ཝང་སྲུལ་པེ་ ཝང་ངེ་ ཡོག་ལ་ འདོད་ཧེ་།
13
ཁྱི་ཞ་ ཚང་མ་ ཝང་སྲུལ་པ་རྒུ་ནི་ ཝང་ངེ་ ཡོག་ལ་ འདེད་རྒོའེ་། ཀོན་འཇོག་རྒེ་ འདམ་མེ་ ཛེད་ཀན་འབོ་ མན་པ་, ཡང་ ཝང་ཞིག་ མེད་རྡེ་ ནོག་། ཏག་ས་ ཝང་སྲུལ་ལེན་ ཡོ་ཀན་རྒུན་ ཀོན་འཇོག་རྒེ་ འདམ་མེ་ ཛེད་ཏེ་ ནོག་། 2 ཏོ་རྦེ་ཕི་ སུ་ཞིག་རྒེ་ ཝང་སྲུལ་པ་རྒུ་ནི་ རྒྱཔ་འགལ་ ཅོ་ནི་, ཁོང་རྒུ་ནི་ ཀོན་འཇོག་རྒེ་ ཅོའོ་ ཛེད་ཀན་འབེ་ རྒྱཔ་འགལ་ ཅོའེ་རྡེ་ ནོག་, ཡང་ ཏུ་ཟུག་ ཅོ་ཀན་རྒུན་ལ་ ཆེད་པ་ ཕོག་རྒེན་། 3 ཝང་སྲུལ་ཧན་རྒུ་ནི་ ཟང་པོ་ ཅོ་ཀན་རྒུ་ནི་ན་ མ་ནོག་, ངན་པ་ ཅོ་ཀན་རྒུ་ནི་ན་ འཇི་ནང་ ཁྱོང་ངེ་ནོག་། ཁྱི་ཞ་ ཝང་སྲུལ་ཧན་རྒུ་ནི་ཀ་ནི་ འཇི་ནང་ མེད་པ་ འདེད་ཉིན་ རག་རྒེ་? ཟང་པོ་ འིན་ཀན་འབོ་ ཅོའེ་ཧེ་, ཏེ་ནི་ ཁོང་རྒུ་ནི་ ཁྱི་ཞ་རྒུན་ལ་ སི་ཝ་ ཅོའེན་། 4 ཁོང་རྒུན་ ཀོན་འཇོག་རྒེ་ ཞབ་རྟོག་པ་ ཁྱི་ཞ་རྒུན་ལ་ ཕན་ཏོག་ ཅོ་ཅེ་ལ་ ཀ་ལེ་ ཛེད་ཀན་རྒུན་ ནོག་། ཀལ་ཏེ་ ཁྱི་ཞ་རྒུ་ནི་ ངན་པ་ ལེ་ཧ་ ཅོ་ནི་ འཇིའི་རྒོའེ་, ཅེ་ཟེར་ནི་ ཁོང་རྒུན་ལ་ ཆེད་པ་ ཏང་ཅེ་ ཝང་ ཡོད་ཏེ་ ནོག་། ཁོང་རྒུན་ ཀོན་འཇོག་རྒེ་ ཞབ་རྟོག་པ་, ངན་པ་ ཅོ་ཀན་རྒུན་ལ་ ཆེད་པ་ ཏང་ངེ་ལ་ ལམ་ཅུག་ཀན་རྒུན་ ནོག་། 5 ཏོ་རྦེ་ཕི་ ཁྱི་ཞ་རྒུ་ནི་ ཆེད་པ་ནི་ ཐར་ཤེ་ ཅིག་པོ་ མན་ནེ་, རང་ངེ་ སེམ་མེ་ན་ རྐྱོན་ མེད་ཅེ་ཕི་ ཁོང་རྒུ་ནི་ ཝང་ངེ་ ཡོག་ལ་ འདེད་རྒོའེ་།6 ཏེ་རྒ་ རྒྱུ་ཚན་འབེ་ཕི་ ཁྱི་ཞ་རྒུ་ནི་ ཁྲལ་རྒུན་ ཤལ་ལེ་ནོག་, ཅེ་ཟེར་ནི་ ཝང་སྲུལ་ཧན་རྒུན་ ཀོན་འཇོག་རྒེ་ ཞབ་རྟོག་པ་ ནོག་, ཡང་ ཏོ་རྒུ་ནི་ ཏུའི་ སོན་ཏེ་ མི་རྒུ་ནི་ ཞབ་རྟོག་རྒེ་ཕི་ ཏང་ངེ་ནོག་། 7 ཝང་སྲུལ་ཧན་ ཚང་མ་ ཏང་རྒོ་ཤེ་ འོའེ་སྤ་ འིན་ཀན་འབོ་ ཏོང་ཧེ་, སྤེར་ན་ ཁྲལ་ ཤལ་རྒོའེ་ ཡོད་ནི་ ཤོལ་ཧེ་, ཞེན་ཡང་ མུལ་ ཤལ་རྒོ་ཤེ་རྒུན་ ཡོད་ནི་ ཤོལ་ཧེ་, སི་ཝ་ རྡང་ ཏེཏ་ཀུའི་པ་ ཏང་རྒོ་ཤེ་ཅེན་རྒུན་ལ་ སི་ཝ་ རྡང་ ཏེཏ་ཀུའི་ ཏོང་ཧེ་།
ཀོན་འཇོག་རྒེ་ རྒོའེ་ཤེ་ ཚང་མ་ ཤེ་སྤེ་ ཀྲུཔ་ཅུག་རྒེ་ནོག་།
