10
ཤེ་སྤ་ སྤུན་རྒུན་, ངེ་ ཉིང་ངེ་ འདོད་པ་ རྡང་ ཀོན་འཇོག་ལ་ མོ་ལམ་ ཞུ་ཅེའོ་ ཨིས་ར་ཡེལ་པ་རྒུན་ རྐྱོབ་ཅེ་ཕི་ འིན་། 2 ཁོང་རྒུ་ནི་ ཀོན་འཇོག་ ཐུག་ཐེད་ཅུག་ཅེ་ འདོད་པེ་ན་ ཙོན་འགྲུའི་ ཧོཔ་ ཅོ་ཀན་འབོ་ལ་ ངེ་ སྤང་པོ་ ཏང་ངེ་ཡོད་, འིན་ན་ ཁོང་རྒུ་ནི་ ཀོན་འཇོག་ ཙལ་ཤེ་ ལམ་འབོ་ ནོར་རྡེ་ ནོག་། 3 ཁོང་རྒུན་ལ་ ཀོན་འཇོག་རྒེ་ ཆོག་ནི་ ཡོང་ཀ་ནེ་ ཀྲང་པེ་ ཧོར་ལ་ རྒྱུའི་མེད་རྡེ་ ནོག་། ཁོང་རྒུན་ ཀོན་འཇོག་རྒེ་ ཀྲང་པེ་ ལམ་མེ་ཀ་ འགྲུལ་ཤེ་ལ་ མ་ཐེད་རྡེ་, ཁོ་རང་རྒུ་ནི་ ཙོན་འགྲུའི་ རྒྱུད་ཏེ་, ཀྲང་པོ་ འགྱུར་ཤེ་ལ་ ཐེད་རྡེ་ནོག་། 4 མ་ཤི་ཀེ་ན་ ཁྲིམ་མེ་ རྒོའེ་ཤེ་ ཚང་མ་ ཀྲུཔ་རྦེ་ ཛེད་ཏེ་ ནོག་, ཏོ་རྦེ་ འབྲེ་རྦུ་ ཁོང་ངེ་ན་ ཏེཏ་པ་ ཅོ་ཀན་ ཚང་མ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ ཅོའོ་ ཛེད་རྡེ་ནོག་།ཐར་པ་ ཚང་མེ་ཕི་།
5 མོ་ཤེ་ འབྲི་ ཛེད་, ཁྲིམ་ ནང་ཞིན་ མི་ཞིག་ ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ཤེ་ རྒོའེ་ཤེའོ་ “ཁྲིམ་ ཚང་མ་ ཁ་ཉེན་རྒོ་ཤེ་ ནོག་།” 6 འིན་ན་ ཏེཏ་པ་ རྒྱུད་ཏེ་ ཀོན་འཇོག་རྒེ་ ཧུ་འདུན་ལ་ ཀྲང་པོ་ འགྱུར་ཤེ་ ལབ་ཞ་རྦེ་ མོལ་, “ཁྱི་ཞི་ ཉིང་ངེ་ན་, ‘སུ་ རྡེ་བ་ཅན་ ཆེན་’ ཅེ་ ས་མེ་རག་? ཡང་ནི་ ཡོག་ལ་ རྐྱོད་ཏེ་ ཐར་པེ་ ཁྲིན་འབོ་ ཨ་ཧོ་རྒུན་ལ་ ཤེད་རྡེ་ ཛེད་ཅེ་ཕི་ མ་ཤི་ཀ་ འབོ་ལ་།” 7 ཡང་ ཅི་ ས་མེ་ཡོད་, “ཡོག་ལ་ ཤི་ཀན་རྒུ་ནི་ མལ་ལེ་ན་ སུ་ ཆེན་?” ཡང་ནི་ ཏེ་ནང་ནི་ མ་ཤི་ཀ་ འབིང་འདེ་ རྐྱོད་ཏེ་ ཐར་པེ་ ཁྲིན་འབོ་ ཨ་ཧོ་རྒུན་ལ་ ཤེད་རྡེ་ ཛེད་ ཟེར་ཤེ་ལ་། 8 འིན་ན་ ཏེཏ་པེ་ ཧོར་ལ་ ལབ་ཞེ་ ཅི་ མོལ་འདུག་?
