འདམ་མེ་ ཛེད་ཀན་ ཨི་ས་ར་ཨེལ་པ་རྒུན་།
9
ངེ་ ཟེར་ཧན་འབོ་ ཀྲང་པོ་ ཡང་ ཟུན་ ཏྃ་རྡེ་ མན་ཀན་འབེ་ སྤང་པོ་ མ་ཤི་ཀ་ འིན་། ངེ་ སེམ་ འདང་ ཏམ་པེ་ ཐུག་ཡིད་རྡེ་ ཏོ་ ནེན་ཏེན་ ཅོ་ནོག་། 2-3 ང་རང་ངེ་ཕི་, ཡ་ཧུ་འདཱ་པེ་ སྤུན་རྒུ་ནི་ཕི་ ངེ་ ཉིང་འབོ་ རྡུ་ངལ་ ཆོན་མོ་ རྡང་ ཐ་མེད་པེ་ ཚེར་ཧེ་ ཀང་འདེ་ རག་། ཀལ་ཏེ་ མ་ཤི་ཀ་ ཉམ་པོ་ ངེ་ འབྲེལ་ ཆེད་ཏེ་ ང་ ཏུའི་རྒྱུན་ནི་ཕི་ ངན་ ཕོག་ཅེ་རྦེ་, ཁོང་རྒུན་ རྐྱོབ་ཉེན་ནེ་ ཡོད་ན་, ང་ ཏོ་རྒུན་ ནེན་ཅེ་ལ་ ཐེད་རྡེ་རག་། 4 ཁོང་རྒུན་ ཨིས་ར་ཡེལ་པ་, ཀོན་འཇོག་རྒེ་ སོའེ་རྦུ་ལ་ འདམ་མེ་ ཛེད་ཀ་ནེ་ ཕྲུ་རྒུ་རྒུན་ ནོག་། ཀོན་འཇོག་རྒེ་ ཟི་ཞིད་པོ་ ཁོང་རྒུན་ལ་ འཇལ་ཅུག་རྒེ་ ཛེད་, ཡང་ ཁོང་རྒུན་ ཉམ་པོ་ ཆེཏ་ཏོན་ ཅོའོ་ ཛེད་ཏེ་ ཏོ་རྒུན་ལ་ ཁོ་རང་ངེ་ ཁྲིམ་ སལ་ལེ་ ཛེད་། ཀོན་འཇོག་རྒེ་ ཁོང་རྒུན་ལ་ ཁོང་ངེ་ ཧ་ལེ་ཤེ་ ཞལ་ཆེཏ་རྒུན་ ཐོབ་ཅེ་ རྡང་ ཁོང་ལ་ ཅོལ་ཤེ་ སི་ཝ་ སལ་ལེ་ ཛེད་། 5 ཨབ་ར་ཧམ་, ཨི་སཱག་ ཏང་, ཡ་ཀུབ་རྒུན་, ཁོང་རྒུ་ནི་ ཕ་མེ་པོ་ ནོག་། མ་ཤི་ཀ་ མི་ ཚུལ་ལ་ ལྟམ་ཟ་ནི་, ཁོང་ ཨིས་ར་ཡེལ་པ་ཞིག་ ཞུ་རྡེ་ འིན་འབེན་། ཡང་ ཁོང་ནི་ ཀོན་འཇོག་ ཞུ་རྡེ་ནོག་། ཁོང་ནི་ ཅི་ཚང་མེ་ཀ་ ཝང་སྲུལ་ ཛེད་ཀན་ འདང་ ཏུའི་རྒྱུན་ རྟོད་པ་ ཐོབ་ཅེ་ འོའེ་སྤ་ ནོག་, ཨ་མེན་།6 ཏེ་ནི་ ཅི་? ཀོན་འཇོག་རྒེ་ ཨིས་ར་ཡེལ་པ་རྒུན་ལ་ ཛེད་ཀ་ནེ་ ཞལ་ཆེཏ་པོ་ འདྲན་འདྲ་ མ་ཀྲུཔ་རྦེ་ ནོག་རྒེ་? མ་ནི་ མག་། ཨིས་ར་ཡེལ་པེ་ ཡུལ་ལ་ རྐྱེ་ཀན་རྒུ་ནི་ ནང་ནི་ལ་ ཚང་མ་, ཀོན་འཇོག་རྒེ་ མི་རྒུ་ནི་ན་ ཐེའེ་ མ་ཛེད་། 