རོམ་པ་ 12

ཀོན་འཇོག་རྒེ་ཕི་ མི་ཙེ་ ཆོད་པ་།

ངེ་ ཤེ་སྤ་ སྤུན་རྒུན་, ཀོན་འཇོག་རྒེ་ ཁྱི་ཞ་རྒུན་ལ་ ཉིང་ཞེ་ ཛེད་ཅེ་རྦེ་, ཁྱི་ཞི་ ཟུྃ་སྤོ་ ཁོང་ལ་ སྲོག་ཆོད་ པུལ་ཅེ་ལ་, ངེ་ འཇུ་འཇུ་ ཞུའིན་ ཞུ་ཝ་ པུ་ལེ་ཡོད་, ཏེ་ ཟུྃ་སྤོ་རྒུན་ སོན་པོ་ རྡང་ ཏམ་པེ་ ཆོད་པ་ ཡོང་རྒོའེ་, ཀ་རྦེ་ ཁོང་ ཐུག་ཐེད་རྡེ་ ཛེད་ཅུག་རྒེན་། ཏེ་རྒ་རྦོ་ རྡེན་འབེ་ ཁོང་ལ་ ཅོལ་ཤེའོ་ ནོག་། 2 འི་ འཇིག་རྟེན་ནེ་ ཤོད་ལམ་ འདང་ ལུག་སྲོལ་རྒུ་ནི་ ལེན་མོ་ མ་ཅོ་ཧེ་། འིན་ན་ ཀོན་འཇོག་ལ་ ཁྱི་ཞ་རང་ངེ་ སམ་ཚུལ་ལེ་ན་ འགྱུར་ཞ་ ཁྱོང་ཅུག་རྒེ་ ཛེད་ཏེ་ ཁྱི་ཞ་རང་རྒུན་ མི་ སོ་མ་ རིག་ལ་ འགྱུར་རེ་ ཛེད་ཅུག་ཧེ་། ཏེ་ནི་ ཁྱི་ཞ་རྒུ་ནི་ཕི་ ཀོན་འཇོག་རྒེ་ ཐུག་འདོད་པོ་ རྒྱུའི་ཆེན་, ཀའོ་ ཟང་པོ་, ཐེད་པོ་ རྡང་ ཛོམ་འབོ་ ནོག་།

3 ང་ སལ་ལེ་ ཛེད་ཀ་ནེ་ ཐུག་ཞེ་ རྒྱུད་ཏེ་, ངེ་ ཁྱི་ཞ་ རེ་རེ་ ཟེ་འིན་, ཁྱི་ཞ་རང་ རྡེན་འབའ་ འིན་ཀན་འབེ་སང་ རྒྱེ་སྤ་ རིག་ འིན་ སམ་ མ་རྒོའེ་། ཁྱི་ཞ་རྒུ་ནི་ ཀོན་འཇོག་རྒེ་ སལ་ཧ་ནེ་ ཏེཏ་པེ་ ཏབ་ཅེ་ ཚེད་པོ་ ཀོལ་རྡེ་, ཁྱི་ཞ་རང་ལ་ ཁྲིམ་ཅེད་རྡེ་ཟ་ནི་, ཀྲང་པོ་ ཟེར་ཧེ་། 4 ཀ་ཟུག་རྒེ་ ཨ་ཧོ་རྒུ་ནི་ ཟུྃ་སྤོ་ལ་ ཡན་ལག་ མང་པོ་ཞིག་ ཡོད་, ཡང་ རེ་རེ་ སོ་སོ་ ལེ་ཧ་ རིག་ ཅོ་ནོག་། 5 ཏེ་རྒ་ ཙོག་སེ་ མ་ཤི་ཀེ་ ཧུ་ཟུག་, ཨ་ཧོའེ་ ཆོའེ་ཚོག་པོ་ ནོག་། ཨ་ཧོ་རྒུན་ ཟུྃ་སྤོ་ ཅིག་རྒེ་ ཡན་ལག་ མང་པོ་ཞིག་ ནོག་, ཡང་ ཨ་ཧོ་ ཚང་མ་ ཅིག་ ཏང་ ཅིག་རྒེ་ ནོག་།