8 ཅིག་ ཏང་ ཅིག་རྒེ་ པར་ལ་ ཤེ་སྤ་ ཅོ་ཅེའོ་ མ་ནོག་, ཞེན་ཡང་ པུ་ལོན་ཞིག་ ལུའི་ མ་རྒོའེ་, ཅེ་ཟེར་ནི་ ཞེན་མ་རྒུན་ལ་ ཤེ་སྤ་ ཅོ་ཀ་ནེ་ མི་རྦེ་ ཁྲིམ་རྒུན་ འདྲན་འདྲ་ ཀྲུབ་ཅུག་ཏེ་ ནོག་། 9 ཀཱ་རྒྱ་རྒུ་ནི་: “རང་ངེ་ ཞི་མེད་ མན་བ་ ཞེན་མ་ ཉམ་པོ་ ལུའི་འབྲེལ་ མ་ཅོ་”, “མི་སེད་ མོ་རྒོའེ་”, “ཧུ་ མི་རྒོའེ་”, “ཞེན་མ་ ཡོ་ཀན་འབེ་ འདོད་པ་ ཅོ་ མི་རྒོའེ་”, ཏོ་རྒུན་ འདང་ ཞེན་ཡང་ ཀཱ་རྒྱ་ ཚང་མ་ འི་ ཀཱ་རྒྱ་ ཅིག་པེ་ན་ འདོར་རྡུའི་རྡེ་ ནོག་, “རང་ལ་ ཤེ་སྤ་ ཅོ་ཀན་ ཙོག་སེ་ ཁྱེ་རང་ངེ་ ཁྱིམ་ཙེ་པ་ལ་ ཤེ་སྤ་ ཅོའེ་།” 10 ཤེ་སྤེ་, ཞེན་མ་ ནོད་པ་ རྐྱལ་ལེ་ མག་ སོང་པེ་སང་, ཤེ་སྤ་ ཀོན་འཇོག་རྒེ་ ཁྲིམ་མེ་ རྒོའེ་ཤེ་ཅན་རྒུན་ འདྲན་འདྲ་ ཀྲུབ་ཅུག་རྒེ་ནོག་།
11 ཏུ་ཟུག་ ཅོ་ཅེའོ་ མང་ངེ་ ཁག་ཅེན་ ནོག་། ཏུའི་རྦོ་ པུད་རྡེན་ ཆ་ཀན་ ཡང་ ཁྱི་ཞ་ འགོར་རྡེ་ འིན་ཀན་འབོ་ ཁྱི་ཞ་རྒུན་ལ་ རྒྱུའི་ནོག་། ཉིད་ནི་ ལོྃ་ཧེ་, ཅེ་ཟེར་ནི་ འགོ་མ་ ཨ་ཧོའེ་ ཏེཏ་པ་ ཅོ་ཀ་ནེ་ ཏུའི་རྦེ་སང་, ཏག་ས་ ཨ་ཧོ་རྒུན་ ཐར་པ་རྦེ་ མང་ངེ་ ཉེ་མོ་ལ་ ལེབ་ཏེ་ ནོག་། 12 ཚེན་འབོ་ པུད་ ཚར་ཀྱི་ སོང་འདེ་ ཐར་པེ་ ཞག་པོ་ འགྱོ་སྤ་ ལེབ་ཅེ་ ཡོད་ཅེ་ཀ་ནི་, ཁྱི་ཞ་རྒུ་ནི་ མུན་ཀྲག་རྒེ་ ལེ་ཧ་རྒུན་ ཕྃ་ཏེ་ འོད་རྡེ་ འདང་ཤེན་ནེ་ མག་ཆ་རྒུན་ ཀོན་ཧེ་། 13 ཨ་ཧོ་རྒུན་ ཉི་མ་ འདང་ཤེན་ནེ་ འིན་ཅེ་རྦེ་, ཨ་ཧོ་རྒུ་ནི་ མི་ཙེ་ ལག་མོ་ཞིག་ པུད་ཧེ་། སྤེར་ན་ འགྲོན་ཏང་ངེན་ ར་རོའེ་ཤེ་ ཟེའེ་རྒུན་ ནེན་འདེ་ ཀྲེན་བ་ རྐྱེལ་ མི་ཅུག་ཅེ་ རྡང་ ཆང་ ཐུང་རྡེ་ ར་ མི་རོའེ་ཤེ་, ལུའི་འབྲེལ་ ངན་པ་ རྡང་ འོའེ་སྤེ་ ལུའི་འབྲེལ་ལེ་ ཚེད་ནི་ ཐལ་རྡེ་ མི་ཅོ་ཅེ་, ཁྲུག་པ་ མི་ཏང་ཅེ་ རྡང་ ཕྲ་རྡོག་ མི་ཅོ་ཅེ་། 14 ཏོ་རྦེ་ ཚབ་ལ་, ཁྱི་ཞ་ རང་འདང་རང་ལ་ ཙོབོ་ ཡི་ཤུ་ མ་ཤི་ཀེ་ ཤོད་པ་རྒུན་ ཀོའེ་ལག་ ཙོག་སེ་ ཧོན་ཧེ་, ཡང་ རྡིག་པེ་ འདོད་པ་རྒུན་ ཀ་ཟུག་རྒེ་ འདྲན་འདྲ་ ཀྲུབ་ཅུག་ཅེ་ སམ་བ་ ཁྱི་ཞི་ན་ ཡོང་ མ་ཅུག་ཧེ་།