེ་རྦུ་ ནེན་ནེ་ ཛེད་ཀ་ནེ་ ཐུག་ཡིད་པོ་ ཐོབ་ཏེ་ ནོག་། ཏ་ ཨ་ཧོ་རྒུ་ནི་ ཁོང་ལ་ “ཨ་རྦ་! ཡབ་ལེ་!” འབོའེན་། 16 ཀོན་འཇོག་རྒེ་ ཐུག་ཡིད་རྡེ་, ཨ་ཧོའེ་ ཐུག་ཡིད་ ཉམ་པོ་ ཨ་ཧོ་ ཀོན་འཇོག་རྒེ་ ཕྲུ་རྒུ་ འིན་ཀན་འབོ་ སྤང་པོ་ སལ་ལེ་ནོག་། 17 ཡང་ ཨ་ཧོ་རྒུན་ ཁོང་ངེ་ ཕྲུ་རྒུ་ འིན་ཅེ་ཀ་ནི་, ཁོང་ངེ་ ནོར་ཧལ་ ནེན་ཀན་ མ་ཚེད་, མ་ཤི་ཀ་ ཉམ་པོ་ ཀོན་འཇོག་རྒེ་ ཟི་ཞིད་, ནེན་ཀན་འབོ་ལ་ ནོག་། འིན་ན་ ཀལ་ཏེ་ ཨ་ཧོ་རྒུན་ ཁོང་ངེ་ ཟི་ཞིད་པེ་ན་ འདྲེའེ་ཡོད་ནི་, ཏེ་ནི་ ཨ་ཧོ་རྒུན་ ཁོང་ངེ་ རྡུ་ངལ་ལེ་ ནང་ལ་ འདྲེའེ་རྒོའེ་།
ཡོང་ཅེ་ཅེན་ནེ་ ཟི་ཞིད་།
18 ཏག་ས་ ཨ་ཧོ་རྒུན་ལ་ སོང་ཀ་ནེ་ རྡུ་ངལ་རྦོ་, ལྟིང་ཞིན་ ཁོང་ངེ་ ཨ་ཧོ་རྒུན་ལ་ སལ་ཅེ་ཅེན་ནེ་ ཟི་ཞིད་ ཉམ་པོ་ རྡུར་ནི་, ཏེ་ནི་ ཏེ་ རྡུ་ངལ་རྦོ་ ཅང་ མེད་ཏེ་ ནོག་། 19 ཀོན་འཇོག་རྒེ་ ཛེད་ཀན་ ཚང་མ་b, ཁོང་ངེ་ རྡེན་འབེ་ ཕྲུ་རྒུ་རྒུན་ ངོན་ཅུག་རྒེ་ ཛེད་ཅེ་ ཏེ་ ཞག་པོ་ལ་, ཡུན་རིང་ཞིག་ སྲུང་རྡེ་ ནོག་། 20 མི་རྒུ་ནི་ཕི་ འིན་ཀན་ ཀོན་འཇོག་རྒེ་ ངན་འབོ་, ཁོང་ངེ་ ཞེན་ཡང་ ཛེད་ཀན་ ཚང་མེ་ཀ་ལ་ ཕོག་, ཀའོ་ ཏོ་རྒུ་ནི་ འདོད་པ་ མ་ནོག་ ཏོ་རྒུན་ ཛེད་ཀན་ ཀོན་འཇོག་རྒེ་ ཐུག་འདོད་ འིན་འབེན་། འིན་ན་ རེ་ཝ་ མང་པོ་ ཉམ་པོ་ 21 ཏེ་ ཛེད་ཀན་ ཚང་མེ་ ཡོང་ཅེ་ཅེན་ནེ་ ཞག་པོ་ལ་ སྲུྃ་, ནམ་ ཏོ་རྒུན་ ཀོན་འཇོག་རྒེ་ ཕྲུ་རྒུ་རྒུན་ ཉམ་པོ་, ཤི་ཅེ་ རྡང་ རུལ་ཤེ་ མེ་ཀ་ནེ་, ཟི་ཞིད་ཅེན་ནེ་ ཐར་པེ་ན་ ཛོམ་མེན་། 22 ཨ་ཧོ་ རྒྱུའི་ནོག་, ཛེད་ཀན་ ཚང་མ་ ཏག་ས་ཚུག་པ་ལ་, ཕྲུ་རྒུ་ རྐྱེ་ཟ་ནི་ རྐྱེ་ཟེར་ ཡོང་ངེ་ ཙོག་སེ་ པར་རྡོ་ ཆེན་ ནོག་། 23 ཡང་ ཏམ་པེ་ ཐུག་ཡིད་ ཀའོ་ ཡོང་ཅེ་ཅེན་ནེ་ ཅིན་ལབ་ སོན་ཏེ་ ཁག་ཅིག་ འིན་, ཏོ་ ཐོབ་ཀན་ ཨ་ཧོ་རྒུ་ནི་ལ་ པར་རྡོ་ ཁུར་རེན་ ཏེ་ ཞག་པོ་ལ་ ཡུན་རིང་ སྲུང་ངེ་ནོག་། ཡང་ ཀོན་འཇོག་རྒེ་ སོའེ་རྦུ་ ནེན་ནེ་ ཛེད་ཀ་ནེ་ ཕྲུ་རྒུ་རྒུན་ ཙོག་སེ་, ཁོང་ངེ་ ཨ་ཧོ་ལ་ ཐོབ་ཏང་ སོན་ཏེ་ སལ་ཅེ་, མ་ཚེད་ ཟུྃ་སྤོ་ སོ་མ་ཞིག་རྒེ་ ཞལ་ཆེཏ་ ཛེད་ཀ་ནེ་ ཞག་པེ་ཕི་ རེ་ཝ་ སྲན་ཀྲེ་ ཉམ་པོ་ སྲུང་ངེ་ནོག་། 24 ཨ་ཧོ་རྒུན་ རྐྱོབ་རྦེ་ ཛེད་ཟ་ནི་, ཨ་ཧོ་རྒུན་ལ་ ཏེ་ རེ་ཝ་རྦོ་ སལ་ལེ་ ཛེད་། ཀལ་ཏེ་ རེ་ཝ་ པོར་ཧན་འབོ་ ཨ་ཧོའེ་ ལག་ལ་ ཡོད་པེན་ནི་, ཏེ་ནི་ ཨ་ཧོ་རྒུན་ལ་ ཏོ་རྦེ་ཕི་ རེ་ཝ་ ཅོ་རྒོའེ་ མེད་རྡེ་ ནོག་། 25 འིན་ན་ ཀལ་ཏེ་ ཨ་ཧོ་རྒུ་ནི་ ཏག་ས་ ཨ་ཧོའེ་ ལག་ལ་ མེ་ཀན་འབེ་ རེ་ཝ་ ཅོ་ནི་, ཨ་ཧོ་རྒུ་ནི་ ཏོ་ལ་ ཟོད་པ་ རྡང་ ལོ་ཁྱེལ་ ཉམ་པོ་ སྲུང་རྒོའེ་།
26 ཡང་ ཨ་ཧོ་རྒུ་ནི་ འུ་ཐུག་རྒེ་ན་, ཏམ་པེ་ ཐུག་ཡིད་རྡེ་ ཨ་ཧོ་རྒུན་ལ་ ཡ་ཏོ་ ཅོའོ་ ཛེད་རྡེ་ནོག་། སྤེར་ན་, ཀོན་འཇོག་རྒེ་ ཐུག་འདོད་ ནང་ཞིན་ ཨ་ཧོའེ་ མོ་ལམ་ ཀ་ཟུག་ཤིག་ ཡོང་རྒོ་ཤེའོ་ ཨ་ཧོ་རྒུན་ལ་ རྒྱུའི་མེད་རྡེ་ ནོག་། འིན་ན་ ཏམ་པེ་ ཐུག་ཡིད་རྡེ་, ཨ་ཧོ་རྒུ་ནི་ཕི་ ཉིང་ཤུག་ ཉམ་པོ་ མོ་ལམ་ ཞུ་ནོག་, ཀའོ་ ཨ་ཧོ་ལ་ ཚིག་ ཀོལ་རྡེ་ ཤེད་ མ་ཉེན་ནེ་ ནོག་། 27 ཡང་ ཉིང་ ཚང་མ་ ཁྱེན་ནེ་ ཛེད་ཀ་ནེ་ ཡབ་རྦེ་, ཐུག་ཡིད་རྡེ་ མོལ་ཧན་འབོ་ལ་ ཁྱེན་ནེ་ ཛེ་རྡེ་ནོག་། ཅེ་ཞུ་ན་ ཐུག་ཡིད་རྡེ་, ཀོན་འཇོག་ལ་ ཨ་ཧོ་ ཏེཏ་པ་ཅན་རྒུ་ནི་ཕི་ ཁོང་ངེ་ ཐུག་འདོད་ ནང་ཞིན་ལ་ ཞུ་ཝ་ པུ་ལེ་ ཛེ་རྡེ་ནོག་། 28 ཀོན་འཇོག་ལ་ ཤེ་སྤ་ ཅོ་ཀན་ འདང་ ཁོང་ངེ་ རྒྱུ་ཚན་ ཀྲུཔ་ཅེ་ལ་ འབོ་ ཛེད་ཀན་ ཨ་ཧོ་རྒུ་ནི་ ཕན་ཏོག་རྡེ་ཕི་, ཁོང་ངེ་ ཨ་ཧོ་རྒུ་ནི་ མི་ཙེ་ན་ སོང་ཀན་ ཚང་མ་ ཀོལ་ལེ་ ཛེད་ཅེའོ་, ཨ་ཧོ་རྒུན་ལ་ རྒྱུའི་ནོག་། 29 ཀོན་འཇོག་རྒེ་ ཁོ་རང་ངེ་ མི་རྒུན་ འགོ་ཟུག་ནི་ཕ་ལ་ ཁྱེན་ནེ་ ཛེད་ཏེ་ ཁོང་རྒུན་ལ་ ཁོ་རང་ངེ་ སྲེ་ ཙོག་སེ་ འགྱུར་ཤེ་ལ་ འདམ་མེ་ ཛེད་། ཡང་ ནང་ཚང་ ཆོན་མེ་ན་ ཁོང་ངེ་ སྲེ་ འགོ་རྦུ་པོ་ འགྱུར་རེན་། 30 ཡང་ འདམ་མེ་ ཛེད་ཀན་རྒུན་, ཁོ་རང་ས་ འབོ་ ཛེད་། ཡང་ འབོ་ ཛེད་ཀན་རྒུན་, ཁོ་རང་ངེ་ ཧུ་འདུན་ལ་ ཀྲང་པོ་ལ་ ཅོའོ་ ཛེད་། ཡང་ ཀྲང་པོ་ ཅོའོ་ ཛེད་ཀན་རྒུན་ ཉམ་པོ་ ཁོ་རང་ངེ་ ཟི་ཞིད་པོ་ལ་ རྒོ་ཛེད་།
ཀོན་འཇོག་རྒེ་ ཤེ་སྤ་།
31 ཏེ་ ཧ་ལེ་ཤེ་ ཅིན་ལབ་རྒུ་ནི་ ཧོར་ལ་ ཏ་ ཨ་ཧོ་རྒུ་ནི་ ཅི་ ཟེར་རྒོའེ་? ཀལ་ཏེ་ ཀོན་འཇོག་ ཨ་ཧོ་རྒུ་ནི་ ཆོག་ལ་ འིན་ནི་, ཏེ་ནི་ ཨ་ཧོ་རྒུ་ནི་ རྒྱཔ་འགལ་ལ་ སུ་ རྒྱལ་ ཐོབ་རྦེན་། 32 ཀོན་འཇོག་རྒེ་ ཁོང་ངེ་ སྲེ་རྦོ་ལ་ མ་པུད་རྡེ་, ཨ་ཧོ་ ཚང་མེ་ ཏོན་ལ་ སལ་ལེ་ ཛེད་། ཏེ་ནི་ ཅི་ ཁོང་ངེ་ ཨ་ཧོ་རྒུན་ལ་ ཡང་ རྒོའེ་ཤེ་ ཚང་མ་ སལ་ལེ་ མི་ཛེད་རྡེ་? 