7 ཨབ་ར་ཧམ་མེ་ ཕར་རྒྱུད་ འིན་ཀན་རྒུ་ནི་ ནང་ནི་ལ་ ཚང་མ་, ཨབ་ར་ཧམ་མེ་ རྡེན་འབེ་ ཕྲུ་རྒུ་ མག་, ཅེ་ཞུ་ནི་ ཏམ་པེ་ སུང་རབ་རྦེ་ན་ མོལ་རྡེ་ ནོག་, “ཨི་སཱག་ནི་ ཏེ་རྒ་ པུ་ཙའོ་། འིན་, ཀའོ་ རྒྱུད་ཏེ་ ཁྱེ་རང་ངེ་ ཕར་རྒྱུད་རྒུན་ ཆ་ཡོད་།” 8 ཏོ་རྦེ་ ཏོན་འབོ་, ཟུྃ་སྤེ་ ཐོག་ནི་ ཨབ་ར་ཧམ་མེ་ ཕར་རྒྱུད་རྒུན་ ཀོན་འཇོག་རྒེ་ ཕྲུ་རྒུ་ མ་ཐེ་ལ་, ཞལ་ཆེཏ་ ཛེད་ཀ་ནེ་ ཕར་རྒྱུད་རྒུན་, ཨབ་ར་ཧམ་མེ་ ཕྲུ་རྒུ་ ཐེའེ་ ཛེ་རྡེན་། 9 ཅེ་ཟེར་ནི་ ཀོན་འཇོག་རྒེ་ ཞལ་ཆེཏ་ ཛེད་, “ལྟིང་མ་ ལོ་, ཧ་ལམ་ འེ་རྒ་ཏུའི་ཞིག་ལ་ ང་ ལོག་ཏེ་ ཡོང་ཟ་ནི་ སཱ་ར་, པུ་ཙ་ཞིག་ རྐྱེ་རྡེ་ ཡོྃ་ངེན་།”
10 འི་ པུ་ཙའོ་ ཨ་ཧོ་རྒུ་ནི་ ཕ་མེ་པོ་ ཨི་སཱག་ འིན་འབེན་། ཁོའེ་ རེ་འབེ་ཀ་ ན་མ་ ཅོའེ་ ཡང་ རེ་འབེ་ཀ་ པུ་ཙ་ ཚག་ཀྲུག་ རྐྱེ་། 11 འིན་ན་ ཁོང་རྒུན་ རྐྱེ་སང་ ངུལ་ལ་, ཡང་ ཁོང་རྒུ་ནི་ ཟང་པོ་ ཡང་ ངན་པ་ ཅོ་སང་ ངུལ་ལ་, རེ་འབེ་ཀ་ ཀོན་འཇོག་རྒེ་ ཆོག་ནི་ ཁྲིན་ཞིག་ ཐོབ་། འི་ ཁྲིན་འབེ་ ཏོན་འབོ་, ཀོན་འཇོག་རྒེ་ མི་རྒུན་ ཁོ་རང་ངེ་ རྒྱུ་ཚན་ཞིག་རྒེ་ཕི་ འདམ་མེ་ ཛེད་, 12 ཁོང་ངེ་ མི་རྒུན་ འབོ་ ཛེད་, འིན་ན་ ཏོ་རྒུ་ནི་ ལེ་ཧ་ ཟང་པོ་ ཡང་ ངན་པ་རྒུ་ནི་ཀ་ རག་ལེ་རྡེ་ མག་། ཁོང་ངེ་ རེ་འབེ་ཀ་ མོལ་, “ཁྱེ་རང་ངེ་ པུ་ཙ་ ཆེ་རྦེ་ ཆུང་ཙེའོ་ལ་ ཞབ་རྟོག་ ཞུའིན་།” 13 ཏུ་ཟུག་ ཀྲུཔ་ཅེ་ལ་ སུང་རབ་རྦེ་ན་ མོལ་རྡེ་ ནོག་,
“ངེ་ ཡ་ཀུབ་ལ་ ཤེ་སྤ་ ཅོའེ་རྦེན་
འིན་ན་ ཨེ་སུ་ སོག་པོ་ ཅོའེ་རྦེན་།”
