ཀོན་འཇོག་རྒེ་ ཉིང་ཞེ་ ཨིས་ར་ཡེལ་པ་རྒུ་ནི་ཀ་།
11
ཏེ་ནི་ ངེ་ འདྲིན་, ཅི་ ཀོན་འཇོག་རྒེ་ ཁོ་རང་ངེ་ མི་ ཨིས་ར་ཡེལ་པ་རྒུན་ ཕང་ངེ་ ཛེད་ཏེ་? མ་ནི་ ཕང་ངེ་ མ་ཛེད་། ང་ ང་རང་ ཨིས་ར་ཡེལ་པ་ཞིག་, ཨབ་ར་ཧམ་མེ་ ཕར་རྒྱུད་, འབེན་ཡཱ་མིན་ རྡེ་ནི་ འིན་། 2 ཀོན་འཇོག་རྒེ་ འགོ་ཟུག་ནི་ཕ་ལ་ འདམ་མེ་ ཛེད་ཀ་ནེ་ ཁོ་རང་ངེ་ མི་རྒུན་ ཕང་ངེ་ མ་ཛེད་། ཅི་ ཏོ་རྦེ་ ཧོར་ལ་ ཏམ་པེ་ སུང་རབ་རྦེ་ན་ མོལ་ཧན་འབོ་ ཁྱི་ཞ་རྒུན་ལ་ རྒྱུའི་མེད་རྡེ་? ལུང་རྟོན་པ་ ཨེ་ལི་ཡཱེ་ ཨིས་ར་ཡེལ་པ་རྒུ་ནི་ རྒྱཔ་འགལ་ལ་ ཀོན་འཇོག་རྒེ་ ཞུ་ཝ་ པུལ་, 3 “ཙོབོ་ལེ་ ཁོང་རྒུ་ནི་ ཉེ་རང་ངེ་ ལུང་རྟོན་པ་རྒུན་ སེད་ཏེ་ ཉེ་རང་ངེ་ ཆོད་ཁྲི་རྒུན་ ཤིག་། ང་རང་ ཅིག་པོ་ ལུའི་རྡེ་ ཡོད་, ཡང་ ཁོང་རྒུ་ནི་ ང་ལ་ སེད་ཅེ་ ཙོན་འགྲུའི་ ཅོ་རུག་།”4 ཡང་ ཀོན་འཇོག་རྒེ་ ལེན་སལ་ལེ་ ཛེད་ཀན་འབོ་ ཁྱི་ཞ་རྒུན་ལ་ འི་ཏུ་ མེ་རག་རྒེ་? “ངེ་ ང་རང་ངེ་ཕི་ འབཱལ་ ཟེར་ཧ་ནེ་ ཧུན་འདྲེ་ འདུན་ལ་ ཆག་ མ་པུལ་ཀན་ རྟོང་རྡུན་ རྐྱོབ་ཏེ་ པོར་རྡེ་ ཡོད་།”
5 ཏོ་ཙོག་སེ་ ཏི་རིང་ལ་ ནོག་, ཀོན་འཇོག་རྒེ་ ཐུག་ཞེ་ ཅོའེ་རྡེ་, ཨིས་ར་ཡེལ་པ་ ཉུང་ཙེ་ཞིག་ ཀོན་འཇོག་ལ་ ལོ་ཁྱེལ་ཅེན་ ལུའི་རྡེ་ནོག་། 6 ཡང་ ཀལ་ཏེ་ ཐུག་ཞེ་ ཅོའེ་རྡེ་ འིན་ནི་, ཏེ་ནི་ ཏོ་ ཁོང་རྒུ་ནི་ ལེ་ཧ་ ཟང་པོ་ ཅོའེ་རྡེ་ མག་། ཀལ་ཏེ་ འིན་འབེན་ནི་ ཏེ་ནི་ ཁོང་ངེ་ ཐུག་ཞེ་རྦོ་, རིན་ མ་ཤལ་ལེ་ ཡང་ འོའེ་སྤ་ མེད་རྡེ་ ཐོབ་ཏེ་ མེད་ཁྲོ་།