33 ཀོན་འཇོག་རྒེ་ འདམ་མེ་ ཛེད་ཀན་ ཨ་ཧོ་རྒུ་ནི་ རྒྱཔ་འགལ་ལ་ ཉེད་ སུ་ ཀལ་ཉེ་ནེན་? ཀོན་འཇོག་རྒེ་ ཨ་ཧོ་རྒུན་ ཁོ་རང་ངེ་ ཧུ་འདུན་ལ་ ཀྲང་པོ་ ཅོའོ་ ཛེད་། 34 ཏེ་ནི་ སུའི་ ཨ་ཧོ་རྒུན་ ཤི་ཅེ་ལ་ འོའེ་སྤེ་ འིན་ཀན་འབེ་ ཁྲིམ་ཅེད་ ཏང་ངེན་? སུ་ཞིག་ལ་ མི་ཏང་, ཅེ་ཞུ་ནི་ མ་ཤི་ཀ་ ཡི་ཤུ་ ཨ་ཧོ་རྒུ་ནི་ ཏོན་ལ་ ཀྲོྃ་རྡེ་, སོན་པོ་ ཞྃ་རྡེ་ ཛེད་། ཡང་ ཁོང་ངེ་ ཀོན་འཇོག་རྒེ་ ཆག་ ཡོའེ་སྤེ་ སི་ཝ་ཅེན་ནེ་ ཞུ་ཁྲིའི་ཀ་ ཞུ་རྡེ་ ཨ་ཧོ་རྒུ་ནི་ཕི་ མོ་ལམ་ ཞུ་ནོག་། 35 ཏེ་ནི་ སུའི་ ཨ་ཧོ་རྒུན་ མ་ཤི་ཀེ་ ཤེ་སྤ་ནི་ པེ་ཉེ་ནེན་? ནག་, ཀག་སྤོ་, རྡུ་ངལ་, ལོར་ཧོན་, ལྕུ་རུ་, འཇི་སྤ་ ཡང་, ར་ཡི་ཀ་ནི་ ཤི་ཅེ་། 36 ཏམ་པེ་ སུང་རབ་རྦེ་ན་ རྒྱ་སྤོ་ འདཱ་འབིད་རྡེ་ མོལ་རྡེ་ ནོག་,
“ཉེ་རང་ངེ་ཕི་ ང་ཞ་རྒུན་ ཞག་ཏང་ སེད་ཏུག་།
ང་ཞ་རྒུན་ ལུག་ ཙོག་སེ་ རྐྱེ་ ཅེད་ཏེ་ སེད་ཏུག་།”
37 མི་ཉེན་, ཨ་ཧོ་རྒུན་ མ་ཤི་ཀེ་ ཤེ་སྤ་ནི་ མ་ནི་ པེ་མི་ཉེན་། ཨ་ཧོ་ལ་ ཤེ་སྤ་ ཛེད་ཀན་ མ་ཤི་ཀ་ རྒྱུད་ཏེ་, ཏེ་ ཚང་མེ་ན་ ཨ་ཧོ་རྒུན་ རྒྱལ་ཁ་ ཐོབ་ཀ་ནེ་སང་ ཀྲ་རྒེ་ཞིག་ ནོག་། 38 ང་ ནེན་ཏེན་ ལོ་ཁྱེལ་ རག་, འི་ ཝང་རྒུ་ནི་ ཨ་ཧོ་ ཀོན་འཇོག་རྒེ་ ཤེ་སྤ་ནི་ པེ་མི་ཉེན་: སྤེར་ན་, ཤི་ཅེ་ ཡང་ མི་ཙེ་, ཕོ་ཉ་རྒུན་ ཡང་ རྡུད་རྒུ་ནི་, འི་ཏུའི་ ཡང་ ཡོང་ཅེ་ཅེན་ནེ་ ཏུའི་, 39 ནམ་མེ་ན་ ཡོ་ཀན་ ཡང་ སེ་ ཡོག་ལ་, ནེན་ཏེན་ལ་ ཀོན་འཇོག་རྒེ་ ཛེད་ཀན་ ཚང་མེ་ ནང་ནི་ ཅིག་ལ་ ཨ་ཧོ་རྒུན་ ཀོན་འཇོག་རྒེ་ ཤེ་སྤ་ནི་ པེ་མི་ཉེན་, ཀའོ་ ཨ་ཧོ་རྒུ་ནི་ ཙོབོ་ མ་ཤི་ཀ་ ཡི་ཤུ་ རྒྱུད་ཏེ་ ངོན་ཅུག་རྒེ་ ཛེད་ཏེ་ ནོག་།