14 ཏེ་ནི་ ཨ་ཧོ་རྒུ་ནི་, ཀོན་འཇོག་ མི་འོའེ་སྤ་ ཛེད་ཀན་ཞིག་ ཞུ་རྡེ་ནོག་ ཟེ་རེན་ནེ་? མ་ནི་ མི་ཟེར་། 15 ཀོན་འཇོག་རྒེ་ མོ་ཤེ་ལ་ མོལ་ལེ་ ཛེད་,
“སུ་ལ་ ངེ་ ཉིང་ཞེ་ ཟིག་ཤེ་ལ་ ཐེད་རྡེ་ཡོད་། ཁོ་ ངེ་ ཉིང་ཞེ་ ཟིག་རྡེན་།
ཡང་ སུ་ལ་ ངེ་ ཀ་ཀྲིན་ ལྟན་ཅེ་ལ་ ཐེད་རྡེ་ཡོད་། ཁོ་ ངེ་ ཀ་ཀྲིན་ ལྟན་ནེན་།”
16 ཏེ་རྒ་འབེ་ཕི་ལ་ ཏོ་ མི་ འདོད་པེ་ ཡ་ སོན་འགྲུའི་རྡེ་ཀ་ མག་, ཀོན་འཇོག་རྒེ་ ཉིང་ཞེ་ཀ་ རག་ལེ་རྡེ་ ནོག་།
17 ཀོན་འཇོག་རྒེ་ ཨི་འཇིབ་རྦེ་ རྒྱ་སྤོ་ ཕེ་རོ་ མོལ་ཧན་འབོ་ སུང་རབ་རྦེ་ན་ འབྲི་ཛེད་ཏེ་ ནོག་, “ཁྱེ་རང་ངེ་ན་ ངེ་ ཤེད་པོ་ ལྟན་ཅེ་ རྡང་ ངེ་ མིང་འབོ་ འཇིག་རྟེན་ སོན་ཏེ་ན་ ཕེལ་ཅུག་ཅེ་ཕི་ ངེ་ ཁྱེ་རང་ འདམ་འདེ་ འིན་།” 18 ཏེ་རྒ་རྦེ་ཕི་ལ་ ཀོན་འཇོག་རྒེ་ ཉིང་ཞེ་ ལྟན་ཅེ་ ཐུག་འདོད་ ཡོ་ཀན་རྒུ་ནི་ཀ་ ཉིང་ཞེ་ ལྟན་ནེ་ ཛེ་རྡེན་, ཡང་ ཁོང་ངེ་ ཉིང་ ཀྱོང་པོ་ ཅོའོ་ ཛེད་ཅེ་ ཐུག་འདོད་ ཡོ་ཀན་རྒུ་ནི་ ཉིང་རྒུན་ ཀྱོང་པོ་ ཛེད་རྡེན་།
19 ཁྱི་ཞ་རྒུ་ནི་ ཟེར་སྲིད་ཅེ་ ནོག་, “སེམ་འགྱུར་རྡེ་ འགྱོད་པ་ མ་ཅོ་ཀན་རྒུན་ལ་ ཅེ་ ཀོན་འཇོག་རྒེ་ ཉེད་ཀལ་ལེ་ ཛེ་རྡེ་ནོག་? ཀོན་འཇོག་རྒེ་ ཁོང་རྒུན་ལ་ ཅོ་ཅུག་རྒེ་ ཛེད་ཀན་འབོ་ ཁོང་རྒུ་ནི་ ཅོའེ་རྡེ་ མ་ནོག་རྒེ་? 20 འིན་ན་ ཀོན་འཇོག་རྒེ་ རྒྱཔ་འགལ་ལ་ སྤེ་ར་ ཟེར་ཧན་ ཁྱེ་རང་ མི་ སུ་ འིན་? ཅོ་ཀན་རྦེ་ ཅོའོ་ ཛེད་ཀན་འབོ་ལ་ ཟེར་རྒོའེ་, ‘ཅེ་ ཉེ་རང་ངེ་ ང་ འི་ཟུག་ ཅོའོ་ ཛེད་ཏེ་ འིན་?’” 21 ཟ་མ་ ཅོ་ཀན་ཞིག་རྒེ་ ཏེ་རྒ་ ཀ་ལག་པེ་ཀ་ནི་ ཟ་མ་ ཅིག་, སི་ཝ་ཅེན་ནེ་ ལེ་ཧ་ལ་ ཀོལ་ཤེ་, ཡང་ ཅིག་ ཞག་ཏང་ངེ་ ལེ་ཧ་ལ་ ཀོལ་ཤེ་ཕི་, ཅོ་ཅེ་ ཐོབ་ཏང་ ཁོ་ མེད་རྡེ་ ནོག་རྒེ་? 