6 ཀོན་འཇོག་རྒེ་ ཁོ་རང་ངེ་ ཐུག་ཞེ་ ནང་ཞིན་ ཨ་ཧོ་རྒུན་ལ་ ཁྱུད་ ན་ཚོག་ རིག་ སལ་ལེ་ ཛེད་ཏེ་ ནོག་། ཀལ་ཏེ་ མི་ཞིག་ལ་ ལུང་རྟན་ ཤེད་ཅེ་ ཁྱུད་ ཡོད་ནི་, ཏོ་ ཁོའོ་, ཁོ་རང་ངེ་ ཏེཏ་པ་ རྡང་ ཐུན་འདེ་ ཀོལ་ཤུག་། 7 ཀལ་ཏེ་ ཏོ་ ཞབ་རྟོག་ ཞུ་ཅེ་ འིན་ནི་, ཁོ་ ཞབ་རྟོག་ ཞུ་ཅུག་། ཀལ་ཏེ་ ཏོ་ ལབ་ཞ་ ཏང་ཅེ་ འིན་ནི་, ཁོ་ ལབ་ཞ་ ཏང་ཅུག་། 8 ཀལ་ཏེ་ ཏོ་ སེམ་རུའི་ ཏང་ཅེ་ འིན་ནི་, ཁོ་ སེམ་རུའི་ ཏང་ཅུག་། ཀལ་ཏེ་ ཏོ་ ཞེན་རྒུན་ལ་ ཡ་ཏོ་ ཏང་ཅེ་ འིན་ནི་, ཁོ་ ཉིང་ པེ་རྡེ་ ཏང་ཅུག་། ཀལ་ཏེ་ ཏོ་ ཆོའེ་ཚོག་ལ་ འགོ་ཁྲིད་ ཅོ་ཅེ་ འིན་ནི་, ཁོ་ ཏེ་ ཁག་པོ་ མ་ ཙོན་འགྲུའི་ ཉམ་པོ་ ཅོ་ཅུག་། ཀལ་ཏེ་ ཏོ་ ཉིང་ཞེ་ ལྟན་ཅེ་ འིན་ནི་, ཁོ་ ཐེད་པོ་ ཉམ་པོ་ ཅོ་ཅུག་།

9 ཞེན་མ་རྒུན་ལ་ ཤེ་སྤ་ ཅོ་ཟུན་ མ་ཏང་ངེ་, རྡེན་འབེ་ ཤེ་སྤ་ ཅོའེ་ཧེ་། ངན་པ་ ཚང་མ་ལ་ སོག་པོ་ ཅོའེ་ཧེ་། ཟང་པོ་ འིན་ཀན་འབོ་ལ་ ཐམ་འདེ་ འདོད་ཧེ་། 10 ཅིག་ ཏང་ ཅིག་ལ་ ངོའེ་མེ་ མི་སྲིང་ ཙོག་སེ་ ཤེ་སྤ་ ཅོའེ་ཧེ་། ཅིག་ ཏང་ ཅིག་ལ་ རང་ངེ་སང་ མང་ངེ་ སི་ཝ་ ཅོའེ་ཧེ་། 11 ལེ་མི་ལམ་ མ་འགྱུར་རེ་, ཙོན་འགྲུའི་ ཧོཔ་ ཅོའེན་, ཙོབོ་ ཀོན་འཇོག་ལ་ ཞབ་རྟོག་, འདོད་པ་ ཆོན་མོ་ ཉམ་པོ་ ཞུ་ཧེ་། 12 རེ་ཝེ་ན་ རྒ་མོ་ ཅོའེ་ཧེ་། ནག་རྒེ་ན་ ཟོད་པ་ ཅོའེ་ཧེ་། མོ་ལམ་ ཞུ་ཅེ་ མ་ནི་ མ་ཕང་ཧེ་། 13 ཀོན་འཇོག་རྒེ་ མི་རྒུན་ རྒོའེ་ཤེ་ན་ ཡོད་ཟ་ནི་, ཁོང་རྒུན་ལ་ ཡ་ཏོ་ ཅོ་ཅེ་ལ་ ཀྲལ་འགྲིག་ འདོད་ཧེ་། རང་ངེ་ ཁང་པ་ ཏུའི་རྒྱུན་ པེ་སྤ་རྒུ་ནི་ཕི་ པེ་རྡེ་ པོར་ཧེ་།