7 ཏེ་ནི་ ཅི་? ཀོན་འཇོག་རྒེ་ ཆོག་རྐྱོར་ ཐོབ་ཅེ་ལ་ ཙོན་འགྲུའི་ ཅོའེ་རྡེ་ ཙལ་ལེན་ ཡོ་ཀན་ ཨིས་ར་ཡེལ་པ་ མང་ཆེ་རྦོ་ལ་ མ་ཐོབ་རྦེ་ ནོག་རྒེ་? ཀོན་འཇོག་རྒེ་ འདམ་མེ་ ཛེད་ཀན་ ཁ་ཅིག་ལ་ ཐོབ་ཏེ་ ནོག་, འིན་ན་ ལུའི་ཧན་རྒུ་ནི་ ཁོ་རང་རྒུ་ནི་ ཉིང་ ཀྱོང་པོ་ ཅོའེ་། 8 ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ ནོག་,
“ཀོན་འཇོག་རྒེ་ ཁོང་རྒུ་ནི་ སམ་བ་རྒུན་ ཁྱོར་ཤུག་རྒེ་ ཛེད་,
ཁོང་རྒུན་ལ་ མིག་ ཡོད་ཏེ་ལ་ མ་ཐོང་ངེ་ ནོག་
ཡང་ ནམ་ཅོག་ ཡོད་ཏེ་ལ་ མ་ཚོར་རེ་ ནོག་།”
9 ཏེ་རྒ་ ཙོག་སེ་ འདཱ་འབིད་རྡེ་ མོལ་,
“ཁར་ཞི་ ཀང་འདེ་ ཡོ་ཀ་ནེ་ ཁོང་རྒུ་ནི་ ཅོག་ཙེ་རྦོ་
ཁད་ཅེ་ པིལ་ལྟེམ་ འགྱུར་ཤིག་།
ཁོང་རྒུ་ནི་ ཅིན་ལབ་པེ་ ཁོང་རྒུན་ལ་ རྒག་ ཕུག་ཅུག་།
ཡང་ ཁོང་རྒུན་ལ་ འོའེ་སྤ་ འིན་ཀན་འབོ་ ཐོབ་ཤིག་།
10 ཁོང་རྒུན་ལ་ མི་ཐོང་ཅེ་ཕི་ ཁོང་རྒུ་ནི་ མིག་ ཞར་ ཤུག་ཤིག་།
ཡང་ ལྕིན་ཀྲེ་ ཁུར་ཤེ་རྦེ་, ཁོང་རྒུན་ ཏུའི་རྒྱུན་ནི་ཕི་ ཀུར་ཀུར་ འགྱུར་ཤིག་།”
11 ཅི་ ཨིས་ར་ཡེལ་པ་རྒུན་ རྒག་ ཕུག་ཏེ་ ལྃ་ མ་ནི་ མི་ཉེན་ཅེ་, ཏེ་ཟམ་ སྲན་ཀྲེ་ འགྱེལ་ལེ་? མ་ནི་ མ་འགྱེལ་། འིན་ན་ ཁོང་ངེ་ ཁ་ མི་ཉེན་ཅེ་, ཀོན་འཇོག་རྒེ་ ཐར་པ་འབོ་ ཡ་ཧུ་འདཱ་པ་ མན་ཀན་རྒུན་ལ་ སལ་ལེ་ ཛེད་། ཁོང་ངེ་ ཏོ་ ཅོའོ་ ཛེད་ཅེ་ རྒྱུ་ཚན་འབོ་ནི་ ཨིས་ར་ཡེལ་པ་རྒུན་ལ་ ཕྲ་རྡོག་ ཡོྃ་རྡེ་, ཁོ་རང་རྒུ་ནི་ཕི་ ཐར་པ་རྦོ་ ནེན་ཅེ་ལ་ ནོག་། 12 འིན་ན་ ཁོང་རྒུ་ནི་ རྡིག་པ་ ཅོ་ཅེའོ་, འཇིག་རྟེན་ སོན་ཏེ་ མི་རྒུ་ནི་ཕི་ ཅིན་ལབ་, ཡང་ ཁོང་རྒུན་ལ་ ཀོན་འཇོག་རྒེ་ ཆོག་རྐྱོར་ མི་ཐོབ་ཅེའོ་, ཡ་ཧུ་འདཱ་པ་ མན་ཀན་རྒུ་ནི་ཕི་ ཅིན་ལབ་ ཁྱོང་ངེ་ཡོད་ནི་, ཏེ་ནི་ ཡ་ཧུ་འདཱ་པ་ ཚང་མེ་ མ་ཤི་ཀེ་ན་ ཏེཏ་པ་ ཅོ་ཟ་ནི་, ཏེཏ་པ་ཅེན་ ཚང་མ་ལ་ ཙམ་ཤིག་རྒེ་ ཆོན་མོ་ ཅིན་ལབ་ མི་ཐོབ་།
13 ངེ་ འི་ ཚང་མ་ ཁྱི་ཞ་ ཡ་ཧུ་འདཱ་པ་ མན་ཀན་རྒུན་ལ་ ཟེ་འིན་, ཀོན་འཇོག་རྒེ་ ང་ ཡ་ཧུ་འདཱ་པ་ མན་ཀན་རྒུ་ནི་ཕི་ ཧུ་ཚབ་ལ་ ཧོ་ ཛེད་ཅེ་རྦོ་ལ་ ཕོ་སོ་ ཚོར་རེ་རག་། 14 འིན་ན་ ངེ་ ལེ་ཧ་རྦེ་, ཨིས་ར་ཡེལ་པ་རྒུན་ལ་ ཁྱི་ཞ་ ཡ་ཧུ་འདཱ་པ་ མན་ཀན་རྒུན་ལ་ ཡོ་ཀན་འབེ་ཀ་ ཕྲ་རྡོག་ ཡོང་ཅུག་ཏེ་ ཁོང་ ཁ་ཅིག་ལ་ རྐྱོབ་ཉེན་ཅེ་ ངེ་ རེ་ཝ་ འིན་། 15 ཀལ་ཏེ་ ཁོང་རྒུ་ནི་ ཕང་ཅེ་རྦེ་, ཀོན་འཇོག་རྒེ་ ཐར་པའོ་ ཞེན་ཡང་ འཇིག་རྟེན་པ་རྒུན་ལ་ སལ་ལེ་ ཛེ་རྡེ་ཡོད་ནི་, ཏེ་ནི་ ཨིས་ར་ཡེལ་པ་རྒུ་ནི་ལ་ ཏེ་ ཐར་པ་རྦོ་ ནེན་ཟ་ནི་, ཙམ་ཤིག་རྒེ་ མང་ངེ་ ཐེད་པོ་ མི་ཡོང་། ཏོ་ ཤི་ཀན་རྒུ་ནི་ཕི་ མི་ཙེ་ འགྱུ་རེན་། 16 ཀལ་ཏེ་ འགོ་མེ་ ཁ་ཟོའེ་ ཙོག་སེ་ པག་པེ་ ཁག་ཅིག་ པུལ་ཧན་འབོ་ ཏམ་པ་ འིན་ནི་, ཏེ་ནི་ པག་པེ་ སོན་ཏེ་ ཏམ་པ་ ནོག་། ཏེ་རྒ་ ཙོག་སེ་ ཨ་ཧོ་ ཡ་ཧུ་འདཱ་པ་རྒུ་ནི་ ཕ་མེ་པོ་རྒུན་ ཏམ་པ་ འིན་ནི་, ཏེ་ནི་ ཁོང་རྒུ་ནི་ ཕར་རྒྱུད་རྒུན་ལ་ ཏམ་པ་ ནོག་། ཀལ་ཏེ་ ཨོ་ལི་ཝེ་ ལྕང་མེ་ པ་ཀྲག་པོ་ ཏམ་པ་ འིན་ནི་, ཏེ་ནི་ ཏེ་ ལྕང་མེ་ ཡ་ལག་རྒུན་ལ་ ཏམ་པ་ ནོག་།