22 ཏེ་རྒ་ ཙོག་སེ་, ཞེན་ ཀོན་འཇོག་ལ་ ཁོ་རང་ངེ་ ཐུག་སྲོ་ རྡང་ ཤེད་པོ་ ལྟན་ཅེ་ ཐོབ་ཏང་ ཡོད་ནྃ་, ཁོང་ངེ་ ཐུག་སྲོ་ པབ་ཅེ་ རྡང་ ལྟོང་ཤེ་ ཆོག་ལ་ ཆ་ཀན་རྒུ་ནི་ཀ་ མ་སྲན་ཀྲེ་ ཟོད་པ་ རྒོམ་མེ་ ཛེ་རྡེ་ནོག་། 23 ཁོང་ངེ་ ཉིང་ཞེ་ ལྟན་ནེ་ ཛེད་ཀན་རྒུ་ནི་ཀ་ ཁོང་ངེ་ ཐུག་ཞེ་ ཙམ་ཤིག་རྒེ་ རྒྱེ་སྤ་ འིན་ཀན་འབོ་ ལྟན་ཅེ་ལ་ ཁོང་ངེ་ ཏོ་ ཅོའོ་ ཛེད་། ཡང་ ཁོང་ངེ་ ཏོ་རྒུན་ ངུལ་ནེ་ཕ་ལ་ རྡེ་བ་ཅན་ན་ ཟི་ཞིད་ཅེན་ནེ་ ས་ཅེ་ཕི་ ཀྲལ་འགྲིག་ ཅོའོ་ ཛེད་ཏེ་ འིན་འབེན་། 24 ཁོང་ངེ་ འདམ་མེ་ ཛེད་ཀན་རྒུ་ནི་ན་ ཨ་ཧོ་རྒུན་ལ་ ནོག་, ཡ་ཧུ་འདཱ་པ་རྒུན་ ཅིག་པེ་ཕི་ མ་ནོག་ ཡ་ཧུ་འདཱ་པ་ མན་ཀན་རྒུ་ནི་ཕི་ལ་ ནོག་།
25 ཀ་ཟུག་ ཡ་ཧུ་འདཱ་པ་ མན་ཀན་རྒུ་ནི་ ཧོར་ལ་ ལུང་རྟོན་པ་ ཧོ་ཤཱ་ཡེ་ སྤེ་ཆེ་ན་ ཀོན་འཇོག་རྒེ་ མོལ་ལེ་ ཛེད་,
“ངེ་ མན་ཀ་ནེ་ མི་རྒུན་ལ་ ངེ་ ང་རང་ངེ་ མི་ ཟེ་རེན་།
ཡང་ ངེ་ ཤེ་སྤ་ མ་ཅོ་ཀན་རྒུན་ལ་ ངེ་ ཤེ་སྤ་ ཅོའེན་།”
26 ཡང་ “‘ཁྱེ་རང་རྒུན་ ངེ་ མི་རྒུན་ མན་’ མོལ་ཧ་ནེ་ ཏེ་རྒ་ ས་ཅ་རྦེ་ཀ་
ཁོང་རྒུན་ལ་, ‘སོན་པོ་ ཀོན་འཇོག་རྒེ་ ཕྲུ་རྒུ་རྒུན་’ མོལ་ལེན་།”
27 ཡང་ ཨིས་ར་ཡེལ་པ་རྒུ་ནི་ ཧོར་ལ་ ལུང་རྟོན་པ་ ཡེ་ཤ་ཡཱེ་ ཀུ་ཅུ་ ཏང་ངེན་ ཟེར་,
“ཞན་ ཨིས་ར་ཡེལ་པེ་ མི་རྒུན་ རྒྱམ་ཚོའེ་ ཐ་མ་ ཡོ་ཀ་ནེ་
པེ་མ་ ཙོག་སེ་ མང་པོ་ ཡོད་ཏེ་ལ་, ཁ་ཅིག་ མ་ནི་ མི་རྐྱོབ་།
28 ཅེ་ཟེར་ནི་ ཙོབོ་རྡེ་, ཁོ་རང་ངེ་ ཆེད་པ་རྦོ་ འི་ འཇིག་རྟེན་ནེ་ཀ་
འགྱོ་སྤ་ རྡང་ སོན་ཏེ་ ཁྱོང་ངེ་ ཛེ་རྡེན་།”