“ཁྲིན་འབོ་ ཁྱི་ཞི་ ལག་ལ་ ཡོད་ཏེ་ ནོག་
ཏོ་ ཁྱི་ཞི་ ཁལ་སྤག་ རྡང་ ཉིང་རྒུ་ནི་ན་ ཡོད་ཏེ་ ནོག་།”
ཡང་ ཏེ་རྒ་ ཁྲིན་འབོ་, མ་ཤི་ཀེ་ན་ ཏེཏ་པ་ ཅོ་ཅེ་ལ་ ང་ཞི་ ཆོའེ་ཤེད་ཀ་ནེ་ ཁྲིན་འབོ་ འིན་། 9 ཀལ་ཏེ་ ཁྱི་ཞ་ རང་ངེ་ ཁ་ནི་, “ཡི་ཤུ་ ཙོབོ་ འིན་ཀན་འབོ་” ཟེར་ཤེ་ རྡང་ ཀོན་འཇོག་རྒེ་ ཁོང་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཏེ་ འིན་ཀན་འབོ་ལ་ ཏེཏ་པ་ ཅོ་ནི་, ཁྱི་ཞ་ ཐར་པ་ ཐོབ་རྦེ་ནོག་། 10 ཁྱི་ཞ་རྒུ་ནི་ ཉིང་ངེ་ན་ ཏེཏ་པ་ ཡོད་ཅེ་རྦེ་, ཁྱི་ཞ་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཅོའོ་ ཛེད་, ཡང་ ཁ་ནི་ ཤེད་ཅེ་རྦེ་, ཁྱི་ཞ་རྒུན་ རྐྱོབ་རྦེ་ཛེད་། 11 ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ ནོག་, “ཁོང་ངེ་ན་ ཏེཏ་པ་ ཅོ་ཀན་རྒུ་ནི་ རེ་བ་རྦོ་ མ་ནི་ ཅག་རྒེ་ མི་ཛེད་།” 12 ཡ་ཧུ་འདཱ་པ་ རྡང་ ཡ་ཧུ་འདཱ་པ་ མན་ཀན་རྒུ་ནི་ན་ ཅང་ ཁྱེད་ མེད་ཏེ་ ནོག་། ཏེ་རྒ་ ཙོབོ་རྦོ་ ཚང་མེ་ ཙོབོ་ ནོག་, ཡང་ ཁོང་ལ་ ཞུ་ཝ་ པུལ་ཧན་རྒུན་ལ་ ཉིང་ པེ་རྡེ་ སལ་ལེ་ ཛེ་རྡེ་ནོག་། 13 ཅེ་ཞུ་ནི་ “ཙོབོ་ ཀོན་འཇོག་ལ་ རྐྱོབ་ཅེ་ལ་ ཞུ་ཝ་ པུལ་ཧན་ ཚང་མ་ ཁོང་ངེ་ རྐྱོབ་རྦེ་ ཛེད་རྡེན་།”
14 ཏེ་ནི་ ཁོང་རྒུ་ནི་ ཀ་ཟུག་རྒེ་ ཞུ་ཝ་ པུ་ལེན་, ཀལ་ཏེ་ ཁོང་རྒུ་ནི་ ཁོང་ལ་ ཏེཏ་པ་ མ་ཅོ་ནི་? ཡང་ ཁོང་རྒུ་ནི་ ཀ་ཟུག་རྒེ་ ཏེཏ་པ་ ཅོའེན་, ཀལ་ཏེ་ ཁོང་རྒུ་ནི་ ཁོང་ངེ་ ཧོར་ལ་ མ་ནི་ མ་ཚོར་རེ་ ཡོད་ནི་? ཡང་ ཁོང་རྒུན་ལ་ ཀ་ཟུག་རྒེ་ ཚོར་རེན་ ཀལ་ཏེ་ སུ་ཞིག་ལ་ ཁོང་ངེ་ ཧོར་ལ་ མ་ཤེད་ནི་? 15 ཡང་ ཆོའེ་ཤེད་ཀན་འབོ་ ཀལ་རྡེ་ མ་ནི་ ཀ་ཟུག་རྒེ་ ཁོའེ་ མི་རྒུན་ལ་ ཆོའེ་ཤེད་རྡེན་? ཏེ་རྒ་རྦེ་ཕི་ལ་ ཏམ་པེ་ སུང་རབ་རྦེ་ན་ མོལ་རྡེ་ ནོག་, “ནེ་ཚུལ་ ཟང་པོ་ ཁྱོང་ཀན་རྒུ་ནི་ ཧང་པ་ ཙམ་ཤིག་རྒེ་ ཅིན་ལབ་ཅེན་ མ་རྒེ་།”