17 འིན་ན་ ཏེ་ ཨོ་ལི་ཝེ་ ལྕང་མེ་ ཡ་ལག་ ཁ་ཅིག་ ཅག་ཏེ་, མ་ཏབ་རྦེ་ རྐྱེ་ཀ་ནེ་ ཨོ་ལི་ཝེ་ ལྕང་མེ་ ཚིའི་རྒུན་, ཏེ་ཚབ་ལ་ པེ་རྦེན་ལ་ ཏང་ཅེ་ཀ་ནི་, ཏ་ ཁྱི་ཞ་རྒུ་ནི་ལ་ ཏེ་ ཨོ་ལི་ཝེ་ ལྕང་མེ་ ཤུག་ཤེན་ པ་ཀྲག་རྒེ་ ཁོའེ་འབོ་ རྒོའེ་རྡེ་ ཐུང་ངེ་ནོག་། 18 ཏེ་ ཡ་ལག་ ཅག་ཀན་རྒུ་ནི་ ཚབ་ལ་ ཁྱི་ཞ་ པེ་རྦེན་ལ་ ཏང་ཧན་འབེ་ཀ་ ཕོ་སོ་ མ་ཅོ་ཧེ་། ཁྱི་ཞ་རྒུན་ ཏེ་ ལྕང་མེ་ པ་ཀྲག་པོ་ མ་ནོག་ ཡ་ལག་ཞིག་ ནོག་།
19 ཏེ་ནི་ ཁྱི་ཞི་ ཟེར་སྲིད་རྡེན་, “ང་ པེ་རྦེན་ལ་ ཏང་ཅེ་ཕི་ ཏེ་ ཡ་ལག་རྒུན་ ཅག་རྒེ་ ཛེད་།” 20 ཏོ་ རྡེན་འབའ་ ནོག་, འིན་ན་ མ་ཤི་ཀེ་ན་ ཏེཏ་པ་ མ་ཅོའེ་རྦེ་, ཏེ་ ཡ་ལག་རྒུན་ ཅག་རྒེ་ ཛེད་, ཡང་ ཁྱི་ཞི་ ཏེཏ་པ་ ཅོ་ཅེ་རྦེ་, ཁྱི་ཞ་རྒུན་ ཏེ་ ལྕང་མེ་ ཁག་ཅིག་ ནོག་། ཕོ་སོ་ མ་ཅོའེ་ཧེ་, འིན་ན་ ཅི་ ཆེན་ སམ་འདེ་ འཇིའི་ཧེ་། 21 ཀལ་ཏེ་ ཀོན་འཇོག་རྒེ་ ངོའེ་མེ་ ཡ་ལག་རྒུན་ མ་པུད་རྡེ་ འིན་ནི་, ཁོང་ངེ་ ཁྱི་ཞ་རྒུན་ལ་ པུད་རྡེ་ མི་ཛེད་།
22 ཀོན་འཇོག་ ཀ་ཀྲིན་ཅེན་ འདང་ ཁྲིམ་ཅེད་ སྲན་ཀྲེ་ ཛེད་ཀན་ འིན་ཀན་འབོ་ ཧ་ཀོ་རྒོའེ་། ཁ་ མི་ཉེན་ཀན་རྒུ་ནི་ཕི་ ཁྲིམ་ཅེད་ སྲན་ཀྲེ་, འིན་ན་ ཁྱི་ཞི་ཕི་ ཐུག་ཞེ་ཅེན་། ཀལ་ཏེ་ ཁྱི་ཞི་ ཁོང་ངེ་ ཐུག་ཞེ་ན་ རྡེན་ཆེ་ཤེ་ ཅོའེན་ འདེད་ མ་འདེད་ནི་, ཁྱི་ཞ་རྒུན་ལ་ ཁོང་ངེ་ ཅེད་ཏེ་ ཕང་ངེ་ ཛེ་རྡེན་། 23 ཡང་ ཀལ་ཏེ་ ཨིས་ར་ཡེལ་པ་རྒུ་ནི་ ཏེཏ་པ་ མེད་ཅེའོ་ ཕང་ནི་, ཁོང་རྒུན་ལ་ ཡང་ ཏེ་ ལྕང་མེ་ན་ པེ་རྦེན་ལ་ ཏང་ངེ་ ཛེ་རྡེན་, ཅེ་ཞུ་ནི་ ཀོན་འཇོག་ལ་ ཏུ་ཟུག་ ཛེད་ཅེ་ ཝང་འབོ་ ཡོད་ཏེ་ ནོག་། 24 ཀལ་ཏེ་ ཁྱི་ཞ་, མ་ཏབ་རྦེ་ལ་ རྐྱེ་ཀན་ ཨོ་ལི་ཝེ་ ལྕང་མེ་ ཡ་ལག་ འིན་འདེ་ལ་, ཀོན་འཇོག་རྒེ་ ཁྱི་ཞ་ ཏབ་ཀ་ནེ་ ཨོ་ལི་ཝེ་ ལྕང་མེ་ཀ་ པེ་རྦེན་ལ་ ཏང་ཅེ་ལ་ ཐེད་རྡེ་ ཛེ་རྡེ་ཡོད་ནི་, ཀའོ་ རང་ཞིན་ འིན་ཀ་ནེ་ འགོ་ལོག་པོ་ ནོག་, ཏེ་ནི་ ངོའེ་རྦེ་ ལྕང་མེ་ ཚིའི་རྦོ་ ཏེ་རྒ་ ངོའེ་མ་ ལྕང་མེ་ན་ པེ་རྦེན་ལ་ ཏང་ངེ་ ཛེད་ཅེ་ལ་ ཀོན་འཇོག་ ཙམ་ཤིག་ མང་ངེ་ ཐེད་རྡེ་ མི་ཛེད་།
ཀོན་འཇོག་རྒེ་ ཉིང་ཞེ་ མི་ཚང་མེ་ཕི་།
25 སྤུན་རྒུན་, ཁྱི་ཞ་རྒུན་ ཕོ་སོ་ མི་ཚོར་ཤེ་ཕི་ ངེ་, འི་ ཀྲང་པེ་ སང་སྤེར་རྦོ་ ཁྱི་ཞ་རྒུན་ལ་ ཧ་ཀོ་རྒོའེ་ ས་མེ་རག་། ཨིས་ར་ཡེལ་པ་ མང་པོ་ཞིག་རྒེ་ ཉིང་ ཀྱོང་པོ་ ལུའི་རྡེན་, ནམ་ཚུག་པ་ ཀོན་འཇོག་རྒེ་ འདམ་མེ་ ཛེད་ཀ་ནེ་ ཡ་ཧུ་འདཱ་པ་ མན་ཀན་ ཚང་མེ་, མ་ཤི་ཀེ་ན་ ཏེཏ་པ་ མི་ཅོ་། 26 ཏེ་ནི་ ཨིས་ར་ཡེལ་པ་ ཚང་མ་ རྐྱོབ་རྦེ་ ཛེ་རྡེན་, ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ ནོག་,
“རྐྱོབ་རྦེ་ ཛེད་ཀན་འབོ་ ཡེ་རུ་ཤ་ལེམ་ནི་ འབིང་ངེན་,
ཡང་ ཁོང་ངེ་ ཨིས་ར་ཡེལ་པ་རྒུན་ ངན་པེ་ ལེ་ཧ་རྒུན་ ཅོ་ཅེ་ནི་ འགྱུར་ཤུག་རྒེ་ ཛེ་རྡེན་།
27 ཡང་ ཁོང་རྒུན་ ཉམ་པོ་ ངེ་ ཆེཏ་ཏོན་འབོ་ནི་,
ངེ་ ཁོང་ངེ་ རྡིག་པ་རྒུན་ མེ་ཀན་ ཅོའེན་།”