14 ཁྱི་ཞ་ རྡུ་ངལ་ ལྟན་ཀན་རྒུན་ལ་ ཅིན་ལབ་ ཏོང་ཧེ་, ཏོ་རྒུན་ལ་ ངན་ མ་ཏབ་ཧེ་། ཀོན་འཇོག་རྒེ་ ཁོང་རྒུན་ལ་ ཅིན་ལབ་ སལ་ལེ་ ཛེད་ཅེ་ལ་ མོ་ལམ་ ཞུའི་ཧེ་། 15 རྐྱིད་པོ་ ཅོ་ཀན་རྒུན་ ཉམ་པོ་ རྐྱིད་པོ་ ཅོའེ་ཧེ་། རྡུག་པོ་ ཅོ་ཀན་རྒུན་ ཉམ་པོ་ རྡུག་པོ་ ཅོའེ་ཧེ་། 16 ཅིག་ ཏང་ ཅིག་ ཉམ་པོ་ ཐུན་འདེ་ འདོད་ཧེ་། ཕོ་སོ་ མ་ཚོར་རེ་ མི་ ཉམ་ཤུང་རྒུན་ ཉམ་པོ་ འདྲེའེ་ཤེ་ལ་ ཐེད་རྒོའེ་། ཡང་ ཁྱི་ཞ་རྒུན་ལ་ ཅི་ཚང་མ་ ཤེ་རྡེ་ཡོད་ མ་སམ་ཧེ་།

17 ངན་པ་ ཅོ་ཀན་ཞིག་རྒེ་ ལེན་ལ་ ངན་པ་ མ་ཅོ་ཧེ་། ཞེན་མ་ ཚང་མེ་ སི་ཝ་ཅེན་ ཐེ་ཀ་ནེ་ ལེ་ཧ་ རིག་ ཅོའེ་ཧེ་། 18 ཚང་མ་ ཉམ་པོ་ ཞིའི་རྡེ་ན་ འདེད་ཅེ་ལ་ ཁྱི་ཞི་ ཙོན་འགྲུའི་ ཧོཔ་ ཅོའེ་ཧེ་།

19 ཤེ་སྤ་ ཡ་ཏོ་རྒུན་, ངན་པ་ ལེན་ མ་ཏང་ངེ་, ཏོ་ ཀོན་འཇོག་རྒེ་ ཐུག་སྲོའེ་ཕི་ པོར་ཧེ་, ཅེ་ཟེར་ནི་ ཏམ་པེ་ སུང་རབ་རྦེ་ན་ མོལ་རྡེ་ ནོག་,

“ངེ་ ལེན་ཏང་ངེན་།

ངེ་ ཁོང་རྒུན་ལ་ ལོག་ཏེ་ ལེན་ཏང་ངེན་།”

ཙོབོ་རྡེ་ མོལ་།

20 མ་ཚེད་ ལེན་ནེ་ ཚབ་ལ་,

“ཀལ་ཏེ་ ཁྱི་ཞི་ འགྲ་ཝོ་རྒུན་ ལྟོག་རྡེ་ཡོད་ནི་,

ཁོང་རྒུན་ལ་ ཟ་ཅེ་ ཏོང་ཧེ་།

ཀལ་ཏེ་ ཁོང་རྒུན་ ཧོམ་མེ་ ཡོད་ནི་,

ཁོང་རྒུན་ལ་ ཐུང་ཅེ་ལ་ ཆུ་ ཏོང་ཧེ་།

ཏུ་ཟུག་ ཅོ་ཅེ་ནི་, ཁོང་རྒུ་ནི་ ཁྱེ་རང་ལ་ ཅི་ཅོའེ་

ཏེ་རྒ་ཕི་ ཁོ་ ཁྲེལ་རྦ་ ཆེན་།”

21 ཁྱི་ཞི་ཀ་ ངན་པ་ རྒྱལ་ཐོབ་ མ་ཅུག་ཧེ་, འིན་ན་ ལེ་ཧ་ ཟང་པོ་ རྒྱུད་ཏེ་ ཁྱི་ཞི་ ཁྱི་ཞ་རང་ལ་ ངན་པེ་ཀ་ རྒྱལ་ཐོབ་ ཅུག་ཧེ་།