16 འིན་ན་ སུ་ཚང་མེ་ ནེ་ཚུལ་ ཟང་པོ་ལ་ རྒ་སུའི་ ཞུ་མག་, ཅེ་ཟེར་ནི་ ལུང་རྟོན་པ་ ཡེ་ཤ་ཡཱེ་ ཟེར་, “ཙོབོ་ལེ་ སུའི་ ཨ་ཧོའེ་ ཁྲིན་འབོ་ལ་ རྡེན་ཆེ་ཤེ་ ཅོའེ་?” 17 སོང་པེ་སང་ ཁྲིན་འབོ་ ཉེན་ཅེ་ ཅིག་པོ་ རྒྱུད་ཏེ་ ཏེཏ་པ་རྦོ་ ཡོང་ངེ་ནོག་, ཡང་ ཏེ་ ཁྲིན་འབོ་ནི་ མ་ཤི་ཀེ་ ཧོར་རེ་ ནེ་ཚུལ་ ཟང་པོ་ ནོག་། 18 འིན་ན་ ངེ་ འདྲི་འིན་, ཅི་ ཨིས་ར་ཡེལ་པ་རྒུན་ལ་ ཁྲིན་འབོ་ མ་ཚོར་རེ་ ནོག་རྒེ་? འོ་ནེ་, ཁོང་རྒུ་ནི་ ཚོར་རྡེ་ ནོག་,
“ཁྲིན་འབོ་ འཇིག་རྟེན་ སོན་ཏེ་ན་ ཕེལ་རྡེ་ ནོག་,
ཡང་ ཀའ་འབོ་ འཇིག་རྟེན་ནེ་ ཐ་མ་ཚུག་པ་ལ་ ལེབ་ཏེ་ ནོག་།”
19 འིན་ན་ ངེ་ ཡང་ འདྲིན་, ཅི་ ཨིས་ར་ཡེལ་པ་རྒུན་ལ་ ཧ་མ་ཀོ་ ནོག་རྒེ་? ཁོང་རྒུ་ནི་ ཧ་ཀོ་རྡེ་ ནོག་, ཅེ་ཟེར་ནི་ མོ་ཤེ་རྡེ་ ཏུའི་ལ་ ཀོན་འཇོག་རྒེ་ མོལ་ལེ་ ཛེད་,
“རྒྱལ་ཁབ་ མན་ཀ་ནེ་ མི་རྒུན་ རྒྱུད་ཏེ་,
ངེ་ ཁྱི་ཞ་རྒུན་ལ་ ཕྲ་རྡོག་ རྐྱེ་ཅུག་འིན་,
ཧ་འགྲང་ངེ་ ཡ་ཧུ་འདཱ་པ་ མན་ཀན་རྒུན་ རྒྱུད་ཏེ་,
ངེ་ ཁྱི་ཞ་རྒུ་ནི་ན་ སྲོ་ རྐྱེ་ཅུག་རྒེན་།”
20 ཡང་ ལྟིང་ནི་ ཀོན་འཇོག་རྒེ་ ཆོག་ནི་ ཡེ་ཤ་ཡཱེ་ ཧམ་པ་ཉམ་པོ་ མོལ་,
“ང་ མ་ཙལ་ཀ་ནེ་ མི་རྒུ་ནི་ ངེ་ན་ ཏེཏ་པ་ ཅོའེ་།
ང་ ཤེ་ཉིན་ མ་འགྲོ་ཀན་རྒུན་ལ་, ངེ་ ང་རང་ ངོན་ཅུག་པེན་།”
21 འིན་ན་ ཨིས་ར་ཡེལ་པ་རྒུ་ནི་ ཧོར་ལ་ ཀོན་འཇོག་རྒེ་ མོལ་,
“ཉི་མ་ སོན་ཏེ་ ངེ་ ང་རང་ངེ་ ལག་པ་ ཁོང་རྒུན་ལ་ རྒ་སུའི་ ཞུ་ལ་ རྐྱང་འདེ་ པོར་རྦེན་,
འིན་ན་ ཁོང་རྒུན་ ཁ་མི་ཉེན་ འདང་ ངོ་ལོག་ ཅོ་ཀན་ ཡོད་པེན་།”