29 ཏམ་པེ་ སུང་རབ་རྦེ་ ཞེན་ཡང་ ས་ཅ་ཞིག་རྒེ་ན་ ཡེ་ཤ་ཡཱེ་ འེ་རྒ་ སྤེ་རའོ་ འབྲི་ཛེད་ཏེ་ ནོག་,
“ཀལ་ཏེ་ རྡེ་བ་ཅན་ནེ་ མག་མི་རྒུ་ནི་ ཙོབོ་རྡེ་,
ཨ་ཧོའེ་ ཕྲུ་རྒུ་ ཉུང་ཙེ་ཞིག་ པུད་རྡེ་ མ་ཛེད་པེ་ནི་,
ཏེ་ནི་ ཨ་ཧོ་རྒུན་ སོ་འདོམ་པ་ ཙོག་སེ་ མེ་ཀན་
ཡང་ འགའ་མོ་ར་པ་ ཙོག་སེ་ ལྟོང་རྡེ་ ཡོད་ཁྲོ་།”
ཏེཏ་པ་ མེ་ཀ་ནེ་ ཨིས་ར་ཡེལ་པ་རྒུན་།
30 ཏེ་ ཚང་མེ་ ཏོན་འབོ་ ཏེ་ནི་ ཅི་ ནོག་? ཞེན་ ཡ་ཧུ་འདཱ་པ་ མན་ཀན་རྒུ་ནི་, ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ཤེ་ ཙོན་འགྲུའི་ མ་ཅོ་ནྃ་, ཁོང་རྒུ་ནི་ ཏེཏ་པ་ ཅོ་ཅེ་རྦེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་། 31 འིན་ན་ ཨིས་ར་ཡེལ་པ་རྒུ་ནི་ ཁྲིམ་རྒུན་ ཁ་ཉེན་འདེ་ ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ཤེ་ ཧོཔ་ ཙོན་འགྲུའི་ ཅོ་རྡང་, ཁྲང་པོ་ མ་ནི་ མ་ལུའི་། 32 ཅེ་ ཁྲང་པོ་ མ་ལུའི་? ཅེ་ཟེར་ནི་ ཁོང་རྒུ་ནི་ ཏེཏ་པ་ མེད་པེ་, ཁྲིམ་ ཁ་ཉེན་འདེ་ ལེ་ཧ་ ཅོ་ཅེའོ་ རྒྱུད་ཏེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ཤེ་ ཙོན་འགྲུའི་ ཅོའེ་། ཁོང་རྒུན་ ཁོ་རང་རྒུ་ནི་ ལམ་མེ་ཀ་ ཡོ་ཀ་ནེ་ རྡོ་ ཆོན་མེ་ཀ་ རྒག་ ཕུག་ཏེ་ ནོག་། 33 ཀོན་འཇོག་རྒེ་ ཡ་ཧུ་འདཱ་པ་རྒུན་ལ་ ཏོ་རྦེ་ ཧོར་ལ་ སྤང་པུད་རྡེ་ ཛེད་, ནམ་ ཁོང་ངེ་ ཏམ་པེ་ སུང་རབ་རྦེ་ན་ མོལ་,
“ངེ་ ཡེ་རུ་ཤ་ལེམ་མེ་ན་ མི་རྒུན་ལ་ རྒག་ ཕུག་ཅུག་ཀ་ནེ་
རྡོ་ཞིག་ པོ་རེ་ཡོད་, འགྱེལ་ཅུག་ཀ་ནེ་ ཕོ་ལོང་ཞིག་།
འིན་ན་ སུ་ཞིག་ ཁོང་ངེ་ན་ ཏེཏ་པ་ ཅོ་ནི་,
ཁོང་རྒུན་ ཕམ་པོ་ མི་ཆ་།”