28 ཨིས་ར་ཡེལ་པ་ མང་པོ་ཞིག་ ཏ་ ནེ་ཚུལ་ ཟང་པེ་ འགྲ་ཝོ་ ནོག་། ཏེ་ན་ ཁོང་རྒུན་ལ་ ཏ་རུང་ང་ ཀོན་འཇོག་རྒེ་ ཤེ་སྤ་ ཛེ་རྡེ་ནོག་, ཅེ་ཟེར་ནི་ ཁོང་ངེ་ ཏོ་རྒུ་ནི་ ཕ་མེ་པོ་ ཨབ་ར་ཧམ་, ཨི་སཱག་ ཏང་, ཡ་ཀུབ་རྒུན་ འདམ་མེ་ ཛེད་། 29 ངེ་ ཏོ་ ཟེ་འིན་ ཅེ་ཟེར་ནི་, ཁོང་ངེ་ སོལ་རེ་ སལ་ལེ་ ཛེད་ཀན་ འདང་ འདམ་མེ་ ཛེད་ཀ་ནེ་ ཐག་ཅེད་པེ་ན་ འགྱུར་ཞ་ མ་ནི་ ཁྱོང་ངེ་ ཛེ་རྡེ་ མག་། 30 ཁྱི་ཞ་ ཡ་ཧུ་འདཱ་པ་ མན་ཀན་རྒུན་ལ་ ཏུའི་ཞིག་ལ་ ཀོན་འཇོག་རྒེ་ ཁ་ མ་ཉེན་ཀན་ འིན་འབེན་, འིན་ན་ ཏ་ ཡ་ཧུ་འདཱ་པ་རྒུ་ནི་ ཁ་ མི་ཉེན་ཅེ་ འབྲེ་རྦུ་ནི་, ཁྱི་ཞ་རྒུན་ལ་ ཁོང་ངེ་ ཉིང་ཞེ་ ཐོབ་ཏེ་ ནོག་། 31 ཏ་ ཁོང་རྒུན་ ཁ་ མི་ཉེན་ཀན་ ནོག་, ཡང་ ཀོན་འཇོག་རྒེ་ ཉིང་ཞེ་ན་ ཁོང་རྒུན་ནང་ འདྲེའེ་ཤེ་ཕི་, ཁྱི་ཞ་རྒུན་ལ་ ཀོན་འཇོག་རྒེ་ ཉིང་ཞེ་ ཐོབ་ཏེ་ ནོག་། 32 ཀོན་འཇོག་རྒེ་ མི་ཚང་མ་ལ་ ཉིང་ཞེ་ ལྟན་ནེ་ ཛེད་ཅེ་ཕི་ ཁོང་ངེ་ མི་ཚང་མ་ ཁ་ མི་ཉེན་ཅེ་ ལག་ལ་ ལྟེད་རྡེ་ ཛེད་།
33 འོ་, ཀོན་འཇོག་རྒེ་ རྒྱུ་ནོར་ རྡང་ ཤེ་རབ་ ཏང་ ཡོན་ཏེན་རྒུན་ ཙམ་ཤིག་རྒེ་ འཇིག་སྤོ་ མག་། ཁོང་ངེ་ ཁྲིམ་ཅེད་ ཏང་ ཆག་ལེ་ ཛེད་ཅེ་ ཚུལ་རྒུན་ ཨ་ཧོ་རྒུན་ལ་ མ་ནི་ ཧ་ཀོ་ཉེན་ཅེ་ མེད་ཏེ་ ནོག་།
34 “སུའི་ ཙོབོ་ ཀོན་འཇོག་རྒེ་ ཐུག་སམ་རྒུན་ ཤེ་རྡེན་?
ཁོང་ལ་ ཁ་རྡ་ ཏང་ཅེ་ ཧ་ཀོ་ སུ་ལ་ ཡོད་?”
35 “སུའི་ ཁོང་ལ་ ཏེ་ཟམ་ མང་པོ་ཞིག་ ཏྃ་རྡེ་ ཡོད་,
ཀའོ་ ཁོང་ལ་ ལོག་ཏེ་ པུལ་རྒོའེ་ རྒོའེ་ཤེ་ རྐྱོད་།”
36 ཁོང་ངེ་ ཆོག་ནི་ ཅི་ཚང་མ་ ཅུང་འདེ་, ཁོང་ངེ་ ཝང་ངེ་ ཅོའེ་རྡེ་, ཏོ་རྒུན་ ལུའི་རྡེ་ནོག་། ཡང་ ཏོ་རྒུན་ ཁོང་ངེ་ སྤལ་ལེ་ཕི་ ནོག་། ཀོན་འཇོག་ལ་ སྤལ་ ཚང་མ་ ཏུའི་རྒྱུན་ ཐོབ་ཤིག་, ཨ་མེན་།